໒. ຫຕ຺ຖາຈຣິຍປຸພ຺ພກຠິກ຺ຂຸວຕ຺ຖຸ

ນ ຫິ ເອເຕຫີຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ເອກໍ ຫຕ຺ຖາຈຣິຍປຸພ຺ພກໍ ຠິກ຺ຂຸໍ ອາຣພ຺ຠ ກເຖສິ.

ໂສ ກິຣ ເອກທິວສໍ ອຈິຣວຕີນທີຕີເຣ ຫຕ຺ຖິທມກໍ ‘‘ເອກໍ ຫຕ຺ຖິໍ ທເມສ຺ສາມີ’’ຕິ ອຕ຺ຕນາ ອິຈ຺ຉິຕໍ ກາຣຓໍ ສິກ຺ຂາເປຕຸໍ ອສກ຺ໂກນ຺ຕໍ ທິສ຺ວາ ສມີເປ ຐິເຕ ຠິກ຺ຂູ ອາມນ຺ເຕຕ຺ວາ ອາຫ – ‘‘ອາວຸໂສ, ສເຈ ອຍໍ ຫຕ຺ຖາຈຣິໂຍ ອິມໍ ຫຕ຺ຖິໍ ອສຸກຏ຺ຐາເນ ນາມ ວິຊ຺ເຌຍ຺ຍ, ຂິປ຺ປເມວ ອິມໍ ກາຣຓໍ ສິກ຺ຂາເປຍ຺ຍາ’’ຕິ. ໂສ ຕສ຺ສ ກຖໍ ສຸຕ຺ວາ ຕຖາ ກຕ຺ວາ ຕໍ ຫຕ຺ຖິໍ ສຸທນ຺ຕໍ ທເມສິ. ເຕ ຠິກ຺ຂູ ຕໍ ປວຕ຺ຕິໍ ສຕ຺ຖຸ ອາໂຣເຈສຸໍ. ສຕ຺ຖາ ຕໍ ຠິກ຺ຂຸໍ ປກ຺ໂກສາເປຕ຺ວາ ‘‘ສຈ຺ຈໍ ກິຣ ຕຍາ ເອວໍ ວຸຕ຺ຕ’’ນ຺ຕິ ປຸຈ຺ຉິຕ຺ວາ ‘‘ສຈ຺ຈໍ, ຠນ຺ເຕ’’ຕິ ວຸຕ຺ເຕ ວິຄຣຫິຕ຺ວາ ‘‘ກິໍ ເຕ, ໂມຆປຸຣິສ, ຫຕ຺ຖິຍາເນນ ວາ ອຎ຺ເຎນ ວາ ທນ຺ເຕນ. ນ ຫິ ເອເຕຫິ ຍາເນຫິ ອຄຕປຸພ຺ພໍ ຐານໍ ຄນ຺ຕຸໍ ສມຕ຺ຖາ ນາມ ອຕ຺ຖິ, ອຕ຺ຕນາ ປນ ສຸທນ຺ເຕນ ສກ຺ກາ ອຄຕປຸພ຺ພໍ ຐານໍ ຄນ຺ຕຸໍ, ຕສ຺ມາ ອຕ຺ຕານເມວ ທເມຫິ, ກິໍ ເຕ ເອເຕສໍ ທມເນນາ’’ຕິ ວຕ຺ວາ ອິມໍ ຄາຖມາຫ –

໓໒໓. ‘‘ນ ຫິ ເອເຕຫິ ຍາເນຫິ, ຄຈ຺ເຉຍ຺ຍ ອຄຕໍ ທິສໍ;

ຍຖາຕ຺ຕນາ ສຸທນ຺ເຕນ, ທນ຺ໂຕ ທນ຺ເຕນ ຄຈ຺ຉຕີ’’ຕິ.

ຕສ຺ສຕ຺ໂຖ – ຍານິ ຕານິ ຫຕ຺ຖິຍານາທີນິ ຍານານິ, ນ ຫິ ເອເຕຫິ ຍາເນຫິ ໂກຈິ ປຸຄ຺ຄໂລ ສຸປິນນ຺ເຕນປິ ອຄຕປຸພ຺ພຕ຺ຕາ ‘‘ອຄຕ’’ນ຺ຕິ ສງ຺ຂາຕໍ ນິພ຺ພານທິສໍ ຕຖາ ຄຈ຺ເຉຍ຺ຍ, ຍຖາ ປຸພ຺ພຠາເຄ ອິນ຺ທ຺ຣິຍທເມນ ອປຣຠາເຄ ອຣິຍມຄ຺ຄຠາວນາຍ ສຸທນ຺ເຕນ ທນ຺ໂຕ ນິພ຺ພິເສວໂນ ສປ຺ປຎ຺ໂຎ ປຸຄ຺ຄໂລ ຕໍ ອຄຕປຸພ຺ພໍ ທິສໍ ຄຈ຺ຉຕິ, ທນ຺ຕຠູມິໍ ປາປຸຓາຕິ. ຕສ຺ມາ ອຕ຺ຕທມນເມວ ຕໂຕ ວຣນ຺ຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ຫຕ຺ຖາຈຣິຍປຸພ຺ພກຠິກ຺ຂຸວຕ຺ຖຸ ທຸຕິຍໍ.