໑. ອຕ຺ຕທນ຺ຕວຕ຺ຖຸ

ອຫໍ ນາໂຄ ວາຕິ ອິມໍ ຘມ຺ມເທສນໍ ສຕ຺ຖາ ໂກສມ຺ພິຍໍ ວິຫຣນ຺ໂຕ ອຕ຺ຕານໍ ອາຣພ຺ຠ ກເຖສິ. ວຕ຺ຖຸ ອປ຺ປມາທວຄ຺ຄສ຺ສ ອາທິຄາຖາວຓ຺ຓນາຍ ວິຕ຺ຖາຣິຕເມວ. ວຸຕ຺ຕຎ຺ເຫຕໍ ຕຕ຺ຖ (ຘ. ປ. ອຏ຺ຐ. ໑.ສາມາວຕິວຕ຺ຖຸ) –

ມາຄຓ຺ຑິຍາ ຕາສໍ ກິຎ຺ຈິ ກາຕຸໍ ອສກ຺ກຸຓິຕ຺ວາ ‘‘ສມຓສ຺ສ ໂຄຕມສ຺ເສວ ກຕ຺ຕພ຺ພໍ ກຣິສ຺ສາມີ’’ຕິ ນາຄຣານໍ ລຎ຺ຊໍ ທຕ຺ວາ ‘‘ສມຓໍ ໂຄຕມໍ ອນ຺ໂຕນຄຣໍ ປວິສິຕ຺ວາ ຈຣນ຺ຕໍ ທາສກມ຺ມກຣໂປຣິເສຫິ ສທ຺ຘິໍ ອກ຺ໂກເສຕ຺ວາ ປຣິຠາເສຕ຺ວາ ປລາເປຖາ’’ຕິ ອາຓາເປສິ. ມິຈ຺ຉາທິຏ຺ຐິກາ ຕີສຸ ຣຕເນສຸ ອປ຺ປສນ຺ນາ ອນ຺ໂຕນຄຣໍ ປວິຏ຺ຐໍ ສຕ຺ຖາຣໍ ອນຸພນ຺ຘິຕ຺ວາ ‘‘ໂຈໂຣສິ ພາໂລສິ ມູຬ຺ໂຫສິ ເຖໂນສິ ໂອຏ຺ໂຐສິ ໂຄໂຓສິ ຄທ຺ຣໂຠສິ ເນຣຍິໂກສິ ຕິຣຈ຺ຉານຄໂຕສິ, ນຕ຺ຖິ ຕຸຍ຺ຫໍ ສຸຄຕິ, ທຸຄ຺ຄຕິເຍວ ຕຸຍ຺ຫໍ ປາຏິກງ຺ຂາ’’ຕິ ທສຫິ ອກ຺ໂກສວຕ຺ຖູຫິ ອກ຺ໂກສນ຺ຕິ ປຣິຠາສນ຺ຕິ. ຕໍ ສຸຕ຺ວາ ອາຍສ຺ມາ ອານນ຺ໂທ ສຕ຺ຖາຣໍ ເອຕທໂວຈ – ‘‘ຠນ຺ເຕ, ອິເມ ນາຄຣາ ອມ຺ເຫ ອກ຺ໂກສນ຺ຕິ ປຣິຠາສນ຺ຕິ, ອິໂຕ ອຎ຺ຎຕ຺ຖ ຄຈ຺ຉາມາ’’ຕິ. ‘‘ກຸຫິໍ, ອານນ຺ທາ’’ຕິ? ‘‘ອຎ຺ຎໍ ນຄຣໍ, ຠນ຺ເຕ’’ຕິ. ‘‘ຕຕ຺ຖ ມນຸສ຺ເສສຸ ອກ຺ໂກສນ຺ເຕສຸ ປຣິຠາສນ຺ເຕສຸ ປຸນ ກຕ຺ຖ ຄມິສ຺ສາມານນ຺ທາ’’ຕິ. ‘‘ຕໂຕປິ ອຎ຺ຎໍ ນຄຣໍ, ຠນ຺ເຕ’’ຕິ. ‘‘ຕຕ຺ຖ ມນຸສ຺ເສສຸ ອກ຺ໂກສນ຺ເຕສຸ ປຣິຠາສນ຺ເຕສຸ ກຸຫິໍ ຄມິສ຺ສາມານນ຺ທາ’’ຕິ. ‘‘ຕໂຕປິ ອຎ຺ຎໍ ນຄຣໍ, ຠນ຺ເຕ’’ຕິ. ‘‘ອານນ຺ທ, ນ ເອວໍ ກາຕຸໍ ວຏ຺ຏຕິ, ຍຕ຺ຖ ອຘິກຣຓໍ ອຸປ຺ປນ຺ນໍ, ຕຕ຺ເຖວ ຕສ຺ມິໍ ວູປສນ຺ເຕ ອຎ຺ຎຕ຺ຖ ຄນ຺ຕຸໍ ວຏ຺ຏຕິ, ເກ ປນ ເຕ, ອານນ຺ທ, ອກ຺ໂກສນ຺ຕີ’’ຕິ. ‘‘ຠນ຺ເຕ, ທາສກມ຺ມກເຣ ອຸປາທາຍ ສພ຺ເພ ອກ຺ໂກສນ຺ຕີ’’ຕິ. ‘‘ອຫໍ, ອານນ຺ທ, ສງ຺ຄາມໍ ໂອຕິຓ຺ຓຫຕ຺ຖິສທິໂສ. ສງ຺ຄາມໍ ໂອຕິຓ຺ຓຫຕ຺ຖິໂນ ຫິ ຈຕູຫິ ທິສາຫິ ອາຄເຕ ສເຣ ສຫິຕຸໍ ຠາໂຣ, ຕເຖວ ພຫູຫິ ທຸສ຺ສີເລຫິ ກຖິຕກຖານໍ ສຫນໍ ນາມ ມຍ຺ຫໍ ຠາໂຣ’’ຕິ ວຕ຺ວາ ອຕ຺ຕານໍ ອາຣພ຺ຠ ຘມ຺ມໍ ເທເສນ຺ໂຕ ອິມາ ຄາຖາ ອຠາສິ –

໓໒໐. ‘‘ອຫໍ ນາໂຄວ ສງ຺ຄາເມ, ຈາປໂຕ ປຕິຕໍ ສຣໍ;

ອຕິວາກ຺ຍໍ ຕິຕິກ຺ຂິສ຺ສໍ, ທຸສ຺ສີໂລ ຫິ ພຫຸຊ຺ຊໂນ.

໓໒໑. ‘‘ທນ຺ຕໍ ນຍນ຺ຕິ ສມິຕິໍ, ທນ຺ຕໍ ຣາຊາຠິຣູຫຕິ;

ທນ຺ໂຕ ເສຏ຺ໂຐ ມນຸສ຺ເສສຸ, ໂຍຕິວາກ຺ຍໍ ຕິຕິກ຺ຂຕິ.

໓໒໒. ‘‘ວຣມສ຺ສຕຣາ ທນ຺ຕາ, ອາຊານີຍາ ຈ ສິນ຺ຘວາ;

ກຸຎ຺ຊຣາ ຈ ມຫານາຄາ, ອຕ຺ຕທນ຺ໂຕ ຕໂຕ ວຣ’’ນ຺ຕິ.

ຕຕ຺ຖ ນາໂຄວາຕິ ຫຕ຺ຖີ ວິຍ. ຈາປໂຕ ປຕິຕນ຺ຕິ ຘນຸໂຕ ມຸຕ຺ຕໍ. ອຕິວາກ຺ຍນ຺ຕິ ອຏ຺ຐອນຣິຍໂວຫາຣວເສນ ປວຕ຺ຕໍ ວີຕິກ຺ກມວຈນໍ. ຕິຕິກ຺ຂິສ຺ສນ຺ຕິ ຍຖາ ສງ຺ຄາມາວຈໂຣ ສຸທນ຺ໂຕ ມຫານາໂຄ ຂໂມ ສຕ຺ຕິປຫາຣາທີນິ ຈາປໂຕ ມຸຈ຺ຈິຕ຺ວາ ອຕ຺ຕນິ ປຕິເຕ ສເຣ ອວິຫຎ຺ຎມາໂນ ຕິຕິກ຺ຂຕິ, ເອວເມວ ເອວຣູປໍ ອຕິວາກ຺ຍໍ ຕິຕິກ຺ຂິສ຺ສໍ, ສຫິສ຺ສາມີຕິ ອຕ຺ໂຖ. ທຸສ຺ສີໂລ ຫີຕິ ອຍຎ຺ຫິ ໂລກິຍມຫາຊໂນ ພຫຸທຸສ຺ສີໂລ ອຕ຺ຕໂນ ອຕ຺ຕໂນ ຣຸຈິວເສນ ວາຈໍ ນິຈ຺ຉາເຣຕ຺ວາ ຆຏ຺ເຏນ຺ໂຕ ຈຣຕິ, ຕຕ຺ຖ ອຘິວາສນໍ ອຊ຺ຌຸເປກ຺ຂນເມວ ມມ ຠາໂຣ. ສມິຕິນ຺ຕິ ອຸຍ຺ຍານກີຬມຓ຺ຑລາທີສຸ ມຫາຊນມຊ຺ຌໍ ຄຈ຺ຉນ຺ຕາ ທນ຺ຕເມວ ໂຄຓຊາຕິໍ ວາ ອສ຺ສຊາຕິໍ ວາ ຍາເນ ໂຍເຊຕ຺ວາ ນຍນ຺ຕິ. ຣາຊາຕິ ຕຖາຣູເປເຫວ ວາຫເນຫິ ຄຈ຺ຉນ຺ໂຕ ຣາຊາປິ ທນ຺ຕເມວ ອຠິຣູຫຕິ. ມນຸສ຺ເສສູຕິ ມນຸສ຺ເສສຸປິ ຈຕູຫິ ອຣິຍມຄ຺ເຄຫິ ທນ຺ໂຕ ນິພ຺ພິເສວໂນວ ເສຏ຺ໂຐ. ໂຍຕິວາກ຺ຍນ຺ຕິ ໂຍ ເອວຣູປໍ ອຕິກ຺ກມວຈນໍ ປຸນປ຺ປຸນໍ ວຸຈ຺ຈມານມ຺ປິ ຕິຕິກ຺ຂຕິ ນ ປຏິປ຺ຜຣຕິ ນ ວິຫຎ຺ຎຕິ, ເອວຣູໂປ ທນ຺ໂຕ ເສຏ຺ໂຐຕິ ອຕ຺ໂຖ.

ອສ຺ສຕຣາຕິ ວຬວາຍ ຄທ຺ຣເຠນ ຊາຕາ. ອາຊານີຍາຕິ ຍໍ ອສ຺ສທມສາຣຖິ ກາຣຓໍ ກາເຣຕິ, ຕສ຺ສ ຂິປ຺ປໍ ຊານນສມຕ຺ຖາ. ສິນ຺ຘວາຕິ ສິນ຺ຘວຣຏ຺ເຐ ຊາຕາ ອສ຺ສາ. ມຫານາຄາຕິ ກຸຎ຺ຊຣສງ຺ຂາຕາ ມຫາຫຕ຺ຖິໂນ. ອຕ຺ຕທນ຺ໂຕຕິ ເອເຕ ອສ຺ສຕຣາ ຈ ສິນ຺ຘວາ ຈ ກຸຎ຺ຊຣາ ຈ ທນ຺ຕາວ ວຣໍ, ນ ອທນ຺ຕາ. ໂຍ ປນ ຈຕູຫິ ອຣິຍມຄ຺ເຄຫິ ອຕ຺ຕໂນ ທນ຺ຕຕາຍ ອຕ຺ຕທນ຺ໂຕ ນິພ຺ພິເສວໂນ, ອຍໍ ຕໂຕປິ ວຣໍ, ສພ຺ເພຫິປິ ເອເຕຫິ ອຸຕ຺ຕຣິຕໂຣຕິ ອຕ຺ໂຖ.

ເທສນາວສາເນ ລຎ຺ຊໍ ຄເຫຕ຺ວາ ວີຖິສິງ຺ຆາຏກາທີສຸ ຐຕ຺ວາ ອກ຺ໂກສນ຺ໂຕ ປຣິຠາສນ຺ໂຕ ສພ຺ໂພປິ ໂສ ມຫາຊໂນ ໂສຕາປຕ຺ຕິຜລາທີນິ ປາປຸຓີຕິ.

ອຕ຺ຕທນ຺ຕວຕ຺ຖຸ ປຐມໍ.