໖. ຫຕ຺ຖກວຕ຺ຖຸ

ນ ມຸຓ຺ຑເກນ ສມໂຓຕິ ອິມໍ ຘມ຺ມເທສນໍ ສຕ຺ຖາ ສາວຕ຺ຖິຍໍ ວິຫຣນ຺ໂຕ ຫຕ຺ຖກໍ ອາຣພ຺ຠ ກເຖສິ.

ໂສ ກິຣ ວາທກ຺ຂິຕ຺ໂຕ ‘‘ຕຸມ຺ເຫ ອສຸກເວລາຍ ອສຸກຏ຺ຐານໍ ນາມ ອາຄຈ຺ເຉຍ຺ຍາຖ, ວາທໍ ກຣິສ຺ສາມາ’’ຕິ ວຕ຺ວາ ປຸເຣຕຣເມວ ຕຕ຺ຖ ຄນ຺ຕ຺ວາ ‘‘ປສ຺ສຖ, ຕິຕ຺ຖິຍາ ມມ ຠເຍນ ນາຄຕາ, ເອໂສວ ປນ ເນສໍ ປຣາຊໂຍ’’ຕິອາທີນິ ວຕ຺ວາ ວາທກ຺ຂິຕ຺ໂຕ ອຎ຺ເຎນຎ຺ຎໍ ປຏິຈຣນ຺ໂຕ ວິຈຣຕິ. ສຕ຺ຖາ ‘‘ຫຕ຺ຖໂກ ກິຣ ເອວໍ ກໂຣຕີ’’ຕິ ສຸຕ຺ວາ ຕໍ ປກ຺ໂກສາເປຕ຺ວາ ‘‘ສຈ຺ຈໍ ກິຣ ຕ຺ວໍ, ຫຕ຺ຖກ, ເອວໍ ກໂຣສີ’’ຕິ ປຸຈ຺ຉິຕ຺ວາ ‘‘ສຈ຺ຈ’’ນ຺ຕິ ວຸຕ຺ເຕ, ‘‘ກສ຺ມາ ເອວໍ ກໂຣສິ? ເອວຣູປຎ຺ຫິ ມຸສາວາທໍ ກໂຣນ຺ໂຕ ສີສມຸຓ຺ຑນາທິມຕ຺ເຕເນວ ສມໂຓ ນາມ ນ ໂຫຕິ. ໂຍ ປນ ອຓູນິ ວາ ຖູລານິ ວາ ປາປານິ ສເມຕ຺ວາ ຐິໂຕ, ອຍເມວ ສມໂຓ’’ຕິ ວຕ຺ວາ ອິມາ ຄາຖາ ອຠາສິ –

໒໖໔. ‘‘ນ ມຸຓ຺ຑເກນ ສມໂຓ, ອພ຺ພໂຕ ອລິກໍ ຠຓໍ;

ອິຈ຺ຉາໂລຠສມາປນ຺ໂນ, ສມໂຓ ກິໍ ຠວິສ຺ສຕິ.

໒໖໕. ‘‘ໂຍ ຈ ສເມຕິ ປາປານິ, ອຓຸໍ ຖູລານິ ສພ຺ພໂສ;

ສມິຕຕ຺ຕາ ຫິ ປາປານໍ, ສມໂຓຕິ ປວຸຈ຺ຈຕີ’’ຕິ.

ຕຕ຺ຖ ມຸຓ຺ຑເກນາຕິ ສີສມຸຓ຺ຑນມຕ຺ເຕນ. ອພ຺ພໂຕຕິ ສີລວເຕນ ຈ ຘຸຕງ຺ຄວເຕນ ຈ ວິຣຫິໂຕ. ອລິກໍ ຠຓນ຺ຕິ ມຸສາວາທໍ ຠຓນ຺ໂຕ ອສມ຺ປຕ຺ເຕສຸ ອາຣມ຺ມເຓສຸ ອິຈ຺ຉາຍ ປຕ຺ເຕສຸ ຈ ໂລເຠນ ສມນ຺ນາຄໂຕ ສມໂຓ ນາມ ກິໍ ຠວິສ຺ສຕິ? ສເມຕີຕິ ໂຍ ຈ ປຣິຕ຺ຕານິ ວາ ມຫນ຺ຕານິ ວາ ປາປານິ ວູປສເມຕິ, ໂສ ເຕສໍ ສມິຕຕ຺ຕາ ສມໂຓຕິ ປວຸຈ຺ຈຕີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ຫຕ຺ຖກວຕ຺ຖຸ ຉຏ຺ຐໍ.