໗. ອຎ຺ຎຕຣພ຺ຣາຫ຺ມຓວຕ຺ຖຸ

ນ ເຕນ ຠິກ຺ຂຸ ໂສ ໂຫຕີຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ອຎ຺ຎຕຣໍ ພ຺ຣາຫ຺ມຓໍ ອາຣພ຺ຠ ກເຖສິ.

ໂສ ກິຣ ພາຫິຣສມເຍ ປພ຺ພຊິຕ຺ວາ ຠິກ຺ຂໍ ຈຣນ຺ໂຕ ຈິນ຺ເຕສິ – ‘‘ສມໂຓ ໂຄຕໂມ ອຕ຺ຕໂນ ສາວເກ ຠິກ຺ຂາຍ ຈຣເຓນ ‘ຠິກ຺ຂູ’ຕິ ວທຕິ, ມມ຺ປິ ‘ຠິກ຺ຂູ’ຕິ ວຕ຺ຕຸໍ ວຏ຺ຏຕີ’’ຕິ. ໂສ ສຕ຺ຖາຣໍ ອຸປສງ຺ກມິຕ຺ວາ, ‘‘ໂຠ ໂຄຕມ, ອຫມ຺ປິ ຠິກ຺ຂໍ ຈຣິຕ຺ວາ ຊີວາມິ, ມມ຺ປິ ‘ຠິກ຺ຂູ’ຕິ ວເທຫີ’’ຕິ ອາຫ. ອຖ ນໍ ສຕ຺ຖາ ‘‘ນາຫໍ, ພ຺ຣາຫ຺ມຓ, ຠິກ຺ຂນມຕ຺ເຕນ ຠິກ຺ຂູຕິ ວທາມິ. ນ ຫິ ວິສ຺ສໍ ຘມ຺ມໍ ສມາທາຍ ວຕ຺ຕນ຺ໂຕ ຠິກ຺ຂຸ ນາມ ໂຫຕິ. ໂຍ ປນ ສພ຺ພສງ຺ຂາເຣສຸ ສງ຺ຂາຍ ຈຣຕິ, ໂສ ຠິກ຺ຂຸ ນາມາ’’ຕິ ວຕ຺ວາ ອິມາ ຄາຖາ ອຠາສິ –

໒໖໖. ‘‘ນ ເຕນ ຠິກ຺ຂຸ ໂສ ໂຫຕິ, ຍາວຕາ ຠິກ຺ຂເຕ ປເຣ;

ວິສ຺ສໍ ຘມ຺ມໍ ສມາທາຍ, ຠິກ຺ຂຸ ໂຫຕິ ນ ຕາວຕາ.

໒໖໗. ‘‘ໂຍຘ ປຸຎ຺ຎຎ຺ຈ ປາປຎ຺ຈ, ພາເຫຕ຺ວາ ພ຺ຣຫ຺ມຈຣິຍວາ;

ສງ຺ຂາຍ ໂລເກ ຈຣຕິ, ສ ເວ ຠິກ຺ຂູຕິ ວຸຈ຺ຈຕີ’’ຕິ.

ຕຕ຺ຖ ຍາວຕາຕິ ຍຕ຺ຕເກນ ປເຣ ຠິກ຺ຂເຕ, ເຕນ ຠິກ຺ຂນມຕ຺ເຕນ ຠິກ຺ຂຸ ນາມ ນ ໂຫຕິ. ວິສ຺ສນ຺ຕິ ວິສມໍ ຘມ຺ມໍ, ວິສ຺ສຄນ຺ຘໍ ວາ ກາຍກມ຺ມາທິກໍ ຘມ຺ມໍ ສມາທາຍ ຈຣນ຺ໂຕ ຠິກ຺ຂຸ ນາມ ນ ໂຫຕິ. ໂຍຘາຕິ ໂຍ ອິຘ ສາສເນ ອຸຠຍມ຺ເປຕໍ ປຸຎ຺ຎຎ຺ຈ ປາປຎ຺ຈ ມຄ຺ຄພ຺ຣຫ຺ມຈຣິເຍນ ພາເຫຕ຺ວາ ປນຸທິຕ຺ວາ ພ຺ຣຫ຺ມຈຣິຍວາ ໂຫຕິ. ສງ຺ຂາຍາຕິ ຎາເຓນ. ໂລເກຕິ ຂນ຺ຘາທິໂລເກ ‘‘ອິເມ ອຊ຺ຌຕ຺ຕິກາ ຂນ຺ຘາ, ອິເມ ພາຫິຣາ’’ຕິ ເອວໍ ສພ຺ເພປິ ຘມ຺ເມ ຊານິຕ຺ວາ ຈຣຕິ, ໂສ ເຕນ ຎາເຓນ ກິເລສານໍ ຠິນ຺ນຕ຺ຕາ ‘‘ຠິກ຺ຂູ’’ຕິ ວຸຈ຺ຈຕີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ອຎ຺ຎຕຣພ຺ຣາຫ຺ມຓວຕ຺ຖຸ ສຕ຺ຕມໍ.