໕. ສມ຺ພຫຸລຠິກ຺ຂຸວຕ຺ຖຸ

ນ ວາກ຺ກຣຓມຕ຺ເຕນາຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ສມ຺ພຫຸເລ ຠິກ຺ຂູ ອາຣພ຺ຠ ກເຖສິ.

ເອກສ຺ມິຎ຺ຫິ ສມເຍ ທຫເຣ ເຈວ ສາມເຓເຣ ຈ ອຕ຺ຕໂນ ຘມ຺ມາຈຣິຍານເມວ ຈີວຣຣຊນາທີນິ ເວຍ຺ຍາວຈ຺ຈານິ ກໂຣນ຺ເຕ ທິສ຺ວາ ເອກຈ຺ເຈ ເຖຣາ ຈິນ຺ຕຍິໍສຸ – ‘‘ມຍມ຺ປິ ພ຺ຍຎ຺ຊນສມເຍ ກຸສລາ, ອມ຺ຫາກເມວ ກິຎ຺ຈິ ນຕ຺ຖິ. ຍໍນູນ ມຍໍ ສຕ຺ຖາຣໍ ອຸປສງ຺ກມິຕ຺ວາ ເອວໍ ວເທຍ຺ຍາມ, ‘ຠນ຺ເຕ, ມຍໍ ພ຺ຍຎ຺ຊນສມເຍ ກຸສລາ, ອຎ຺ເຎສໍ ສນ຺ຕິເກ ຘມ຺ມໍ ອຸຄ຺ຄຓ຺ຫິຕ຺ວາປິ ອິເມສໍ ສນ຺ຕິເກ ອໂສເຘຕ຺ວາ ມາ ສຊ຺ຌາຍິຕ຺ຖາຕິ ທຫຣສາມເຓເຣ ອາຓາເປຖາ’ຕິ. ເອວຎ຺ຫິ ອມ຺ຫາກໍ ລາຠສກ຺ກາໂຣ ວຑ຺ຒິສ຺ສຕີ’’ຕິ. ເຕ ສຕ຺ຖາຣໍ ອຸປສງ຺ກມິຕ຺ວາ ຕຖາ ວທິໍສຸ.

ສຕ຺ຖາ ເຕສໍ ວຈນໍ ສຸຕ຺ວາ ‘‘ອິມສ຺ມິໍ ສາສເນ ປເວຓິວເສເນວ ເອວໍ ວຕ຺ຕຸໍ ລຠຕິ, ອິເມ ປນ ລາຠສກ຺ກາເຣ ນິສ຺ສິຕາຕິ ຎຕ຺ວາ ອຫໍ ຕຸມ຺ເຫ ວາກ຺ກຣຓມຕ຺ເຕນ ສາຘຸຣູປາຕິ ນ ວທາມິ. ຍສ຺ສ ປເນເຕ ອິສ຺ສາທໂຍ ຘມ຺ມາ ອຣຫຕ຺ຕມຄ຺ເຄນ ສມຸຈ຺ຉິນ຺ນາ, ເອໂສ ເອວ ສາຘຸຣູໂປ’’ຕິ ວຕ຺ວາ ອິມາ ຄາຖາ ອຠາສິ –

໒໖໒. ‘‘ນ ວາກ຺ກຣຓມຕ຺ເຕນ, ວຓ຺ຓໂປກ຺ຂຣຕາຍ ວາ;

ສາຘຸຣູໂປ ນໂຣ ໂຫຕິ, ອິສ຺ສຸກີ ມຈ຺ຉຣີ ສໂຐ.

໒໖໓. ‘‘ຍສ຺ສ ເຈຕໍ ສມຸຈ຺ຉິນ຺ນໍ, ມູລຆຈ຺ຈໍ ສມູຫຕໍ;

ສວນ຺ຕໂທໂສ ເມຘາວີ, ສາຘຸຣູໂປຕິ ວຸຈ຺ຈຕີ’’ຕິ.

ຕຕ຺ຖ ນ ວາກ຺ກຣຓມຕ຺ເຕນາຕິ ວຈີກຣຓມຕ຺ເຕນ ສທ຺ທລກ຺ຂຓສມ຺ປນ຺ນວຈນມຕ຺ເຕນ. ວຓ຺ຓໂປກ຺ຂຣຕາຍ ວາຕິ ສຣີຣວຓ຺ຓສ຺ສ ມນາປຠາເວນ ວາ. ນໂຣຕິ ເອຕ຺ຕເກເນວ ກາຣເຓນ ປຣລາຠາທີສຸ ອິສ຺ສາມນໂກ ປຎ຺ຈວິເຘນ ມຈ຺ເຉເຣນ ສມນ຺ນາຄໂຕ ເກຣາຏິກຠາເວນ ສໂຐ ນໂຣ ສາຘຸຣູໂປ ນ ໂຫຕິ. ຍສ຺ສ ເຈຕນ຺ຕິ ຍສ຺ສ ຈ ປຸຄ຺ຄລສ຺ເສຕໍ ອິສ຺ສາທິໂທສຊາຕໍ ອຣຫຕ຺ຕມຄ຺ຄຎາເຓນ ສມູລກໍ ຉິນ຺ນໍ, ມູລຆາຕໍ ກຕ຺ວາ ສມູຫຕໍ, ໂສ ວນ຺ຕໂທໂສ ຘມ຺ໂມຊປຎ຺ຎາຍ ສມນ຺ນາຄໂຕ ສາຘຸຣູໂປຕິ ວຸຈ຺ຈຕີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ສມ຺ພຫຸລຠິກ຺ຂຸວຕ຺ຖຸ ປຎ຺ຈມໍ.