໔. ລກຸຓ຺ຑກຠທ຺ທິຍຕ຺ເຖຣວຕ຺ຖຸ

ນ ເຕນ ເຖໂຣ ໂສ ໂຫຕີຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ລກຸຓ຺ຑກຠທ຺ທິຍຕ຺ເຖຣໍ ອາຣພ຺ຠ ກເຖສິ.

ເອກທິວສຎ຺ຫິ ຕສ຺ມິໍ ເຖເຣ ສຕ຺ຖຸ ອຸປຏ຺ຐານໍ ຄນ຺ຕ຺ວາ ປກ຺ກນ຺ຕມຕ຺ເຕ ຕິໍສມຕ຺ຕາ ອາຣຎ຺ຎິກາ ຠິກ຺ຂູ ຕໍ ປສ຺ສນ຺ຕາ ເອວ ອາຄນ຺ຕ຺ວາ ສຕ຺ຖາຣໍ ວນ຺ທິຕ຺ວາ ນິສີທິໍສຸ. ສຕ຺ຖາ ເຕສໍ ອຣຫຕ຺ຕູປນິສ຺ສຍໍ ທິສ຺ວາ ອິມໍ ປຎ຺ຫໍ ປຸຈ຺ຉິ – ‘‘ອິໂຕ ຄຕໍ ເອກໍ ເຖຣໍ ປສ຺ສຖາ’’ຕິ? ‘‘ນ ປສ຺ສາມ, ຠນ຺ເຕ’’ຕິ. ‘‘ກິໍ ນຸ ທິຏ຺ໂຐ ໂວ’’ຕິ? ‘‘ເອກໍ, ຠນ຺ເຕ, ສາມເຓຣໍ ປສ຺ສິມ຺ຫາ’’ຕິ. ‘‘ນ ໂສ, ຠິກ຺ຂເວ, ສາມເຓໂຣ, ເຖໂຣ ເອວ ໂສ’’ຕິ? ‘‘ອຕິວິຍ ຂຸທ຺ທໂກ, ຠນ຺ເຕ’’ຕິ. ‘‘ນາຫໍ, ຠິກ຺ຂເວ, ມຫລ຺ລກຠາເວນ ເຖຣາສເນ ນິສິນ຺ນມຕ຺ຕເກນ ເຖໂຣຕິ ວທາມິ. ໂຍ ປນ ສຈ຺ຈານິ ປຏິວິຊ຺ຌິຕ຺ວາ ມຫາຊນສ຺ສ ອຫິໍສກຠາເວ ຐິໂຕ, ອຍໍ ເຖໂຣ ນາມາ’’ຕິ ວຕ຺ວາ ອິມາ ຄາຖາ ອຠາສິ –

໒໖໐. ‘‘ນ ເຕນ ເຖໂຣ ໂສ ໂຫຕິ, ເຍນສ຺ສ ປລິຕໍ ສິໂຣ;

ປຣິປກ຺ໂກ ວໂຍ ຕສ຺ສ, ໂມຆຊິຓ຺ໂຓຕິ ວຸຈ຺ຈຕິ.

໒໖໑. ‘‘ຍມ຺ຫິ ສຈ຺ຈຎ຺ຈ ຘມ຺ໂມ ຈ, ອຫິໍສາ ສໍຍໂມ ທໂມ;

ສ ເວ ວນ຺ຕມໂລ ຘີໂຣ, ເຖໂຣ ອິຕິ ປວຸຈ຺ຈຕີ’’ຕິ.

ຕຕ຺ຖ ປຣິປກ຺ໂກຕິ ປຣິຓໂຕ, ວຸຑ຺ຒຠາວໍ ປຕ຺ໂຕຕິ ອຕ຺ໂຖ. ໂມຆຊິຓ຺ໂຓຕິ ອນ຺ໂຕ ເຖຣກຣານໍ ຘມ຺ມານໍ ອຠາເວນ ຕຸຈ຺ຉຊິຓ຺ໂຓ ນາມ. ຍມ຺ຫິ ສຈ຺ຈຎ຺ຈ ຘມ຺ໂມ ຈາຕິ ຍມ຺ຫິ ປນ ປຸຄ຺ຄເລ ໂສຬສຫາກາເຣຫິ ປຏິວິທ຺ຘຕ຺ຕາ ຈຕຸພ຺ພິຘໍ ສຈ຺ຈໍ, ຎາເຓນ ສຈ຺ຉິກຕຕ຺ຕາ ນວວິໂຘ ໂລກຸຕ຺ຕຣຘມ຺ໂມ ຈ ອຕ຺ຖິ. ອຫິໍສາຕິ ອຫິໍສນຠາໂວ. ເທສນາມຕ຺ຕເມຕໍ, ຍມ຺ຫິ ປນ ຈຕຸພ຺ພິຘາປິ ອປ຺ປມຎ຺ຎາຠາວນາ ອຕ຺ຖີຕິ ອຕ຺ໂຖ. ສໍຍໂມ ທໂມຕິ ສີລຎ຺ເຈວ ອິນ຺ທ຺ຣິຍສໍວໂຣ ຈ. ວນ຺ຕມໂລຕິ ມຄ຺ຄຎາເຓນ ນີຫຏມໂລ. ຘີໂຣຕິ ຘິຕິສມ຺ປນ຺ໂນ. ເຖໂຣຕິ ໂສ ອິເມຫິ ຖິຣຠາວກາຣເກຫິ ສມນ຺ນາຄຕຕ຺ຕາ ເຖໂຣຕິ ວຸຈ຺ຈຕີຕິ ອຕ຺ໂຖ.

ເທສນາວສາເນ ເຕ ຠິກ຺ຂູ ອຣຫຕ຺ເຕ ປຕິຏ຺ຐຫິໍສູຕິ.

ລກຸຓ຺ຑກຠທ຺ທິຍຕ຺ເຖຣວຕ຺ຖຸ ຈຕຸຕ຺ຖໍ.