໓. ເອກຸທານຂີຓາສວຕ຺ເຖຣວຕ຺ຖຸ

ນ ຕາວຕາຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ເອກຸທານຕ຺ເຖຣໍ ນາມ ຂີຓາສວໍ ອາຣພ຺ຠ ກເຖສິ.

ໂສ ກິຣ ເອກໂກວ ເອກສ຺ມິໍ ວນສຓ຺ເຑ ວິຫຣຕິ, ເອກເມວສ຺ສ ອຸທານໍ ປຄຸຓໍ –

‘‘ອຘິເຈຕໂສ ອປ຺ປມຊ຺ຊໂຕ,

ມຸນິໂນ ໂມນປເຖສຸ ສິກ຺ຂໂຕ;

ໂສກາ ນ ຠວນ຺ຕິ ຕາທິໂນ,

ອຸປສນ຺ຕສ຺ສ ສທາ ສຕີມໂຕ’’ຕິ. (ປາຈິ. ໑໕໓; ອຸທາ. ໓໗);

ໂສ ກິຣ ອຸໂປສຖທິວເສສຸ ສຍເມວ ຘມ຺ມສ຺ສວນໍ ໂຆເສຕ຺ວາ ອິມໍ ຄາຖໍ ວທຕິ. ປຖວິອຸນ຺ທ຺ຣິຍນສທ຺ໂທ ວິຍ ເທວຕານໍ ສາຘຸກາຣສທ຺ໂທ ໂຫຕິ. ອເຖກສ຺ມິໍ ອຸໂປສຖທິວເສ ປຎ຺ຈປຎ຺ຈສຕປຣິວາຣາ ທ຺ເວ ຕິປິຏກຘຣາ ຠິກ຺ຂູ ຕສ຺ສ ວສນຏ຺ຐານໍ ອຄມໍສຸ. ໂສ ເຕ ທິສ຺ວາວ ຕຸຏ຺ຐມານໂສ ‘‘ສາຘຸ ໂວ ກຕໍ ອິຘ ອາຄຈ຺ຉນ຺ເຕຫິ, ອຊ຺ຊ ມຍໍ ຕຸມ຺ຫາກໍ ຘມ຺ມໍ ສຸຓິສ຺ສາມາ’’ຕິ ອາຫ. ອຕ຺ຖິ ປນ, ອາວຸໂສ, ອິຘ ຘມ຺ມໍ ໂສຕຸກາມາຕິ. ອຕ຺ຖິ, ຠນ຺ເຕ, ອຍໍ ວນສຓ຺ໂຑ ຘມ຺ມສ຺ສວນທິວເສ ເທວຕານໍ ສາຘຸກາຣສທ຺ເທນ ເອກນິນ຺ນາໂທ ໂຫຕີຕິ. ເຕສຸ ເອໂກ ຕິປິຏກຘໂຣ ຘມ຺ມໍ ໂອສາເຣສິ, ເອໂກ ກເຖສິ. ເອກເທວຕາປິ ສາຘຸກາຣໍ ນາທາສິ. ເຕ ອາຫໍສຸ – ‘‘ຕ຺ວໍ, ອາວຸໂສ, ຘມ຺ມສ຺ສວນທິວເສ ອິມສ຺ມິໍ ວນສຓ຺ເຑ ເທວຕາ ມຫນ຺ເຕນ ສທ຺ເທນ ສາຘຸກາຣໍ ເທນ຺ຕີຕິ ວເທສິ, ກິໍ ນາເມຕ’’ນ຺ຕິ. ຠນ຺ເຕ, ອຎ຺ເຎສຸ ທິວເສສຸ ສາຘຸກາຣສທ຺ເທນ ເອກນິນ຺ນາໂທ ເອວ ໂຫຕິ, ນ ອຊ຺ຊ ປນ ຊານາມິ ‘‘ກິເມຕ’’ນ຺ຕິ. ‘‘ເຕນ ຫິ, ອາວຸໂສ, ຕ຺ວໍ ຕາວ ຘມ຺ມໍ ກເຖຫີ’’ຕິ. ໂສ ພີຊນິໍ ຄເຫຕ຺ວາ ອາສເນ ນິສິນ຺ໂນ ຕເມວ ຄາຖໍ ວເທສິ. ເທວຕາ ມຫນ຺ເຕນ ສທ຺ເທນ ສາຘຸກາຣມທໍສຸ. ອຖ ເນສໍ ປຣິວາຣາ ຠິກ຺ຂູ ອຸຊ຺ຌາຍິໍສຸ ‘‘ອິມສ຺ມິໍ ວນສຓ຺ເຑ ເທວຕາ ມຸໂຂໂລກເນນ ສາຘຸກາຣໍ ທທນ຺ຕິ, ຕິປິຏກຘຣຠິກ຺ຂູສຸ ເອຕ຺ຕກໍ ຠຓນ຺ເຕສຸປິ ກິຎ຺ຈິ ປສໍສນມຕ຺ຕມ຺ປິ ອວຕ຺ວາ ເອເກນ ມຫລ຺ລກຕ຺ເຖເຣນ ເອກຄາຖາຍ ກຖິຕາຍ ມຫາສທ຺ເທນ ສາຘຸກາຣໍ ທທນ຺ຕີ’’ຕິ. ເຕປິ ວິຫາຣໍ ຄນ຺ຕ຺ວາ ສຕ຺ຖຸ ຕມຕ຺ຖໍ ອາໂຣເຈສຸໍ.

ສຕ຺ຖາ ‘‘ນາຫໍ, ຠິກ຺ຂເວ, ໂຍ ພຫຸມ຺ປິ ອຸຄ຺ຄຓ຺ຫຕິ ວາ ຠາສຕິ ວາ, ຕໍ ຘມ຺ມຘໂຣຕິ ວທາມິ. ໂຍ ປນ ເອກມ຺ປິ ຄາຖໍ ອຸຄ຺ຄຓ຺ຫິຕ຺ວາ ສຈ຺ຈານິ ປຏິວິຊ຺ຌຕິ, ອຍໍ ຘມ຺ມຘໂຣ ນາມາ’’ຕິ ວຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໒໕໙. ‘‘ນ ຕາວຕາ ຘມ຺ມຘໂຣ, ຍາວຕາ ພຫຸ ຠາສຕິ;

ໂຍ ຈ ອປ຺ປມ຺ປິ ສຸຕ຺ວານ, ຘມ຺ມໍ ກາເຍນ ປສ຺ສຕິ;

ສ ເວ ຘມ຺ມຘໂຣ ໂຫຕິ, ໂຍ ຘມ຺ມໍ ນປ຺ປມຊ຺ຊຕີ’’ຕິ.

ຕຕ຺ຖ ຍາວຕາຕິ ຍຕ຺ຕເກນ ອຸຄ຺ຄຫຓຘາຣຓວາຈນາທິນາ ກາຣເຓນ ພຫຸໍ ຠາສຕິ, ຕາວຕ຺ຕເກນ ຘມ຺ມຘໂຣ ນ ໂຫຕິ, ວໍສານຸຣກ຺ຂໂກ ປນ ປເວຓິປາລໂກ ນາມ ໂຫຕິ. ໂຍ ຈ ອປ຺ປມ຺ປີຕິ ໂຍ ປນ ອປ຺ປມຕ຺ຕກມ຺ປິ ສຸຕ຺ວາ ຘມ຺ມມນ຺ວາຍ ອຕ຺ຖມນ຺ວາຍ ຘມ຺ມານຸຘມ຺ມປ຺ປຏິປນ຺ໂນ ຫຸຕ຺ວາ ນາມກາເຍນ ທຸກ຺ຂາທີນິ ປຣິຊານນ຺ໂຕ ຈຕຸສຈ຺ຈຘມ຺ມໍ ປສ຺ສຕິ, ສ ເວ ຘມ຺ມຘໂຣ ໂຫຕິ. ໂຍ ຘມ຺ມໍ ນປ຺ປມຊ຺ຊຕີຕິ ໂຍປິ ອາຣທ຺ຘວີຣິໂຍ ຫຸຕ຺ວາ ອຊ຺ຊ ອຊ຺ເຊວາຕິ ປຏິເວຘໍ ອາກງ຺ຂນ຺ໂຕ ຘມ຺ມໍ ນປ຺ປມຊ຺ຊຕິ, ອຍມ຺ປິ ຘມ຺ມຘໂຣເຍວາຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ເອກຸທານຂີຓາສວຕ຺ເຖຣວຕ຺ຖຸ ຕຕິຍໍ.