໔. ມຫາໂມຄ຺ຄລ຺ລານຕ຺ເຖຣປຎ຺ຫວຕ຺ຖຸ

ສຈ຺ຈໍ ຠເຓຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ມຫາໂມຄ຺ຄລ຺ລານຕ຺ເຖຣສ຺ສ ປຎ຺ຫໍ ອາຣພ຺ຠ ກເຖສິ.

ເອກສ຺ມິຎ຺ຫິ ສມເຍ ເຖໂຣ ເທວຈາຣິກໍ ຄນ຺ຕ຺ວາ ມເຫສກ຺ຂາຍ ເທວຕາຍ ວິມານທ຺ວາເຣ ຐຕ຺ວາ ຕໍ ອຕ຺ຕໂນ ສນ຺ຕິກໍ ອາຄນ຺ຕ຺ວາ ວນ຺ທິຕ຺ວາ ຐິຕໍ ເອວມາຫ – ‘‘ເທວເຕ ມຫຕີ ເຕ ສມ຺ປຕ຺ຕິ, ກິໍ ກມ຺ມໍ ກຕ຺ວາ ອິມໍ ອລຕ຺ຖາ’’ຕິ? ‘‘ມາ ມໍ, ຠນ຺ເຕ, ປຸຈ຺ຉຖາ’’ຕິ. ເທວຕາ ກິຣ ອຕ຺ຕໂນ ປຣິຕ຺ຕກມ຺ເມນ ລຊ຺ຊມານາ ເອວໍ ວທຕິ. ສາ ປນ ເຖເຣນ ‘‘ກເຖຫິເຍວາ’’ຕິ ວຸຈ຺ຈມານາ ອາຫ – ‘‘ຠນ຺ເຕ, ມຍາ ເນວ ທານໍ ທິນ຺ນໍ, ນ ປູຊາ ກຕາ, ນ ຘມ຺ໂມ ສຸໂຕ, ເກວລໍ ສຈ຺ຈມຕ຺ຕໍ ຣກ຺ຂິຕ’’ນ຺ຕິ. ເຖໂຣ ອຎ຺ຎານິ ວິມານທ຺ວາຣານິ ຄນ຺ຕ຺ວາ ອາຄຕາຄຕາ ອປຣາປິ ເທວຘີຕໂຣ ປຸຈ຺ຉິ. ຕາສຸປິ ຕເຖວ ນິຄຸຫິຕ຺ວາ ເຖຣໍ ປຏິພາຫິຕຸໍ ອສກ຺ໂກນ຺ຕີສຸ ເອກາ ຕາວ ອາຫ – ‘‘ຠນ຺ເຕ, ມຍາ ເນວ ທານາທີສຸ ກຕໍ ນາມ ອຕ຺ຖິ, ອຫໍ ປນ ກສ຺ສປພຸທ຺ຘກາເລ ປຣສ຺ສ ທາສີ ອໂຫສິໍ, ຕສ຺ສາ ເມ ສາມິໂກ ອຕິວິຍ ຈຓ຺ໂຑ ຜຣຸໂສ, ຄຫິຕຄ຺ຄຫິເຕເນວ ກຏ຺ເຐນ ວາ ກລິງ຺ຄເຣນ ວາ ສີສໍ ຠິນ຺ທຕິ. ສາຫໍ ອຸປ຺ປນ຺ເນ ໂກເປ ‘ເອສ ຕວ ສາມິໂກ ລກ຺ຂຓາຫຕໍ ວາ ກາຕຸໍ ນາສາທີນິ ວາ ຉິນ຺ທິຕຸໍ ອິສ຺ສໂຣ, ມາ ກຸຊ຺ຌີ’ຕິ ອຕ຺ຕານເມວ ປຣິຠາເສຕ຺ວາ ໂກປໍ ນາມ ນ ອກາສິໍ, ເຕນ ເມ ອຍໍ ສມ຺ປຕ຺ຕິ ລທ຺ຘາ’’ຕິ. ອປຣາ ອາຫ – ‘‘ອຫໍ, ຠນ຺ເຕ, ອຸຈ຺ຉຸເຂຕ຺ຕໍ ຣກ຺ຂມານາ ເອກສ຺ສ ຠິກ຺ຂຸໂນ ອຸຈ຺ຉຸຍຏ຺ຐິໍ ອທາສິໍ’’. ອປຣາ ເອກໍ ຕິມ຺ພຣຸສກໍ ອທາສິໍ. ອປຣາ ເອກໍ ເອຬາລຸກໍ ອທາສິໍ. ອປຣາ ເອກໍ ຜາຣຸສກໍ ອທາສິໍ. ອປຣາ ເອກໍ ມູລມຸຏ຺ຐິໍ. ອປຣາ ‘‘ນິມ຺ພມຸຏ຺ຐິ’’ນ຺ຕິອາທິນາ ນເຍນ ອຕ຺ຕນາ ອຕ຺ຕນາ ກຕໍ ປຣິຕ຺ຕທານໍ ອາໂຣເຈຕ຺ວາ ‘‘ອິມິນາ ອິມິນາ ກາຣເຓນ ອມ຺ເຫຫິ ອຍໍ ສມ຺ປຕ຺ຕິ ລທ຺ຘາ’’ຕິ ອາຫໍສຸ.

ເຖໂຣ ຕາຫິ ກຕກມ຺ມໍ ສຸຕ຺ວາ ສຕ຺ຖາຣໍ ອຸປສງ຺ກມິຕ຺ວາ ປຸຈ຺ຉິ – ‘‘ສກ຺ກາ ນຸ ໂຂ, ຠນ຺ເຕ, ສຈ຺ຈກຖນມຕ຺ເຕນ, ໂກປນິພ຺ພາປນມຕ຺ເຕນ, ອຕິປຣິຕ຺ຕເກນ ຕິມ຺ພຣຸສກາທິທານມຕ຺ເຕນ ທິພ຺ພສມ຺ປຕ຺ຕິໍ ລທ຺ຘຸ’’ນ຺ຕິ. ‘‘ກສ຺ມາ ມໍ, ໂມຄ຺ຄລ຺ລານ, ປຸຈ຺ຉສິ, ນນຸ ເຕ ເທວຕາຫິ ອຍໍ ອຕ຺ໂຖ ກຖິໂຕ’’ຕິ? ‘‘ອາມ, ຠນ຺ເຕ, ລພ຺ຠຕິ ມຎ຺ເຎ ເອຕ຺ຕເກນ ທິພ຺ພສມ຺ປຕ຺ຕີ’’ຕິ. ອຖ ນໍ ສຕ຺ຖາ ‘‘ໂມຄ຺ຄລ຺ລານ, ສຈ຺ຈມຕ຺ຕໍ ກເຖຕ຺ວາປິ ໂກປມຕ຺ຕໍ ຊຫິຕ຺ວາປິ ປຣິຕ຺ຕກໍ ທານໍ ທຕ຺ວາປິ ເທວໂລກໍ ຄຈ຺ຉຕິເຍວາ’’ຕິ ວຕ຺ວາ ອິມໍ ຄາຖມາຫ –

໒໒໔. ‘‘ສຈ຺ຈໍ ຠເຓ ນ ກຸຊ຺ເຌຍ຺ຍ, ທຊ຺ຊາ ອປ຺ປມ຺ປິ ຍາຈິໂຕ;

ເອເຕຫິ ຕີຫິ ຐາເນຫິ, ຄຈ຺ເຉ ເທວານ ສນ຺ຕິເກ’’ຕິ.

ຕຕ຺ຖ ສຈ຺ຈໍ ຠເຓຕິ ສຈ຺ຈໍ ທີເປຍ຺ຍ ໂວຫເຣຍ຺ຍ, ສຈ຺ເຈ ປຕິຏ຺ຐເຫຍ຺ຍາຕິ ອຕ຺ໂຖ. ນ ກຸຊ຺ເຌຍ຺ຍາຕິ ປຣສ຺ສ ນ ກຸຊ຺ເຌຍ຺ຍ. ຍາຈິໂຕຕິ ຍາຈກາ ນາມ ສີລວນ຺ໂຕ ປພ຺ພຊິຕາ. ເຕ ຫິ ກິຎ຺ຈາປິ ‘‘ເທຖາ’’ຕິ ອຍາຈິຕ຺ວາວ ຆຣທ຺ວາເຣ ຕິຏ຺ຐນ຺ຕິ, ອຕ຺ຖໂຕ ປນ ຍາຈນ຺ຕິເຍວ ນາມ. ເອວໍ ສີລວນ຺ເຕຫິ ຍາຈິໂຕ ອປ຺ປສ຺ມິໍ ເທຍ຺ຍຘມ຺ເມ ວິຊ຺ຊມາເນ ອປ຺ປມຕ຺ຕກມ຺ປິ ທເທຍ຺ຍ. ເອເຕຫິ ຕີຫີຕິ ເອເຕສຸ ຕີສຸ ເອເກນາປິ ກາຣເຓນ ເທວໂລກໍ ຄຈ຺ເຉຍ຺ຍາຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ມຫາໂມຄ຺ຄລ຺ລານຕ຺ເຖຣປຎ຺ຫວຕ຺ຖຸ ຈຕຸຕ຺ຖໍ.