໙. ນນ຺ທິຍວຕ຺ຖຸ

ຈິຣປ຺ປວາສິນ຺ຕິ ອິມໍ ຘມ຺ມເທສນໍ ສຕ຺ຖາ ອິສິປຕເນ ວິຫຣນ຺ໂຕ ນນ຺ທິຍໍ ອາຣພ຺ຠ ກເຖສິ.

ພາຣາຓສິຍໍ ກິຣ ສທ຺ຘາສມ຺ປນ຺ນສ຺ສ ກຸລສ຺ສ ນນ຺ທິໂຍ ນາມ ປຸຕ຺ໂຕ ອໂຫສິ, ໂສ ມາຕາປິຕູນໍ ອນຸຣູໂປ ສທ຺ຘາສມ຺ປນ຺ໂນ ສງ຺ຆຸປຏ຺ຐາໂກ ອໂຫສິ. ອຖສ຺ສ ມາຕາປິຕໂຣ ວຍປ຺ປຕ຺ຕກາເລ ສມ຺ມຸຂເຄຫໂຕ ມາຕຸລຘີຕຣໍ ເຣວຕິໍ ນາມ ອາເນຕຸກາມາ ອເຫສຸໍ. ສາ ປນ ອສ຺ສທ຺ຘາ ອທານສີລາ, ນນ຺ທິໂຍ ຕໍ ນ ອິຈ຺ຉິ. ອຖສ຺ສ ມາຕາ ເຣວຕິໍ ອາຫ – ‘‘ອມ຺ມ, ຕ຺ວໍ ອິມສ຺ມິໍ ເຄເຫ ຠິກ຺ຂຸສງ຺ຆສ຺ສ ນິສຊ຺ຊນຏ຺ຐານໍ ອຸປລິມ຺ປິຕ຺ວາ ອາສນານິ ປຎ຺ຎາເປຫິ, ອາຘາຣເກ ຐເປຫິ, ຠິກ຺ຂູນໍ ອາຄຕກາເລ ປຕ຺ຕໍ ຄເຫຕ຺ວາ ນິສີທາເປຕ຺ວາ ຘມ຺ມກຣເຓນ ປານີຍໍ ປຣິສ຺ສາເວຕ຺ວາ ຠຸຕ຺ຕກາເລ ປຕ຺ເຕ ໂຘວ, ເອວໍ ເມ ປຸຕ຺ຕສ຺ສ ອາຣາຘິຕາ ຠວິສ຺ສສີ’’ຕິ. ສາ ຕຖາ ອກາສິ. ອຖ ນໍ ‘‘ໂອວາທກ຺ຂມາ ຊາຕາ’’ຕິ ປຸຕ຺ຕສ຺ສ ອາໂຣເຈຕ຺ວາ ເຕນ ສາຘູຕິ ສມ຺ປຏິຈ຺ຉິເຕ ທິວສໍ ຐເປຕ຺ວາ ອາວາຫໍ ກຣິໍສຸ.

ອຖ ນໍ ນນ຺ທິໂຍ ອາຫ – ‘‘ສເຈ ຠິກ຺ຂຸສງ຺ຆຎ຺ຈ ມາຕາປິຕໂຣ ຈ ເມ ອຸປຏ຺ຐຫິສ຺ສສິ, ເອວໍ ອິມສ຺ມິໍ ເຄເຫ ວສິຕຸໍ ລຠິສ຺ສສິ, ອປ຺ປມຕ຺ຕາ ໂຫຫີ’’ຕິ. ສາ ‘‘ສາຘູ’’ຕິ ປຏິສ຺ສຸຓິຕ຺ວາ ກຕິປາຫໍ ສທ຺ຘາ ວິຍ ຫຸຕ຺ວາ ຠຕ຺ຕາຣໍ ອຸປຏ຺ຐຫນ຺ຕີ ທ຺ເວ ປຸຕ຺ເຕ ວິຊາຍິ. ນນ຺ທິຍສ຺ສາປິ ມາຕາປິຕໂຣ ກາລມກໍສຸ, ເຄເຫ ສພ຺ພິສ຺ສຣິຍໍ ຕສ຺ສາເຍວ ອໂຫສິ. ນນ຺ທິໂຍປິ ມາຕາປິຕູນໍ ກາລກິຣິຍໂຕ ປຏ຺ຐາຍ ມຫາທານປຕິ ຫຸຕ຺ວາ ຠິກ຺ຂຸສງ຺ຆສ຺ສ ທານໍ ປຏ຺ຐເປສິ. ກປຓທ຺ຘິກາທີນມ຺ປິ ເຄຫທ຺ວາເຣ ປາກວຕ຺ຕໍ ປຏ຺ຐເປສິ. ໂສ ອປຣຠາເຄ ສຕ຺ຖຸ ຘມ຺ມເທສນໍ ສຸຕ຺ວາ ອາວາສທາເນ ອານິສໍສໍ ສລ຺ລກ຺ເຂຕ຺ວາ ອິສິປຕເນ ມຫາວິຫາເຣ ຈຕູຫິ ຄພ຺ເຠຫິ ປຏິມຓ຺ຑິຕໍ ຈຕຸສາລໍ ກາເຣຕ຺ວາ ມຎ຺ຈປີຐາທີນິ ອຕ຺ຖຣາເປຕ຺ວາ ຕໍ ອາວາສໍ ນິຍ຺ຍາເທນ຺ໂຕ ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ທານໍ ທຕ຺ວາ ຕຖາຄຕສ຺ສ ທກ຺ຂິໂຓທກໍ ອທາສິ. ສຕ຺ຖຸ ຫຕ຺ເຖ ທກ຺ຂິໂຓທກປຕິຏ຺ຐາເນນ ສທ຺ຘິໍເຍວ ຕາວຕິໍສເທວໂລເກ ສພ຺ພທິສາສຸ ທ຺ວາທສໂຍຊນິໂກ ອຸທ຺ຘໍ ໂຍຊນສຕຸພ຺ເພໂຘ ສຕ຺ຕຣຕນມໂຍ ນາຣີຄຓສມ຺ປນ຺ໂນ ທິພ຺ພປາສາໂທ ອຸຄ຺ຄຈ຺ຉິ.

ອເຖກທິວເສ ມຫາໂມຄ຺ຄລ຺ລານຕ຺ເຖໂຣ ເທວຈາຣິກໍ ຄນ຺ຕ຺ວາ ຕສ຺ສ ປາສາທສ຺ສ ອວິທູເຣ ຐິໂຕ ອຕ຺ຕໂນ ສນ຺ຕິເກ ອາຄເຕ ເທວປຸຕ຺ເຕ ປຸຈ຺ຉິ – ‘‘ກສ຺ເສໂສ ອຈ຺ຉຣາຄຓປຣິວຸໂຕ ທິພ຺ພປາສາໂທ ນິພ຺ພຕ຺ໂຕ’’ຕິ. ອຖສ຺ສ ເທວປຸຕ຺ຕາ ວິມານສາມິກໍ ອາຈິກ຺ຂນ຺ຕາ ອາຫໍສຸ – ‘‘ຠນ຺ເຕ, ເຍນ ນນ຺ທິເຍນ ນາມ ຄຫປຕິປຸຕ຺ເຕນ ອິສິປຕເນ ສຕ຺ຖຸ ວິຫາຣໍ ກາເຣຕ຺ວາ ທິນ຺ໂນ, ຕສ຺ສຕ຺ຖາຍ ເອຕໍ ວິມານໍ ນິພ຺ພຕ຺ຕ’’ນ຺ຕິ. ອຈ຺ຉຣາສງ຺ໂຆປິ ນໍ ທິສ຺ວາ ປາສາທໂຕ ໂອໂຣຫິຕ຺ວາ ອາຫ – ‘‘ຠນ຺ເຕ, ມຍໍ ‘ນນ຺ທິຍສ຺ສ ປຣິຈາຣິກາ ຠວິສ຺ສາມາ’ຕິ ອິຘ ນິພ຺ພຕ຺ຕາ, ຕໍ ປນ ອປສ຺ສນ຺ຕີ ອຕິວິຍ ອຸກ຺ກຓ຺ຐິຕມ຺ຫາ, ມຕ຺ຕິກປາຕິໍ ຠິນ຺ທິຕ຺ວາ ສຸວຓ຺ຓປາຕິຄຫຓໍ ວິຍ ມນຸສ຺ສສມ຺ປຕ຺ຕິໍ ຊຫິຕ຺ວາ ທິພ຺ພສມ຺ປຕ຺ຕິຄຫຓໍ, ອິຘາຄມນຕ຺ຖາຍ ນໍ ວເທຍ຺ຍາຖາ’’ຕິ. ເຖໂຣ ຕໂຕ ອາຄນ຺ຕ຺ວາ ສຕ຺ຖາຣໍ ອຸປສງ຺ກມິຕ຺ວາ ປຸຈ຺ຉິ – ‘‘ນິພ຺ພຕ຺ຕຕິ ນຸ ໂຂ, ຠນ຺ເຕ, ມນຸສ຺ສໂລເກ ຐິຕານໍເຍວ ກຕກລ຺ຍາຓານໍ ທິພ຺ພສມ຺ປຕ຺ຕີ’’ຕິ. ‘‘ໂມຄ຺ຄລ຺ລານ, ນນຸ ເຕ ເທວໂລເກ ນນ຺ທິຍສ຺ສ ນິພ຺ພຕ຺ຕາ ທິພ຺ພສມ຺ປຕ຺ຕິ ສາມໍ ທິຏ຺ຐາ, ກສ຺ມາ ມໍ ປຸຈ຺ຉສີ’’ຕິ. ‘‘ເອວໍ, ຠນ຺ເຕ, ນິພ຺ພຕ຺ຕຕີ’’ຕິ.

ອຖ ນໍ ສຕ຺ຖາ ‘‘ໂມຄ຺ຄລ຺ລານໍ ກິໍ ນາເມຕໍ ກເຖສິ. ຍຖາ ຫິ ຈິຣປ຺ປວຸຏ຺ຐໍ ປຸຕ຺ຕໍ ວາ ຠາຕຣໍ ວາ ວິປ຺ປວາສໂຕ ອາຄຈ຺ຉນ຺ຕໍ ຄາມທ຺ວາເຣ ຐິໂຕ ໂກຈິເທວ ທິສ຺ວາ ເວເຄນ ເຄຫໍ ອາຄນ຺ຕ຺ວາ ‘ອສຸໂກ ນາມ ອາຄໂຕ’ຕິ ອາໂຣເຈຍ຺ຍ, ອຖສ຺ສ ຎາຕກາ ຫຏ຺ຐປຫຏ຺ຐາ ເວເຄນ ນິກ຺ຂມິຕ຺ວາ ‘ອາຄໂຕສິ, ຕາຕ, ອໂຣໂຄສິ, ຕາຕາ’ຕິ ຕໍ ອຠິນນ຺ເທຍ຺ຍຸໍ, ເອວເມວ ອິຘ ກຕກລ຺ຍາຓໍ ອິຕ຺ຖິໍ ວາ ປຸຣິສໍ ວາ ອິມໍ ໂລກໍ ຊຫິຕ຺ວາ ປຣໂລກໍ ຄຕໍ ທສວິຘໍ ທິພ຺ພປຓ຺ຓາກາຣໍ ອາທາຍ ‘ອຫໍ ປຸຣໂຕ, ອຫໍ ປຸຣໂຕ’ຕິ ປຈ຺ຈຸຄ຺ຄນ຺ຕ຺ວາ ເທວຕາ ອຠິນນ຺ທນ຺ຕີ’’ຕິ ວຕ຺ວາ ອິມາ ຄາຖາ ອຠາສິ –

໒໑໙. ‘‘ຈິຣປ຺ປວາສິໍ ປຸຣິສໍ, ທູຣໂຕ ໂສຕ຺ຖິມາຄຕໍ;

ຎາຕິມິຕ຺ຕາ ສຸຫຊ຺ຊາ ຈ, ອຠິນນ຺ທນ຺ຕິ ອາຄຕໍ.

໒໒໐. ‘‘ຕເຖວ ກຕປຸຎ຺ຎມ຺ປິ, ອສ຺ມາ ໂລກາ ປຣໍ ຄຕໍ;

ປຸຎ຺ຎານິ ປຏິຄຓ຺ຫນ຺ຕິ, ປິຍໍ ຎາຕີວ ອາຄຕ’’ນ຺ຕິ.

ຕຕ຺ຖ ຈິຣປ຺ປວາສິນ຺ຕິ ຈິຣປ຺ປວຸຏ຺ຐໍ. ທູຣໂຕ ໂສຕ຺ຖິມາຄຕນ຺ຕິ ວຓິຊ຺ຊໍ ວາ ຣາຊໂປຣິສໍ ວາ ກຕ຺ວາ ລທ຺ຘລາຠໍ ນິປ຺ຜນ຺ນສມ຺ປຕ຺ຕິໍ ອນຸປທ຺ທເວນ ທູຣຏ຺ຐານໂຕ ອາຄຕໍ. ຎາຕິມິຕ຺ຕາ ສຸຫຊ຺ຊາ ຈາຕິ ກຸລສມ຺ພນ຺ຘວເສນ ຎາຕີ ຈ ສນ຺ທິຏ຺ຐາທິຠາເວນ ມິຕ຺ຕາ ຈ ສຸຫທຍຠາເວນ ສຸຫຊ຺ຊາ ຈ. ອຠິນນ຺ທນ຺ຕິ ອາຄຕນ຺ຕິ ນໍ ທິສ຺ວາ ອາຄຕນ຺ຕິ ວຈນມຕ຺ເຕນ ວາ ອຎ຺ຊລິກຣຓມຕ຺ເຕນ ວາ ເຄຫສມ຺ປຕ຺ຕໍ ປນ ນານປ຺ປກາຣປຓ຺ຓາກາຣາຠິຫຣຓວເສນ ອຠິນນ຺ທນ຺ຕິ. ຕເຖວາຕິ ເຕເນວາກາເຣນ ກຕປຸຎ຺ຎມ຺ປິ ປຸຄ຺ຄລໍ ອິມສ຺ມາ ໂລກາ ປຣໂລກໍ ຄຕໍ ທິພ຺ພໍ ອາຍຸວຓ຺ຓສຸຂຍສອາຘິປເຕຍ຺ຍໍ, ທິພ຺ພໍ ຣູປສທ຺ທຄນ຺ຘຣສໂຜຏ຺ຐພ຺ພນ຺ຕິ ອິມໍ ທສວິຘໍ ປຓ຺ຓາກາຣໍ ອາທາຍ ມາຕາປິຕຸຏ຺ຐາເນ ຐິຕານິ ປຸຎ຺ຎານິ ອຠິນນ຺ທນ຺ຕານິ ປຏິຄ຺ຄຓ຺ຫນ຺ຕິ. ປິຍໍ ຎາຕີວາຕິ ອິຘໂລເກ ປິຍຎາຕກໍ ອາຄຕໍ ເສສຎາຕກາ ວິຍາຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ນນ຺ທິຍວຕ຺ຖຸ ນວມໍ.

ປິຍວຄ຺ຄວຓ຺ຓນາ ນິຏ຺ຐິຕາ.

ໂສຬສໂມ ວຄ຺ໂຄ.