໑. ຕໂຍຊນປພ຺ພຊິຕວຕ຺ຖຸ

ອໂຍເຄຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ຕໂຍ ປພ຺ພຊິເຕ ອາຣພ຺ຠ ກເຖສິ.

ສາວຕ຺ຖິຍໍ ກິຣ ເອກສ຺ມິໍ ກຸເລ ມາຕາປິຕູນໍ ເອກປຸຕ຺ຕໂກ ອໂຫສິ ປິໂຍ ມນາໂປ. ໂສ ເອກທິວສໍ ເຄເຫ ນິມນ຺ຕິຕານໍ ຠິກ຺ຂູນໍ ອນຸໂມທນໍ ກໂຣນ຺ຕານໍ ຘມ຺ມກຖໍ ສຸຕ຺ວາ ປພ຺ພຊິຕຸກາໂມ ຫຸຕ຺ວາ ມາຕາປິຕໂຣ ປພ຺ພຊ຺ຊໍ ຍາຈິ. ເຕ ນານຸຊານິໍສຸ. ຕສ຺ສ ເອຕທໂຫສິ – ‘‘ອຫໍ ມາຕາປິຕູນໍ ອປສ຺ສນ຺ຕານໍເຍວ ພຫິ ຄນ຺ຕ຺ວາ ປພ຺ພຊິສ຺ສາມີ’’ຕິ. ອຖສ຺ສ ປິຕາ ພຫິ ນິກ຺ຂມນ຺ໂຕ ‘‘ອິມໍ ຣກ຺ເຂຍ຺ຍາສີ’’ຕິ ມາຕຣໍ ປຏິຈ຺ຉາເປສິ, ມາຕາ ພຫິ ນິກ຺ຂມນ຺ຕີ ປິຕຣໍ ປຏິຈ຺ຉາເປສິ. ອຖສ຺ສ ເອກທິວສໍ ປິຕຣິ ພຫິ ຄເຕ ມາຕາ ‘‘ປຸຕ຺ຕໍ ຣກ຺ຂິສ຺ສາມີ’’ຕິ ເອກໍ ທ຺ວາຣພາຫໍ ນິສ຺ສາຍ ເອກໍ ປາເທຫິ ອຸປ຺ປີເຬຕ຺ວາ ຉມາຍ ນິສິນ຺ນາ ສຸຕ຺ຕໍ ກນ຺ຕຕິ. ໂສ ‘‘ອິມໍ ວຎ຺ເຈຕ຺ວາ ຄມິສ຺ສາມີ’’ຕິ ຈິນ຺ເຕຕ຺ວາ, ‘‘ອມ຺ມ, ໂຖກໍ ຕາວ ອເປຫິ, ສຣີຣວລຎ຺ຊໍ ກຣິສ຺ສາມີ’’ຕິ ວຕ຺ວາ ຕາຍ ປາເທ ສມິຎ຺ຊິເຕ ນິກ຺ຂມິຕ຺ວາ ເວເຄນ ວິຫາຣໍ ຄນ຺ຕ຺ວາ ຠິກ຺ຂູ ອຸປສງ຺ກມິຕ຺ວາ ‘‘ປພ຺ພາເຊຖ ມໍ, ຠນ຺ເຕ’’ຕິ ຍາຈິຕ຺ວາ ເຕສໍ ສນ຺ຕິເກ ປພ຺ພຊິ.

ອຖສ຺ສ ປິຕາ ອາຄນ຺ຕ຺ວາ ມາຕຣໍ ປຸຈ຺ຉິ – ‘‘ກຫໍ ເມ ປຸຕ຺ໂຕ’’ຕິ? ‘‘ສາມິ, ອິມສ຺ມິໍ ປເທເສ ອໂຫສີ’’ຕິ. ໂສ ‘‘ກຫໍ ນຸ ໂຂ ເມ ປຸຕ຺ໂຕ’’ຕິ ໂອໂລເກນ຺ໂຕ ຕໍ ອທິສ຺ວາ ‘‘ວິຫາຣໍ ຄໂຕ ຠວິສ຺ສຕີ’’ຕິ ວິຫາຣໍ ຄນ຺ຕ຺ວາ ປຸຕ຺ຕໍ ປພ຺ພຊິຕໍ ທິສ຺ວາ ກນ຺ທິຕ຺ວາ ໂຣທິຕ຺ວາ, ‘‘ຕາຕ, ກິໍ ມໍ ນາເສສີ’’ຕິ ວຕ຺ວາ ‘‘ມມ ປຸຕ຺ເຕ ປພ຺ພຊິເຕ ອຫໍ ອິທານິ ເຄເຫ ກິໍ ກຣິສ຺ສາມີ’’ຕິ ສຍມ຺ປິ ຠິກ຺ຂູ ຍາຈິຕ຺ວາ ປພ຺ພຊິ. ອຖສ຺ສ ມາຕາປິ ‘‘ກິໍ ນຸ ໂຂ ເມ ປຸຕ຺ໂຕ ຈ ປຕິ ຈ ຈິຣາຍນ຺ຕິ, ກຈ຺ຈິ ວິຫາຣໍ ຄນ຺ຕ຺ວາ ປພ຺ພຊິຕາ’’ຕິ ເຕ ໂອໂລເກນ຺ຕີ ວິຫາຣໍ ຄນ຺ຕ຺ວາ ອຸໂຠປິ ປພ຺ພຊິເຕ ທິສ຺ວາ ‘‘ອິເມສໍ ປພ຺ພຊິຕກາເລ ມມ ເຄເຫນ ໂກ ອຕ຺ໂຖ’’ຕິ ສຍມ຺ປິ ຠິກ຺ຂຸນິອຸປສ຺ສຍໍ ຄນ຺ຕ຺ວາ ປພ຺ພຊິ. ເຕ ປພ຺ພຊິຕ຺ວາປິ ວິນາ ຠວິຕຸໍ ນ ສກ຺ໂກນ຺ຕິ, ວິຫາເຣປິ ຠິກ຺ຂຸນິອຸປສ຺ສເຍປິ ເອກໂຕວ ນິສີທິຕ຺ວາ ສລ຺ລປນ຺ຕາ ທິວສໍ ວີຕິນາເມນ຺ຕິ. ເຕນ ຠິກ຺ຂູປິ ຠິກ຺ຂູນິໂຍປິ ອຸພ຺ພາຬ຺ຫາ ໂຫນ຺ຕິ.

ອເຖກທິວສໍ ຠິກ຺ຂູ ເນສໍ ກິຣິຍໍ ສຕ຺ຖຸໍ ອາໂຣເຈສຸໍ. ສຕ຺ຖາ ເຕ ປກ຺ໂກສາເປຕ຺ວາ ‘‘ສຈ຺ຈໍ ກິຣ ຕຸມ຺ເຫ ເອວໍ ກໂຣຖາ’’ຕິ ປຸຈ຺ຉິຕ຺ວາ ‘‘ສຈ຺ຈ’’ນ຺ຕິ ວຸຕ຺ເຕ ‘‘ກສ຺ມາ ເອວໍ ກໂຣຖ? ນ ຫິ ເອສ ປພ຺ພຊິຕານໍ ໂຍໂຄ’’ຕິ. ‘‘ຠນ຺ເຕ, ວິນາ ຠວິຕຸໍ ນ ສກ຺ໂກມາ’’ຕິ. ‘‘ປພ຺ພຊິຕກາລໂຕ ປຏ຺ຐາຍ ເອວໍ ກຣຓໍ ອຍຸຕ຺ຕໍ. ປິຍານຎ຺ຫິ ອທສ຺ສນໍ, ອປ຺ປິຍານຎ຺ຈ ທສ຺ສນໍ ທຸກ຺ຂເມວ. ຕສ຺ມາ ສຕ຺ເຕສຸ ຈ ສງ຺ຂາເຣສຸ ຈ ກຎ຺ຈິ ປິຍໍ ວາ ອປ຺ປິຍໍ ວາ ກາຕຸໍ ນ ວຏ຺ຏຕີ’’ຕິ ວຕ຺ວາ ອິມາ ຄາຖາ ອຠາສິ –

໒໐໙. ‘‘ອໂຍເຄ ຍຸຎ຺ຊມຕ຺ຕານໍ, ໂຍຄສ຺ມິຎ຺ຈ ອໂຍຊຍໍ;

ອຕ຺ຖໍ ຫິຕ຺ວາ ປິຍຄ຺ຄາຫີ, ປິເຫຕຕ຺ຕານຸໂຍຄິນໍ.

໒໑໐. ‘‘ມາ ປິເຍຫິ ສມາຄຎ຺ຉິ, ອປ຺ປິເຍຫິ ກຸທາຈນໍ;

ປິຍານໍ ອທສ຺ສນໍ ທຸກ຺ຂໍ, ອປ຺ປິຍານຎ຺ຈ ທສ຺ສນໍ.

໒໑໑. ‘‘ຕສ຺ມາ ປິຍໍ ນ ກຍິຣາຖ, ປິຍາປາໂຍ ຫິ ປາປໂກ;

ຄນ຺ຖາ ເຕສໍ ນ ວິຊ຺ຊນ຺ຕິ, ເຍສໍ ນຕ຺ຖິ ປິຍາປ຺ປິຍ’’ນ຺ຕິ.

ຕຕ຺ຖ ອໂຍເຄຕິ ອຍຸຎ຺ຊິຕພ຺ເພ ອໂຍນິໂສມນສິກາເຣ. ເວສິຍາໂຄຈຣາທິເຠທສ຺ສ ຫິ ຉພ຺ພິຘສ຺ສ ອໂຄຈຣສ຺ສ ເສວນໍ ອິຘ ອໂຍນິໂສມນສິກາໂຣ ນາມ, ຕສ຺ມິໍ ອໂຍນິໂສມນສິກາເຣ ອຕ຺ຕານໍ ຍຸຎ຺ຊນ຺ໂຕຕິ ອຕ຺ໂຖ. ໂຍຄສ຺ມິນ຺ຕິ ຕພ຺ພິປຣີເຕ ຈ ໂຍນິໂສມນສິກາເຣ ອຍຸຎ຺ຊນ຺ໂຕຕິ ອຕ຺ໂຖ. ອຕ຺ຖໍ ຫິຕ຺ວາຕິ ປພ຺ພຊິຕກາລໂຕ ປຏ຺ຐາຍ ອຘິສີລາທິສິກ຺ຂຕ຺ຕຍໍ ອຕ຺ໂຖ ນາມ, ຕໍ ອຕ຺ຖໍ ຫິຕ຺ວາ. ປິຍຄ຺ຄາຫີຕິ ປຎ຺ຈກາມຄຸຓສງ຺ຂາຕໍ ປິຍເມວ ຄຓ຺ຫນ຺ໂຕ. ປິເຫຕຕ຺ຕານຸໂຍຄິນນ຺ຕິ ຕາຍ ປຏິປຕ຺ຕິຍາ ສາສນໂຕ ຈຸໂຕ ຄິຫິຠາວໍ ປຕ຺ວາ ປຈ຺ຉາ ເຍ ອຕ຺ຕານຸໂຍຄໍ ອນຸຍຸຕ຺ຕາ ສີລາທີນິ ສມ຺ປາເທຕ຺ວາ ເທວມນຸສ຺ສານໍ ສນ຺ຕິກາ ສກ຺ກາຣໍ ລຠນ຺ຕິ, ເຕສໍ ປິເຫຕິ, ‘‘ອໂຫ ວຕາຫມ຺ປິ ເອວຣູໂປ ອສ຺ສ’’ນ຺ຕິ ອິຈ຺ຉຕີຕິ ອຕ຺ໂຖ.

ມາ ປິເຍຫີຕິ ປິເຍຫິ ສຕ຺ເຕຫິ ວາ ສງ຺ຂາເຣຫິ ວາ ກຸທາຈນໍ ເອກກ຺ຂເຓປິ ນ ສມາຄຈ຺ເຉຍ຺ຍ, ຕຖາ ອປ຺ປິເຍຫິ. ກິໍ ກາຣຓາ? ປິຍາ ນຎ຺ຫິ ວິໂຍຄວເສນ ອທສ຺ສນໍ ອປ຺ປິຍານຎ຺ຈ ອຸປສງ຺ກມນວເສນ ທສ຺ສນໍ ນາມ ທຸກ຺ຂໍ. ຕສ຺ມາຕິ ຍສ຺ມາ ອິທໍ ອຸຠຍມ຺ປິ ທຸກ຺ຂໍ, ຕສ຺ມາ ກຎ຺ຈິ ສຕ຺ຕໍ ວາ ສງ຺ຂາຣໍ ວາ ປິຍໍ ນາມ ນ ກເຣຍ຺ຍ. ປິຍາປາໂຍ ຫີຕິ ປິເຍຫິ ອປາໂຍ ວິໂຍໂຄ. ປາປໂກຕິ ລາມໂກ. ຄນ຺ຖາ ເຕສໍ ນ ວິຊ຺ຊນ຺ຕີຕິ ເຍສໍ ປິຍໍ ນຕ຺ຖິ, ເຕສໍ ອຠິຊ຺ຌາກາຍຄນ຺ໂຖ ປຫີຍຕິ. ເຍສໍ ອປ຺ປິຍໍ ນຕ຺ຖິ, ເຕສໍ ພ຺ຍາປາໂທ ກາຍຄນ຺ໂຖ. ເຕສຸ ປນ ທ຺ວີສຸ ປຫີເນສຸ ເສສຄນ຺ຖາ ປຫີນາ ໂຫນ຺ຕິ. ຕສ຺ມາ ປິຍໍ ວາ ອປ຺ປິຍໍ ວາ ນ ກຕ຺ຕພ຺ພນ຺ຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ. ເຕນ ປນ ຕໂຍ ຊນາ ‘‘ມຍໍ ວິນາ ຠວິຕຸໍ ນ ສກ຺ໂກມາ’’ຕິ ວິພ຺ຠມິຕ຺ວາ ເຄຫເມວ ອຄມິໍສູຕິ.

ຕໂຍຊນປພ຺ພຊິຕວຕ຺ຖຸ ປຐມໍ.