໙. ກສ຺ສປທສພລສ຺ສ ສຸວຓ຺ຓເຈຕິຍວຕ຺ຖຸ

ປູຊາຣເຫຕິ ອິມໍ ຘມ຺ມເທສນໍ ສຕ຺ຖາ ຈາຣິກໍ ຈຣມາໂນ ກສ຺ສປທສພລສ຺ສ ສຸວຓ຺ຓເຈຕິຍໍ ອາຣພ຺ຠ ກເຖສິ.

ຕຖາຄໂຕ ສາວຕ຺ຖິໂຕ ນິກ຺ຂມິຕ຺ວາ ອນຸປຸພ຺ເພນ ພາຣາຓສິໍ ຄຈ຺ຉນ຺ໂຕ ອນ຺ຕຣາມຄ຺ເຄ ໂຕເທຍ຺ຍຄາມສ຺ສ ສມີເປ ມຫາຠິກ຺ຂຸສງ຺ຆປຣິວາໂຣ ອຎ຺ຎຕຣໍ ເທວຏ຺ຐານໍ ສມ຺ປາປຸຓິ. ຕຕ຺ຣ ນິສິນ຺ໂນ ສຸຄໂຕ ຘມ຺ມຠຓ຺ຑາຄາຣິກໍ ເປເສຕ຺ວາ ອວິທູເຣ ກສິກມ຺ມໍ ກໂຣນ຺ຕໍ ພ຺ຣາຫ຺ມຓໍ ປກ຺ໂກສາເປສິ. ໂສ ພ຺ຣາຫ຺ມໂຓ ອາຄນ຺ຕ຺ວາ ຕຖາຄຕໍ ອນຠິວນ຺ທິຕ຺ວາ ຕເມວ ເທວຏ຺ຐານໍ ວນ຺ທິຕ຺ວາ ອຏ຺ຐາສິ. ສຸຄໂຕປິ ‘‘ອິມໍ ປເທສໍ ກິນ຺ຕິ ມຎ຺ຎສິ ພ຺ຣາຫ຺ມຓາ’’ຕິ ອາຫ. ອມ຺ຫາກໍ ປເວຓິຍາ ອາຄຕເຈຕິຍຏ຺ຐານນ຺ຕິ ວນ຺ທາມິ, ໂຠ ໂຄຕມາຕິ. ‘‘ອິມໍ ຐານໍ ວນ຺ທນ຺ເຕນ ຕຍາ ສາຘຸ ກຕໍ ພ຺ຣາຫ຺ມຓາ’’ຕິ ສຸຄໂຕ ຕໍ ສມ຺ປຫໍເສສິ. ຕໍ ສຸຕ຺ວາ ຠິກ຺ຂູ ‘‘ເກນ ນຸ ໂຂ ກາຣເຓນ ຠຄວາ ເອວໍ ສມ຺ປຫໍເສສີ’’ຕິ ສໍສຍໍ ສຎ຺ຊເນສຸໍ. ຕໂຕ ຕຖາຄໂຕ ເຕສໍ ສໍສຍມປເນຕຸໍ ມຊ຺ຌິມນິກາເຍ ຆຏິກາຣສຸຕ຺ຕນ຺ຕໍ (ມ. ນິ. ໒.໒໘໒ ອາທໂຍ) ວຕ຺ວາ ອິທ຺ຘານຸຠາເວນ ກສ຺ສປທສພລສ຺ສ ໂຍຊນຸພ຺ເພຘໍ ກນກເຈຕິຍໍ ອປຣຎ຺ຈ ກນກເຈຕິຍໍ ອາກາເສ ນິມ຺ມິນິຕ຺ວາ ມຫາຊນໍ ທສ຺ເສຕ຺ວາ, ‘‘ພ຺ຣາຫ຺ມຓ, ເອວໍວິຘານໍ ປູຊາຣຫານໍ ປູຊາ ຍຸຕ຺ຕຕຣາວາ’’ຕິ ວຕ຺ວາ ມຫາປຣິນິພ຺ພານສຸຕ຺ເຕ (ທີ. ນິ. ໒.໒໐໖) ທສ຺ສິຕນເຍເນວ ພຸທ຺ຘາທິເກ ຈຕ຺ຕາໂຣ ຖູປາຣເຫ ປກາເສຕ຺ວາ ສຣີຣເຈຕິຍໍ ອຸທ຺ທິສ຺ສເຈຕິຍໍ ປຣິໂຠຄເຈຕິຍນ຺ຕິ ຕີຓິ ເຈຕິຍານິ ວິເສສໂຕ ປຣິທີເປຕ຺ວາ ອິມາ ຄາຖາ ອຠາສິ –

໑໙໕. ‘‘ປູຊາຣເຫ ປູຊຍໂຕ, ພຸທ຺ເຘ ຍທິ ຈ ສາວເກ;

ປປຎ຺ຈສມຕິກ຺ກນ຺ເຕ, ຕິຓ຺ຓໂສກປຣິທ຺ທເວ.

໑໙໖. ‘‘ເຕ ຕາທິເສ ປູຊຍໂຕ, ນິພ຺ພຸເຕ ອກຸໂຕຠເຍ;

ນ ສກ຺ກາ ປຸຎ຺ຎໍ ສງ຺ຂາຕຸໍ, ອິເມຕ຺ຕມປິ ເກນຈີ’’ຕິ. (ອປ. ເຖຣ ໑.໑໐.໑-໒);

ຕຕ຺ຖ ປູຊິຕຸໍ ອຣຫາ ປູຊາຣຫາ, ປູຊິຕຸໍ ຍຸຕ຺ຕາຕິ ອຕ຺ໂຖ. ປູຊາຣເຫ ປູຊຍໂຕຕິ ອຠິວາທນາທີຫິ ຈ ຈຕູຫິ ຈ ປຈ຺ຈເຍຫິ ປູເຊນ຺ຕສ຺ສ. ປູຊາຣເຫ ທສ຺ເສຕິ ພຸທ຺ເຘຕິອາທິນາ. ພຸທ຺ເຘຕິ ສມ຺ມາສມ຺ພຸທ຺ເຘ. ຍທີຕິ ຍທິ ວາ, ອຖ ວາຕິ ອຕ຺ໂຖ. ຕຕ຺ຖ ປຈ຺ເຈກພຸທ຺ເຘຕິ ກຖິຕໍ ໂຫຕິ, ສາວເກ ຈ. ປປຎ຺ຈສມຕິກ຺ກນ຺ເຕຕິ ສມຕິກ຺ກນ຺ຕຕຓ຺ຫາທິຏ຺ຐິມານປປຎ຺ເຈ. ຕິຓ຺ຓໂສກປຣິທ຺ທເວຕິ ອຕິກ຺ກນ຺ຕໂສກປຣິທ຺ທເວ, ອິເມ ທ຺ເວ ອຕິກ຺ກນ຺ເຕຕິ ອຕ຺ໂຖ. ເອເຕຫິ ປູຊາຣຫຕ຺ຕໍ ທສ຺ສິຕໍ.

ເຕຕິ ພຸທ຺ຘາທໂຍ. ຕາທິເສຕິ ວຸຕ຺ຕຄຫຓວເສນ. ນິພ຺ພຸເຕຕິ ຣາຄາທິນິພ຺ພຸຕິຍາ. ນຕ຺ຖິ ກຸໂຕຈິ ຠວໂຕ ວາ ອາຣມ຺ມຓໂຕ ວາ ເອເຕສໍ ຠຍນ຺ຕິ ອກຸໂຕຠຍາ, ເຕ ອກຸໂຕຠເຍ. ນ ສກ຺ກາ ປຸຎ຺ຎໍ ສງ຺ຂາຕຸນ຺ຕິ ປຸຎ຺ຎໍ ຄເຓຕຸໍ ນ ສກ຺ກາ. ກຖນ຺ຕິ ເຈ? ອິເມຕ຺ຕມປິ ເກນຈີຕິ ອິມໍ ເອຕ຺ຕກໍ, ອິມໍ ເອຕ຺ຕກນ຺ຕິ ເກນຈີຕິ ອປິສທ຺ໂທ ອິຘ ສມ຺ພນ຺ຘິຕພ຺ໂພ, ເກນຈິ ປຸຄ຺ຄເລນ ມາເນນ ວາ. ຕຕ຺ຖ ປຸຄ຺ຄເລນາຕິ ເຕນ ພ຺ຣຫ຺ມາທິນາ. ມາເນນາຕິ ຕິວິເຘນ ມາເນນ ຕີຣເຓນ ຘາຣເຓນ ປູຣເຓນ ວາ. ຕີຣຓໍ ນາມ ອິທໍ ເອຕ຺ຕກນ຺ຕິ ນຍໂຕ ຕີຣຓໍ. ຘາຣຓນ຺ຕິ ຕຸລາຍ ຘາຣຓໍ. ປູຣຓໍ ນາມ ອຑ຺ຒປສຕປຕ຺ຖນາຬິກາທິວເສນ ປູຣຓໍ. ເກນຈິ ປຸຄ຺ຄເລນ ອິເມຫິ ຕີຫິ ມາເນຫິ ພຸທ຺ຘາທິເກ ປູຊຍໂຕ ປຸຎ຺ຎໍ ວິປາກວເສນ ຄເຓຕຸໍ ນ ສກ຺ກາ ປຣິຍນ຺ຕຣຫິຕໂຕຕິ ທ຺ວີສຸ ຐາເນສຸ ປູຊຍໂຕ ກິໍ ທານໍ ປຐມໍ ຘຣມາເນ ພຸທ຺ຘາທີ ປູຊຍໂຕ ນ ສກ຺ກາ ປຸຎ຺ຎໍ ສງ຺ຂາຕຸໍ, ປຸນ ເຕ ຕາທິເສ ກິເລສປຣິນິພ຺ພານນິມິຕ຺ເຕນ ຂນ຺ຘປຣິນິພ຺ພາເນນ ນິພ຺ພຸເຕປິ ປູຊຍໂຕ ນ ສກ຺ກາ ສງ຺ຂາຕຸນ຺ຕິ ເຠທາ ຍຸຊ຺ຊນ຺ຕິ. ເຕນ ຫິ ວິມານວຕ຺ຖຸມ຺ຫິ –

‘‘ຕິຏ຺ຐນ຺ເຕ ນິພ຺ພຸເຕ ຈາປິ, ສເມ ຈິຕ຺ເຕ ສມໍ ຜລໍ;

ເຈໂຕປຓິຘິເຫຕຸ ຫິ, ສຕ຺ຕາ ຄຈ຺ຉນ຺ຕິ ສຸຄ຺ຄຕິ’’ນ຺ຕິ. (ວິ. ວ. ໘໐໖);

ເທສນາວສາເນ ໂສ ພ຺ຣາຫ຺ມໂຓ ໂສຕາປນ຺ໂນ ອໂຫສີຕິ. ໂຍຊນິກໍ ກນກເຈຕິຍໍ ສຕ຺ຕາຫມາກາເສວ ອຏ຺ຐາສິ, ມຫນ຺ເຕນ ສມາຄໂມ ຈາໂຫສິ, ສຕ຺ຕາຫໍ ເຈຕິຍໍ ນານປ຺ປກາເຣນ ປູເຊສຸໍ. ຕໂຕ ຠິນ຺ນລທ຺ຘິການໍ ລທ຺ຘິເຠໂທ ຊາໂຕ, ພຸທ຺ຘານຸຠາເວນ ຕໍ ເຈຕິຍໍ ສກຏ຺ຐານເມວ ຄຕໍ, ຕຕ຺ເຖວ ຕໍຂເຓ ມຫນ຺ຕໍ ປາສາຓເຈຕິຍໍ ອໂຫສິ. ຕສ຺ມິໍ ສມາຄເມ ຈຕຸຣາສີຕິຍາ ປາຓສຫສ຺ສານໍ ຘມ຺ມາຠິສມໂຍ ອໂຫສີຕິ.

ກສ຺ສປທສພລສ຺ສ ສຸວຓ຺ຓເຈຕິຍວຕ຺ຖຸ ນວມໍ.

ພຸທ຺ຘວຄ຺ຄວຓ຺ຓນາ ນິຏ຺ຐິຕາ.

ຈຸທ຺ທສໂມ ວຄ຺ໂຄ.

ປຐມຠາຓວາຣໍ ນິຏ຺ຐິຕໍ.