໓. ປຎ຺ຈສຕວິປສ຺ສກຠິກ຺ຂຸວຕ຺ຖຸ

ຍຖາ ປຸພ຺ພຸຬກນ຺ຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ປຎ຺ຈສເຕ ວິປສ຺ສເກ ຠິກ຺ຂູ ອາຣພ຺ຠ ກເຖສິ.

ເຕ ກິຣ ສຕ຺ຖຸ ສນ຺ຕິເກ ກມ຺ມຏ຺ຐານໍ ຄເຫຕ຺ວາ ອຣຎ຺ຎໍ ປວິສິຕ຺ວາ ຆເຏນ຺ຕາ ວາຍມນ຺ຕາ ອປ຺ປວິເສສາ ‘‘ວິເສເສຕ຺ວາ ກມ຺ມຏ຺ຐານໍ ຄເຫສ຺ສາມາ’’ຕິ ສຕ຺ຖຸ ສນ຺ຕິກໍ ອາຄຈ຺ຉນ຺ຕາ ອນ຺ຕຣາມຄ຺ເຄ ມຣີຈິກມ຺ມຏ຺ຐານໍ ຠາເວນ຺ຕາວ ອາຄມິໍສຸ. ເຕສໍ ວິຫາຣໍ ປວິຏ຺ຐກ຺ຂເຓເຍວ ເທໂວ ວສ຺ສິ. ເຕ ຕຕ຺ຖ ຕຕ຺ຖ ປມຸເຂສຸ ຐຕ຺ວາ ຘາຣາເວເຄນ ອຸຏ຺ຐຫິຕ຺ວາ ຠິຊ຺ຊນ຺ເຕ ປຸພ຺ພຬເກ ທິສ຺ວາ ‘‘ອຍມ຺ປິ ອຕ຺ຕຠາໂວ ອຸປ຺ປຊ຺ຊິຕ຺ວາ ຠິຊ຺ຊນຕ຺ເຖນ ປຸພ຺ພຸຬກສທິໂສເຍວາ’’ຕິ ອາຣມ຺ມຓໍ ຄຓ຺ຫິໍສຸ. ສຕ຺ຖາ ຄນ຺ຘກຸຏິຍໍ ນິສິນ຺ໂນວ ເຕ ຠິກ຺ຂູ ໂອໂລເກຕ຺ວາ ເຕຫິ ສທ຺ຘິໍ ກເຖນ຺ໂຕ ວິຍ ໂອຠາສໍ ຜຣິຕ຺ວາ ອິມໍ ຄາຖມາຫ –

໑໗໐. ‘‘ຍຖາ ປຸພ຺ພຸຬກໍ ປສ຺ເສ, ຍຖາ ປສ຺ເສ ມຣີຈິກໍ;

ເອວໍ ໂລກໍ ອເວກ຺ຂນ຺ຕໍ, ມຈ຺ຈຸຣາຊາ ນ ປສ຺ສຕີ’’ຕິ.

ຕຕ຺ຖ ມຣີຈິກນ຺ຕິ ມຍູຂໍ. ເຕ ຫິ ທູຣໂຕວ ເຄຫສຓ຺ຐານາທິວເສນ ອຸປຏ຺ຐິຕາປິ ອຸປຄຈ຺ຉນ຺ຕານໍ ອຄຍ຺ຫູປຄາ ຣິຕ຺ຕກາ ຕຸຈ຺ຉກາວ. ຕສ຺ມາ ຍຖາ ອຸປ຺ປຊ຺ຊິຕ຺ວາ ຠິຊ຺ຊນຕ຺ເຖນ ປຸພ຺ພຸຬກໍ ຣິຕ຺ຕຕຸຈ຺ຉາທິຠາເວເນວ ປສ຺ເສຍ຺ຍ, ເອວໍ ຂນ຺ຘາທິໂລກໍ ອເວກ຺ຂນ຺ຕໍ ມຈ຺ຈຸຣາຊາ ນ ປສ຺ສຕີຕິ ອຕ຺ໂຖ.

ເທສນາວສາເນ ເຕ ຠິກ຺ຂູ ຐິຕຏ຺ຐາເນເຍວ ອຣຫຕ຺ຕໍ ປາປຸຓິໍສູຕິ.

ປຎ຺ຈສຕວິປສ຺ສກຠິກ຺ຂຸວຕ຺ຖຸ ຕຕິຍໍ.