໔. ອຠຍຣາຊກຸມາຣວຕ຺ຖຸ

ເອຖ ປສ຺ສຖິມໍ ໂລກນ຺ຕິ ອິມໍ ຘມ຺ມເທສນໍ ສຕ຺ຖາ ເວຬຸວເນ ວິຫຣນ຺ໂຕ ອຠຍຣາຊກຸມາຣໍ ອາຣພ຺ຠ ກເຖສິ.

ຕສ຺ສ ກິຣ ປຈ຺ຈນ຺ຕໍ ວູປສເມຕ຺ວາ ອາຄຕສ຺ສ ປິຕາ ພິມ຺ພິສາໂຣ ຕຸສ຺ສິຕ຺ວາ ເອກໍ ນຈ຺ຈຄີຕກຸສລໍ ນາຏກິຕ຺ຖິໍ ທຕ຺ວາ ສຕ຺ຕາຫໍ ຣຊ຺ຊມທາສິ. ໂສ ສຕ຺ຕາຫໍ ເຄຫາ ພຫິ ອນິກ຺ຂນ຺ໂຕວ ຣຊ຺ຊສິຣິໍ ອນຸຠວິຕ຺ວາ ອຏ຺ຐເມ ທິວເສ ນທີຕິຕ຺ຖໍ ຄນ຺ຕ຺ວາ ນ຺ຫຕ຺ວາ ອຸຍ຺ຍານໍ ປວິສິຕ຺ວາ ສນ຺ຕຕິມຫາມຕ຺ໂຕ ວິຍ ຕສ຺ສາ ອິຕ຺ຖິຍາ ນຈ຺ຈຄີຕໍ ປສ຺ສນ຺ໂຕ ນິສີທິ. ສາປິ ຕງ຺ຂຓຎ຺ເຎວ ສນ຺ຕຕິມຫາມຕ຺ຕສ຺ສ ນາຏກິຕ຺ຖີ ວິຍ ສຕ຺ຖກວາຕານໍ ວເສນ ກາລມກາສິ. ກຸມາໂຣ ຕສ຺ສາ ກາລກິຣິຍາຍ ອຸປ຺ປນ຺ນໂສໂກ ‘‘ນ ເມ ອິມໍ ໂສກໍ ຐເປຕ຺ວາ ສຕ຺ຖາຣໍ ອຎ຺ໂຎ ນິພ຺ພາເປຕຸໍ ສກ຺ຂິສ຺ສຕີ’’ຕິ ສຕ຺ຖາຣໍ ອຸປສງ຺ກມິຕ຺ວາ, ‘‘ຠນ຺ເຕ, ໂສກໍ ເມ ນິພ຺ພາເປຖາ’’ຕິ ອາຫ. ສຕ຺ຖາ ຕໍ ສມສ຺ສາເສຕ຺ວາ ‘‘ຕຍາ ຫິ, ກຸມາຣ, ອິມິສ຺ສາ ອິຕ຺ຖິຍາ ເອວເມວ ມຕກາເລ ໂຣທນ຺ເຕນ ປວຕ຺ຕິຕານໍ ອສ຺ສູນໍ ອນມຕຄ຺ເຄ ສໍສາເຣ ປມາຓໍ ນຕ຺ຖີ’’ຕິ ວຕ຺ວາ ຕາຍ ເທສນາຍ ໂສກສ຺ສ ຕນຸຠາວໍ ຎຕ຺ວາ, ‘‘ກຸມາຣ, ມາ ໂສຈິ, ພາລຊນານໍ ສໍສີທນຏ຺ຐານເມຕ’’ນ຺ຕິ ວຕ຺ວາ ອິມໍ ຄາຖມາຫ –

໑໗໑. ‘‘ເອຖ ປສ຺ສຖິມໍ ໂລກໍ, ຈິຕ຺ຕໍ ຣາຊຣຖູປມໍ;

ຍຕ຺ຖ ພາລາ ວິສີທນ຺ຕິ, ນຕ຺ຖິ ສງ຺ໂຄ ວິຊານຕ’’ນ຺ຕິ.

ຕຕ຺ຖ ເຕ ປສ຺ສຖາຕິ ຣາຊກຸມາຣເມວ ສນ຺ຘາຍາຫ. ອິມໍ ໂລກນ຺ຕິ ອິມໍ ຂນ຺ຘໂລກາທິສງ຺ຂາຕໍ ອຕ຺ຕຠາວໍ. ຈິຕ຺ຕນ຺ຕິ ສຕ຺ຕຣຕນາທິວິຈິຕ຺ຕໍ ຣາຊຣຖໍ ວິຍ ວຕ຺ຖາລງ຺ກາຣາທິຈິຕ຺ຕິຕໍ. ຍຕ຺ຖ ພາລາຕິ ຍສ຺ມິໍ ອຕ຺ຕຠາເວ ພາລາ ເອວໍ ວິສີທນ຺ຕິ. ວິຊານຕນ຺ຕິ ວິຊານນ຺ຕານໍ ປຓ຺ຑິຕານໍ ເອຕ຺ຖ ຣາຄສງ຺ຄາທີສຸ ເອໂກປິ ສງ຺ໂຄ ນຕ຺ຖີຕິ ອຕ຺ໂຖ.

ເທສນາວສາເນ ຣາຊກຸມາໂຣ ໂສຕາປຕ຺ຕິຜເລ ປຕິຏ຺ຐຫິ, ສມ຺ປຕ຺ຕານມ຺ປິ ສາຕ຺ຖິກາ ຘມ຺ມເທສນາ ອໂຫສີຕິ.

ອຠຍຣາຊກຸມາຣວຕ຺ຖຸ ຈຕຸຕ຺ຖໍ.