໒. ສຸທ຺ໂຘທນວຕ຺ຖຸ

ອຸຕ຺ຕິຏ຺ເຐຕິ ອິມໍ ຘມ຺ມເທສນໍ ສຕ຺ຖາ ນິຄ຺ໂຣຘາຣາເມ ວິຫຣນ຺ໂຕ ປິຕຣໍ ອາຣພ຺ຠ ກເຖສິ.

ເອກສ຺ມິຎ຺ຫິ ສມເຍ ສຕ຺ຖາ ປຐມຄມເນນ ກປິລປຸຣໍ ຄນ຺ຕ຺ວາ ຎາຕີຫິ ກຕປຈ຺ຈຸຄ຺ຄມໂນ ນິຄ຺ໂຣຘາຣາມໍ ປຕ຺ວາ ຎາຕີນໍ ມານຠິນ຺ທນຕ຺ຖາຍ ອາກາເສ ຣຕນຈງ຺ກມໍ ມາເປຕ຺ວາ ຕຕ຺ຖ ຈງ຺ກມນ຺ໂຕ ຘມ຺ມໍ ເທເສສິ. ຎາຕີ ປສນ຺ນຈິຕ຺ຕາ ສຸທ຺ໂຘທນມຫາຣາຊານໍ ອາທິໍ ກຕ຺ວາ ວນ຺ທິໍສຸ. ຕສ຺ມິໍ ຎາຕິສມາຄເມ ໂປກ຺ຂຣວສ຺ສໍ ວສ຺ສິ. ຕໍ ອາຣພ຺ຠ ມຫາຊເນນ ກຖາຍ ສມຸຏ຺ຐາປິຕາຍ ‘‘ນ, ຠິກ຺ຂເວ, ອິທາເນວ, ປຸພ຺ເພປິ ມຍ຺ຫໍ ຎາຕິສມາຄເມ ໂປກ຺ຂຣວສ຺ສໍ ວສ຺ສິເຍວາ’’ຕິ ວຕ຺ວາ ເວສ຺ສນ຺ຕຣຊາຕກໍ (ຊາ. ໒.໒໒.໑໖໕໕ ອາທໂຍ) ກເຖສິ. ຘມ຺ມເທສນໍ ສຸຕ຺ວາ ປກ຺ກມນ຺ເຕສຸ ຎາຕີສຸ ເອໂກປິ ສຕ຺ຖາຣໍ ນ ນິມນ຺ເຕສິ. ຣາຊາປິ ‘‘ມຍ຺ຫໍ ປຸຕ຺ໂຕ ມມ ເຄຫໍ ອນາຄນ຺ຕ຺ວາ ກຫໍ ຄມິສ຺ສຕີ’’ຕິ ອນິມນ຺ເຕຕ຺ວາວ ອຄມາສິ. ຄນ຺ຕ຺ວາ ຈ ປນ ເຄເຫ ວີສຕິຍາ ຠິກ຺ຂຸສຫສ຺ສານໍ ຍາຄຸອາທີນິ ປຏິຍາທາເປຕ຺ວາ ອາສນານິ ປຎ຺ຎາເປສິ. ປຸນທິວເສ ສຕ຺ຖາ ປິຓ຺ຑາຍ ປວິສນ຺ໂຕ ‘‘ກິໍ ນຸ ໂຂ ອຕີຕພຸທ຺ຘາ ປິຕຸ ນຄຣໍ ປຕ຺ວາ ອຸຊຸກເມວ ຎາຕິກຸລໍ ປວິສິໍສຸ, ອຸທາຫຸ ປຏິປາຏິຍາ ປິຓ຺ຑາຍ ຈຣິໍສູ’’ຕິ ອາວຊ຺ເຊນ຺ໂຕ ‘‘ປຏິປາຏິຍາ ຈຣິໍສູ’’ຕິ ທິສ຺ວາ ປຐມເຄຫໂຕ ປຏ຺ຐາຍ ປິຓ຺ຑາຍ ຈຣນ຺ໂຕ ປາຍາສິ. ຣາຫຸລມາຕາ ປາສາທຕເລ ນິສິນ຺ນາວ ທິສ຺ວາ ຕໍ ປວຕ຺ຕິໍ ຣຎ຺ໂຎ ອາໂຣເຈສິ. ຣາຊາ ສາຏກໍ ສຓ຺ຐາເປນ຺ໂຕ ເວເຄນ ນິກ຺ຂມິຕ຺ວາ ສຕ຺ຖາຣໍ ວນ຺ທິຕ຺ວາ – ‘‘ປຸຕ຺ຕ, ກສ຺ມາ ມໍ ນາເສສິ, ອຕິວິຍ ເຕ ປິຓ຺ຑາຍ ຈຣນ຺ເຕນ ລຊ຺ຊາ ອຸປ຺ປາທິຕາ, ຍຸຕ຺ຕໍ ນາມ ໂວ ອິມສ຺ມິໍເຍວ ນຄເຣ ສຸວຓ຺ຓສິວິກາທີຫິ ວິຈຣິຕ຺ວາ ປິຓ຺ຑາຍ ຈຣິຕຸໍ, ກິໍ ມໍ ລຊ຺ຊາເປສີ’’ຕິ? ‘‘ນາຫໍ ຕໍ, ມຫາຣາຊ, ລຊ຺ຊາເປມິ, ອຕ຺ຕໂນ ປນ ກຸລວໍສໍ ອນຸວຕ຺ຕາມີ’’ຕິ. ‘‘ກິໍ ປນ, ຕາຕ, ປິຓ຺ຑາຍ ຈຣິຕ຺ວາ ຊີວນວໍໂສ ມມ ວໍໂສ’’ຕິ? ‘‘ເນໂສ, ມຫາຣາຊ, ຕວ ວໍໂສ, ມມ ປເນໂສ ວໍໂສ. ອເນການິ ຫິ ພຸທ຺ຘສຫສ຺ສານິ ປິຓ຺ຑາຍ ຈຣິຕ຺ວາວ ຊີວິໍສູ’’ຕິ ວຕ຺ວາ ຘມ຺ມໍ ເທເສນ຺ໂຕ ອິມາ ຄາຖາ ອຠາສິ –

໑໖໘. ‘‘ອຸຕ຺ຕິຏ຺ເຐ ນປ຺ປມຊ຺ເຊຍ຺ຍ, ຘມ຺ມໍ ສຸຈຣິຕໍ ຈເຣ;

ຘມ຺ມຈາຣີ ສຸຂໍ ເສຕິ, ອສ຺ມິໍ ໂລເກ ປຣມ຺ຫິ ຈ.

໑໖໙. ‘‘ຘມ຺ມໍ ຈເຣ ສຸຈຣິຕໍ, ນ ນໍ ທຸຈ຺ຈຣິຕໍ ຈເຣ;

ຘມ຺ມຈາຣີ ສຸຂໍ ເສຕິ, ອສ຺ມິໍ ໂລເກ ປຣມ຺ຫິ ຈາ’’ຕິ.

ຕຕ຺ຖ ອຸຕ຺ຕິຏ຺ເຐຕິ ອຸຏ຺ຐຫິຕ຺ວາ ປເຣສໍ ຆຣທ຺ວາເຣ ຐຕ຺ວາ ຄເຫຕພ຺ພປິຓ຺ເຑ. ນປ຺ປມຊ຺ເຊຍ຺ຍາຕິ ປິຓ຺ຑຈາຣິກວຕ຺ຕຎ຺ຫິ ຫາເປຕ຺ວາ ປຓີຕໂຠຊນານິ ປຣິເຍສນ຺ໂຕ ອຸຕ຺ຕິຏ຺ເຐ ປມຊ຺ຊຕິ ນາມ, ສປທານໍ ປິຓ຺ຑາຍ ຈຣນ຺ໂຕ ປນ ນ ປມຊ຺ຊຕິ ນາມ. ເອວໍ ກໂຣນ຺ໂຕ ອຸຕ຺ຕິຏ຺ເຐ ນປ຺ປມຊ຺ເຊຍ຺ຍ. ຘມ຺ມນ຺ຕິ ອເນສນໍ ປຫາຍ ສປທານໍ ຈຣນ຺ໂຕ ຕເມວ ຠິກ຺ຂາຈຣິຍຘມ຺ມໍ ສຸຈຣິຕໍ ຈເຣ. ສຸຂໍ ເສຕີຕິ ເທສນາມຕ຺ຕເມຕໍ, ເອວໍ ປເນຕໍ ຠິກ຺ຂາຈຣິຍຘມ຺ມໍ ຈຣນ຺ໂຕ ຘມ຺ມຈາຣີ ອິຘ ໂລເກ ຈຕູຫິ ອິຣິຍາປເຖຫິ ສຸຂໍ ວິຫຣຕີຕິ ອຕ຺ໂຖ. ນ ນໍ ທຸຈ຺ຈຣິຕນ຺ຕິ ເວສິຍາທິເຠເທ ອໂຄຈເຣ ຈຣນ຺ໂຕ ຠິກ຺ຂາຈຣິຍຘມ຺ມໍ ທຸຈ຺ຈຣິຕໍ ຈຣຕິ ນາມ. ເອວໍ ອຈຣິຕ຺ວາ ຘມ຺ມໍ ຈເຣ ສຸຈຣິຕໍ, ນ ນໍ ທຸຈ຺ຈຣິຕໍ ຈເຣ. ເສສໍ ວຸຕ຺ຕຕ຺ຖເມວ.

ເທສນາວສາເນ ຣາຊາ ໂສຕາປຕ຺ຕິຜເລ ປຕິຏ຺ຐຫິ, ສມ຺ປຕ຺ຕານມ຺ປິ ສາຕ຺ຖິກາ ຘມ຺ມເທສນາ ອໂຫສີຕິ.

ສຸທ຺ໂຘທນວຕ຺ຖຸ ທຸຕິຍໍ.