໑໑. ອນາຖປິຓ຺ຑກປຸຕ຺ຕກາລວຕ຺ຖຸ

ປຖພ຺ຍາ ເອກຣຊ຺ເຊນາຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ກາລໍ ນາມ ອນາຖປິຓ຺ຑິກສ຺ສ ປຸຕ຺ຕໍ ອາຣພ຺ຠ ກເຖສິ.

ໂສ ກິຣ ຕຖາວິຘສ຺ສ ສທ຺ຘາສມ຺ປນ຺ນສ຺ສ ເສຏ຺ຐິໂນ ປຸຕ຺ໂຕ ຫຸຕ຺ວາ ເນວ ສຕ຺ຖຸ ສນ຺ຕິກໍ ຄນ຺ຕຸໍ, ນ ເຄຫໍ ອາຄຕກາເລ ທຏ຺ຐຸໍ, ນ ຘມ຺ມໍ ໂສຕຸໍ, ນ ສງ຺ຆສ຺ສ ເວຍ຺ຍາວຈ຺ຈໍ ກາຕຸໍ ອິຈ຺ຉຕິ. ປິຕຣາ ‘‘ມາ ເອວໍ, ຕາຕ, ກຣີ’’ຕິ ວຸຕ຺ໂຕປິ ຕສ຺ສ ວຈນໍ ນ ສຸຓາຕິ. ອຖສ຺ສ ປິຕາ ຈິນ຺ເຕສິ – ‘‘ອຍໍ ເອວຣູປໍ ທິຏ຺ຐິໍ ຄເຫຕ຺ວາ ວິຈຣນ຺ໂຕ ອວີຈິປຣາຍໂຓ ຠວິສ຺ສຕິ, ນ ໂຂ ປເນຕໍ ປຕິຣູປໍ, ຍໍ ມຍິ ປສ຺ສນ຺ເຕ ມມ ປຸຕ຺ໂຕ ນິຣຍໍ ຄຈ຺ເຉຍ຺ຍ. ອິມສ຺ມິໍ ໂຂ ປນ ໂລເກ ຘນທາເນນ ອຠິຊ຺ຊນກສຕ຺ໂຕ ນາມ ນຕ຺ຖິ, ຘເນນ ນໍ ຠິນ຺ທິສ຺ສາມີ’’ຕິ. ອຖ ນໍ ອາຫ – ‘‘ຕາຕ, ອຸໂປສຖິໂກ ຫຸຕ຺ວາ ວິຫາຣໍ ຄນ຺ຕ຺ວາ ຘມ຺ມໍ ສຸຕ຺ວາ ເອຫິ, ກຫາປຓສຕໍ ເຕ ທສ຺ສາມີ’’ຕິ. ທສ຺ສຖ, ຕາຕາຕິ. ທສ຺ສາມິ, ປຸຕ຺ຕາຕິ. ໂສ ຍາວຕຕິຍໍ ປຏິຎ຺ຎໍ ຄເຫຕ຺ວາ ອຸໂປສຖິໂກ ຫຸຕ຺ວາ ວິຫາຣໍ ອຄມາສິ. ຘມ຺ມສ຺ສວເນນ ປນສ຺ສ ກິຈ຺ຈໍ ນຕ຺ຖິ, ຍຖາຜາສຸກຏ຺ຐາເນ ສຍິຕ຺ວາ ປາໂຕວ ເຄຫໍ ອຄມາສິ. ອຖສ຺ສ ປິຕາ ‘‘ປຸຕ຺ໂຕ ເມ ອຸໂປສຖິໂກ ອໂຫສິ, ສີຆມສ຺ສ ຍາຄຸອາທີນິ ອາຫຣຖາ’’ຕິ ວຕ຺ວາ ທາເປສິ. ໂສ ‘‘ກຫາປເຓ ອຄ຺ຄເຫຕ຺ວາ ນ ຠຸຎ຺ຊິສ຺ສາມີ’’ຕິ ອາຫຏາຫຏໍ ປຏິກ຺ຂິປິ. ອຖສ຺ສ ປິຕາ ປີຬໍ ອສຫນ຺ໂຕ ກຫາປຓຠຓ຺ຑໍ ທາເປສິ. ໂສ ຕໍ ຫຕ຺ເຖນ ຄເຫຕ຺ວາວ ອາຫາຣໍ ປຣິຠຸຎ຺ຊິ.

ອຖ ນໍ ປຸນທິວເສ ເສຏ຺ຐິ, ‘‘ຕາຕ, ກຫາປຓສຫສ຺ສໍ ເຕ ທສ຺ສາມິ, ສຕ຺ຖຸ ປຸຣໂຕ ຐຕ຺ວາ ເອກໍ ຘມ຺ມປທໍ ອຸຄ຺ຄຓ຺ຫິຕ຺ວາ ອາຄຈ຺ເຉຍ຺ຍາສີ’’ຕິ ເປເສສິ. ໂສປິ ວິຫາຣໍ ຄນ຺ຕ຺ວາ ສຕ຺ຖຸ ປຸຣໂຕ ຐຕ຺ວາວ ເອກເມວ ປທໍ ອຸຄ຺ຄຓ຺ຫິຕ຺ວາ ປລາຍິຕຸກາໂມ ອໂຫສິ. ອຖສ຺ສ ສຕ຺ຖາ ອສລ຺ລກ຺ຂຓາກາຣໍ ອກາສິ. ໂສ ຕໍ ປທໍ ອສລ຺ລກ຺ເຂຕ຺ວາ ອຸປຣິປທໍ ອຸຄ຺ຄຓ຺ຫິສ຺ສາມີຕິ ຐຕ຺ວາ ອສ຺ໂສສິເຍວ. ອຸຄ຺ຄຓ຺ຫິສ຺ສາມີຕິ ສຸຓນ຺ໂຕວ ກິຣ ສກ຺ກຈ຺ຈໍ ສຸຓາຕິ ນາມ. ເອວຎ຺ຈ ກິຣ ສຸຓນ຺ຕານໍ ຘມ຺ໂມ ໂສຕາປຕ຺ຕິມຄ຺ຄາທໂຍ ເທຕິ. ໂສປິ ອຸຄ຺ຄຓ຺ຫິສ຺ສາມີຕິ ສຸຓາຕິ, ສຕ຺ຖາປິສ຺ສ ອສລ຺ລກ຺ຂຓາກາຣໍ ກໂຣຕິ. ໂສ ‘‘ອຸປຣິປທໍ ອຸຄ຺ຄຓ຺ຫິສ຺ສາມີ’’ຕິ ຐຕ຺ວາ ສຸຓນ຺ໂຕວ ໂສຕາປຕ຺ຕິຜເລ ປຕິຏ຺ຐາສິ.

ໂສ ປຸນທິວເສ ພຸທ຺ຘປ຺ປມຸເຂນ ຠິກ຺ຂຸສງ຺ເຆນ ສທ຺ຘິໍເຍວ ສາວຕ຺ຖິໍ ປາວິສິ. ມຫາເສຏ຺ຐິ ຕໍ ທິສ຺ວາ ‘‘ອຊ຺ຊ ມມ ປຸຕ຺ຕສ຺ສ ອາກາໂຣ ຣຸຈ຺ຈຕີ’’ຕິ ຈິນ຺ເຕສິ. ຕສ຺ສປິ ເອຕທໂຫສິ – ‘‘ອໂຫ ວຕ ເມ ປິຕາ ອຊ຺ຊ ສຕ຺ຖຸ ສນ຺ຕິເກ ກຫາປເຓ ນ ທເທຍ຺ຍ, ກຫາປຓກາຣຓາ ມຍ຺ຫໍ ອຸໂປສຖິກຠາວໍ ປຏິຈ຺ຉາເທຍ຺ຍາ’’ຕິ. ສຕ຺ຖາ ປນສ຺ສ ຫິຍ຺ໂຍວ ກຫາປຓສ຺ສ ກາຣຓາ ອຸໂປສຖິກຠາວໍ ອຎ຺ຎາສິ. ມຫາເສຏ຺ຐິ, ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ຍາຄຸໍ ທາເປຕ຺ວາ ປຸຕ຺ຕສ຺ສປິ ທາເປສິ. ໂສ ນິສີທິຕ຺ວາ ຕຸຓ຺ຫີຠູໂຕວ ຍາຄຸໍ ປິວິ, ຂາທນີຍໍ ຂາທິ, ຠຕ຺ຕໍ ຠຸຎ຺ຊິ. ມຫາເສຏ຺ຐິ ສຕ຺ຖຸ ຠຕ຺ຕກິຈ຺ຈາວສາເນ ປຸຕ຺ຕສ຺ສ ປຸຣໂຕ ສຫສ຺ສຠຓ຺ຑິກໍ ຐປາເປຕ຺ວາ, ‘‘ຕາຕ, ມຍາ ເຕ ‘ສຫສ຺ສໍ ທສ຺ສາມີ’ຕິ ວຕ຺ວາ ອຸໂປສຖໍ ສມາທາເປຕ຺ວາ ວິຫາຣໍ ປຫິໂຕ. ອິທໍ ເຕ ສຫສ຺ສ’’ນ຺ຕິ ອາຫ. ໂສ ສຕ຺ຖຸ ປຸຣໂຕ ກຫາປເຓ ທິຍ຺ຍມາເນ ທິສ຺ວາ ລຊ຺ຊນ຺ໂຕ ‘‘ອລໍ ເມ ກຫາປເຓຫີ’’ຕິ ວຕ຺ວາ, ‘‘ຄຓ຺ຫ, ຕາຕາ’’ຕິ ວຸຈ຺ຈມາໂນປິ ນ ຄຓ຺ຫິ. ອຖສ຺ສ ປິຕາ ສຕ຺ຖາຣໍ ວນ຺ທິຕ຺ວາ, ‘‘ຠນ຺ເຕ, ອຊ຺ຊ ເມ ປຸຕ຺ຕສ຺ສ ອາກາໂຣ ຣຸຈ຺ຈຕີ’’ຕິ ວຕ຺ວາ ‘‘ກິໍ, ມຫາເສຏ຺ຐີ’’ຕິ ວຸຕ຺ເຕ ‘‘ມຍາ ເອສ ປຸຣິມທິວເສ ‘ກຫາປຓສຕໍ ເຕ ທສ຺ສາມີ’ຕິ ວຕ຺ວາ ວິຫາຣໍ ເປສິໂຕ. ປຸນທິວເສ ກຫາປເຓ ອຄ຺ຄເຫຕ຺ວາ ຠຸຎ຺ຊິຕຸໍ ນ ອິຈ຺ຉິ, ອຊ຺ຊ ປນ ທິຍ຺ຍມາເນປິ ກຫາປເຓ ນ ອິຈ຺ຉຕີ’’ຕິ ອາຫ. ສຕ຺ຖາ ‘‘ອາມ, ມຫາເສຏ຺ຐິ, ອຊ຺ຊ ຕວ ປຸຕ຺ຕສ຺ສ ຈກ຺ກວຕ຺ຕິສມ຺ປຕ຺ຕິໂຕປິ ເທວໂລກພ຺ຣຫ຺ມໂລກສມ຺ປຕ຺ຕີຫິປິ ໂສຕາປຕ຺ຕິຜລເມວ ວຣ’’ນ຺ຕິ ວຕ຺ວາ ອິມໍ ຄາຖມາຫ –

໑໗໘. ‘‘ປຖພ຺ຍາ ເອກຣຊ຺ເຊນ, ສຄ຺ຄສ຺ສ ຄມເນນ ວາ;

ສພ຺ພໂລກາຘິປຈ຺ເຈນ, ໂສຕາປຕ຺ຕິຜລໍ ວຣ’’ນ຺ຕິ.

ຕຕ຺ຖ ປຖພ຺ຍາ ເອກຣຊ຺ເຊນາຕິ ຈກ຺ກວຕ຺ຕິຣຊ຺ເຊນ. ສຄ຺ຄສ຺ສ ຄມເນນ ວາຕິ ຉພ຺ພີສຕິວິຘສ຺ສ ສຄ຺ຄສ຺ສ ອຘິຄມເນນ. ສພ຺ພໂລກາຘິປຈ຺ເຈນາຕິ ນ ເອກສ຺ມິໍ ເອຕ຺ຕເກ ໂລເກ ນາຄສຸປຓ຺ຓເວມານິກເປເຕຫິ ສທ຺ຘິໍ, ສພ຺ພສ຺ມິໍ ໂລເກ ອາຘິປຈ຺ເຈນ. ໂສຕາປຕ຺ຕິຜລໍ ວຣນ຺ຕິ ຍສ຺ມາ ເອຕ຺ຕເກ ຐາເນ ຣຊ຺ຊໍ ກາເຣຕ຺ວາປິ ນິຣຍາທີຫິ ອມຸຕ຺ໂຕວ ໂຫຕິ, ໂສຕາປນ຺ໂນ ປນ ປິຫິຕາປາຍທ຺ວາໂຣ ຫຸຕ຺ວາ ສພ຺ພທຸພ຺ພໂລປິ ອຏ຺ຐເມ ຠເວ ນ ນິພ຺ພຕ຺ຕຕິ, ຕສ຺ມາ ໂສຕາປຕ຺ຕິຜລເມວ ວຣໍ ອຸຕ຺ຕມນ຺ຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ອນາຖປິຓ຺ຑກປຸຕ຺ຕກາລວຕ຺ຖຸ ເອກາທສມໍ.

ໂລກວຄ຺ຄວຓ຺ຓນາ ນິຏ຺ຐິຕາ.

ເຕຣສໂມ ວຄ຺ໂຄ.