໙. ຈູຬກາລອຸປາສກວຕ຺ຖຸ

ອຕ຺ຕນາ ຫິ ກຕນ຺ຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ຈູຬກາລໍ ອຸປາສກໍ ອາຣພ຺ຠ ກເຖສິ.

ເອກທິວສຎ຺ຫິ ມຫາກາລວຕ຺ຖຸສ຺ມິໍ ວຸຕ຺ຕນເຍເນວ ອຸມງ຺ຄໂຈຣາ ສາມິເກຫິ ອນຸພທ຺ຘາ ຣຕ຺ຕິໍ ວິຫາເຣ ຘມ຺ມກຖໍ ສຸຕ຺ວາ ປາໂຕວ ວິຫາຣາ ນິກ຺ຂມິຕ຺ວາ ສາວຕ຺ຖິໍ ອາຄຈ຺ຉນ຺ຕສ຺ສ ຕສ຺ສ ອຸປາສກສ຺ສ ປຸຣໂຕ ຠຓ຺ຑິກໍ ຉຑ຺ເຑຕ຺ວາ ປລາຍິໍສຸ. ມນຸສ຺ສາ ຕໍ ທິສ຺ວາ ‘‘ອຍໍ ຣຕ຺ຕິໍ ໂຈຣກມ຺ມໍ ກຕ຺ວາ ຘມ຺ມໍ ສຸຓນ຺ໂຕ ວິຍ ຈຣຕິ, ຄຓ຺ຫຖ ນ’’ນ຺ຕິ ຕໍ ໂປຖຍິໍສຸ. ກຸມ຺ຠທາສິໂຍ ອຸທກຕິຕ຺ຖໍ ຄຈ຺ຉມານາ ຕໍ ທິສ຺ວາ ‘‘ອເປຖ, ສາມິ, ນາຍໍ ເອວຣູປໍ ກໂຣຕີ’’ຕິ ຕໍ ໂມເຈສຸໍ. ໂສ ວິຫາຣໍ ຄນ຺ຕ຺ວາ, ‘‘ຠນ຺ເຕ, ອຫມ຺ຫິ ມນຸສ຺ເສຫິ ນາສິໂຕ, ກຸມ຺ຠທາສິໂຍ ເມ ນິສ຺ສາຍ ຊີວິຕໍ ລທ຺ຘ’’ນ຺ຕິ ຠິກ຺ຂູນໍ ອາໂຣເຈສິ. ຠິກ຺ຂູ ຕຖາຄຕສ຺ສ ຕມຕ຺ຖໍ ອາໂຣເຈສຸໍ. ສຕ຺ຖາ ເຕສໍ ກຖໍ ສຸຕ຺ວາ, ‘‘ຠິກ຺ຂເວ, ຈູຬກາລອຸປາສໂກ ກຸມ຺ຠທາສິໂຍ ເຈວ ນິສ຺ສາຍ, ອຕ຺ຕໂນ ຈ ອກຣຓຠາເວນ ຊີວິຕໍ ລຠິ. ອິເມ ຫິ ນາມ ສຕ຺ຕາ ອຕ຺ຕນາ ປາປກມ຺ມໍ ກຕ຺ວາ ນິຣຍາທີສຸ ອຕ຺ຕນາວ ກິລິສ຺ສນ຺ຕິ, ກຸສລໍ ກຕ຺ວາ ປນ ສຸຄຕິຎ຺ເຈວ ນິພ຺ພານຎ຺ຈ ຄຈ຺ຉນ຺ຕາ ອຕ຺ຕນາວ ວິສຸຊ຺ຌນ຺ຕີ’’ຕິ ວຕ຺ວາ ອິມໍ ຄາຖມາຫ –

໑໖໕. ‘‘ອຕ຺ຕນາ ຫິ ກຕໍ ປາປໍ, ອຕ຺ຕນາ ສໍກິລິສ຺ສຕິ;

ອຕ຺ຕນາ ອກຕໍ ປາປໍ, ອຕ຺ຕນາວ ວິສຸຊ຺ຌຕິ;

ສຸທ຺ຘີ ອສຸທ຺ຘິ ປຈ຺ຈຕ຺ຕໍ, ນາຎ຺ໂຎ ອຎ຺ຎໍ ວິໂສຘເຍ’’ຕິ.

ຕສ຺ສຕ຺ໂຖ – ເຍນ ອຕ຺ຕນາ ອກຸສລກມ຺ມໍ ກຕໍ ໂຫຕິ, ໂສ ຈຕູສຸ ອປາເຍສຸ ທຸກ຺ຂໍ ອນຸຠວນ຺ໂຕ ອຕ຺ຕນາວ ສໍກິລິສ຺ສຕິ. ເຍນ ປນ ອຕ຺ຕນາ ອກຕໍ ປາປໍ, ໂສ ສຸຄຕິຎ຺ເຈວ ນິພ຺ພານຎ຺ຈ ຄຈ຺ຉນ຺ໂຕ ອຕ຺ຕນາວ ວິສຸຊ຺ຌຕິ. ກຸສລກມ຺ມສງ຺ຂາຕາ ສຸທ຺ຘິ ອກຸສລກມ຺ມສງ຺ຂາຕາ ຈ ອສຸທ຺ຘິ ປຈ຺ຈຕ຺ຕໍ ກາຣກສຕ຺ຕານໍ ອຕ຺ຕນິເຍວ ວິປຈ຺ຈຕິ. ອຎ຺ໂຎ ປຸຄ຺ຄໂລ ອຎ຺ຎໍ ປຸຄ຺ຄລໍ ນ ວິໂສຘເຍ ເນວ ວິໂສເຘຕິ, ນ ກິເລເສຕີຕິ ວຸຕ຺ຕໍ ໂຫຕິ.

ເທສນາວສາເນ ຈູຬກາໂລ ໂສຕາປຕ຺ຕິຜເລ ປຕິຏ຺ຐຫິ, ສມ຺ປຕ຺ຕປຣິສາຍປິ ສາຕ຺ຖິກາ ຘມ຺ມເທສນາ ອໂຫສີຕິ.

ຈູຬກາລອຸປາສກວຕ຺ຖຸ ນວມໍ.