໑໐. ອຕ຺ຕທຕ຺ຖຕ຺ເຖຣວຕ຺ຖຸ

ອຕ຺ຕທຕ຺ຖນ຺ຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ອຕ຺ຕທຕ຺ຖຕ຺ເຖຣໍ ອາຣພ຺ຠ ກເຖສິ.

ສຕ຺ຖາຣາ ຫິ ປຣິນິພ຺ພານກາເລ, ‘‘ຠິກ຺ຂເວ, ອຫໍ ອິໂຕ ຈຕຸມາສຈ຺ຈເຍນ ປຣິນິພ຺ພາຍິສ຺ສາມີ’’ຕິ ວຸຕ຺ເຕ ອຸປ຺ປນ຺ນສໍເວຄາ ສຕ຺ຕສຕາ ປຸຖຸຊ຺ຊນາ ຠິກ຺ຂູ ສຕ຺ຖຸ ສນ຺ຕິກໍ ອວິຊຫິຕ຺ວາ ‘‘ກິໍ ນຸ ໂຂ, ອາວຸໂສ, ກຣິສ຺ສາມາ’’ຕິ ສມ຺ມນ຺ຕຍມານາ ວິຈຣນ຺ຕິ. ອຕ຺ຕທຕ຺ຖຕ຺ເຖໂຣ ປນ ຈິນ຺ເຕສິ – ‘‘ສຕ຺ຖາ ກິຣ ຈຕຸມາສຈ຺ຈເຍນ ປຣິນິພ຺ພາຍິສ຺ສຕິ, ອຫຎ຺ຈມ຺ຫິ ອວີຕຣາໂຄ, ສຕ຺ຖຣິ ຘຣມາເນເຍວ ອຣຫຕ຺ຕຕ຺ຖາຍ ວາຍມິສ຺ສາມີ’’ຕິ. ໂສ ຠິກ຺ຂູນໍ ສນ຺ຕິກໍ ນ ຄຈ຺ຉຕິ. ອຖ ນໍ ຠິກ຺ຂູ ‘‘ກສ຺ມາ, ອາວຸໂສ, ຕ຺ວໍ ເນວ ອມ຺ຫາກໍ ສນ຺ຕິກໍ ອາຄຈ຺ຉສິ, ນ ກິຎ຺ຈິ ມນ຺ເຕສີ’’ຕິ ວຕ຺ວາ ສຕ຺ຖຸ ສນ຺ຕິກໍ ເນຕ຺ວາ ‘‘ອຍໍ, ຠນ຺ເຕ, ເອວໍ ນາມ ກໂຣຕີ’’ຕິ ອາໂຣຈຍິໍສຸ. ໂສ ສຕ຺ຖາຣາປິ ‘‘ກສ຺ມາ ເອວໍ ກໂຣສີ’’ຕິ ວຸຕ຺ເຕ ‘‘ຕຸມ຺ເຫ ກິຣ, ຠນ຺ເຕ, ຈຕຸມາສຈ຺ຈເຍນ ປຣິນິພ຺ພາຍິສ຺ສຖ, ອຫໍ ຕຸມ຺ເຫສຸ ຘຣນ຺ເຕສຸເຍວ ອຣຫຕ຺ຕປ຺ປຕ຺ຕິຍາ ວາຍມິສ຺ສາມີ’’ຕິ. ສຕ຺ຖາ ຕສ຺ສ ສາຘຸກາຣໍ ທຕ຺ວາ, ‘‘ຠິກ຺ຂເວ, ຍສ຺ສ ມຍິ ສິເນໂຫ ອຕ຺ຖິ, ເຕນ ອຕ຺ຕທຕ຺ເຖນ ວິຍ ຠວິຕຸໍ ວຏ຺ຏຕິ. ນ ຫິ ຄນ຺ຘາທີຫິ ປູເຊນ຺ຕາ ມໍ ປູເຊນ຺ຕິ, ຘມ຺ມານຸຘມ຺ມປຏິປຕ຺ຕິຍາ ປນ ມໍ ປູເຊນ຺ຕິ. ຕສ຺ມາ ອຎ຺ເຎນປິ ອຕ຺ຕທຕ຺ຖສທິເສເນວ ຠວິຕພ຺ພ’’ນ຺ຕິ ວຕ຺ວາ ອິມໍ ຄາຖມາຫ –

໑໖໖. ‘‘ອຕ຺ຕທຕ຺ຖໍ ປຣຕ຺ເຖນ, ພຫຸນາປິ ນ ຫາປເຍ;

ອຕ຺ຕທຕ຺ຖມຠິຎ຺ຎາຍ, ສທຕ຺ຖປສຸໂຕ ສິຍາ’’ຕິ.

ຕສ຺ສຕ຺ໂຖ – ຄິຫິຠູຕາ ຕາວ ກາກຓິກມຕ຺ຕມ຺ປິ ອຕ຺ຕໂນ ອຕ຺ຖໍ ສຫສ຺ສມຕ຺ເຕນາປິ ປຣສ຺ສ ອຕ຺ເຖນ ນ ຫາປເຍ. ກາກຓິກມຕ຺ເຕນາປິ ຫິສ຺ສ ອຕ຺ຕທຕ຺ໂຖວ ຂາທນີຍໍ ວາ ໂຠຊນີຍໍ ວາ ນິປ຺ຜາເທຍ຺ຍ, ນ ປຣຕ຺ໂຖ. ອິທໍ ປນ ເອວໍ ອກເຖຕ຺ວາ ກມ຺ມຏ຺ຐານສີເສນ ກຖິຕໍ, ຕສ຺ມາ ‘‘ອຕ຺ຕທຕ຺ຖໍ ນ ຫາເປມີ’’ຕິ ຠິກ຺ຂຸນາ ນາມ ສງ຺ຆສ຺ສ ອຸປ຺ປນ຺ນໍ ເຈຕິຍປຏິສງ຺ຂຣຓາທິກິຈ຺ຈໍ ວາ ອຸປຊ຺ຌາຍາທິວຕ຺ຕໍ ວາ ນ ຫາເປຕພ຺ພໍ. ອາຠິສມາຈາຣິກວຕ຺ຕຎ຺ຫິ ປູເຣນ຺ໂຕເຍວ ອຣິຍຜລາທີນິ ສຈ຺ຉິກໂຣຕິ, ຕສ຺ມາ ອຍມ຺ປິ ອຕ຺ຕທຕ຺ໂຖວ. ໂຍ ປນ ອຈ຺ຈາຣທ຺ຘວິປສ຺ສໂກ ‘‘ອຊ຺ຊ ວາ ສຸເວ ວາ’’ຕິ ປຏິເວຘໍ ປຕ຺ຖຍມາໂນ ວິຈຣຕິ, ເຕນ ອຸປຊ຺ຌາຍວຕ຺ຕາທີນິປິ ຫາເປຕ຺ວາ ອຕ຺ຕໂນ ກິຈ຺ຈເມວ ກາຕພ຺ພໍ. ເອວຣູປຎ຺ຫິ ອຕ຺ຕທຕ຺ຖມຠິຎ຺ຎາຍ ‘‘ອຍໍ ເມ ອຕ຺ຕໂນ ອຕ຺ໂຖ’’ຕິ ສລ຺ລກ຺ເຂຕ຺ວາ, ສທຕ຺ຖປສຸໂຕ ສິຍາຕິ ຕສ຺ມິໍ ສເກ ອຕ຺ເຖ ອຸຍ຺ຍຸຕ຺ຕປຍຸຕ຺ໂຕ ຠເວຍ຺ຍາຕິ.

ເທສນາວສາເນ ໂສ ເຖໂຣ ອຣຫຕ຺ເຕ ປຕິຏ຺ຐຫິ, ສມ຺ປຕ຺ຕຠິກ຺ຂູນມ຺ປິ ສາຕ຺ຖິກາ ຘມ຺ມເທສນາ ອໂຫສີຕິ.

ອຕ຺ຕທຕ຺ຖຕ຺ເຖຣວຕ຺ຖຸ ທສມໍ.

ອຕ຺ຕວຄ຺ຄວຓ຺ຓນາ ນິຏ຺ຐິຕາ.

ທ຺ວາທສໂມ ວຄ຺ໂຄ.