໙. ມຫາຘນເສຏ຺ຐິປຸຕ຺ຕວຕ຺ຖຸ

ອຈຣິຕ຺ວາຕິ ອິມໍ ຘມ຺ມເທສນໍ ສຕ຺ຖາ ອິສິປຕເນ ມິຄທາເຍ ວິຫຣນ຺ໂຕ ມຫາຘນເສຏ຺ຐິປຸຕ຺ຕໍ ອາຣພ຺ຠ ກເຖສິ.

ໂສ ກິຣ ພາຣາຓສິຍໍ ອສີຕິໂກຏິວິຠເວ ກຸເລ ນິພ຺ພຕ຺ຕິ. ອຖສ຺ສ ມາຕາປິຕໂຣ ຈິນ຺ເຕສຸໍ – ‘‘ອມ຺ຫາກໍ ກຸເລ ມຫາໂຠຄກ຺ຂນ຺ໂຘ, ປຸຕ຺ຕສ຺ສ ໂນ ຫຕ຺ເຖ ຐເປຕ຺ວາ ຍຖາສຸຂໍ ປຣິໂຠຄໍ ກຣິສ຺ສາມ, ອຎ຺ເຎນ ກມ຺ເມນ ກິຈ຺ຈໍ ນຕ຺ຖີ’’ຕິ. ຕໍ ນຈ຺ຈຄີຕວາທິຕມຕ຺ຕເມວ ສິກ຺ຂາເປສຸໍ. ຕສ຺ມິໍເຍວ ນຄເຣ ອຎ຺ຎສ຺ມິໍ ອສີຕິໂກຏິວິຠເວ ກຸເລ ເອກາ ຘີຕາປິ ນິພ຺ພຕ຺ຕິ. ຕສ຺ສາປິ ມາຕາປິຕໂຣ ຕເຖວ ຈິນ຺ເຕຕ຺ວາ ຕໍ ນຈ຺ຈຄີຕວາທິຕມຕ຺ຕເມວ ສິກ຺ຂາເປສຸໍ. ເຕສໍ ວຍປ຺ປຕ຺ຕານໍ ອາວາຫວິວາໂຫ ອໂຫສິ. ອຖ ເນສໍ ອປຣຠາເຄ ມາຕາປິຕໂຣ ກາລມກໍສຸ. ທ຺ເວອສີຕິໂກຏິຘນໍ ເອກສ຺ມິໍເຍວ ເຄເຫ ອໂຫສິ. ເສຏ຺ຐິປຸຕ຺ໂຕ ທິວສສ຺ສ ຕິກ຺ຂຕ຺ຕຸໍ ຣຎ຺ໂຎ ອຸປຏ຺ຐານໍ ຄຈ຺ຉຕິ. ອຖ ຕສ຺ມິໍ ນຄເຣ ຘຸຕ຺ຕາ ຈິນ຺ເຕສຸໍ – ‘‘ສຈາຍໍ ເສຏ຺ຐິປຸຕ຺ໂຕ ສຸຣາໂສຓ຺ໂຑ ຠວິສ຺ສຕິ, ອມ຺ຫາກໍ ຜາສຸກໍ ຠວິສ຺ສຕິ, ອຸຄ຺ຄຓ຺ຫາເປມ ນໍ ສຸຣາໂສຓ຺ຑຠາວ’’ນ຺ຕິ. ເຕ ສຸຣໍ ອາທາຍ ຂຊ຺ຊກມໍເສ ເຈວ ໂລຓສກ຺ຂຣາ ຈ ທຸສ຺ສນ຺ເຕ ພນ຺ຘິຕ຺ວາ ມູລກນ຺ເທ ຄເຫຕ຺ວາ ຕສ຺ສ ຣາຊກຸລໂຕ ອາຄຈ຺ຉນ຺ຕສ຺ສ ມຄ຺ຄໍ ໂອໂລກຍມານາ ນິສີທິຕ຺ວາ ຕໍ ອາຄຈ຺ຉນ຺ຕໍ ທິສ຺ວາ ສຸຣໍ ປິວິຕ຺ວາ ໂລຓສກ຺ຂຣໍ ມຸເຂ ຂິປິຕ຺ວາ ມູລກນ຺ທໍ ຑໍສິຕ຺ວາ ‘‘ວສ຺ສສຕໍ ຊີວ ສາມິ, ເສຏ຺ຐິປຸຕ຺ຕ, ຕໍ ນິສ຺ສາຍ ມຍໍ ຂາທນປິວນສມຕ຺ຖາ ຠເວຍ຺ຍາມາ’’ຕິ ອາຫໍສຸ. ໂສ ເຕສໍ ວຈນໍ ສຸຕ຺ວາ ປຈ຺ຉໂຕ ອາຄຈ຺ຉນ຺ຕໍ ຈູຬູປຏ຺ຐາກໍ ປຸຈ຺ຉິ – ‘‘ກິໍ ເອເຕ ປິວນ຺ຕີ’’ຕິ. ເອກໍ ປານກໍ, ສາມີຕິ. ມນາປຊາຕິກໍ ເອຕນ຺ຕິ. ສາມິ, ອິມສ຺ມິໍ ຊີວໂລເກ ອິມິນາ ສທິສໍ ປາຕພ຺ພຍຸຕ຺ຕກໍ ນາມ ນຕ຺ຖີຕິ. ໂສ ‘‘ເອວໍ ສນ຺ເຕ ມຍາປິ ປາຕຸໍ ວຏ຺ຏຕີ’’ຕິ ໂຖກໍ ໂຖກໍ ອາຫຣາເປຕ຺ວາ ປິວຕິ. ອຖສ຺ສ ນຈິຣສ຺ເສວ ເຕ ຘຸຕ຺ຕາ ປິວນຠາວໍ ຎຕ຺ວາ ຕໍ ປຣິວາຣຍິໍສຸ. ຄຈ຺ຉນ຺ເຕ ກາເລ ປຣິວາໂຣ ມຫາ ອໂຫສິ. ໂສ ສເຕນປິ ສຕທ຺ວເຍນປິ ສຸຣໍ ອາຫຣາເປຕ຺ວາ ປິວນ຺ໂຕ ອິມິນາ ອນຸກ຺ກເມເນວ ນິສິນ຺ນຏ຺ຐານາທີສຸ ກຫາປຓຣາສິໍ ຐເປຕ຺ວາ ສຸຣໍ ປິວນ຺ໂຕ ‘‘ອິມິນາ ມາລາ ອາຫຣຖ, ອິມິນາ ຄນ຺ເຘ, ອຍໍ ຊໂນ ຊຸເຕ ເຉໂກ, ອຍໍ ນຈ຺ເຈ, ອຍໍ ຄີເຕ, ອຍໍ ວາທິເຕ. ອິມສ຺ສ ສຫສ຺ສໍ ເທຖ, ອິມສ຺ສ ທ຺ເວ ສຫສ຺ສານີ’’ຕິ ເອວໍ ວິກິຣນ຺ໂຕ ນຈິຣສ຺ເສວ ອຕ຺ຕໂນ ສນ຺ຕກໍ ອສີຕິໂກຏິຘນໍ ເຂເປຕ຺ວາ ‘‘ຂີຓໍ ເຕ, ສາມິ, ຘນ’’ນ຺ຕິ ວຸຕ຺ເຕ ກິໍ ຠຣິຍາຍ ເມ ສນ຺ຕກໍ ນຕ຺ຖີຕິ. ອຕ຺ຖິ, ສາມີຕິ. ເຕນ ຫິ ຕໍ ອາຫຣຖາຕິ. ຕມ຺ປິ ຕເຖວ ເຂເປຕ຺ວາ ອນຸປຸພ຺ເພນ ເຂຕ຺ຕອາຣາມຸຍ຺ຍານໂຍຄ຺ຄາທິກມ຺ປິ ອນ຺ຕມໂສ ຠາຊນຠຓ຺ຑກມ຺ປິ ອຕ຺ຖຣຓປາວຸຣຓນິສີທນມ຺ປິ ສພ຺ພໍ ອຕ຺ຕໂນ ສນ຺ຕກໍ ວິກ຺ກິຓິຕ຺ວາ ຂາທິ. ອຖ ນໍ ມຫລ຺ລກກາເລ ເຍຫິສ຺ສ ກຸລສນ຺ຕກໍ ເຄຫໍ ວິກ຺ກິຓິຕ຺ວາ ຄຫິຕໍ, ເຕ ຕໍ ເຄຫາ ນີຫຣິໍສຸ. ໂສ ຠຣິຍໍ ອາທາຍ ປຣຊນສ຺ສ ເຄຫຠິຕ຺ຕິໍ ນິສ຺ສາຍ ວສນ຺ໂຕ ກປາລຂຓ຺ຑໍ ອາທາຍ ຠິກ຺ຂາຍ ຈຣິຕ຺ວາ ຊນສ຺ສ ອຸຈ຺ຉິຏ຺ຐກໍ ຠຸຎ຺ຊິຕຸໍ ອາຣຠິ.

ອຖ ນໍ ເອກທິວສໍ ອາສນສາລາຍ ທ຺ວາເຣ ຐຕ຺ວາ ທຫຣສາມເຓເຣຫິ ທິຍ຺ຍມານໍ ອຸຈ຺ຉິຏ຺ຐກໂຠຊນໍ ປຏິຄ຺ຄຓ຺ຫນ຺ຕໍ ທິສ຺ວາ ສຕ຺ຖາ ສິຕໍ ປາຕ຺ວາກາສິ. ອຖ ນໍ ອານນ຺ທຕ຺ເຖໂຣ ສິຕກາຣຓໍ ປຸຈ຺ຉິ. ສຕ຺ຖາ ສິຕກາຣຓໍ ກເຖນ຺ໂຕ ‘‘ປສ຺ສານນ຺ທ, ອິມໍ ມຫາຘນເສຏ຺ຐິປຸຕ຺ຕໍ ອິມສ຺ມິໍ ນຄເຣ ທ຺ເວອສີຕິໂກຏິຘນໍ ເຂເປຕ຺ວາ ຠຣິຍໍ ອາທາຍ ຠິກ຺ຂາຍ ຈຣນ຺ຕໍ. ສເຈ ຫິ ອຍໍ ປຐມວເຍ ໂຠເຄ ອເຂເປຕ຺ວາ ກມ຺ມນ຺ເຕ ປໂຍຊຍິສ຺ສ, ອິມສ຺ມິໍເຍວ ນຄເຣ ອຄ຺ຄເສຏ຺ຐິ ອຠວິສ຺ສ. ສເຈ ປນ ນິກ຺ຂມິຕ຺ວາ ປພ຺ພຊິສ຺ສ, ອຣຫຕ຺ຕໍ ປາປຸຓິສ຺ສ, ຠຣິຍາປິສ຺ສ ອນາຄາມິຜເລ ປຕິຏ຺ຐຫິສ຺ສ. ສເຈ ມຊ຺ຌິມວເຍ ໂຠເຄ ອເຂເປຕ຺ວາ ກມ຺ມນ຺ເຕ ປໂຍຊຍິສ຺ສ, ທຸຕິຍເສຏ຺ຐິ ອຠວິສ຺ສ, ນິກ຺ຂມິຕ຺ວາ ປພ຺ພຊນ຺ໂຕ ອນາຄາມີ ອຠວິສ຺ສ. ຠຣິຍາປິສ຺ສ ສກທາຄາມິຜເລ ປຕິຏ຺ຐຫິສ຺ສ. ສເຈ ປຈ຺ຉິມວເຍ ໂຠເຄ ອເຂເປຕ຺ວາ ກມ຺ມນ຺ເຕ ປໂຍຊຍິສ຺ສ, ຕຕິຍເສຏ຺ຐິ ອຠວິສ຺ສ, ນິກ຺ຂມິຕ຺ວາ ປພ຺ພຊນ຺ໂຕປິ ສກທາຄາມີ ອຠວິສ຺ສ, ຠຣິຍາປິສ຺ສ ໂສຕາປຕ຺ຕິຜເລ ປຕິຏ຺ຐຫິສ຺ສ. ອິທານິ ປເນສ ຄິຫິໂຠຄໂຕປິ ປຣິຫີໂນ ສາມຎ຺ຎໂຕປິ. ປຣິຫາຍິຕ຺ວາ ຈ ປນ ສຸກ຺ຂປລ຺ລເລ ໂກຎ຺ຈສກຸໂຓ ວິຍ ຊາໂຕ’’ຕິ ວຕ຺ວາ ອິມາ ຄາຖາ ອຠາສິ –

໑໕໕. ‘‘ອຈຣິຕ຺ວາ ພ຺ຣຫ຺ມຈຣິຍໍ, ອລທ຺ຘາ ໂຍພ຺ພເນ ຘນໍ;

ຊິຓ຺ຓໂກຎ຺ຈາວ ຌາຍນ຺ຕິ, ຂີຓມຈ຺ເຉວ ປລ຺ລເລ.

໑໕໖. ‘‘ອຈຣິຕ຺ວາ ພ຺ຣຫ຺ມຈຣິຍໍ, ອລທ຺ຘາ ໂຍພ຺ພເນ ຘນໍ;

ເສນ຺ຕິ ຈາປາຕິຂີຓາວ, ປຸຣາຓານິ ອນຸຕ຺ຖຸນ’’ນ຺ຕິ.

ຕຕ຺ຖ ອຈຣິຕ຺ວາຕິ ພ຺ຣຫ຺ມຈຣິຍວາສໍ ອວສິຕ຺ວາ. ໂຍພ຺ພເນຕິ ອນຸປ຺ປນ຺ເນ ວາ ໂຠເຄ ອຸປ຺ປາເທຕຸໍ ອຸປ຺ປນ຺ເນ ວາ ໂຠເຄ ຣກ຺ຂິຕຸໍ ສມຕ຺ຖກາເລ ຘນມ຺ປິ ອລຠິຕ຺ວາ. ຂີຓມຈ຺ເຉຕິ ເຕ ເອວຣູປາ ພາລາ ອຸທກສ຺ສ ອຠາວາ ຂີຓມຈ຺ເຉ ປລ຺ລເລ ປຣິກ຺ຂີຓປຕ຺ຕາ ຊິຓ຺ຓໂກຎ຺ຈາ ວິຍ ອວຌາຍນ຺ຕິ. ອິທໍ ວຸຕ຺ຕໍ ໂຫຕິ – ປລ຺ລເລ ອຸທກສ຺ສ ອຠາໂວ ວິຍ ຫິ ອິເມສໍ ວສນຏ຺ຐານສ຺ສ ອຠາໂວ, ມຈ຺ຉານໍ ຂີຓຠາໂວ ວິຍ ອິເມສໍ ໂຠຄານໍ ອຠາໂວ, ຂີຓປຕ຺ຕານໍ ໂກຎ຺ຈານໍ ອຸປ຺ປຕິຕ຺ວາ ຄມນາຠາໂວ ວິຍ ອິເມສໍ ອິທານິ ຊລຖລປຖາທີຫິ ໂຠເຄ ສຓ຺ຐາເປຕຸໍ ອສມຕ຺ຖຠາໂວ. ຕສ຺ມາ ເຕ ຂີຓປຕ຺ຕາ ໂກຎ຺ຈາ ວິຍ ເອຕ຺ເຖວ ພຊ຺ຌິຕ຺ວາ ອວຌາຍນ຺ຕີຕິ. ຈາປາຕິຂີຓາວາຕິ ຈາປໂຕ ອຕິຂີຓາ, ຈາປາ ວິນິມຸຕ຺ຕາຕິ ອຕ຺ໂຖ. ອິທໍ ວຸຕ຺ຕໍ ໂຫຕິ – ຍຖາ ຈາປາ ວິນິມຸຕ຺ຕາ ສຣາ ຍຖາເວຄໍ ຄນ຺ຕ຺ວາ ປຕິຕາ, ຕໍ ຄເຫຕ຺ວາ ອຸກ຺ຂິປນ຺ເຕ ອສຕິ ຕຕ຺ເຖວ ອຸປຈິການໍ ຠຕ຺ຕໍ ໂຫນ຺ຕິ, ເອວໍ ອິເມປິ ຕໂຍ ວເຍ ອຕິກ຺ກນ຺ຕາ ອິທານິ ອຕ຺ຕານໍ ອຸທ຺ຘຣິຕຸໍ ອສມຕ຺ຖຕາຍ ມຣຓໍ ອຸປຄມິສ຺ສນ຺ຕິ. ເຕນ ວຸຕ຺ຕໍ – ‘‘ເສນ຺ຕິ ຈາປາຕິຂີຓາວາ’’ຕິ. ປຸຣາຓານິ ອນຸຕ຺ຖຸນນ຺ຕິ ‘‘ອິຕິ ອມ຺ເຫຫິ ຂາທິຕໍ ອິຕິ ປີຕ’’ນ຺ຕິ ປຸພ຺ເພ ກຕານິ ຂາທິຕປິວິຕນຈ຺ຈຄີຕວາທິຕາທີນິ ອນຸຕ຺ຖຸນນ຺ຕາ ໂສຈນ຺ຕາ ອນຸໂສຈນ຺ຕາ ເສນ຺ຕີຕິ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ມຫາຘນເສຏ຺ຐິປຸຕ຺ຕວຕ຺ຖຸ ນວມໍ.

ຊຣາວຄ຺ຄວຓ຺ຓນາ ນິຏ຺ຐິຕາ.

ເອກາທສໂມ ວຄ຺ໂຄ.