໖. ມລ຺ລິກາເທວີວຕ຺ຖຸ

ຊີຣນ຺ຕິ ເວຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ມລ຺ລິກໍ ເທວິໍ ອາຣພ຺ຠ ກເຖສິ.

ສາ ກິຣ ເອກທິວສໍ ນ຺ຫານໂກຏ຺ຐກໍ ປວິຏ຺ຐາ ມຸຂໍ ໂຘວິຕ຺ວາ ໂອນຕສຣີຣາ ຊງ຺ຆໍ ໂຘວິຕຸໍ ອາຣຠິ. ຕາຍ ຈ ສທ຺ຘິໍເຍວ ປວິຏ຺ໂຐ ເອໂກ ວລ຺ລຠສຸນໂຂ ອຕ຺ຖິ. ໂສ ຕໍ ຕຖາ ໂອນຕໍ ທິສ຺ວາ ອສທ຺ຘມ຺ມສນ຺ຖວໍ ກາຕຸໍ ອາຣຠິ. ສາ ຜສ຺ສໍ ສາທິຍນ຺ຕີ ອຏ຺ຐາສິ. ຣາຊາປິ ອຸປຣິປາສາເທ ວາຕປາເນນ ໂອໂລເກນ຺ໂຕ ຕໍ ທິສ຺ວາ ຕໂຕ ອາຄຕກາເລ ‘‘ນສ຺ສ, ວສລິ, ກສ຺ມາ ເອວຣູປມກາສີ’’ຕິ ອາຫ. ກິໍ ມຍາ ກຕໍ, ເທວາຕິ. ສຸນເຂນ ສທ຺ຘິໍ ສນ຺ຖໂວຕິ. ນຕ຺ເຖຕໍ, ເທວາຕິ. ມຍາ ສາມໍ ທິຏ຺ຐໍ, ນາຫໍ ຕວ ສທ຺ທຫິສ຺ສາມິ, ນສ຺ສ, ວສລີຕິ. ‘‘ມຫາຣາຊ, ໂຍ ໂກຈິ ອິມໍ ໂກຏ຺ຐກໍ ປວິຏ຺ໂຐ ອິມິນາ ວາຕປາເນນ ໂອໂລເກນ຺ຕສ຺ສ ເອໂກວ ທ຺ວິຘາ ປຎ຺ຎາຍຕີ’’ຕິ ອຠູຕໍ ກເຖສິ. ເທວ, ສເຈ ເມ ສທ຺ທຫສິ, ເອຕໍ ໂກຏ຺ຐກໍ ປວິສ, ອຫໍ ຕໍ ອິມິນາ ວາຕປາເນນ ໂອໂລເກສ຺ສາມີຕິ. ຣາຊາ ມູຬ຺ຫຘາຕຸໂກ ຕສ຺ສາ ວຈນໍ ສທ຺ທຫິຕ຺ວາ ໂກຏ຺ຐກໍ ປາວິສິ. ສາປິ ໂຂ ເທວີ ວາຕປາເນ ຐຕ຺ວາ ໂອໂລເກນ຺ຕີ ‘‘ອນ຺ຘພາລ, ມຫາຣາຊ, ກິໍ ນາເມຕໍ, ອຊິກາຍ ສທ຺ຘິໍ ສນ຺ຖວໍ ກໂຣສີ’’ຕິ ອາຫ. ‘‘ນາຫໍ, ຠທ຺ເທ, ເອວຣູປໍ ກໂຣມີ’’ຕິ ຈ ວຸຕ຺ເຕປິ ‘‘ມຍາ ສາມໍ ທິຏ຺ຐໍ, ນາຫໍ ຕວ ສທ຺ທຫິສ຺ສາມີ’’ຕິ ອາຫ.

ຕໍ ສຸຕ຺ວາ ຣາຊາ ‘‘ອທ຺ຘາ ອິມໍ ໂກຏ຺ຐກໍ ປວິຏ຺ໂຐ ເອໂກວ ທ຺ວິຘາ ປຎ຺ຎາຍຕີ’’ຕິ ສທ຺ທຫິ. ມລ຺ລິກາ ຈິນ຺ເຕສິ – ‘‘ອຍໍ ຣາຊາ ອນ຺ຘພາລຕາຍ ມຍາ ວຎ຺ຈິໂຕ, ປາປໍ ເມ ກຕໍ, ອຍຎ຺ຈ ເມ ອຠູເຕນ ອພ຺ຠາຈິກ຺ຂິໂຕ, ອິທໍ ເມ ກມ຺ມໍ ສຕ຺ຖາປິ ຊານິສ຺ສຕິ, ທ຺ເວ ອຄ຺ຄສາວກາປິ ອສີຕິ ມຫາສາວກາປິ ຊານິສ຺ສນ຺ຕິ, ອໂຫ ວຕ ເມ ຠາຣິຍໍ ກມ຺ມໍ ກຕ’’ນ຺ຕິ. ອຍໍ ກິຣ ຣຎ຺ໂຎ ອສທິສທາເນ ສຫາຍິກາ ອໂຫສິ. ຕຕ຺ຖ ຈ ເອກທິວສໍ ກຕປຣິຈ຺ຈາໂຄ ຘນສ຺ສ ຈຸທ຺ທສໂກຏິອຄ຺ຆນໂກ ອໂຫສິ. ຕຖາຄຕສ຺ສ ເສຕຈ຺ຉຕ຺ຕໍ ນິສີທນປລ຺ລງ຺ໂກ ອາຘາຣໂກ ປາທປີຐນ຺ຕິ ອິມານິ ປນ ຈຕ຺ຕາຣິ ອນຄ຺ຆາເນວ ອເຫສຸໍ. ສາ ມຣຓກາເລ ເອວຣູປໍ ມຫາປຣິຈ຺ຈາຄໍ ນານຸສ຺ສຣິຕ຺ວາ ຕເທວ ປາປກມ຺ມໍ ອນຸສ຺ສຣນ຺ຕີ ກາລໍ ກຕ຺ວາ ອວີຈິມ຺ຫິ ນິພ຺ພຕ຺ຕິ. ຣຎ຺ໂຎ ປນ ສາ ອຕິວິຍ ປິຍາ ອໂຫສິ. ໂສ ພລວໂສກາຠິຠູໂຕ ຕສ຺ສາ ສຣີຣກິຈ຺ຈໍ ກາເຣຕ຺ວາ ‘‘ນິພ຺ພຕ຺ຕຏ຺ຐານມສ຺ສາ ປຸຈ຺ຉິສ຺ສາມີ’’ຕິ ສຕ຺ຖຸ ສນ຺ຕິກໍ ອຄມາສິ. ສຕ຺ຖາ ຍຖາ ໂສ ອາຄຕກາຣຓໍ ນ ສຣຕິ, ຕຖາ ອກາສິ. ໂສ ສຕ຺ຖຸ ສນ຺ຕິເກ ສາຣຓີຍຘມ຺ມກຖໍ ສຸຕ຺ວາ ເຄຫໍ ປວິຏ຺ຐກາເລ ສຣິຕ຺ວາ ‘‘ອຫໍ ຠເຓ ມລ຺ລິກາຍ ນິພ຺ພຕ຺ຕຏ຺ຐານໍ ປຸຈ຺ຉິສ຺ສາມີຕິ ສຕ຺ຖຸ ສນ຺ຕິກໍ ຄນ຺ຕ຺ວາ ປມຸຏ຺ໂຐ, ສ຺ເວ ປຸນ ປຸຈ຺ຉິສ຺ສາມີ’’ຕິ ປຸນທິວເສປິ ອຄມາສິ. ສຕ຺ຖາປິ ປຏິປາຏິຍາ ສຕ຺ຕ ທິວສານິ ຍຖາ ໂສ ນ ສຣຕິ, ຕຖາ ອກາສິ. ສາປິ ສຕ຺ຕາຫເມວ ນິຣເຍ ປຈ຺ຈິຕ຺ວາ ອຏ຺ຐເມ ທິວເສ ຕໂຕ ຈຸຕາ ຕຸສິຕຠວເນ ນິພ຺ພຕ຺ຕິ. ກສ຺ມາ ປນສ຺ສ ສຕ຺ຖາ ອສຣຓຠາວໍ ອກາສີຕິ? ສາ ກິຣ ຕສ຺ສ ອຕິວິຍ ປິຍາ ອໂຫສິ ມນາປາ, ຕສ຺ມາ ຕສ຺ສາ ນິຣເຍ ນິພ຺ພຕ຺ຕຠາວໍ ສຸຕ຺ວາ ‘‘ສເຈ ເອວຣູປາ ສທ຺ຘາສມ຺ປນ຺ນາ ນິຣເຍ ນິພ຺ພຕ຺ຕາ, ທານໍ ທຕ຺ວາ ກິໍ ກຣິສ຺ສາມີ’’ຕິ ມິຈ຺ຉາທິຏ຺ຐິໍ ຄເຫຕ຺ວາ ປຎ຺ຈນ຺ນໍ ຠິກ຺ຂຸສຕານໍ ເຄເຫ ປວຕ຺ຕໍ ນິຈ຺ຈຠຕ຺ຕໍ ຫຣາເປຕ຺ວາ ນິຣເຍ ນິພ຺ພຕ຺ເຕຍ຺ຍ, ເຕນສ຺ສ ສຕ຺ຖາ ສຕ຺ຕາຫໍ ອສຣຓຠາວໍ ກຕ຺ວາ ອຏ຺ຐເມ ທິວເສ ປິຓ຺ຑາຍ ຈຣນ຺ໂຕ ສຍເມວ ຣາຊກຸລທ຺ວາຣໍ ອຄມາສິ.

ຣາຊາ ‘‘ສຕ຺ຖາ ອາຄໂຕ’’ຕິ ສຸຕ຺ວາ ນິກ຺ຂມິຕ຺ວາ ປຕ຺ຕໍ ອາທາຍ ປາສາທໍ ອຠິຣຸຫິຕຸໍ ອາຣຠິ. ສຕ຺ຖາ ປນ ຣຖສາລາຍ ນິສີທິຕຸໍ ອາກາຣໍ ທສ຺ເສສິ. ຣາຊາ ສຕ຺ຖາຣໍ ຕຕ຺ເຖວ ນິສີທາເປຕ຺ວາ ຍາຄຸຂຊ຺ຊເກນ ປຏິມາເນຕ຺ວາ ວນ຺ທິຕ຺ວາ ນິສິນ຺ໂນວ ອຫໍ, ຠນ຺ເຕ, ມລ຺ລິກາຍ ເທວິຍາ ນິພ຺ພຕ຺ຕຏ຺ຐານໍ ປຸຈ຺ຉິສ຺ສາມີຕິ ຄນ຺ຕ຺ວາ ປມຸຏ຺ໂຐ, ກຕ຺ຖ ນຸ ໂຂ ສາ, ຠນ຺ເຕ, ນິພ຺ພຕ຺ຕາຕິ. ຕຸສິຕຠວເນ, ມຫາຣາຊາຕິ, ຠນ຺ເຕ, ຕາຍ ຕຸສິຕຠວເນ ອນິພ຺ພຕ຺ຕນ຺ຕິຍາ ໂກ ອຎ຺ໂຎ ນິພ຺ພຕ຺ຕິສ຺ສຕິ, ຠນ຺ເຕ, ນຕ຺ຖິ ຕາຍ ສທິສາ ອິຕ຺ຖີ. ຕສ຺ສາ ຫິ ນິສິນ຺ນຏ຺ຐານາທີສຸ ‘‘ສ຺ເວ ຕຖາຄຕສ຺ສ ອິທໍ ທສ຺ສາມິ, ອິທໍ ກຣິສ຺ສາມີ’’ຕິ ທານສໍວິຘານໍ ຐເປຕ຺ວາ ອຎ຺ຎໍ ກິຈ຺ຈເມວ ນຕ຺ຖິ, ຠນ຺ເຕ, ຕສ຺ສາ ປຣໂລກໍ ຄຕກາລໂຕ ປຏ຺ຐາຍ ສຣີຣໍ ເມ ນ ວຫຕີຕິ. ອຖ ນໍ ສຕ຺ຖາ ‘‘ມາ ຈິນ຺ຕຍິ, ມຫາຣາຊ, ສພ຺ເພສໍ ຘຸວຘມ຺ໂມ ອຍ’’ນ຺ຕິ ວຕ຺ວາ ‘‘ອຍໍ, ມຫາຣາຊ, ຣໂຖ ກສ຺ສາ’’ຕິ ປຸຈ຺ຉິ. ຕໍ ສຸຕ຺ວາ ຣາຊາ ສິຣສ຺ມິໍ ອຎ຺ຊລິໍ ປຕິຏ຺ຐາເປຕ຺ວາ ‘‘ປິຕາມຫສ຺ສ ເມ, ຠນ຺ເຕ’’ຕິ ອາຫ. ‘‘ອຍໍ ກສ຺ສາ’’ຕິ? ‘‘ປິຕຸ ເມ, ຠນ຺ເຕ’’ຕິ. ‘‘ອຍໍ ປນ ຣໂຖ ກສ຺ສາ’’ຕິ? ‘‘ມມ, ຠນ຺ເຕ’’ຕິ. ເອວໍ ວຸຕ຺ເຕ ສຕ຺ຖາ, ‘‘ມຫາຣາຊ, ຕວ ປິຕາມຫສ຺ສ ຣໂຖ ເຕເນວາກາເຣນ ຕວ ປິຕຸ ຣຖໍ ນ ປາປຸຓິ, ຕວ ປິຕຸ ຣໂຖ ຕວ ຣຖໍ ນ ປາປຸຓິ, ເອວຣູປສ຺ສ ນາມ ກຏ຺ຐກລິງ຺ຄຣສ຺ສາປິ ຊຣາ ອາຄຈ຺ຉຕິ, ກິມງ຺ຄໍ ປນ ອຕ຺ຕຠາວສ຺ສ. ມຫາຣາຊ, ສປ຺ປຸຣິສຘມ຺ມສ຺ເສວ ຫິ ຊຣາ ນຕ຺ຖິ, ສຕ຺ຕາ ປນ ອຊີຣກາ ນາມ ນຕ຺ຖີ’’ຕິ ວຕ຺ວາ ອິມໍ ຄາຖມາຫ –

໑໕໑. ‘‘ຊີຣນ຺ຕິ ເວ ຣາຊຣຖາ ສຸຈິຕ຺ຕາ,

ອໂຖ ສຣີຣມ຺ປິ ຊຣໍ ອຸເປຕິ;

ສຕຎ຺ຈ ຘມ຺ໂມ ນ ຊຣໍ ອຸເປຕິ,

ສນ຺ໂຕ ຫເວ ສພ຺ຠິ ປເວທຍນ຺ຕີ’’ຕິ.

ຕຕ຺ຖ ເວຕິ ນິປາໂຕ. ສຸຈິຕ຺ຕາຕິ ສຕ຺ຕຫິ ຣຕເນຫິ ອປເຣຫິ ຈ ຣຖາລງ຺ກາເຣຫິ ສຸຏ຺ຐຸ ຈິຕ຺ຕິຕາ ຣາຊູນໍ ຣຖາປິ ຊີຣນ຺ຕິ. ສຣີຣມ຺ປີຕິ ນ ເກວລໍ ຣຖາ ເອວ, ອິທໍ ສຸປ຺ປຏິຊຄ຺ຄິຕໍ ສຣີຣມ຺ປິ ຂຓ຺ຑິຈ຺ຈາທີນິ ປາປຸຓນ຺ຕໍ ຊຣໍ ອຸເປຕິ. ສຕຎ຺ຈາຕິ ພຸທ຺ຘາທີນໍ ປນ ສນ຺ຕານໍ ນວວິໂຘ ໂລກຸຕ຺ຕຣຘມ຺ໂມ ຈ ກິຎ຺ຈິ ອຸປຆາຕໍ ນ ອຸເປຕີຕິ ນ ຊຣໍ ອຸເປຕິ ນາມ. ປເວທຍນ຺ຕີຕິ ເອວໍ ສນ຺ໂຕ ພຸທ຺ຘາທໂຍ ສພ຺ຠິ ປຓ຺ຑິເຕຫິ ສທ຺ຘິໍ ກເຖນ຺ຕີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ມລ຺ລິກາເທວີວຕ຺ຖຸ ຉຏ຺ຐໍ.