໕. ອຸໂປສຖິກອິຕ຺ຖີນໍ ວຕ຺ຖຸ

ຍຖາ ທຓ຺ເຑນາຕິ ອິມໍ ຘມ຺ມເທສນໍ ສຕ຺ຖາ ປຸພ຺ພາຣາເມ ວິຫຣນ຺ໂຕ ວິສາຂາທີນໍ ອຸປາສິການໍ ອຸໂປສຖກມ຺ມໍ ອາຣພ຺ຠ ກເຖສິ.

ສາວຕ຺ຖິຍໍ ກິຣ ເອກສ຺ມິໍ ມຫາອຸໂປສຖທິວເສ ປຎ຺ຈສຕມຕ຺ຕາ ອິຕ຺ຖິໂຍ ອຸໂປສຖິກາ ຫຸຕ຺ວາ ວິຫາຣໍ ອຄມິໍສຸ. ວິສາຂາ ຕາສຸ ມຫລ຺ລກິຕ຺ຖິໂຍ ອຸປສງ຺ກມິຕ຺ວາ ປຸຈ຺ຉິ, ‘‘ອມ຺ມາ, ກິມຕ຺ຖໍ ອຸໂປສຖິກາ ຊາຕຕ຺ຖາ’’ຕິ. ຕາຫິ ‘‘ທິພ຺ພສມ຺ປຕ຺ຕິໍ ປຕ຺ເຖຕ຺ວາ’’ຕິ ວຸຕ຺ເຕ ມຊ຺ຌິມິຕ຺ຖິໂຍ ປຸຈ຺ຉິ, ຕາຫິ ‘‘ສປຕ຺ຕິວາສາ ມຸຈ຺ຈນຕ຺ຖາຍາ’’ຕິ ວຸຕ຺ເຕ ຕຣຸຓິຕ຺ຖິໂຍ ປຸຈ຺ຉິ, ຕາຫິ ‘‘ປຐມຄພ຺ເຠ ປຸຕ຺ຕປຏິລາຠຕ຺ຖາຍາ’’ຕິ ວຸຕ຺ເຕ ກຸມາຣິກາໂຍ ປຸຈ຺ຉິ, ຕາຫິ ‘‘ຕຣຸຓຠາເວເຍວ ປຕິກຸລຄມນຕ຺ຖາຍາ’’ຕິ ວຸຕ຺ເຕ ຕໍ ສພ຺ພມ຺ປິ ຕາສໍ ກຖໍ ສຸຕ຺ວາ ຕາ ອາທາຍ ສຕ຺ຖຸ ສນ຺ຕິກໍ ຄນ຺ຕ຺ວາ ປຏິປາຏິຍາ ອາໂຣເຈສິ. ຕໍ ສຸຕ຺ວາ ສຕ຺ຖາ ‘‘ວິສາເຂ ອິເມສໍ ສຕ຺ຕານໍ ຊາຕິອາທໂຍ ນາມ ທຓ຺ຑຫຕ຺ຖກໂຄປາລກສທິສາ, ຊາຕິ ຊຣາຍ ສນ຺ຕິກໍ, ຊຣາ ພ຺ຍາຘິໂນ ສນ຺ຕິກໍ, ພ຺ຍາຘິ ມຣຓສ຺ສ ສນ຺ຕິກໍ ເປເສຕ຺ວາ ມຣຓໍ ກຸຐາຣິຍາ ຉິນ຺ທນ຺ຕາ ວິຍ ຊີວິຕໍ ຉິນ຺ທຕິ, ເອວໍ ສນ຺ເຕປິ ວິວຏ຺ຏໍ ປຕ຺ເຖນ຺ຕາ ນາມ ນຕ຺ຖິ, ວຏ຺ຏເມວ ປນ ປຕ຺ເຖນ຺ຕີ’’ຕິ ວຕ຺ວາ ອນຸສນ຺ຘິໍ ຆເຏຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໑໓໕. ‘‘ຍຖາ ທຓ຺ເຑນ ໂຄປາໂລ, ຄາໂວ ປາເຊຕິ ໂຄຈຣໍ;

ເອວໍ ຊຣາ ຈ ມຈ຺ຈຸ ຈ, ອາຍຸໍ ປາເຊນ຺ຕິ ປາຓິນ’’ນ຺ຕິ.

ຕຕ຺ຖ ປາເຊຕີຕິ ເຉໂກ ໂຄປາໂລ ເກທາຣນ຺ຕຣໍ ປວິສນ຺ຕິໂຍ ຄາໂວ ທຓ຺ເຑນ ນິວາເຣຕ຺ວາ ເຕເນວ ໂປເຖນ຺ໂຕ ສຸລຠຕິໂຓທກໍ ໂຄຈຣໍ ເນຕິ. ອາຍຸໍ ປາເຊນ຺ຕີຕິ ຊີວິຕິນ຺ທ຺ຣິຍໍ ຉິນ຺ທນ຺ຕິ ເຂເປນ຺ຕິ. ໂຄປາລໂກ ວິຍ ຫິ ຊຣາ ຈ ມຈ຺ຈຸ ຈ, ໂຄຄໂຓ ວິຍ ຊີວິຕິນ຺ທ຺ຣິຍໍ, ໂຄຈຣຠູມິ ວິຍ ມຣຓໍ. ຕຕ຺ຖ ຊາຕິ ຕາວ ສຕ຺ຕານໍ ຊີວິຕິນ຺ທ຺ຣິຍໍ ຊຣາຍ ສນ຺ຕິກໍ ເປເສສິ, ຊຣາ ພ຺ຍາຘິໂນ ສນ຺ຕິກໍ, ພ຺ຍາຘິ ມຣຓສ຺ສ ສນ຺ຕິກໍ. ຕເມວ ມຣຓໍ ກຸຐາຣິຍາ ເຉທໍ ວິຍ ຉິນ຺ທິຕ຺ວາ ຄຈ຺ຉຕີຕິ ອິທເມຕ຺ຖ ໂອປມ຺ມສມ຺ປຏິປາທນໍ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ອຸໂປສຖິກອິຕ຺ຖີນໍ ວຕ຺ຖຸ ປຎ຺ຈມໍ.