໘. ສາຣິປຸຕ຺ຕຕ຺ເຖຣວຕ຺ຖຸ

ອສ຺ສທ຺ໂຘຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ສາຣິປຸຕ຺ຕຕ຺ເຖຣໍ ອາຣພ຺ຠ ກເຖສິ.

ເອກສ຺ມິຎ຺ຫິ ສມເຍ ຕິໍສມຕ຺ຕາ ອາຣຎ຺ຎກາ ຠິກ຺ຂູ ສຕ຺ຖຸ ສນ຺ຕິກໍ ອາຄນ຺ຕ຺ວາ ວນ຺ທິຕ຺ວາ ນິສີທິໍສຸ. ສຕ຺ຖາ ເຕສໍ ສຫ ປຏິສມ຺ຠິທາຫິ ອຣຫຕ຺ຕສ຺ສູປນິສ຺ສຍໍ ທິສ຺ວາ ສາຣິປຸຕ຺ຕຕ຺ເຖຣໍ ອາມນ຺ເຕຕ຺ວາ ‘‘ສທ຺ທຫສິ ຕ຺ວໍ, ສາຣິປຸຕ຺ຕ, ສທ຺ຘິນ຺ທ຺ຣິຍໍ ຠາວິຕໍ ພຫຸລີກຕໍ ອມໂຕຄຘໍ ໂຫຕິ ອມຕປຣິໂຍສານ’’ນ຺ຕິ (ສໍ. ນິ. ໕.໕໑໔) ເອວໍ ປຎ຺ຈິນ຺ທ຺ຣິຍານິ ອາຣພ຺ຠ ປຎ຺ຫໍ ປຸຈ຺ຉິ. ເຖໂຣ ‘‘ນ ຂ຺ວາຫໍ, ຠນ຺ເຕ, ເອຕ຺ຖ ຠຄວໂຕ ສທ຺ຘາຍ ຄຈ຺ຉາມິ, ສທ຺ຘິນ຺ທ຺ຣິຍໍ…ເປ… ອມຕປຣິໂຍສານໍ. ເຍສຎ຺ເຫຕໍ, ຠນ຺ເຕ, ອຎ຺ຎາຕໍ ອສ຺ສ ອທິຏ຺ຐໍ ອວິທິຕໍ ອສຈ຺ຉິກຕໍ ອຜສ຺ສິຕໍ ປຎ຺ຎາຍ, ເຕ ຕຕ຺ຖ ປເຣສໍ ສທ຺ຘາຍ ຄຈ຺ເຉຍ຺ຍຸໍ. ສທ຺ຘິນ຺ທ຺ຣິຍໍ…ເປ… ອມຕປຣິໂຍສານ’’ນ຺ຕິ (ສໍ. ນິ. ໕.໕໑໔) ເອວໍ ຕໍ ປຎ຺ຫໍ ພ຺ຍາກາສິ. ຕໍ ສຸຕ຺ວາ ຠິກ຺ຂູ ກຖໍ ສມຸຏ຺ຐາເປສຸໍ ‘‘ສາຣິປຸຕ຺ຕຕ຺ເຖໂຣ ມິຈ຺ຉາຄຫຓໍ ເນວ ວິສ຺ສຊ຺ເຊສິ, ອຊ຺ຊາປິ ສມ຺ມາສມ຺ພຸທ຺ຘສ຺ສ ນ ສທ຺ທຫຕິເຍວາ’’ຕິ. ຕໍ ສຸຕ຺ວາ ສຕ຺ຖາ ‘‘ກິໍ ນາເມຕໍ, ຠິກ຺ຂເວ, ວເທຖ. ອຫຎ຺ຫິ ‘ປຎ຺ຈິນ຺ທ຺ຣິຍານິ ອຠາເວຕ຺ວາ ສມຖວິປສ຺ສນໍ ອວຑ຺ເຒຕ຺ວາ ມຄ຺ຄຜລານິ ສຈ຺ຉິກາຕຸໍ ສມຕ຺ໂຖ ນາມ ອຕ຺ຖີຕິ ສທ຺ທຫສິ ຕ຺ວໍ ສາຣິປຸຕ຺ໂຕ’ຕິ ປຸຈ຺ຉິໍ. ໂສ ‘ເອວໍ ສຈ຺ຉິກໂຣນ຺ໂຕ ອຕ຺ຖິ ນາມາຕິ ນ ສທ຺ທຫາມິ, ຠນ຺ເຕ’ຕິ ກເຖສິ. ນ ທິນ຺ນສ຺ສ ວາ ກຕສ຺ສ ວາ ຜລໍ ວິປາກໍ ນ ສທ຺ທຫຕິ, ນາປິ ພຸທ຺ຘາທີນໍ ຄຸຓໍ ນ ສທ຺ທຫຕິ. ເອໂສ ປນ ອຕ຺ຕນາ ປຏິວິທ຺ເຘສຸ ຌານວິປສ຺ສນາມຄ຺ຄຜລຘມ຺ເມສຸ ປເຣສໍ ສທ຺ຘາຍ ນ ຄຈ຺ຉຕິ. ຕສ຺ມາ ອນຸປວຊ຺ໂຊ’’ຕິ ວຕ຺ວາ ອນຸສນ຺ຘິໍ ຆເຏຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໙໗. ‘‘ອສ຺ສທ຺ໂຘ ອກຕຎ຺ຎູ ຈ, ສນ຺ຘິຈ຺ເຉໂທ ຈ ໂຍ ນໂຣ,

ຫຕາວກາໂສ ວນ຺ຕາໂສ, ສ ເວ ອຸຕ຺ຕມໂປຣິໂສ’’ຕິ.

ຕສ຺ສໂຖ – ອຕ຺ຕໂນ ປຏິວິທ຺ຘຄຸຓໍ ປເຣສໍ ກຖາຍ ນ ສທ຺ທຫຕີຕິ ອສ຺ສທ຺ໂຘ. ອກຕໍ ນິພ຺ພານໍ ຊານາຕີຕິ ອກຕຎ຺ຎູ, ສຈ຺ຉິກຕນິພ຺ພາໂນຕິ ອຕ຺ໂຖ. ວຏ຺ຏສນ຺ຘິໍ, ສໍສາຣສນ຺ຘິໍ ຉິນ຺ທິຕ຺ວາ ຐິໂຕຕິ ສນ຺ຘິຈ຺ເຉໂທ. ກຸສລາກຸສລກມ຺ມພີຊສ຺ສ ຂີຓຕ຺ຕາ ນິພ຺ພຕ຺ຕນາວກາໂສ ຫໂຕ ອສ຺ສາຕິ ຫຕາວກາໂສ. ຈຕູຫິ ມຄ຺ເຄຫິ ກຕ຺ຕພ຺ພກິຈ຺ຈສ຺ສ ກຕຕ຺ຕາ,ສພ຺ພາ ອາສາ ອິມິນາ ວນ຺ຕາຕິ ວນ຺ຕາໂສ. ໂສ ເອວຣູໂປ ນໂຣ. ປຏິວິທ຺ຘໂລກຸຕ຺ຕຣຘມ຺ມຕາຍ ປຸຣິເສສຸ ອຸຕ຺ຕມຠາວໍ ປຕ຺ໂຕຕິ ປຸຣິສຸຕ຺ຕໂມຕິ.

ຄາຖາວສາເນ ເຕ ອາຣຎ຺ຎກາ ຕິໍສມຕ຺ຕາ ຠິກ຺ຂູ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິໍສຸ. ເສສຊນສ຺ສາປິ ສຕ຺ຖິກາ ຘມ຺ມເທສນາ ອໂຫສີຕິ.

ສາຣິປຸຕ຺ຕຕ຺ເຖຣວຕ຺ຖຸ ອຏ຺ຐມໍ.