໕. ມຫາກຈ຺ຈາຍນຕ຺ເຖຣວຕ຺ຖຸ

ຍສ຺ສິນ຺ທ຺ຣິຍານີຕິ ອິມໍ ຘມ຺ມເທສນໍ ສຕ຺ຖາ ປຸພ຺ພາຣາເມ ວິຫຣນ຺ໂຕ ມຫາກຈ຺ຈາຍນຕ຺ເຖຣໍ ອາຣພ຺ຠ ກເຖສິ.

ເອກສ຺ມິຎ຺ຫິ ສມເຍ ຠຄວາ ມຫາປວາຣຓາຍ ມິຄາຣມາຕຸຍາ ປາສາທສ຺ສ ເຫຏ຺ຐາ ມຫາສາວກປຣິວຸໂຕ ນິສີທິ. ຕສ຺ມິໍ ສມເຍ ມຫາກຈ຺ຈາຍນຕ຺ເຖໂຣ ອວນ຺ຕີສຸ ວິຫຣຕິ. ໂສ ປນາຍສ຺ມາ ທູຣໂຕປິ ອາຄນ຺ຕ຺ວາ ຘມ຺ມສ຺ສວນໍ ປຄ຺ຄຓ຺ຫາຕິເຍວ. ຕສ຺ມາ ມຫາເຖຣາ ນິສີທນ຺ຕາ ມຫາກຈ຺ຈາຍນຕ຺ເຖຣສ຺ສ ອາສນໍ ຐເປຕ຺ວາ ນິສີທິໍສຸ. ສກ຺ໂກ ເທວຣາຊາ ທ຺ວີຫິ ເທວໂລເກຫິ ເທວປຣິສາຍ ສທ຺ຘິໍ ອາຄນ຺ຕ຺ວາ ທິພ຺ພຄນ຺ຘມາລາທີຫິ ສຕ຺ຖາຣໍ ປູເຊຕ຺ວາ ຐິໂຕ ມຫາກຈ຺ຈາຍນຕ຺ເຖຣໍ ອທິສ຺ວາ ກິໍ ນຸ ໂຂ ມມ, ອຍ຺ໂຍ, ນ ທິສ຺ສຕິ, ສາຘຸ ໂຂ ປນສ຺ສ ສເຈ ອາຄຈ຺ເຉຍ຺ຍາຕິ. ເຖໂຣປິ ຕໍ ຂຓຎ຺ເຎວ ອາຄນ຺ຕ຺ວາ ອຕ຺ຕໂນ ອາສເນ ນິສິນ຺ນເມວ ອຕ຺ຕານໍ ທສ຺ເສສິ. ສກ຺ໂກ ເຖຣໍ ທິສ຺ວາ ໂຄປ຺ຜເກສຸ ທຬ຺ຫໍ ຄເຫຕ຺ວາ ‘‘ສາຘຸ ວຕ ເມ, ອຍ຺ໂຍ, ອາຄໂຕ, ອຫໍ ອຍ຺ຍສ຺ສ ອາຄມນເມວ ປຈ຺ຈາສີສາມີ’’ຕິ ວຕ຺ວາ ອຸໂຠຫິ ຫຕ຺ເຖຫິ ປາເທ ສມ຺ພາຫິຕ຺ວາ ຄນ຺ຘມາລາທີຫິ ປູເຊຕ຺ວາ ວນ຺ທິຕ຺ວາ ເອກມນ຺ຕໍ ອຏ຺ຐາສິ. ຠິກ຺ຂູ ອຸຊ຺ຌາຍິໍສຸ. ‘‘ສກ຺ໂກ ມຸຂໍ ໂອໂລເກຕ຺ວາ ສກ຺ກາຣໍ ກໂຣຕິ, ອວເສສມຫາສາວການໍ ເອວຣູປໍ ສກ຺ກາຣໍ ອກຣິຕ຺ວາ ມຫາກຈ຺ຈາຍນໍ ທິສ຺ວາ ເວເຄນ ໂຄປ຺ຜເກສຸ ຄເຫຕ຺ວາ ‘ສາຘຸ ວຕ ເມ, ອຍ຺ໂຍ, ອາຄໂຕ, ອຫໍ ອຍ຺ຍສ຺ສ ອາຄມນເມວ ປຈ຺ຈາສີສາມີ’ຕິ ວຕ຺ວາ ອຸໂຠຫິ ຫຕ຺ເຖຫິ ປາເທ ສມ຺ພາຫິຕ຺ວາ ປູເຊຕ຺ວາ ວນ຺ທິຕ຺ວາ ເອກມນ຺ຕໍ ຐິໂຕ’’ຕິ. ສຕ຺ຖາ ເຕສໍ ຕໍ ກຖໍ ສຸຕ຺ວາ, ‘‘ຠິກ຺ຂເວ, ມມ ປຸຕ຺ເຕນ ມຫາກຈ຺ຈາຍເນນ ສທິສາ ອິນ຺ທ຺ຣິເຍສຸ ຄຸຕ຺ຕທ຺ວາຣາ ຠິກ຺ຂູ ເທວານມ຺ປິ ມນຸສ຺ສານມ຺ປິ ປິຍາເຍວາ’’ຕິ ວຕ຺ວາ ອນຸສນ຺ຘິໍ ຆເຏຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໙໔. ‘‘ຍສ຺ສິນ຺ທ຺ຣິຍານິ ສມຖງ຺ຄຕານິ,

ອສ຺ສາ ຍຖາ ສາຣຖິນາ ສຸທນ຺ຕາ;

ປຫີນມານສ຺ສ ອນາສວສ຺ສ,

ເທວາປິ ຕສ຺ສ ປິຫຍນ຺ຕິ ຕາທິໂນ’’ຕິ.

ຕສ຺ສຕ຺ໂຖ – ຍສ຺ສ ຠິກ຺ຂຸໂນ ເຉເກນ ສາຣຖິນາ ສຸທນ຺ຕາ ອສ຺ສາ ວິຍ ຉ ອິນ຺ທ຺ຣິຍານິ ສມຖໍ ທນ຺ຕຠາວໍ ນິພ຺ພິເສວນຠາວໍ ຄຕານິ, ຕສ຺ສ ນວວິຘໍ ມານໍ ປຫາຍ ຐິຕຕ຺ຕາ ປຫີນມານສ຺ສ ຈຕຸນ຺ນໍ ອາສວານໍ ອຠາເວນ ອນາສວສ຺ສ. ຕາທິໂນຕິ ຕາທິຠາວສຓ຺ຐິຕສ຺ສ ຕຖາຣູປສ຺ສ ເທວາປິ ປິຫຍນ຺ຕິ, ມນຸສ຺ສາປິ ທສ຺ສນຎ຺ຈ ອາຄມນຎ຺ຈ ປຕ຺ເຖນ຺ຕິເຍວາຕິ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ມຫາກຈ຺ຈາຍນຕ຺ເຖຣວຕ຺ຖຸ ປຎ຺ຈມໍ.