໑໑. ຊມ຺ພຸກຕ຺ເຖຣວຕ຺ຖຸ

ມາເສ ມາເສຕິ ອິມໍ ຘມ຺ມເທສນໍ ສຕ຺ຖາ ເວຬຸວເນ ວິຫຣນ຺ໂຕ ຊມ຺ພຸກໍ ອາຊີວກໍ ອາຣພ຺ຠ ກເຖສິ.

ອຕີເຕ ກິຣ ກສ຺ສປສມ຺ມາສມ຺ພຸທ຺ຘກາເລ ຄາມວາສີ ເອໂກ ກຸຏຸມ຺ພິໂກ ເອກສ຺ສ ເຖຣສ຺ສ ວິຫາຣໍ ກຕ຺ວາ ຕໍ ຕຕ຺ຖ ວິຫຣນ຺ຕໍ ຈຕູຫິ ປຈ຺ຈເຍຫິ ອຸປຏ຺ຐຫິ. ເຖໂຣ ຕສ຺ສ ເຄເຫ ນິພທ຺ຘໍ ຠຸຎ຺ຊຕິ. ອເຖໂກ ຂີຓາສໂວ ຠິກ຺ຂຸ ທິວາ ປິຓ຺ຑາຍ ຈຣນ຺ໂຕ ຕສ຺ສ ເຄຫທ຺ວາຣໍ ປາປຸຓິ. ກຸຏຸມ຺ພິໂກ ຕໍ ທິສ຺ວາ ຕສ຺ສ ອິຣິຍາປເຖ ປສນ຺ໂນ ເຄຫໍ ປເວເສຕ຺ວາ ສກ຺ກຈ຺ຈໍ ປຓີເຕນ ໂຠຊເນນ ປຣິວິສິຕ຺ວາ, ‘‘ຠນ຺ເຕ, ອິມໍ ສາຏກໍ ຣຊິຕ຺ວາ ນິວາເສຍ຺ຍາຖາ’’ຕິ ມຫນ຺ຕໍ ສາຏກໍ ທຕ຺ວາ, ‘‘ຠນ຺ເຕ, ເກສາ ໂວ ທີຆາ, ຕຸມ຺ຫາກໍ ເກໂສໂຣປນຕ຺ຖາຍ ນ຺ຫາປິຕໍ ອາເນສ຺ສາມິ, ສຍນຕ຺ຖາຍ ຈ ໂວ ມຎ຺ຈກໍ ຄາຫາເປຕ຺ວາ ອາຄມິສ຺ສາມີ’’ຕິ ອາຫ. ນິພທ຺ຘໍ ເຄເຫ ຠຸຎ຺ຊນ຺ໂຕ ກຸລູປໂກ ຠິກ຺ຂຸ ຕໍ ຕສ຺ສ ສກ຺ກາຣໍ ທິສ຺ວາ ຈິຕ຺ຕໍ ປສາເທຕຸໍ ນາສກ຺ຂິ, ‘‘ອຍໍ ຕໍ ມຸຫຸຕ຺ຕໍ ທິຏ຺ຐກສ຺ສ ເອວຣູປໍ ສກ຺ກາຣໍ ກໂຣຕິ, ນິພທ຺ຘໍ ເຄເຫ ຠຸຎ຺ຊນ຺ຕສ຺ສ ປນ ມຍ຺ຫໍ ນ ກໂຣຕີ’’ຕິ ຈິນ຺ເຕຕ຺ວາ ວິຫາຣໍ ອຄມາສິ. ອິຕໂຣປິ ເຕເນວ ສທ຺ຘິໍ ຄນ຺ຕ຺ວາ ກຸຏຸມ຺ພິເກນ ທິນ຺ນສາຏກໍ ຣຊິຕ຺ວາ ນິວາເສສິ. ກຸຏມ຺ພິໂກປິ ນ຺ຫາປິຕໍ ອາທາຍ ຄນ຺ຕ຺ວາ ເຖຣສ຺ສ ເກເສ ໂອຫາຣາເປຕ຺ວາ ມຎ຺ຈກໍ ອຕ຺ຖຣາເປຕ຺ວາ, ‘‘ຠນ຺ເຕ, ອິມສ຺ມິໍເຍວ ມຎ຺ຈເກ ສຍຖາ’’ຕິ ວຕ຺ວາ ທ຺ເວປິ ເຖເຣ ສ຺ວາຕນາຍ ນິມນ຺ເຕຕ຺ວາ ປກ຺ກາມິ.

ເນວາສິໂກ ຕສ຺ສ ຕໍ ສກ຺ກາຣໍ ກຍິຣມານໍ ອຘິວາເສຕຸໍ ນາສກ຺ຂິ. ອຖສ຺ສ ໂສ ສາຍໍ ເຖຣສ຺ສ ນິປນ຺ນຏ຺ຐານໍ ຄນ຺ຕ຺ວາ ຈຕູຫາກາເຣຫິ ເຖຣໍ ອກ຺ໂກສິ, ‘‘ອາວຸໂສ, ອາຄນ຺ຕຸກ ກຸຏຸມ຺ພິກສ຺ສ ເຕ ເຄເຫ ຠຕ຺ຕໍ ຠຸຎ຺ຊນໂຕ ວຣຕຣໍ ມີຬ຺ຫໍ ຂາທິຕຸໍ, ກຸຏຸມ຺ພິເກນ ອານີຕນ຺ຫາປິເຕນ ເກໂສຫາຣາປນໂຕ ວຣຕຣໍ ຕາລຏ຺ຐິເກນ ເກເສ ລຸຎ຺ຈາເປຕຸໍ. ກຸຏຸມ຺ພິເກນ ທິນ຺ນສາຏກນິວາສນໂຕ ວຣຕຣໍ ນຄ຺ເຄນ ວິຈຣິຕຸໍ, ກຸຏຸມ຺ພິເກນ ອາຠຕມຎ຺ຈເກ ນິປຊ຺ຊນໂຕ ວຣຕຣໍ ຠູມິຍໍ ນິປຊ຺ຊິຕຸ’’ນ຺ຕິ. ເຖໂຣປິ ‘‘ມາ ເອສ ພາໂລ ມໍ ນິສ຺ສາຍ ນສ຺ສີ’’ຕິ ນິມນ຺ຕນໍ ອນາທິຍິຕ຺ວາ ປາໂຕວ ອຸຏ຺ຐາຍ ຍຖາສຸຂໍ ອຄມາສິ. ເນວາສິໂກປິ ປາໂຕວ ວິຫາເຣ ກຕ຺ຕພ຺ພວຕ຺ຕໍ ກຕ຺ວາ ຠິກ຺ຂາຈາຣເວລາຍ ‘‘ອິທານິປິ ອາຄນ຺ຕຸໂກ ນິທ຺ທາຍຕິ, ຆຓ຺ຑິກສທ຺ເທນ ປພຸຊ຺ເຌຍ຺ຍາ’’ຕິ ສຎ຺ຎາຍ ນຂປິຏ຺ເຐເນວ ຆຓ຺ຑິໍ ປຫຣິຕ຺ວາ ຄາມໍ ປິຓ຺ຑາຍ ປາວິສິ. ກຸຏຸມ຺ພິໂກປິ ສກ຺ກາຣໍ ກຕ຺ວາ ເຖຣານໍ ອາຄມນມຄ຺ຄໍ ໂອໂລເກນ຺ໂຕ ເນວາສິກໍ ທິສ຺ວາ, ‘‘ຠນ຺ເຕ, ເຖໂຣ ກຸຫິ’’ນ຺ຕິ ປຸຈ຺ຉິ. ອຖ ນໍ ເນວາສິໂກ ‘‘ມາ, ອາວຸໂສ, ກິຎ຺ຈິ ອວຈ, ຕຸຍ຺ຫໍ ກຸລູປໂກ ຫິຍ຺ໂຍ, ຕວ ນິກ຺ຂນ຺ຕເວລາຍ ໂອວຣກໍ ປວິສິຕ຺ວາ ນິທ຺ທໍ ໂອກ຺ກນ຺ໂຕ ປາໂຕວ ອຸຏ຺ຐາຍ ມມ ວິຫາຣສມ຺ມຊ຺ຊນສທ຺ທມ຺ປິ ປານີຍຆຏປຣິໂຠຊນີຍຆເຏສຸ ອຸທກສິຎ຺ຈນສທ຺ທມ຺ປິ ຆຓ຺ຑິກສທ຺ທມ຺ປິ ກໂຣນ຺ຕສ຺ສ ນ ຊານາຕີ’’ຕິ ອາຫ. ກຸຏຸມ຺ພິໂກ ຈິນ຺ເຕສິ – ‘‘ຕາທິສາຍ ອິຣິຍາປຖສມ຺ປຕ຺ຕິຍາ ສມນ຺ນາຄຕສ຺ສ ເມ ອຍ຺ຍສ຺ສ ຍາວ ອິມມ຺ຫາ ກາລາ ນິທ຺ທາຍນໍ ນາມ ນຕ຺ຖິ, ມໍ ປນ ຕສ຺ສ ສກ຺ກາຣໍ ກໂຣນ຺ຕໍ ທິສ຺ວາ ອທ຺ຘາ ອິມິນາ ຠທນ຺ເຕນ ກິຎ຺ຈິ ວຸຕ຺ຕໍ ຠວິສ຺ສຕີ’’ຕິ. ໂສ ອຕ຺ຕໂນ ປຓ຺ຑິຕຠາເວນ ຕໍ ສກ຺ກຈ຺ຈໍ ໂຠເຊຕ຺ວາ ຕສ຺ສ ປຕ຺ຕໍ ສາຘຸກໍ ໂຘວິຕ຺ວາ ນານຄ຺ຄຣສໂຠຊນສ຺ສ ປູເຣຕ຺ວາ, ‘‘ຠນ຺ເຕ, ສເຈ ເມ ອຍ຺ຍໍ ປສ຺ເສຍ຺ຍາຖ, ອິມມສ຺ສ ປິຓ຺ຑປາຕໍ ທເທຍ຺ຍາຖາ’’ຕິ ອາຫ.

ອິຕໂຣ ຕໍ ຄເຫຕ຺ວາວ ຈິນ຺ເຕສິ – ‘‘ສເຈ ໂສ ເອວຣູປໍ ປິຓ຺ຑປາຕໍ ຠຸຎ຺ຊິສ຺ສຕິ, ອິມສ຺ມິໍເຍວ ຐາເນ ປລຸທ຺ໂຘ ຠວິສ຺ສຕີ’’ຕິ ອນ຺ຕຣາມຄ຺ເຄ ຕໍ ປິຓ຺ຑປາຕໍ ຉຑ຺ເຑຕ຺ວາ ເຖຣສ຺ສ ວສນຏ຺ຐານໍ ຄນ຺ຕ຺ວາ ຕໍ ຕຕ຺ຖ ໂອໂລເກນ຺ໂຕ ນ ອທ຺ທສ. ອຖ ນໍ ເອຕ຺ຕກສ຺ສ ກມ຺ມສ຺ສ ກຕຕ຺ຕາ ວີສຕິວສ຺ສສຫສ຺ສານິ ກໂຕປິ ສມຓຘມ຺ໂມ ຣກ຺ຂິຕຸໍ ນາສກ຺ຂິ. ອາຍຸປຣິໂຍສາເນ ປນ ກາລໍ ກຕ຺ວາ ອວີຈິມ຺ຫິ ນິພ຺ພຕ຺ຕິຕ຺ວາ ເອກໍ ພຸທ຺ຘນ຺ຕຣໍ ມຫາທຸກ຺ຂໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ຣາຊຄຫນຄເຣ ເອກສ຺ມິໍ ພຫ຺ວນ຺ນປາເນ ກຸລຆເຣ ນິພ຺ພຕ຺ຕິ. ໂສ ປທສາ ຄມນກາລໂຕ ປຏ຺ຐາຍ ເນວ ສຍເນ ສຍິຕຸໍ, ນ ຠຕ຺ຕໍ ຠຸຎ຺ຊິຕຸໍ ອິຈ຺ຉຕິ, ອຕ຺ຕໂນ ສຣີຣວລຎ຺ຊເມວ ຂາທຕິ. ‘‘ພາລຕາຍ ອຊານນ຺ໂຕ ກໂຣຕີ’’ຕິ ຕໍ ໂປສຍິໍສຸ. ມຫລ຺ລກກາເລປິ ວຕ຺ຖໍ ນິວາເສຕຸໍ ນ ອິຈ຺ຉຕິ, ນຄ຺ໂຄວ ວິຈຣຕິ, ຠູມິຍໍ ສຍຕິ, ອຕ຺ຕໂນ ສຣີຣວລຎ຺ຊເມວ ຂາທຕິ. ອຖສ຺ສ ມາຕາປິຕໂຣ ‘‘ນາຍໍ ກຸລຆຣສ຺ສ ອນຸຈ຺ຉວິໂກ, ເກວລໍ ອລຊ຺ຊນໂກ ອາຊີວການໍ ເອສ ອນຸຈ຺ຉວິໂກ’’ຕິ ເຕສໍ ສນ຺ຕິກໍ ເນຕ຺ວາ ‘‘ອິມໍ ທາຣກໍ ປພ຺ພາເຊຖາ’’ຕິ ອທໍສຸ. ອຖ ນໍ ເຕ ປພ຺ພາເຊສຸໍ. ປພ຺ພາເຊນ຺ຕາ ຈ ປນ ຄລປ຺ປມາເຓ ອາວາເຏ ຐເປຕ຺ວາ ທ຺ວິນ຺ນໍ ອໍສກູຏານໍ ອຸປຣິໍ ປທຣານິ ທຕ຺ວາ ເຕສໍ ອຸປຣິ ນິສີທິຕ຺ວາ ຕາລຏ຺ຐິຂຓ຺ເຑນ ເກເສ ລຸຎ຺ຈິໍສຸ. ອຖ ເນ ຕສ຺ສ ມາຕາປິຕໂຣ ສ຺ວາຕນາຍ ນິມນ຺ເຕຕ຺ວາ ປກ຺ກມິໍສຸ.

ປຸນທິວເສ ອາຊີວກາ ‘‘ເອຫິ, ຄາມໍ ປວິສິສ຺ສາມາ’’ຕິ ຕໍ ວທິໍສຸ. ໂສ ‘‘ຄຈ຺ຉຖ ຕຸມ຺ເຫ, ອຫໍ ອິເຘວ ຠວິສ຺ສາມີ’’ຕິ ນ ອິຈ຺ຉິ. ອຖ ນໍ ປຸນປ຺ປຸນໍ ວຕ຺ວາ ອນິຈ຺ຉມານໍ ໂອຫາຍ ອຄມໍສຸ. ໂສປິ ເຕສໍ ຄຕຠາວໍ ຎຕ຺ວາ ວຈ຺ຈກຸຏິຍາ ປທຣໍ ວິວຣິຕ຺ວາ ໂອຣຸຍ຺ຫ ອຸໂຠຫິ ຫຕ຺ເຖຫິ ອາໂລປໍ ອາໂລປໍ ກຕ຺ວາ ຄູຖໍ ຂາທິ. ອາຊີວກາ ຕສ຺ສ ອນ຺ໂຕຄາມໂຕ ອາຫາຣໍ ປຫິຓິໍສຸ. ຕມ຺ປິ ນ ອິຈ຺ຉິ. ປຸນປ຺ປຸນໍ ວຸຈ຺ຈມາໂນປິ ‘‘ນ ເມ ອິມິນາ ອຕ຺ໂຖ. ລທ຺ໂຘ ເມ ອາຫາໂຣ’’ຕິ ອາຫ. ‘‘ກຫໍ ລທ຺ໂຘ’’ຕິ? ‘‘ອິເຘວ ລທ຺ໂຘ’’ຕິ. ເອວໍ ທຸຕິເຍ ຕຕິເຍ ຈຕຸຕ຺ເຖປິ ທິວເສ ເຕຫິ ພຫຸມ຺ປິ ວຸຈ຺ຈມາໂນ ‘‘ອຫໍ ອິເຘວ ຠວິສ຺ສາມີ’’ຕິ ຄາມໍ ຄນ຺ຕຸໍ ນ ອິຈ຺ຉິ. ອາຊີວກາ ‘‘ອຍໍ ທິວເສ ທິວເສ ເນວ ຄາມໍ ປວິສິຕຸໍ ອິຈ຺ຉຕິ, ນ ອມ຺ເຫຫິ ປຫິຕາຫາຣໍ ອາຫຣິຕຸໍ ອິຈ຺ຉຕິ, ‘ອິເຘວ ເມ ລທ຺ໂຘ’ຕິ ວທຕິ, ກິໍ ນຸ ໂຂ ກໂຣຕິ, ປຣິຄ຺ຄຓ຺ຫິສ຺ສາມ ນ’’ນ຺ຕິ ຄາມໍ ປວິສນ຺ຕາ ເອກໍ ທ຺ເວ ຊເນ ຕສ຺ສ ປຣິຄ຺ຄຓ຺ຫນຕ຺ຖໍ ໂອຫາຍ ຄມິໍສຸ. ເຕ ປຈ຺ຉໂຕ ຄຈ຺ຉນ຺ຕາ ວິຍ ຫຸຕ຺ວາ ນິລີຍິໍສຸ. ໂສປິ ເຕສໍ ຄຕຠາວໍ ຎຕ຺ວາ ປຸຣິມນເຍເນວ ວຈ຺ຈກຸຏິໍ ໂອຣຸຍ຺ຫ ຄູຖໍ ຂາທິ.

ອິຕເຣ ຕສ຺ສ ກິຣິຍໍ ທິສ຺ວາ ອາຊີວການໍ ອາໂຣຈຍິໍສຸ. ຕໍ ສຸຕ຺ວາ ອາຊີວກາ ‘‘ອໂຫ ຠາຣິຍໍ ກມ຺ມໍ, ສເຈ ສມຓສ຺ສ ໂຄຕມສ຺ສ ສາວກາ ຊາເນຍ຺ຍຸໍ, ‘ອາຊີວກາ ຄູຖໍ ຂາທມານາ ວິຈຣນ຺ຕີ’ຕິ ອມ຺ຫາກໍ ອກິຕ຺ຕິໍ ປກາເສຍ຺ຍຸໍ, ນາຍໍ ອມ຺ຫາກໍ ອນຸຈ຺ຉວິໂກ’’ຕິ ຕໍ ອຕ຺ຕໂນ ສນ຺ຕິກາ ນີຫຣິໍສຸ. ໂສ ເຕຫິ ນີຫຣິໂຕ ມຫາຊນສ຺ສ ອຸຈ຺ຈາຣກຣຓຏ຺ຐາເນ ປຕ຺ຖຣິໂຕ ເອໂກ ປິຏ຺ຐິປາສາໂຓ ອຕ຺ຖິ. ຕສ຺ມິໍ ມຫນ຺ຕໍ ໂສຓ຺ຑິ, ປິຏ຺ຐິປາສາຓໍ ນິສ຺ສາຍ ມຫາຊນສ຺ສ ອຸຈ຺ຈາຣກຣຓຏ຺ຐານໍ. ໂສ ຕຕ຺ຖ ຄນ຺ຕ຺ວາ ຣຕ຺ຕິໍ ຄູຖໍ ຂາທິຕ຺ວາ ມຫາຊນສ຺ສ ສຣີຣວລຎ຺ຊນຕ຺ຖາຍ ອາຄມນກາເລ ເອເກນ ຫຕ຺ເຖນ ປາສາຓສ຺ສ ເອກໍ ອນ຺ຕໍ ໂອລຸພ຺ຠ ເອກໍ ປາທໍ ອຸກ຺ຂິປິຕ຺ວາ ຊຓ຺ຓຸເກ ຐເປຕ຺ວາ ອຸທ຺ຘໍວາຕາຠິມຸໂຂ ມຸຂໍ ວິວຣິຕ຺ວາ ຕິຏ຺ຐຕິ. ມຫາຊໂນ ຕໍ ທິສ຺ວາ ອຸປສງ຺ກມິຕ຺ວາ ວນ຺ທິຕ຺ວາ, ‘‘ຠນ຺ເຕ, ກສ຺ມາ ອຍ຺ໂຍ ມຸຂໍ ວິວຣິຕ຺ວາ ຐິໂຕ’’ຕິ ປຸຈ຺ຉຕິ. ‘‘ອຫໍ ວາຕຠກ຺ໂຂ, ອຎ຺ໂຎ ເມ ອາຫາໂຣ ນຕ຺ຖີ’’ຕິ. ອຖ ‘‘ກສ຺ມາ ເອກໍ ປາທໍ ຊຓ຺ຓຸເກ ກຕ຺ວາ ຐິໂຕສິ, ຠນ຺ເຕ’’ຕິ? ‘‘ອຫໍ ອຸຄ຺ຄຕໂປ ໂຆຣຕໂປ, ມຍາ ທ຺ວີຫິ ປາເທຫິ ອກ຺ກນ຺ຕາ ປຖວີ ກມ຺ປຕິ, ຕສ຺ມາ ເອກໍ ປາທໍ ອຸກ຺ຂິປິຕ຺ວາ ຊຓ຺ຓຸເກ ຐເປຕ຺ວາ ຐິໂຕມ຺ຫິ. ອຫຎ຺ຫິ ຣຕ຺ຕິນ຺ທິວໍ ຐິຕໂກວ ວີຕິນາເມມິ, ນ ນິສີທາມິ, ນ ນິປຊ຺ຊາມີ’’ຕິ. ມນຸສ຺ສາ ນາມ ເຍຠຸຍ຺ເຍນ ວຈນມຕ຺ຕເມວ ສທ຺ທຫນ຺ຕິ, ຕສ຺ມາ ‘‘ອໂຫ ອຈ຺ຉຣິຍໍ, ເອວຣູປາປິ ນາມ ຕປສ຺ສິໂນ ໂຫນ຺ຕິ, ນ ໂນ ເອວຣູປາ ທິຏ຺ຐປຸພ຺ພາ’’ຕິ ເຍຠຸຍ຺ເຍນ ອງ຺ຄມຄຘວາສິໂນ ສງ຺ຂຸຠິຕ຺ວາ ອຸປສງ຺ກມິຕ຺ວາ ມາເສ ມາເສ ມຫນ຺ຕໍ ສກ຺ກາຣໍ ອຠິຫຣນ຺ຕິ. ໂສ ‘‘ອຫໍ ວາຕເມວ ຠກ຺ຂາມິ, ນ ອຎ຺ຎໍ ອາຫາຣໍ. ອຎ຺ຎຎ຺ຫິ ເມ ຂາທນ຺ຕສ຺ສ ຕໂປ ນສ຺ສຕີ’’ຕິ ເຕຫິ ອຠິຫຏໍ ນ ກິຎ຺ຈິ ອິຈ຺ຉຕິ. ມນຸສ຺ສາ ‘‘ມາ ໂນ, ຠນ຺ເຕ, ນາເສຖ, ຕຸມ຺ຫາທິເສນ ໂຆຣຕເປນ ປຣິໂຠເຄ ກເຕ ອມ຺ຫາກໍ ທີຆຣຕ຺ຕໍ ຫິຕາຍ ສຸຂາຍ ສໍວຕ຺ຕຕີ’’ຕິ ປຸນປ຺ປຸນໍ ຍາຈນ຺ຕິ. ຕສ຺ສ ອຎ຺ໂຎ ອາຫາໂຣ ນ ຣຸຈ຺ຈຕິ. ມຫາຊນສ຺ສ ປນ ຍາຈນາຍ ປີຬິໂຕ ເຕຫິ ອາຠຕານິ ສປ຺ປິຜາຓິຕາທີນິ ກຸສຄ຺ເຄນ ຊິວ຺ຫຄ຺ເຄ ຐເປຕ຺ວາ ‘‘ຄຈ຺ຉຖ, ອລໍ ໂວ ເອຕ຺ຕກໍ ຫິຕາຍ ສຸຂາຍ ຈາ’’ຕິ ອຸຍ຺ໂຍເຊສິ. ເອວໍ ໂສ ປຎ຺ຈປຎ຺ຎາສ ວສ຺ສານິ ນຄ຺ໂຄ ຄູຖໍ ຂາທນ຺ໂຕ ເກເສ ລຸຎ຺ຈນ຺ໂຕ ຠູມິຍໍ ສຍມາໂນ ວີຕິນາເມສິ.

ພຸທ຺ຘານມ຺ປິ ໂຂ ປຈ຺ຈູສກາເລ ໂລກໂວໂລກນໍ ອວິຊຫິຕເມວ ໂຫຕິ. ຕສ຺ມາ ເອກທິວສໍ ຠຄວໂຕ ປຈ຺ຈູສສມເຍ ໂລກໍ ໂວໂລເກນ຺ຕສ຺ສ ອຍໍ ຊມ຺ພຸກາຊີວໂກ ຎາຓຊາລສ຺ສ ອນ຺ໂຕ ປຎ຺ຎາຍິ. ສຕ຺ຖາ ‘‘ກິໍ ນຸ ໂຂ ຠວິສ຺ສຕີ’’ຕິ ອາວຊ຺ເຊຕ຺ວາ ຕສ຺ສ ສຫ ປຏິສມ຺ຠິທາຫິ ອຣຫຕ຺ຕສ຺ສູປນິສ຺ສຍໍ ທິສ຺ວາ ‘‘ອຫໍ ເອຕໍ ອາທິໍ ກຕ຺ວາ ເອກໍ ຄາຖໍ ຠາສິສ຺ສາມິ, ຄາຖາວສາເນ ຈຕຸຣາສີຕິຍາ ປາຓສຫສ຺ສານໍ ຘມ຺ມາຠິສມໂຍ ຠວິສ຺ສຕິ. ອິມໍ ກຸລປຸຕ຺ຕໍ ນິສ຺ສາຍ ມຫາຊໂນ ໂສຕ຺ຖິຠາວໍ ປາປຸຓິສ຺ສຕີ’’ຕິ ຎຕ຺ວາ ປຸນທິວເສ ຣາຊຄເຫ ປິຓ຺ຑາຍ ຈຣິຕ຺ວາ ປິຓ຺ຑປາຕປຏິກ຺ກນ຺ໂຕ ອານນ຺ທຕ຺ເຖຣໍ ອາມນ຺ເຕສິ – ‘‘ອານນ຺ທ, ຊມ຺ພຸກາຊີວກສ຺ສ ສນ຺ຕິກໍ ຄມິສ຺ສາມີ’’ຕິ. ‘‘ຠນ຺ເຕ, ກິໍ ຕຸມ຺ເຫເຍວ ຄມິສ຺ສຖາ’’ຕິ? ‘‘ອາມ, ອຫເມວາ’’ຕິ ເອວໍ ວຕ຺ວາ ສຕ຺ຖາ ວຑ຺ຒມານກຈ຺ຉາຍາຍ ຕສ຺ສ ສນ຺ຕິກໍ ປາຍາສິ.

ເທວຕາ ຈິນ຺ຕຍິໍສຸ – ‘‘ສຕ຺ຖາ ສາຍໍ ຊມ຺ພຸກາຊີວກສ຺ສ ສນ຺ຕິກໍ ຄຈ຺ຉຕິ, ໂສ ຈ ເຊຄຸຈ຺ເຉ ອຸຈ຺ຈາຣປສ຺ສາວທນ຺ຕກຏ຺ຐກິລິຏ຺ເຐ ປິຏ຺ຐິປາສາເຓ ວສຕິ, ເທວໍ ວສ຺ສາເປຕຸໍ ວຏ຺ຏຕີ’’ຕິ ອຕ຺ຕໂນ ອານຸຠາເວນ ຕໍ ມຸຫຸຕ຺ຕໍເຍວ ເທວໍ ວສ຺ສາເປສຸໍ. ປິຏ຺ຐິປາສາໂຓ ສຸຈິ ນິມ຺ມໂລ ອໂຫສິ. ອຖສ຺ສ ອຸປຣິ ປຎ຺ຈວຓ຺ຓໍ ປຸປ຺ຜວສ຺ສໍ ວສ຺ສາເປສຸໍ. ສຕ຺ຖາ ສາຍໍ ຊມ຺ພຸກາຊີວກສ຺ສ ສນ຺ຕິກໍ ຄນ຺ຕ຺ວາ ‘‘ຊມ຺ພຸກາ’’ຕິ ສທ຺ທມກາສິ. ຊມ຺ພຸໂກ ‘‘ໂກ ນຸ ໂຂ ເອສ, ທຸຊ຺ຊໂນ ມໍ ຊມ຺ພຸກວາເທນ ວທຕີ’’ຕິ ຈິນ຺ເຕຕ຺ວາ ‘‘ໂກ ເອໂສ’’ຕິ ອາຫ. ‘‘ອຫໍ ສມໂຓ’’ຕິ. ‘‘ກິໍ ມຫາສມຓາ’’ຕິ? ‘‘ອຊ຺ຊ ເມ ເອກຣຕ຺ຕິໍ ອິຘ ວສນຏ຺ຐານໍ ເທຫີ’’ຕິ. ‘‘ນຕ຺ຖິ, ມຫາສມຓ, ອິມສ຺ມິໍ ຐາເນ ວສນຏ຺ຐານ’’ນ຺ຕິ. ‘‘ຊມ຺ພຸກ, ມາ ເອວໍ ກຣິ, ເອກຣຕ຺ຕິໍ ເມ ວສນຏ຺ຐານໍ ເທຫິ, ປພ຺ພຊິຕາ ນາມ ປພ຺ພຊິຕໍ ປຕ຺ເຖນ຺ຕິ, ມນຸສ຺ສາ ມນຸສ຺ສໍ, ປສໂວ ປສວ’’ນ຺ຕິ. ‘‘ກິໍ ປນ ຕ຺ວໍ ປພ຺ພຊິໂຕ’’ຕິ? ‘‘ອາມ, ປພ຺ພຊິໂຕມ຺ຫີ’’ຕິ. ‘‘ສເຈ ຕ຺ວໍ ປພ຺ພຊິໂຕ, ກຫໍ ເຕ ລາພຸກໍ, ກຫໍ ຘູມກຏຈ຺ຉຸໂກ, ກຫໍ ຍຎ຺ຎສຸຕ຺ຕກ’’ນ຺ຕິ? ‘‘‘ອຕ຺ເຖຕໍ ມຍ຺ຫໍ, ວິສຸໍ ວິສຸໍ ປນ ຄເຫຕ຺ວາ ວິຈຣຓໍ ທຸກ຺ຂ’ນ຺ຕິ ອພ຺ຠນ຺ຕເຣເນວ ຄເຫຕ຺ວາ ຈຣາມີ’’ຕິ. ໂສ ‘‘ຈຣິສ຺ສສິ ຕ຺ວໍ ເອຕໍ ອຄ຺ຄຓ຺ຫິຕ຺ວາ’’ຕິ ກຸຊ຺ຌິ. ອຖ ນໍ ສຕ຺ຖາ ອາຫ – ‘‘ໂຫຕຸ, ຊມ຺ພຸກ, ມາ ກຸຊ຺ຌ, ວສນຏ຺ຐານໍ ເມ ອາຈິກ຺ຂາ’’ຕິ. ‘‘ນຕ຺ຖິ, ມຫາສມຓ, ເອຕ຺ຖ ວສນຏ຺ຐານ’’ນ຺ຕິ.

ສຕ຺ຖາ ຕສ຺ສ ວສນຏ຺ຐານໂຕ ອວິທູເຣ ເອກໍ ປພ຺ຠາຣໍ ອຕ຺ຖິ, ຕໍ ນິທ຺ທິສນ຺ໂຕ ‘‘ເອຕສ຺ມິໍ ປພ຺ຠາເຣ ໂກ ວສຕີ’’ຕິ ອາຫ. ‘‘ນຕ຺ຖິ ໂກຈິ, ມຫາສມຓາ’’ຕິ. ‘‘ເຕນ ຫິ ເອຕໍ ມຍ຺ຫໍ ເທຫີ’’ຕິ. ‘‘ຕ຺ວຎ຺ເຎວ ຊານ, ມຫາສມຓາ’’ຕິ. ສຕ຺ຖາ ປພ຺ຠາເຣ ນິສີທນໍ ປຎ຺ຎາເປຕ຺ວາ ນິສີທິ. ປຐມຍາເມ ຈຕ຺ຕາໂຣ ມຫາຣາຊາໂນ ຈຕຸທ຺ທິສໍ ເອໂກຠາສໍ ກໂຣນ຺ຕາ ສຕ຺ຖຸ ອຸປຏ຺ຐານໍ ອາຄມິໍສຸ. ຊມ຺ພຸໂກ ໂອຠາສໍ ທິສ຺ວາ ‘‘ໂກ ໂອຠາໂສ ນາເມໂສ’’ຕິ ຈິນ຺ເຕສິ. ມຊ຺ຌິມຍາເມ ສກ຺ໂກ ເທວຣາຊາ ອາຄມິ. ຊມ຺ພຸໂກ ຕມ຺ປິ ທິສ຺ວາ ‘‘ໂກ ນາເມໂສ’’ຕິ ຈິນ຺ເຕສິ. ປຈ຺ຉິມຍາເມ ເອກາຍ ອງ຺ຄຸລິຍາ ເອກໍ, ທ຺ວີຫິ ທ຺ເວ, ທສຫິ ທສ ຈກ຺ກວາຬານິ ໂອຠາເສຕຸໍ ສມຕ຺ໂຖ ມຫາພ຺ຣຫ຺ມາ ສກລໍ ອຣຎ຺ຎໍ ເອໂກຠາສໍ ກໂຣນ຺ໂຕ ອາຄມິ. ຊມ຺ພຸໂກ ຕມ຺ປິ ທິສ຺ວາ ‘‘ໂກ ນຸ ໂຂ ເອໂສ’’ຕິ ຈິນ຺ເຕຕ຺ວາ ປາໂຕວ ສຕ຺ຖຸ ສນ຺ຕິກໍ ຄນ຺ຕ຺ວາ ປຏິສນ຺ຖາຣໍ ກຕ຺ວາ ເອກມນ຺ຕໍ ຐິໂຕ ສຕ຺ຖາຣໍ ປຸຈ຺ຉິ – ‘‘ມຫາສມຓ, ຕຸມ຺ຫາກໍ ສນ຺ຕິກໍ ຈຕສ຺ໂສ ທິສາ ໂອຠາເສນ຺ໂຕ ເກ ອາຄຕາ’’ຕິ? ‘‘ຈຕ຺ຕາໂຣ ມຫາຣາຊາໂນ’’ຕິ. ‘‘ກິໍ ກາຣຓາ’’ຕິ? ‘‘ມໍ ອຸປຏ຺ຐາຕຸ’’ນ຺ຕິ. ‘‘ກິໍ ປນ ຕ຺ວໍ ຈຕູຫິ ມຫາຣາເຊຫິ ອຸຕ຺ຕຣິຕໂຣ’’ຕິ? ‘‘ອາມ, ຊມ຺ພຸກ, ມຫາຣາຊູນມ຺ປິ ອຕິຣາຊາ’’ຕິ. ‘‘ມຊ຺ຌິມຍາເມ ປນ ໂກ ອາຄໂຕ’’ຕິ? ‘‘ສກ຺ໂກ ເທວຣາຊາ, ຊມ຺ພຸກາ’’ຕິ. ‘‘ກິໍ ກາຣຓາ’’ຕິ? ‘‘ມໍ ອຸປຏ຺ຐາຕຸເມວາ’’ຕິ. ‘‘ກິໍ ປນ ຕ຺ວໍ ສກ຺ກເທວຣາຊໂຕປິ ອຸຕ຺ຕຣິຕໂຣ’’ຕິ? ‘‘ອາມ, ຊມ຺ພຸກ, ສກ຺ກໂຕປິ ອຸຕ຺ຕຣິຕໂຣມ຺ຫິ, ເອໂສ ປນ ມຍ຺ຫໍ ຄິລານຸປຏ຺ຐາໂກ ກປ຺ປິຍກາຣກສາມເຓຣສທິໂສ’’ຕິ. ‘‘ປຈ຺ຉິມຍາເມ ສກລໍ ອຣຎ຺ຎໍ ໂອຠາເສຕ຺ວາ ໂກ ອາຄໂຕ’’ຕິ? ‘‘ຍໍ ໂລເກ ພ຺ຣາຫ຺ມຓາທໂຍ ຂິປິຕ຺ວາ ປກ຺ຂລິຕ຺ວາ ‘ນໂມ ມຫາພ຺ຣຫ຺ມຸໂນ’ຕິ ວທນ຺ຕິ, ໂສ ເອວ ມຫາພ຺ຣຫ຺ມາ’’ຕິ. ‘‘ກິໍ ປນ ຕ຺ວໍ ມຫາພ຺ຣຫ຺ມໂຕປິ ອຸຕ຺ຕຣິຕໂຣ’’ຕິ? ‘‘ອາມ, ຊມ຺ພຸກ, ອຫຎ຺ຫິ ພ຺ຣຫ຺ມຸນາປິ ອຕິພ຺ຣຫ຺ມາ’’ຕິ. ‘‘ອຈ຺ຉຣິໂຍສິ ຕ຺ວໍ, ມຫາສມຓ, ມຍ຺ຫໍ ປນ ປຎ຺ຈ ປຎ຺ຎາສ ວສ຺ສານິ ອິຘ ວສນ຺ຕສ຺ສ ເອເຕສຸ ເອໂກປິ ມໍ ອຸປຏ຺ຐາຕຸໍ ນາຄຕປຸພ຺ໂພ. ອຫຎ຺ຫິ ເອຕ຺ຕກໍ ອທ຺ຘານໍ ວາຕຠກ຺ໂຂ ຫຸຕ຺ວາ ຐິຕໂກວ ວີຕິນາເມສິໍ, ນ ຕາວ ເຕ ມຍ຺ຫໍ ອຸປຏ຺ຐານໍ ອາຄຕປຸພ຺ພາ’’ຕິ.

ອຖ ນໍ ສຕ຺ຖາ ອາຫ – ຊມ຺ພຸກ, ຕ຺ວໍ ໂລກສ຺ມິໍ ອນ຺ຘພາລໍ ມຫາຊນໍ ວຎ຺ຈຍມາໂນ ມມ຺ປິ ວຎ຺ເຈຕຸກາໂມ ຊາໂຕ, ນນຸ ຕ຺ວໍ ປຎ຺ຈປຎ຺ຎາສ ວສ຺ສານິ ຄູຖເມວ ຂາທິ, ຠູມິຍໍເຍວ ນິປຊ຺ຊິ, ນຄ຺ໂຄ ຫຸຕ຺ວາ ວິຈຣິ, ຕາລຏ຺ຐິຂຓ຺ເຑນ ເກເສ ລຸຎ຺ຈິ. ອຖ ຈ ປນ ໂລກໍ ວຎ຺ເຈນ຺ໂຕ ‘‘ອຫໍ ວາຕຠກ຺ໂຂ, ເອກປາເທນ ຕິຏ຺ຐາມິ, ນ ນິສີທາມິ, ນ ນິປຊ຺ຊາມີ’’ຕິ ວເທສິ, ‘‘ມມມ຺ປິ ວຎ຺ເຈຕຸກາໂມສິ ປຸພ຺ເພປິ ຕ຺ວໍ ປາປິກໍ ລາມິກໍ ທິຏ຺ຐິໍ ນິສ຺ສາຍ ເອຕ຺ຕກໍ ກາລໍ ຄູຖຠກ຺ໂຂ ຠູມິສໂຍ ນຄ຺ໂຄ ວິຈຣນ຺ໂຕ ຕາລຏ຺ຐິຂຓ຺ເຑນ ເກສລຸຎ຺ຈນໍ ປຕ຺ໂຕ, ອິທານິປິ ປາປິກໍ ລາມິກໍ ທິຏ຺ຐິເມວ ຄຓ຺ຫາສີ’’ຕິ. ‘‘ກິໍ ປນ ມຍາ ກຕໍ, ມຫາສມຓາ’’ຕິ? ອຖສ຺ສ ສຕ຺ຖາ ປຸພ຺ເພ ກຕກມ຺ມໍ ອາຈິກ຺ຂິ. ຕສ຺ສ ສຕ຺ຖຣິ ກເຖນ຺ເຕເຍວ ສໍເວໂຄ ອຸປ຺ປຊ຺ຊິ, ຫິໂຣຕ຺ຕປ຺ປໍ ອຸປຏ຺ຐິຕໍ, ໂສ ອຸກ຺ກຸຏິໂກ ນິສີທິ. ອຖສ຺ສ ສຕ຺ຖາ ອຸທກສາຏິກໍ ຂິປິຕ຺ວາ ອທາສິ. ໂສ ຕໍ ນິວາເສຕ຺ວາ ສຕ຺ຖາຣໍ ວນ຺ທິຕ຺ວາ ເອກມນ຺ຕໍ ນິສີທິ. ສຕ຺ຖາປິສ຺ສ ອນຸປຸພ຺ພິໍ ກຖໍ ກເຖຕ຺ວາ ຘມ຺ມໍ ເທເສສິ. ໂສ ເທສນາວສາເນ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ວາ ສຕ຺ຖາຣໍ ວນ຺ທິຕ຺ວາ ອຸຏ຺ຐາຍາສນາ ປພ຺ພຊ຺ຊຎ຺ຈ ອຸປສມ຺ປທຎ຺ຈ ຍາຈິ. ເອຕ຺ຕາວຕາ ຕສ຺ສ ປຸຣິມກມ຺ມໍ ປຣິກ຺ຂີຓໍ. ອຍຎ຺ຫິ ຂີຓາສວມຫາເຖຣໍ ຈຕູຫິ ອກ຺ໂກເສຫິ ອກ຺ໂກສິຕ຺ວາ ຍາວາຍໍ ມຫາປຖວີ ຕິຄາວຸຕາຘິກໍ ໂຍຊນໍ ອຸສ຺ສນ຺ນາ, ຕາວ ອວີຈິມ຺ຫິ ປຈ຺ຈິຕ຺ວາ ຕຕ຺ຖ ປກ຺ກາວເສເສນ ປຎ຺ຈປຎ຺ຎາສ ວສ຺ສານິ ອິມໍ ວິປ຺ປກາຣໍ ປຕ຺ໂຕ. ເຕນສ຺ສ ຕໍ ກມ຺ມໍ ຂີຓໍ. ວີສຕິ ປນ ວສ຺ສສຫສ຺ສານິ ອິມິນາ ກຕສ຺ສ ສມຓຘມ຺ມສ຺ສ ຜລໍ ນາເສຕຸໍ ນ ສກ຺ກາ. ຕສ຺ມາ ສຕ຺ຖາ ທກ຺ຂິຓຫຕ຺ຖໍ ປສາເຣຕ຺ວາ ‘‘ເອຫິ, ຠິກ຺ຂຸ, ຈຣ ພ຺ຣຫ຺ມຈຣິຍໍ ສມ຺ມາ ທຸກ຺ຂສ຺ສ ອນ຺ຕກິຣິຍາຍາ’’ຕິ ອາຫ. ຕາວເທວສ຺ສ ຄິຫິລິງ຺ຄໍ ອນ຺ຕຣຘາຍິ ອຏ຺ຐປຣິກ຺ຂາຣຘໂຣ ສຏ຺ຐິວສ຺ສິກມຫາເຖໂຣ ວິຍ ອໂຫສິ.

ອງ຺ຄມຄຘວາສີນໍ ຕສ຺ສ ສກ຺ກາຣໍ ຄເຫຕ຺ວາ ອາຄຕທິວໂສ ກິເຣສ, ຕສ຺ມາ ອຸຠຍຣຏ຺ຐວາສິໂນ ສກ຺ກາຣໍ ຄເຫຕ຺ວາ ອາຄຕາ ຕຖາຄຕໍ ທິສ຺ວາ ‘‘ກິໍ ນຸ ໂຂ ອມ຺ຫາກໍ ອຍ຺ໂຍ ຊມ຺ພຸໂກ ມຫາ, ອຸທາຫຸ ສມໂຓ ໂຄຕໂມ’’ຕິ ຈິນ຺ເຕຕ຺ວາ ‘‘ສເຈ ສມໂຓ ໂຄຕໂມ ມຫາ ຠເວຍ຺ຍ, ອຍໍ ສມຓສ຺ສ ໂຄຕມສ຺ສ ສນ຺ຕິກໍ ຄຈ຺ເຉຍ຺ຍ, ຊມ຺ພຸກາຊີວກສ຺ສ ປນ ມຫນ຺ຕຕາຍ ສມໂຓ ໂຄຕໂມ ອິມສ຺ສ ສນ຺ຕິກໍ ອາຄໂຕ’’ຕິ ຈິນ຺ຕຍິໍສຸ. ສຕ຺ຖາ ມຫາຊນສ຺ສ ປຣິວິຕກ຺ກໍ ຎຕ຺ວາ, ‘‘ຊມ຺ພຸກ, ຕວ ອຸປຏ຺ຐາການໍ ກງ຺ຂໍ ຉິນ຺ທາຫີ’’ຕິ ອາຫ, ໂສ ‘‘ອຫມ຺ປິ, ຠນ຺ເຕ, ເອຕ຺ຕກເມວ ປຈ຺ຈາສີສາມີ’’ຕິ ວຕ຺ວາ ຈຕຸຕ຺ຖຊ຺ຌານໍ ສມາປຊ຺ຊິຕ຺ວາ ອຸຏ຺ຐາຍ ຕາລປ຺ປມາຓໍ ເວຫາສໍ ອພ຺ຠຸຄ຺ຄນ຺ຕ຺ວາ ‘‘ສຕ຺ຖາ ເມ, ຠນ຺ເຕ ຠຄວາ, ສາວໂກຫມສ຺ມີ’’ຕິ ວຕ຺ວາ ໂອຣຸຍ຺ຫ ວນ຺ທິຕ຺ວາ ປຸນ ທ຺ວິຕາລມຕ຺ຕໍ ຕິຕາລມຕ຺ຕນ຺ຕິ ເອວໍ ສຕ຺ຕຕາລມຕ຺ຕໍ ເວຫາສໍ ອພ຺ຠຸຄ຺ຄນ຺ຕ຺ວາ ໂອຣຸຍ຺ຫ ອຕ຺ຕໂນ ສາວກຠາວໍ ຊານາເປສິ. ຕໍ ທິສ຺ວາ ມຫາຊໂນ ‘‘ອໂຫ ພຸທ຺ຘາ ນາມ ອຈ຺ຉຣິຍາ ອໂນປມຄຸຓາ’’ຕິ ຈິນ຺ເຕສິ. ສຕ຺ຖາ ມຫາຊເນນ ສທ຺ຘິໍ ກເຖນ຺ໂຕ ເອວມາຫ – ‘‘ອຍໍ ເອຕ຺ຕກໍ ກາລໍ ຕຸມ຺ເຫຫິ ອາຠຕໍ ສກ຺ກາຣໍ ກຸສຄ຺ເຄນ ຊິວ຺ຫຄ຺ເຄ ຐເປຕ຺ວາ ‘ຕປຈຣຓໍ ປູເຣມີ’ຕິ ອິຘ ນິວຸຏ຺ໂຐ, ສເຈປິ ອິມິນາ ອຸປາເຍນ ວສ຺ສສຕໍ ຕປຈຣຓໍ ປູເຣຍ຺ຍ, ຍາ ຈສ຺ສ ອິທານິ ກາລໍ ວາ ຠຕ຺ຕໍ ວາ ກຸກ຺ກຸຈ຺ຈາຍິຕ຺ວາ ອຠຸຎ຺ຊນ຺ຕສ຺ສ ຠຕ຺ຕຈ຺ເຉທນກຸສລເຈຕນາ, ຕສ຺ສາ ຕໍ ຕປຈຣຓໍ ໂສຬສິໍ ກລມ຺ປິ ນ ອຄ຺ຆຕີ’’ຕິ ອນຸສນ຺ຘິໍ ຆເຏຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໗໐. ‘‘ມາເສ ມາເສ ກຸສຄ຺ເຄນ, ພາໂລ ຠຸຎ຺ເຊຍ຺ຍ ໂຠຊນໍ;

ນ ໂສ ສງ຺ຂາຕຘມ຺ມານໍ, ກລໍ ອຄ຺ຆຕິ ໂສຬສິ’’ນ຺ຕິ.

ຕສ຺ສຕ຺ໂຖ – ສເຈ ພາໂລ ອປຣິຎ຺ຎາຕຘມ຺ໂມ ສີລາທິຄຸຓາ ປຣິພາຫິໂຣ ຕິຕ຺ຖາຍຕເນ ປພ຺ພຊິໂຕ ‘‘ຕປຈຣຓໍ ປູເຣສ຺ສາມີ’’ຕິ ມາເສ ມາເສ ປຕ຺ເຕ ກຸສຄ຺ເຄນ ໂຠຊນໍ ຠຸຎ຺ຊນ຺ໂຕ ວສ຺ສສຕໍ ຠຸຎ຺ເຊຍ຺ຍ ໂຠຊນໍ. ນ ໂສ ສງ຺ຂາຕຘມ຺ມານໍ, ກລໍ ອຄ຺ຆຕິ ໂສຬສິນ຺ຕິ ສງ຺ຂາຕຘມ຺ມາ ວຸຈ຺ຈນ຺ຕິ ຎາຕຘມ຺ມາ ຕຸລິຕຘມ຺ມາ. ເຕສຸ ເຫຏ຺ຐິມໂກຏິຍາ ໂສຕາປນ຺ໂນ ສງ຺ຂາຕຘມ຺ໂມ, ອຸປຣິມໂກຏິຍາ ຂີຓາສໂວ. ອິເມສໍ ສງ຺ຂາຕຘມ຺ມານໍ ໂສ ພາໂລ ກລໍ ນ ອຄ຺ຆຕິ ໂສຬສິນ຺ຕິ ປຸຄ຺ຄລາຘິຏ຺ຐານາ ເທສນາ. ອຍໍ ປເນຕ຺ຖ ອຕ຺ໂຖ – ຍາ ຈສ຺ສ ຕຖາ ຕປຈຣຓໍ ປູເຣນ຺ຕສ຺ສ ວສ຺ສສຕໍ ເຈຕນາ ຍາ ຈ ສງ຺ຂາຕຘມ຺ມານໍ ກາລໍ ວາ ຠຕ຺ຕໍ ວາ ກຸກ຺ກຸຈ຺ຈາຍິຕ຺ວາ ອຠຸຎ຺ຊນ຺ຕານໍ ເອກາ ຠຕ຺ຕຈ຺ເຉທນກຸສລເຈຕນາ, ຕສ຺ສາ ເຈຕນາຍ ສາ ຕາວ ທີຆຣຕ຺ຕໍ ປວຕ຺ຕເຈຕນາ ໂສຬສິໍ ກລໍ ນ ອຄ຺ຆຕິ. ອິທໍ ວຸຕ຺ຕໍ ໂຫຕິ – ຍໍ ຕສ຺ສາ ສງ຺ຂາຕຘມ຺ມານໍ ເຈຕນາຍ ຜລໍ, ຕໍ ໂສຬສ ໂກຏ຺ຐາເສ ກຕ຺ວາ ຕໂຕ ເອເກກໍ ປຸນ ໂສຬສ ໂສຬສ ໂກຏ຺ຐາເສ ກຕ຺ວາ ຕໂຕ ເອກສ຺ສ ໂກຏ຺ຐາສສ຺ສ ຍໍ ຜລໍ, ຕເທວ ຕສ຺ສ ພາລສ຺ສ ຕປຈຣຓໂຕ ມຫປ຺ຜລຕຣນ຺ຕິ.

ເທສນາວສາເນ ຈຕຸຣາສີຕິຍາ ປາຓສຫສ຺ສານໍ ຘມ຺ມາຠິສມໂຍ ອໂຫສີຕິ.

ຊມ຺ພຸກຕ຺ເຖຣວຕ຺ຖຸ ເອກາທສມໍ.