໙. ໂສເຣຍ຺ຍຕ຺ເຖຣວຕ຺ຖຸ

ນ ຕໍ ມາຕາ ປິຕາ ກຍິຣາຕິ ອິມໍ ຘມ຺ມເທສນໍ ສຕ຺ຖາ ສາວຕ຺ຖິຍໍ ເຊຕວເນ ວິຫຣນ຺ໂຕ ໂສເຣຍ຺ຍຕ຺ເຖຣໍ ອາຣພ຺ຠ ກເຖສິ.

ວຕ຺ຖຸ ໂສເຣຍ຺ຍນຄເຣ ສມຸຏ຺ຐິຕໍ, ສາວຕ຺ຖິຍໍ ນິຏ຺ຐາເປສິ. ສມ຺ມາສມ຺ພຸທ຺ເຘ ສາວຕ຺ຖິຍໍ ວິຫຣນ຺ເຕ ໂສເຣຍ຺ຍນຄເຣ ໂສເຣຍ຺ຍເສຏ຺ຐິປຸຕ຺ໂຕ ເອເກນ ສຫາຍເກນ ສທ຺ຘິໍ ສຸຂຍານເກ ນິສີທິຕ຺ວາ ມຫນ຺ເຕນ ປຣິວາເຣນ ນ຺ຫານຕ຺ຖາຍ ນຄຣາ ນິກ຺ຂມິ. ຕສ຺ມິໍ ຂເຓ ມຫາກຈ຺ຈາຍນຕ຺ເຖໂຣ ໂສເຣຍ຺ຍນຄຣໍ ປິຓ຺ຑາຍ ປວິສິຕຸກາໂມ ຫຸຕ຺ວາ ພຫິນຄເຣ ສງ຺ຆາຏິໍ ປາຣຸປຕິ. ເຖຣສ຺ສ ຈ ສຸວຓ຺ຓວຓ຺ຓໍ ສຣີຣໍ. ໂສເຣຍ຺ຍເສຏ຺ຐິປຸຕ຺ໂຕ ຕໍ ທິສ຺ວາ ຈິນ຺ເຕສິ – ‘‘ອໂຫ ວຕ ອຍໍ ວາ ເຖໂຣ ມມ ຠຣິຍາ ຠເວຍ຺ຍ, ມມ ວາ ຠຣິຍາຍ ສຣີຣວຓ຺ໂຓ ເອຕສ຺ສ ສຣີຣວຓ຺ໂຓ ວິຍ ຠເວຍ຺ຍາ’’ຕິ. ຕສ຺ສ ຈິນ຺ຕິຕມຕ຺ເຕເຍວ ປຸຣິສລິງ຺ຄໍ ອນ຺ຕຣຘາຍິ, ອິຕ຺ຖິລິງ຺ຄໍ ປາຕຸຣໂຫສິ. ໂສ ລຊ຺ຊມາໂນ ຍານກາ ໂອຣຸຍ຺ຫ ປລາຍິ. ປຣິຊໂນ ຕໍ ອສຎ຺ຊານນ຺ໂຕ ‘‘ກິເມຕ’’ນ຺ຕິ ອາຫ. ສາປິ ຕກ຺ກສິລມຄ຺ຄໍ ປຏິປຊ຺ຊິ. ສຫາຍໂກປິສ຺ສາ ອິໂຕ ຈິໂຕ ຈ ວິຈຣິຕ຺ວາປິ ນາທ຺ທສ. ສພ຺ເພ ນ຺ຫາຍິຕ຺ວາ ເຄຫໍ ອຄມິໍສຸ. ‘‘ກຫໍ ເສຏ຺ຐິປຸຕ຺ໂຕ’’ຕິ ຈ ວຸຕ຺ເຕ, ‘‘ນ຺ຫຕ຺ວາ ອາຄໂຕ ຠວິສ຺ສຕີຕິ ມຎ຺ຎິມ຺ຫາ’’ຕິ ວທິໍສຸ. ອຖສ຺ສ ມາຕາປິຕໂຣ ຕຕ຺ຖ ຕຕ຺ຖ ປຣິເຍສິຕ຺ວາ ອປສ຺ສນ຺ຕາ ໂຣທິຕ຺ວາ ປຣິເທວິຕ຺ວາ, ‘‘ມໂຕ ຠວິສ຺ສຕີ’’ຕິ ມຕກຠຕ຺ຕໍ ອທໍສຸ. ສາ ເອກໍ ຕກ຺ກສິລຄາມິໍ ສຕ຺ຖວາຫໍ ທິສ຺ວາ ຍານກສ຺ສ ປຈ຺ຉໂຕ ປຈ຺ຉໂຕ ອນຸພນ຺ຘິ.

ອຖ ນໍ ມນຸສ຺ສາ ທິສ຺ວາ, ‘‘ອມ຺ຫາກໍ ຍານກສ຺ສ ປຈ຺ຉໂຕ ປຈ຺ຉໂຕ ອນຸຄຈ຺ຉຕິ, ມຍໍ ‘ກສ຺ເສສາ ທາຣິກາ’ຕິ ຕໍ ນ ຊານາມາ’’ຕິ ວທິໍສຸ. ສາປິ ‘‘ຕຸມ຺ເຫ ອຕ຺ຕໂນ ຍານກໍ ປາເຊຖ, ອຫໍ ປທສາ ຄມິສ຺ສາມີ’’ຕິ ຄຈ຺ຉນ຺ຕີ ອງ຺ຄຸລິມຸທ຺ທິກໍ ທຕ຺ວາ ເອກສ຺ມິໍ ຍານເກ ໂອກາສໍ ກາເຣສິ. ມນຸສ຺ສາ ຈິນ຺ຕຍິໍສຸ – ‘‘ຕກ຺ກສິລນຄເຣ ອມ຺ຫາກໍ ເສຏ຺ຐິປຸຕ຺ຕສ຺ສ ຠຣິຍາ ນຕ຺ຖິ, ຕສ຺ສ ອາຈິກ຺ຂິສ຺ສາມ, ມຫາປຓ຺ຓາກາໂຣ ໂນ ຠວິສ຺ສຕີ’’ຕິ. ເຕ ເຄຫໍ ຄນ຺ຕ຺ວາ, ‘‘ສາມິ, ອມ຺ເຫຫິ ຕຸມ຺ຫາກໍ ເອກໍ ອິຕ຺ຖິຣຕນໍ ອານີຕ’’ນ຺ຕິ ອາຫໍສຸ. ໂສ ຕໍ ສຸຕ຺ວາ ຕໍ ປກ຺ໂກສາເປຕ຺ວາ ອຕ຺ຕໂນ ວຍານຸຣູປໍ ອຠິຣູປໍ ປາສາທິກໍ ທິສ຺ວາ ອຸປ຺ປນ຺ນສິເນໂຫ ເຄເຫ ອກາສິ. ປຸຣິສາ ຫິ ອິຕ຺ຖິໂຍ, ອິຕ຺ຖິໂຍ ວາ ປຸຣິສາ ອຠູຕປຸພ຺ພາ ນາມ ນຕ຺ຖິ. ປຸຣິສາ ຫິ ປຣສ຺ສ ທາເຣສຸ ອຕິຈຣິຕ຺ວາ ກາລໍ ກຕ຺ວາ ພຫູນິ ວສ຺ສສຕສຫສ຺ສານິ ນິຣເຍ ປຈ຺ຈິຕ຺ວາ ມນຸສ຺ສຊາຕິໍ ອາຄຈ຺ຉນ຺ຕາ ອຕ຺ຕຠາວສເຕ ອິຕ຺ຖິຠາວໍ ອາປຊ຺ຊນ຺ຕິ.

ອານນ຺ທຕ຺ເຖໂຣປິ ກປ຺ປສຕສຫສ຺ສໍ ປູຣິຕປາຣມີ ອຣິຍສາວໂກ ສໍສາເຣ ສໍສຣນ຺ໂຕ ເອກສ຺ມິໍ ອຕ຺ຕຠາເວ ກມ຺ມາຣກຸເລ ນິພ຺ພຕ຺ໂຕ. ປຣທາຣກມ຺ມໍ ກຕ຺ວາ ນິຣເຍ ປຈ຺ຈິຕ຺ວາ ປກ຺ກາວເສເສນ ຈຸທ຺ທສສຸ ອຕ຺ຕຠາເວສຸ ປຸຣິສສ຺ສ ປາທປຣິຈາຣິກາ ອິຕ຺ຖີ ອໂຫສິ, ສຕ຺ຕສຸ ອຕ຺ຕຠາເວສຸ ພີຊຸທ຺ຘຣຓໍ ປາປຸຓິ. ອິຕ຺ຖິໂຍ ປນ ທານາທີນິ ປຸຎ຺ຎານິ ກຕ຺ວາ ອິຕ຺ຖິຠາເວ ຉນ຺ທໍ ວິຣາເຊຕ຺ວາ, ‘‘ອິທໍ ໂນ ປຸຎ຺ຎໍ ປຸຣິສຕ຺ຕຠາວປຏິລາຠາຍ ສໍວຕ຺ຕຕູ’’ຕິ ຈິຕ຺ຕໍ ອຘິຏ຺ຐຫິຕ຺ວາ ກາລໍ ກຕ຺ວາ ປຸຣິສຕ຺ຕຠາວໍ ປຏິລຠນ຺ຕິ, ປຕິເທວຕາ ຫຸຕ຺ວາ ສາມິເກ ສມ຺ມາປຏິປຕ຺ຕິວເສນາປິ ປຸຣິສຕ຺ຕຠາວໍ ປຏິລຠນ຺ເຕວ.

ອຍໍ ປນ ເສຏ຺ຐິປຸຕ຺ໂຕ ເຖເຣ ອໂຍນິໂສ ຈິຕ຺ຕໍ ອຸປ຺ປາເທຕ຺ວາ ອິມສ຺ມິໍເຍວ ອຕ຺ຕຠາເວ ອິຕ຺ຖິຠາວໍ ປຏິລຠິ. ຕກ຺ກສິລາຍໍ ເສຏ຺ຐິປຸຕ຺ເຕນ ສທ຺ຘິໍ ສໍວາສມນ຺ວາຍ ປນ ຕສ຺ສາ ກຸຈ຺ຉິຍໍ ຄພ຺ໂຠ ປຕິຏ຺ຐາສິ. ສາ ທສມາສຈ຺ຈເຍນ ປຸຕ຺ຕໍ ລຠິຕ຺ວາ ຕສ຺ສ ປທສາ ຄມນກາເລ ອປຣມ຺ປິ ປຸຕ຺ຕໍ ປຏິລຠິ. ເອວມສ຺ສາ ກຸຈ຺ຉິຍໍ ວຸຕ຺ຖາ ທ຺ເວ, ໂສເຣຍ຺ຍນຄເຣ ຕໍ ປຏິຈ຺ຈ ນິພ຺ພຕ຺ຕາ ທ຺ເວຕິ ຈຕ຺ຕາໂຣ ປຸຕ຺ຕາ ອເຫສຸໍ. ຕສ຺ມິໍ ກາເລ ໂສເຣຍ຺ຍນຄຣໂຕ ຕສ຺ສາ ສຫາຍໂກ ເສຏ຺ຐິປຸຕ຺ໂຕ ປຎ຺ຈຫິ ສກຏສເຕຫິ ຕກ຺ກສິລໍ ຄນ຺ຕ຺ວາ ສຸຂຍານເກ ນິສິນ຺ໂນ ນຄຣໍ ປາວິສິ. ອຖ ນໍ ສາ ອຸປຣິປາສາທຕເລ ວາຕປານໍ ວິວຣິຕ຺ວາ ອນ຺ຕຣວີຖິໍ ໂອໂລກຍມານາ ຐິຕາ ທິສ຺ວາ ສຎ຺ຊານິຕ຺ວາ ທາສິໍ ເປເສຕ຺ວາ ປກ຺ໂກສາເປຕ຺ວາ ມຫາຕເລ ນິສີທາເປຕ຺ວາ ມຫນ຺ຕໍ ສກ຺ກາຣສມ຺ມານໍ ອກາສິ. ອຖ ນໍ ໂສ ອາຫ – ‘‘ຠທ຺ເທ, ຕ຺ວໍ ອິໂຕ ປຸພ຺ເພ ອມ຺ເຫຫິ ນ ທິຏ຺ຐປຸພ຺ພາ, ອຖ ຈ ປນ ໂນ ມຫນ຺ຕໍ ສກ຺ກາຣໍ ກໂຣສິ, ຊານາສິ ຕ຺ວໍ ອມ຺ເຫ’’ຕິ. ‘‘ອາມ, ສາມິ, ຊານາມິ, ນນຸ ຕຸມ຺ເຫ ໂສເຣຍ຺ຍນຄຣວາສິໂນ’’ຕິ? ‘‘ອາມ, ຠທ຺ເທ’’ຕິ. ສາ ມາຕາປິຕູນຎ຺ຈ ຠຣິຍາຍ ຈ ປຸຕ຺ຕານຎ຺ຈ ອໂຣຄຠາວໍ ປຸຈ຺ຉິ. ອິຕໂຣ ‘‘ອາມ, ຠທ຺ເທ, ອໂຣຄາ’’ຕິ ວຕ຺ວາ ‘‘ຊານາສິ ຕ຺ວໍ ເອເຕ’’ຕິ ອາຫ. ‘‘ອາມ ສາມິ, ຊານາມິ. ເຕສໍ ເອໂກ ປຸຕ຺ໂຕ ອຕ຺ຖິ, ໂສ ກຫໍ, ສາມີ’’ຕິ? ‘‘ຠທ຺ເທ, ມາ ເອຕໍ ກເຖຫິ, ມຍໍ ເຕນ ສທ຺ຘິໍ ເອກທິວສໍ ສຸຂຍານເກ ນິສີທິຕ຺ວາ ນ຺ຫາຍິຕຸໍ ນິກ຺ຂນ຺ຕາ ເນວສ຺ສ ຄຕິໍ ຊານາມ, ອິໂຕ ຈິໂຕ ຈ ວິຈຣິຕ຺ວາ ຕໍ ອທິສ຺ວາ ມາຕາປິຕູນໍ ອາໂຣຈຍິມ຺ຫາ, ເຕປິສ຺ສ ໂຣທິຕ຺ວາ ກນ຺ທິຕ຺ວາ ເປຕກິຈ຺ຈໍ ກິຣິໍສູ’’ຕິ. ‘‘ອຫໍ ໂສ, ສາມີ’’ຕິ. ‘‘ອເປຫິ, ຠທ຺ເທ, ກິໍ ກເຖສິ ມຍ຺ຫໍ ສຫາໂຍ ເທວກຸມາໂຣ ວິຍ ເອໂກ ປຸຣິໂສ’’ຕິ? ‘‘ໂຫຕຸ, ສາມິ, ອຫໍ ໂສ’’ຕິ. ‘‘ອຖ ອິທໍ ກິໍ ນາມາ’’ຕິ? ‘‘ຕໍ ທິວສໍ ເຕ ອຍ຺ໂຍ ມຫາກຈ຺ຈາຍນຕ຺ເຖໂຣ ທິຏ຺ໂຐ’’ຕິ? ‘‘ອາມ, ທິຏ຺ໂຐ’’ຕິ. ອຫໍ ອຍ຺ຍໍ ມຫາກຈ຺ຈາຍນຕ຺ເຖຣໍ ໂອໂລເກຕ຺ວາ, ‘‘ອໂຫ ວຕ ອຍໍ ວາ ເຖໂຣ ມມ ຠຣິຍາ ຠເວຍ຺ຍ, ເອຕສ຺ສ ວາ ສຣີຣວຓ຺ໂຓ ວິຍ ມມ ຠຣິຍາຍ ສຣີຣວຓ຺ໂຓ ຠເວຍ຺ຍາ’’ຕິ ຈິນ຺ເຕສິໍ. ຈິນ຺ຕິຕກ຺ຂເຓເຍວ ເມ ປຸຣິສລິງ຺ຄໍ ອນ຺ຕຣຘາຍິ, ອິຕ຺ຖິລິງ຺ຄໍ ປາຕຸຠວິ. ອຖາຫໍ ລຊ຺ຊມານາ ກສ຺ສຈິ ກິຎ຺ຈິ ວຕ຺ຕຸໍ ອສກ຺ກຸຓິຕ຺ວາ ຕໂຕ ປລາຍິຕ຺ວາ ອິຘາຄຕາ, ສາມີຕິ.

‘‘ອໂຫ ວຕ ເຕ ຠາຣິຍໍ ກມ຺ມໍ ກຕໍ, ກສ຺ມາ ມຍ຺ຫໍ ນາຈິກ຺ຂິ, ອປິຈ ປນ ເຕ ເຖໂຣ ຂມາປິໂຕ’’ຕິ? ‘‘ນ ຂມາປິໂຕ, ສາມິ. ຊານາສິ ປນ ຕ຺ວໍ ກຫໍ ເຖໂຣ’’ຕິ? ‘‘ອິມເມວ ນຄຣໍ ອຸປນິສ຺ສາຍ ວິຫຣຕີ’’ຕິ. ‘‘ສເຈ ປິຓ຺ຑາຍ ຈຣນ຺ໂຕ ອິຘາຄຈ຺ເຉຍ຺ຍ, ອຫໍ ມມ ອຍ຺ຍສ຺ສ ຠິກ຺ຂາຫາຣໍ ທເທຍ຺ຍໍ, ສາມີ’’ຕິ. ‘‘ເຕນ ຫິ ສີຆໍ ສກ຺ກາຣໍ ກໂຣຫິ, ອມ຺ຫາກໍ ອຍ຺ຍໍ ຂມາເປສ຺ສາມາ’’ຕິ ໂສ ເຖຣສ຺ສ ວສນຏ຺ຐານໍ ຄນ຺ຕ຺ວາ ວນ຺ທິຕ຺ວາ ເອກມນ຺ຕໍ ນິສິນ຺ໂນ, ‘‘ຠນ຺ເຕ, ສ຺ເວ ມຍ຺ຫໍ ຠິກ຺ຂໍ ຄຓ຺ຫຖາ’’ຕິ ອາຫ. ‘‘ນນຸ ຕ຺ວໍ, ເສຏ຺ຐິປຸຕ຺ຕ, ອາຄນ຺ຕຸໂກສີ’’ຕິ. ‘‘ຠນ຺ເຕ, ມາ ອມ຺ຫາກໍ ອາຄນ຺ຕຸກຠາວໍ ປຸຈ຺ຉຖ, ສ຺ເວ ເມ ຠິກ຺ຂໍ ຄຓ຺ຫຖາ’’ຕິ. ເຖໂຣ ອຘິວາເສສິ, ເຄເຫປິ ເຖຣສ຺ສ ມຫາສກ຺ກາໂຣ ປຏິຍຕ຺ໂຕ. ເຖໂຣ ປຸນທິວເສ ຕໍ ເຄຫທ຺ວາຣໍ ອຄມາສິ. ອຖ ນໍ ນິສີທາເປຕ຺ວາ ປຓີເຕນາຫາເຣນ ປຣິວິສິຕ຺ວາ ເສຏ຺ຐິປຸຕ຺ໂຕ ຕໍ ອິຕ຺ຖິໍ ຄເຫຕ຺ວາ ເຖຣສ຺ສ ປາທມູເລ ນິປຊ຺ຊາເປຕ຺ວາ, ‘‘ຠນ຺ເຕ, ມຍ຺ຫໍ ສຫາຍິກາຍ ຂມຖາ’’ຕິ ອາຫ. ‘‘ກິເມຕ’’ນ຺ຕິ? ‘‘ອຍໍ, ຠນ຺ເຕ, ປຸພ຺ເພ ມຍ຺ຫໍ ປິຍສຫາຍໂກ ຫຸຕ຺ວາ ຕຸມ຺ເຫ ໂອໂລເກຕ຺ວາ ເອວໍ ນາມ ຈິນ຺ເຕສິ, ອຖສ຺ສ ປຸຣິສລິງ຺ຄໍ ອນ຺ຕຣຘາຍິ, ອິຕ຺ຖິລິງ຺ຄໍ ປາຕຸຠວິ, ຂມຖ, ຠນ຺ເຕ’’ຕິ. ‘‘ເຕນ ຫິ ອຸຏ຺ຐຫຖ, ຂມາມິ ໂວ ອຫ’’ນ຺ຕິ. ເຖເຣນ ‘‘ຂມາມີ’’ຕິ ວຸຕ຺ຕມຕ຺ເຕເຍວ ອິຕ຺ຖິລິງ຺ຄໍ ອນ຺ຕຣຘາຍິ, ປຸຣິສລິງ຺ຄໍ ປາຕຸຠວິ.

ປຸຣິສລິງ຺ເຄ ປາຕຸຠູຕມຕ຺ເຕເຍວ ຕໍ ຕກ຺ກສິລາຍ ເສຏ຺ຐິປຸຕ຺ໂຕ ອາຫ – ‘‘ສມ຺ມ ສຫາຍກ, ອິເມ ທ຺ເວ ທາຣກາ ຕວ ກຸຈ຺ຉິຍໍ ວຸຕ຺ຖຕ຺ຕາ ມໍ ປຏິຈ຺ຈ ນິພ຺ພຕ຺ຕຕ຺ຕາ ອຸຠິນ຺ນມ຺ປິໂນ ປຸຕ຺ຕາ ເອວ, ອິເຘວ ວສິສ຺ສາມ, ມາ ອຸກ຺ກຓ຺ຐີ’’ຕິ. ‘‘ສມ຺ມ, ອຫໍ ເອເກນຕ຺ຕຠາເວນ ປຐມໍ ປຸຣິໂສ ຫຸຕ຺ວາ ອິຕ຺ຖິຠາວໍ ປຕ຺ວາ ປຸນ ປຸຣິໂສ ຊາໂຕຕິ ວິປ຺ປກາຣປ຺ປຕ຺ໂຕ, ປຐມໍ ມໍ ປຏິຈ຺ຈ ທ຺ເວ ປຸຕ຺ຕາ ນິພ຺ພຕ຺ຕາ, ອິທານິ ເມ ກຸຈ຺ຉິໂຕ ທ຺ເວ ປຸຕ຺ຕາ ນິກ຺ຂນ຺ຕາ, ສ຺ວາຫໍ ເອເກນຕ຺ຕຠາເວນ ວິປ຺ປກາຣປ຺ປຕ຺ໂຕ, ປຸນ ‘ເຄເຫ ວສິສ຺ສຕີ’ຕິ ສຎ຺ຎໍ ມາ ກຣິ, ອຫໍ ມມ ອຍ຺ຍສ຺ສ ສນ຺ຕິເກ ປພ຺ພຊິສ຺ສາມິ. ອິເມ ທ຺ເວ ທາຣກາ ຕວ ຠາຣາຕິ, ອິເມສຸ ມາ ປມຊ຺ຊີ’’ຕິ ວຕ຺ວາ ປຸຕ຺ເຕ ສີເສ ປຣິຈຸມ຺ພິຕ຺ວາ ປຣິມຊ຺ຊິຕ຺ວາ ອຸເຣ ນິປຊ຺ຊາເປຕ຺ວາ ປິຕຸ ນິຍ຺ຍາເທຕ຺ວາ ນິກ຺ຂມິຕ຺ວາ ເຖຣສ຺ສ ສນ຺ຕິເກ ປພ຺ພຊ຺ຊໍ ຍາຈິ. ເຖໂຣປິ ນໍ ປພ຺ພາເຊຕ຺ວາ ອຸປສມ຺ປາເທຕ຺ວາ ຄຓ຺ຫິຕ຺ວາວ ຈາຣິກໍ ຈຣມາໂນ ອນຸປຸພ຺ເພນ ສາວຕ຺ຖິໍ ອຄມາສິ. ຕສ຺ສ ໂສເຣຍ຺ຍຕ຺ເຖໂຣຕິ ນາມໍ ອໂຫສິ. ຊນປທວາສິໂນ ຕໍ ປວຕ຺ຕິໍ ຎຕ຺ວາ ສງ຺ຂຸຠິຕ຺ວາ ໂກຕູຫລຊາຕາ ຕໍ ອຸປສງ຺ກມິຕ຺ວາ ປຸຈ຺ຉິໍສຸ – ‘‘ເອວໍ ກິຣ, ຠນ຺ເຕ’’ຕິ? ‘‘ອາມ, ອາວຸໂສ’’ຕິ. ‘‘ຠນ຺ເຕ, ເອວຣູປມ຺ປິ ກາຣຓໍ ນາມ ໂຫຕິ’’? ‘‘ຕຸມ຺ຫາກໍ ກຸຈ຺ຉິຍໍ ກິຣ ທ຺ເວ ປຸຕ຺ຕາ ນິພ຺ພຕ຺ຕາ, ຕຸມ຺ເຫ ປຏິຈ຺ຈ ທ຺ເວ ຊາຕາ, ເຕສໍ ໂວ ກຕເຣສຸ ພລວສິເນໂຫ ໂຫຕີ’’ຕິ? ‘‘ກຸຈ຺ຉິຍໍ ວຸຕ຺ຖເກສຸ, ອາວຸໂສ’’ຕິ. ອາຄຕາຄຕາ ນິພທ຺ຘໍ ຕເຖວ ປຸຈ຺ຉິໍສຸ.

ເຖໂຣ ‘‘ກຸຈ຺ຉິຍໍ ວຸຕ຺ຕເກສຸ ເອວ ສິເນໂຫ ພລວາ’’ຕິ ປຸນປ຺ປຸນໍ ກເຖນ຺ໂຕ ຫຣາຍມາໂນ ເອໂກວ ນິສີທຕິ, ເອໂກວ ຕິຏ຺ຐຕິ. ໂສ ເອວໍ ເອກຕ຺ຕູປຄໂຕ ອຕ຺ຕຠາເວ ຂຍວຍໍ ສມຸຏ຺ຐາເປຕ຺ວາ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິ. ອຖ ນໍ ອາຄຕາຄຕາ ປຸຈ຺ຉນ຺ຕິ – ‘‘ຠນ຺ເຕ, ເອວໍ ກິຣ ນາມ ອໂຫສີ’’ຕິ? ‘‘ອາມາວຸໂສ’’ຕິ. ‘‘ກຕເຣສຸ ສິເນໂຫ ພລວາ’’ຕິ? ‘‘ມຍ຺ຫໍ ກຕ຺ຖຈິ ສິເນໂຫ ນາມ ນຕ຺ຖີ’’ຕິ. ຠິກ຺ຂູ ‘‘ອຍໍ ອຠູຕໍ ກເຖສິ, ປຸຣິມທິວເສສຸ ‘ກຸຈ຺ຉິຍໍ ວຸຕ຺ຖປຸຕ຺ເຕສຸ ສິເນໂຫ ພລວາ’ຕິ ວຕ຺ວາ ອິທານິ ‘ມຍ຺ຫໍ ກຕ຺ຖຈິ ສິເນໂຫ ນຕ຺ຖີ’ຕິ ວທຕິ, ອຎ຺ຎໍ ພ຺ຍາກໂຣຕິ, ຠນ຺ເຕ’’ຕິ ອາຫໍສຸ. ສຕ຺ຖາ ‘‘ນ, ຠິກ຺ຂເວ, ມມ ປຸຕ຺ໂຕ ອຎ຺ຎໍ ພ຺ຍາກໂຣຕິ, ມມ ປຸຕ຺ຕສ຺ສ ສມ຺ມາປຓິຫິເຕນ ຈິຕ຺ເຕນ ມຄ຺ຄສ຺ສ ທິຏ຺ຐກາລໂຕ ປຏ຺ຐາຍ ນ ກຕ຺ຖຈິ ສິເນໂຫ ຊາໂຕ, ຍໍ ສມ຺ປຕ຺ຕິໍ ເນວ ມາຕາ, ນ ປິຕາ ກາຕຸໍ ສກ຺ໂກຕິ, ຕໍ ອິເມສໍ ສຕ຺ຕານໍ ອພ຺ຠນ຺ຕເຣ ປວຕ຺ຕໍ ສມ຺ມາປຓິຫິຕໍ ຈິຕ຺ຕເມວ ເທຕີ’’ຕິ ວຕ຺ວາ ອິມໍ ຄາຖມາຫ –

໔໓. ‘‘ນ ຕໍ ມາຕາ ປິຕາ ກຍິຣາ, ອຎ຺ເຎ ວາປິ ຈ ຎາຕກາ;

ສມ຺ມາປຓິຫິຕໍ ຈິຕ຺ຕໍ, ເສຍ຺ຍໂສ ນໍ ຕໂຕ ກເຣ’’ຕິ.

ຕຕ຺ຖນ ຕນ຺ຕິ ຕໍ ກາຣຓໍ ເນວ ມາຕາ ກເຣຍ຺ຍ, ນ ປິຕາ, ນ ອຎ຺ເຎ ຎາຕກາ. ສມ຺ມາປຓິຫິຕນ຺ຕິ ທສສຸ ກຸສລກມ຺ມປເຖສຸ ສມ຺ມາ ຐປິຕໍ. ເສຍ຺ຍໂສ ນໍ ຕໂຕ ກເຣຕິ ຕໂຕ ກາຣຓໂຕ ເສຍ຺ຍໂສ ນໍ ວຣຕຣໍ ອຸຕ຺ຕຣິຕຣໍ ກເຣຍ຺ຍ, ກໂຣຕີຕິ ອຕ຺ໂຖ. ມາຕາປິຕໂຣ ຫິ ປຸຕ຺ຕານໍ ຘນໍ ທທມານາ ເອກສ຺ມິໍເຍວ ອຕ຺ຕຠາເວ ກມ຺ມໍ ອກຕ຺ວາ ສຸເຂນ ຊີວິກກປ຺ປນໍ ຘນໍ ທາຕຸໍ ສກ຺ໂກນ຺ຕິ. ວິສາຂາຍ ມາຕາປິຕໂຣປິ ຕາວ ມຫທ຺ຘນາ ມຫາໂຠຄາ, ຕສ຺ສາ ເອກສ຺ມິໍເຍວ ອຕ຺ຕຠາເວ ສຸເຂນ ຊີວິກກປ຺ປນໍ ຘນໍ ອທໍສຸ. ຈຕູສຸ ປນ ທີເປສຸ ຈກ຺ກວຕ຺ຕິສິຣິໍ ທາຕຸໍ ສມຕ຺ຖາ ມາຕາປິຕໂຣປິ ນາມ ປຸຕ຺ຕານໍ ນຕ຺ຖິ, ປເຄວ ທິພ຺ພສມ຺ປຕ຺ຕິໍ ວາ ປຐມຊ຺ຌານາທິສມ຺ປຕ຺ຕິໍ ວາ, ໂລກຸຕ຺ຕຣສມ຺ປຕ຺ຕິທາເນ ກຖາວ ນຕ຺ຖິ, ສມ຺ມາປຓິຫິຕໍ ປນ ຈິຕ຺ຕໍ ສພ຺ພມ຺ເປຕໍ ສມ຺ປຕ຺ຕິໍ ທາຕຸໍ ສກ຺ໂກຕິ. ເຕນ ວຸຕ຺ຕໍ ‘‘ເສຍ຺ຍໂສ ນໍ ຕໂຕ ກເຣ’’ຕິ.

ເທສນາວສາເນ ພຫູ ໂສຕາປຕ຺ຕິຜລາທີນິ ປຕ຺ຕາ. ເທສນາ ມຫາຊນສ຺ສ ສາຕ຺ຖິກາ ຊາຕາຕິ.

ໂສເຣຍ຺ຍຕ຺ເຖຣວຕ຺ຖຸ ນວມໍ.

ຈິຕ຺ຕວຄ຺ຄວຓ຺ຓນາ ນິຏ຺ຐິຕາ.

ຕຕິໂຍ ວຄ຺ໂຄ.