໘. ນນ຺ທໂຄປາລກວຕ຺ຖຸ

ທິໂສ ທິສນ຺ຕິ ອິມໍ ຘມ຺ມເທສນໍ ສຕ຺ຖາ ໂກສລຊນປເທ ນນ຺ທໂຄປາລກໍ ອາຣພ຺ຠ ກເຖສິ.

ສາວຕ຺ຖິຍໍ ກິຣ ອນາຖປິຓ຺ຑິກສ຺ສ ຄຫປຕິໂນ ນນ຺ໂທ ນາມ ໂຄປາລໂກ ໂຄຍູຖໍ ຣກ຺ຂຕິ ອຑ຺ໂຒ ມຫທ຺ຘໂນ ມຫາໂຠໂຄ. ໂສ ກິຣ ຍຖາ ເກຓິໂຍ ຊຏິໂລ ປພ຺ພຊ຺ຊາເວເສນ, ເອວໍ ໂຄປາລກຕ຺ເຕນ ຣາຊພລິໍ ປຣິຫຣນ຺ໂຕ ອຕ຺ຕໂນ ກຸຏຸມ຺ພໍ ຣກ຺ຂຕິ. ໂສ ກາເລນ ກາລໍ ປຎ຺ຈ ໂຄຣເສ ອາທາຍ ອນາຖປິຓ຺ຑິກສ຺ສ ສນ຺ຕິກໍ ອາຄນ຺ຕ຺ວາ ສຕ຺ຖາຣໍ ປສ຺ສຕິ, ຘມ຺ມໍ ສຸຓາຕິ, ອຕ຺ຕໂນ ວສນຏ຺ຐານໍ ອາຄມນຕ຺ຖາຍ ສຕ຺ຖາຣໍ ຍາຈຕິ. ສຕ຺ຖາ ຕສ຺ສ ຎາຓປຣິປາກໍ ອາຄມຍມາໂນ ອາຄນ຺ຕ຺ວາ ປຣິປກ຺ກຠາວໍ ຎຕ຺ວາ ເອກທິວສໍ ມຫາຠິກ຺ຂຸສງ຺ຆປຣິວຸໂຕ ຈາຣິກໍ ຈຣນ຺ໂຕ ມຄ຺ຄາ ໂອກ຺ກມ຺ມ ຕສ຺ສ ວສນຏ຺ຐານາສນ຺ເນ ອຎ຺ຎຕຣສ຺ມິໍ ຣຸກ຺ຂມູເລ ນິສີທິ. ນນ຺ໂທ ສຕ຺ຖຸ ສນ຺ຕິກໍ ອຄນ຺ຕ຺ວາ ວນ຺ທິຕ຺ວາ ປຏິສນ຺ຖາຣໍ ກຕ຺ວາ ສຕ຺ຖາຣໍ ນິມນ຺ເຕຕ຺ວາ ສຕ຺ຖາຫໍ ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ປຓີຕໍ ປຎ຺ຈໂຄຣສທານໍ ອທາສິ. ສຕ຺ຕເມ ທິວເສ ສຕ຺ຖາ ອນຸໂມທນໍ ກຕ຺ວາ ທານກຖາທິເຠທໍ ອນຸປຸພ຺ພິໍ ກຖໍ ກເຖສິ. ກຖາປຣິໂຍສາເນ ນນ຺ທໂຄປາລໂກ ໂສຕາປຕ຺ຕິຜເລ ປຕິຏ຺ຐາຍ ສຕ຺ຖຸ ປຕ຺ຕໍ ຄເຫຕ຺ວາ ສຕ຺ຖາຣໍ ອນຸຄຈ຺ຉນ຺ໂຕ ທູຣໍ ຄນ຺ຕ຺ວາ, ‘‘ຕິຏ຺ຐ, ອຸປາສກາ’’ຕິ ນິວຕ຺ຕິຍມາໂນ ວນ຺ທິຕ຺ວາ ນິວຕ຺ຕິ. ອຖ ນໍ ເອໂກ ລຸທ຺ທໂກ ວິຊ຺ຌິຕ຺ວາ ມາເຣສິ. ປຈ຺ຉໂຕ ອາຄຈ຺ຉນ຺ຕາ ຠິກ຺ຂູ ນໍ ທິສ຺ວາ ຄນ຺ຕ຺ວາ ສຕ຺ຖາຣໍ ອາຫໍສຸ – ‘‘ນນ຺ໂທ, ຠນ຺ເຕ, ໂຄປາລໂກ ຕຸມ຺ຫາກໍ ອິຘາຄຕຕ຺ຕາ ມຫາທານໍ ທຕ຺ວາ ອນຸຄນ຺ຕ຺ວາ ນິວຕ຺ເຕນ຺ໂຕ ມາຣິໂຕ, ສເຈ ຕຸມ຺ເຫ ນາຄຈ຺ຉິສ຺ສຖ, ນາສ຺ສ ມຣຓໍ ອຠວິສ຺ສາ’’ຕິ. ສຕ຺ຖາ, ‘‘ຠິກ຺ຂເວ, ມຍິ ອາຄເຕປິ ອນາຄເຕປິ ຕສ຺ສ ຈຕສ຺ໂສ ທິສາ ຈຕສ຺ໂສ ອນຸທິສາ ຈ ຄຈ຺ຉນ຺ຕສ຺ສາປິ ມຣຓໂຕ ມຸຈ຺ຈນູປາໂຍ ນາມ ນຕ຺ຖິ. ຍຎ຺ຫິ ເນວ ໂຈຣາ, ນ ເວຣິໂນ ກໂຣນ຺ຕິ, ຕໍ ອິເມສໍ ສຕ຺ຕານໍ ອນ຺ໂຕປທຸຏ຺ຐໍ ມິຈ຺ຉາປຓິຫິຕໍ ຈິຕ຺ຕເມວ ກໂຣຕີ’’ຕິ ວຕ຺ວາ ອິມໍ ຄາຖມາຫ –

໔໒. ‘‘ທິໂສ ທິສໍ ຍໍ ຕໍ ກຍິຣາ, ເວຣີ ວາ ປນ ເວຣິນໍ;

ມິຈ຺ຉາປຓິຫິຕໍ ຈິຕ຺ຕໍ, ປາປິໂຍ ນໍ ຕໂຕ ກເຣ’’ຕິ.

ຕຕ຺ຖ ທິໂສ ທິສນ຺ຕິ ໂຈໂຣ ໂຈຣໍ. ‘‘ທິສ຺ວາ’’ຕິ ປາຐເສໂສ. ຍໍ ຕໍ ກຍິຣາຕິ ຍໍ ຕໍ ຕສ຺ສ ອນຍພ຺ຍສນໍ ກເຣຍ຺ຍ. ທຸຕິຍປເທປິ ເອເສວ ນໂຍ. ອິທໍ ວຸຕ຺ຕໍ ໂຫຕິ – ເອໂກ ເອກສ຺ສ ມິຕ຺ຕທຸພ຺ຠີ ໂຈໂຣ ປຸຕ຺ຕທາຣເຂຕ຺ຕວຕ຺ຖຸ ໂຄມຫິໍສາທີສຸ ອປຣຊ຺ຌນ຺ໂຕ ຍສ຺ສ ອປຣຊ຺ຌຕິ, ຕມ຺ປິ ຕເຖວ ອຕ຺ຕນິ ອປຣຊ຺ຌນ຺ຕໍ ໂຈຣໍ ທິສ຺ວາ, ເວຣິ ວາ ປນ ເກນຈິເທວ ກາຣເຓນ ພທ຺ຘເວຣໍ ເວຣິໍ ທິສ຺ວາ ອຕ຺ຕໂນ ກກ຺ຂຬຕາຍ ທາຣຸຓຕາຍ ຍໍ ຕໍ ຕສ຺ສ ອນຍພ຺ຍສນໍ ກເຣຍ຺ຍ, ປຸຕ຺ຕທາຣໍ ວາ ປີເຬຍ຺ຍ, ເຂຕ຺ຕາທີນິ ວາ ນາເສຍ຺ຍ, ຊີວິຕາ ວາ ປນ ນໍ ໂວໂຣເປຍ຺ຍ, ທສສຸ ອກຸສລກມ຺ມປເຖສຸ ມິຈ຺ຉາຐປິຕຕ຺ຕາ ມິຈ຺ຉາປຫິຓິຕໍ ຈິຕ຺ຕໍ ປາປິໂຍ ນໍ ຕໂຕ ກເຣ ຕໍ ປຸຣິສໍ ຕໂຕ ປາປຕຣໍ ກເຣຍ຺ຍ. ວຸຕ຺ຕປ຺ປກາເຣຫິ, ທິໂສ ທິສສ຺ສ ວາ ເວຣີ ເວຣິໂນ ວາ ອິມສ຺ມິໍເຍວ ອຕ຺ຕຠາເວ ທຸກ຺ຂໍ ວາ ອຸປ຺ປາເທຍ຺ຍ, ຊີວິຕກ຺ຂຍໍ ວາ ກເຣຍ຺ຍ. ອິທໍ ປນ ອກຸສລກມ຺ມປເຖສຸ ມິຈ຺ຉາຐປິຕໍ ຈິຕ຺ຕໍ ທິຏ຺ເຐວ ຘມ຺ເມ ອນຍພ຺ຍສນໍ ປາເປຕິ, ອຕ຺ຕຠາວສຕສຫສ຺ເສສຸປິ ຈຕູສຸ ອປາເຍສຸ ຂິປິຕ຺ວາ ສີສໍ ອຸກ຺ຂິປິຕຸໍ ນ ເທຕີຕິ.

ເທສນາປຣິໂຍສາເນ ພຫູ ໂສຕາປຕ຺ຕິຜລາທີນິ ປຕ຺ຕາ. ມຫາຊນສ຺ສ ສາຕ຺ຖິກາ ເທສນາ ຊາຕາ. ອຸປາສເກນ ປນ ຠວນ຺ຕເຣ ກຕກມ຺ມໍ ຠິກ຺ຂູຫິ ນ ປຸຈ຺ຉິຕໍ, ຕສ຺ມາ ສຕ຺ຖາຣາ ນ ກຖິຕນ຺ຕິ.

ນນ຺ທໂຄປາລກວຕ຺ຖຸ ອຏ຺ຐມໍ.