໙. ນິຄມວາສິຕິສ຺ສຕ຺ເຖຣວຕ຺ຖຸ

ອປ຺ປມາທຣໂຕຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ນິຄມວາສິຕິສ຺ສຕ຺ເຖຣໍ ນາມ ອາຣພ຺ຠ ກເຖສິ.

ເອກສ຺ມິຎ຺ຫິ ສາວຕ຺ຖິໂຕ ອວິທູເຣ ນິຄມຄາເມ ຊາຕສໍວຑ຺ໂຒ ເອໂກ ກຸລປຸຕ຺ໂຕ ສຕ຺ຖຸ ສາສເນ ປພ຺ພຊິຕ຺ວາ ລທ຺ຘູປສມ຺ປໂທ ‘‘ນິຄມວາສິຕິສ຺ສຕ຺ເຖໂຣ ນາມ ອປ຺ປິຈ຺ໂຉ ສນ຺ຕຸຏ຺ໂຐ ປວິວິຕ຺ໂຕ ອາຣທ຺ຘວີຣິໂຍ’’ຕິ ປຎ຺ຎາຍິ. ໂສ ນິພທ຺ຘໍ ຎາຕິຄາເມເຍວ ປິຓ຺ຑາຍ ວິຈຣຕິ. ອນາຖປິຓ຺ຑິກາທີສຸ ມຫາທານານິ ກໂຣນ຺ເຕສຸ, ປເສນທິໂກສເລ ອສທິສທານໍ ກໂຣນ຺ເຕປິ ສາວຕ຺ຖິໍ ນາຄຈ຺ຉຕິ. ຠິກ຺ຂູ ‘‘ອຍໍ ນິຄມວາສິຕິສ຺ສຕ຺ເຖໂຣ ອຸຏ຺ຐາຍ ສມຸຏ຺ຐາຍ ຎາຕິສໍສຏ຺ໂຐ ວິຫຣຕິ, ອນາຖປິຓ຺ຑິກາທີສຸ ມຫາທານາທີນິ ກໂຣນ຺ເຕສຸ, ປເສນທິໂກສເລ ອສທິສທານໍ ກໂຣນ຺ເຕປິ ເນວ ອາຄຈ຺ຉຕີ’’ຕິ ກຖໍ ສມຸຏ຺ຐາເປຕ຺ວາ ສຕ຺ຖຸ ອາໂຣຈຍິໍສຸ. ສຕ຺ຖາ ຕໍ ປກ຺ໂກສາເປຕ຺ວາ, ‘‘ສຈ຺ຈໍ ກິຣ ຕ຺ວໍ, ຠິກ຺ຂຸ, ເອວໍ ກໂຣສີ’’ຕິ ປຸຈ຺ຉິຕ຺ວາ, ‘‘ນຕ຺ຖິ, ຠນ຺ເຕ, ມຍ຺ຫໍ ຎາຕິສໍສຄ຺ໂຄ, ອຫໍ ເອເຕ ມນຸສ຺ເສ ນິສ຺ສາຍ ອຊ຺ໂຌຫຣຓີຍມຕ຺ຕໍ ອາຫາຣໍ ລຠາມິ ລູເຂ ວາ ປຓີເຕ ວາ. ຍາປນມຕ຺ເຕ ລທ຺ເຘ ປຸນ ກິໍ ອາຫາຣປຣິເຍສເນນາຕິ ນ ຄຈ຺ຉາມິ, ຎາຕີຫິ ປນ ເມ ສໍສຄ຺ໂຄ ນາມ ນຕ຺ຖິ, ຠນ຺ເຕ’’ຕິ ວຸຕ຺ເຕ ສຕ຺ຖາ ປກຕິຍາປິ ຕສ຺ສ ອຊ຺ຌາສຍໍ ວິຊານນ຺ໂຕ – ‘‘ສາຘຸ ສາຘຸ, ຠິກ຺ຂູ’’ຕິ ຕສ຺ສ ສາຘຸກາຣໍ ທຕ຺ວາ, ‘‘ອນຈ຺ຉຣິຍໍ ໂຂ ປເນຕໍ ຠິກ຺ຂຸ, ຍໍ ຕ຺ວໍ ມາທິສໍ ອາຈຣິຍໍ ລຠິຕ຺ວາ ອປ຺ປິຈ຺ໂຉ ອໂຫສິ. ອຍຎ຺ຫິ ອປ຺ປິຈ຺ຉຕາ ນາມ ມມ ຕນ຺ຕິ, ມມ ປເວຓີ’’ຕິ ວຕ຺ວາ ຠິກ຺ຂູຫິ ຍາຈິໂຕ ອຕີຕໍ ອາຫຣິ –

ອຕີເຕ ຫິມວນ຺ເຕ ຄງ຺ຄາຕີເຣ ເອກສ຺ມິໍ ອຸທຸມ຺ພຣວເນ ອເນກສຫສ຺ສາ ສຸວາ ວສິໍສຸ. ຕຕ຺ເຣໂກ ສຸວຣາຊາ ອຕ຺ຕໂນ ນິວາສຣຸກ຺ຂສ຺ສ ຜເລສຸ ຂີເຓສຸ ຍໍ ຍເທວ ອວສິຏ຺ຐໍ ໂຫຕິ ອງ຺ກຸໂຣ ວາ ປຕ຺ຕໍ ວາ ຕໂຈ ວາ, ຕໍ ຕໍ ຂາທິຕ຺ວາ ຄງ຺ຄາຍໍ ປານີຍໍ ປິວິຕ຺ວາ ປຣມປ຺ປິຈ຺ໂຉ ສນ຺ຕຸຏ຺ໂຐ ຫຸຕ຺ວາ ອຎ຺ຎຕ຺ຖ ນ ຄຈ຺ຉຕິ. ຕສ຺ສ ອປ຺ປິຈ຺ຉສນ຺ຕຸຏ຺ຐຠາວຄຸເຓນ ສກ຺ກສ຺ສ ຠວນໍ ກມ຺ປິ. ສກ຺ໂກ ອາວຊ຺ຊມາໂນ ຕໍ ທິສ຺ວາ ຕສ຺ສ ວີມໍສນຕ຺ຖໍ ອຕ຺ຕໂນ ອານຸຠາເວນ ຕໍ ຣຸກ຺ຂໍ ສຸກ຺ຂາເປສິ. ຣຸກ຺ໂຂ ໂອຠຄ຺ໂຄ ຂາຓຸມຕ຺ໂຕ ຉິທ຺ທາວຉິທ຺ໂທວ ຫຸຕ຺ວາ ວາເຕ ປຫຣນ຺ເຕ ອາໂກຏິໂຕ ວິຍ ສທ຺ທໍ ນິຈ຺ຉາເຣນ຺ໂຕ ອຏ຺ຐາສິ. ຕສ຺ສ ຉິທ຺ເທຫິ ຈຸຓ຺ຓານິ ນິກ຺ຂມນ຺ຕິ. ສຸວຣາຊາ ຕານິ ຂາທິຕ຺ວາ ຄງ຺ຄາຍໍ ປານີຍໍ ປິວິຕ຺ວາ ອຎ຺ຎຕ຺ຖ ອຄນ຺ຕ຺ວາ ວາຕາຕປໍ ອຄເຓຕ຺ວາ ອຸທຸມ຺ພຣຂາຓຸມຕ຺ຖເກ ນິສີທຕິ. ສກ຺ໂກ ຕສ຺ສ ປຣມປ຺ປິຈ຺ຉຠາວໍ ຎຕ຺ວາ, ‘‘ມິຕ຺ຕຘມ຺ມຄຸຓໍ ກຖາເປຕ຺ວາ ວຣມສ຺ສ ທຕ຺ວາ ອຸທຸມ຺ພຣໍ ອມຕຜລໍ ກຕ຺ວາ ອາຄມິສ຺ສາມີ’’ຕິ ເອໂກ ຫໍສຣາຊາ ຫຸຕ຺ວາ ສຸຊໍ ອສຸຣກຎ຺ຎໍ ປຸຣໂຕ ກຕ຺ວາ ອຸທຸມ຺ພຣວນໍ ຄນ຺ຕ຺ວາ ອວິທູເຣ ເອກສ຺ສ ຣຸກ຺ຂສ຺ສ ສາຂາຍ ນິສີທິຕ຺ວາ ເຕນ ສທ຺ຘິໍ ກເຖນ຺ໂຕ ອິມໍ ຄາຖມາຫ –

‘‘ສນ຺ຕິ ຣຸກ຺ຂາ ຫຣິປຕ຺ຕາ, ທຸມາເນກຜລາ ພຫູ;

ກສ຺ມາ ນຸ ສຸກ຺ເຂ ໂກຬາເປ, ສຸວສ຺ສ ນິຣໂຕ ມໂນ’’ຕິ. (ຊາ. ໑.໙.໓໐);

ສພ຺ພໍ ສຸວຊາຕກໍ ນວກນິປາເຕ ອາຄຕນເຍເນວ ວິຕ຺ຖາເຣຕພ຺ພໍ. ອຏ຺ຐຸປ຺ປຕ຺ຕິເຍວ ຫິ ຕຕ຺ຖ ຈ ອິຘ ຈ ນານາ, ເສສໍ ຕາທິສເມວ. ສຕ຺ຖາ ອິມໍ ຘມ຺ມເທສນໍ ອາຫຣິຕ຺ວາ, ‘‘ຕທາ ສກ຺ໂກ ອານນ຺ໂທ ອໂຫສິ, ສຸວຣາຊາ ອຫເມວາ’’ຕິ ວຕ຺ວາ, ‘‘ເອວໍ, ຠິກ຺ຂເວ, ອປ຺ປິຈ຺ຉຕາ ນາເມສາ ມມ ຕນ຺ຕິ, ມມ ປເວຓີ, ອນຈ຺ຉຣິຍາ ມມ ປຸຕ຺ຕສ຺ສ ນິຄມວາສິຕິສ຺ສສ຺ສ ມາທິສໍ ອາຈຣິຍໍ ລຠິຕ຺ວາ ອປ຺ປິຈ຺ຉຕາ, ຠິກ຺ຂຸນາ ນາມ ນິຄມວາສິຕິສ຺ເສນ ວິຍ ອປ຺ປິຈ຺ເຉເນວ ຠວິຕພ຺ພໍ. ເອວຣູໂປ ຫິ ຠິກ຺ຂຸ ອຠພ຺ໂພ ສມຖວິປສ຺ສນາຘມ຺ເມຫິ ວາ ມຄ຺ຄຜເລຫິ ວາ ປຣິຫານາຍ, ອຎ຺ຎທຕ຺ຖຸ ນິພ຺ພານສ຺ເສວ ສນ຺ຕິເກ ໂຫຕີ’’ຕິ ວຕ຺ວາ ອິມໍ ຄາຖມາຫ –

໓໒. ‘‘ອປ຺ປມາທຣໂຕ ຠິກ຺ຂຸ, ປມາເທ ຠຍທສ຺ສິ ວາ;

ອຠພ຺ໂພ ປຣິຫານາຍ, ນິພ຺ພານສ຺ເສວ ສນ຺ຕິເກ’’ຕິ.

ຕຕ຺ຖ ອຠພ຺ໂພ ປຣິຫານາຍາຕິ ໂສ ເອວຣູໂປ ຠິກ຺ຂຸ ສມຖວິປສ຺ສນາຘມ຺ເມຫິ ວາ ມຄ຺ຄຜເລຫິ ວາ ປຣິຫານາຍ ອຠພ຺ໂພ, ນາປິ ປຕ຺ເຕຫິ ປຣິຫາຍຕິ, ນ ອປ຺ປຕ຺ຕານິ ນ ປາປຸຓາຕິ. ນິພ຺ພານສ຺ເສວ ສນ຺ຕິເກຕິ ກິເລສປຣິນິພ຺ພານສ຺ສປິ ອນຸປາທາປຣິນິພ຺ພານສ຺ສາປິ ສນ຺ຕິເກເຍວາຕິ.

ຄາຖາປຣິໂຍສາເນ ນິຄມວາສິຕິສ຺ສຕ຺ເຖໂຣ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິ. ອຎ຺ເຎປິ ພຫູ ໂສຕາປນ຺ນາທໂຍ ອເຫສຸໍ. ມຫາຊນສ຺ສ ສາຕ຺ຖິກາ ຘມ຺ມເທສນາ ຊາຕາຕິ.

ນິຄມວາສິຕິສ຺ສຕ຺ເຖຣວຕ຺ຖຸ ນວມໍ.

ອປ຺ປມາທວຄ຺ຄວຓ຺ຓນາ ນິຏ຺ຐິຕາ. ທຸຕິໂຍ ວຄ຺ໂຄ.