໘. ອຎ຺ຎຕຣຠິກ຺ຂຸວຕ຺ຖຸ

ອປ຺ປມາທຣໂຕ ຠິກ຺ຂູຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ອຎ຺ຎຕຣໍ ຠິກ຺ຂຸໍ ອາຣພ຺ຠ ກເຖສິ.

ໂສ ກິຣ ສຕ຺ຖຸ ສນ຺ຕິເກ ຍາວ ອຣຫຕ຺ຕາ ກມ຺ມຏ຺ຐານໍ ກຖາເປຕ຺ວາ ອຣຎ຺ຎໍ ປວິສິຕ຺ວາ ຆເຏນ຺ໂຕ ວາຍມນ຺ໂຕ ອຣຫຕ຺ຕໍ ປຕ຺ຕຸໍ ນາສກ຺ຂິ. ໂສ ‘‘ວິເສເສຕ຺ວາ ກມ຺ມຏ຺ຐານໍ ກຖາເປສ຺ສາມີ’’ຕິ ຕໂຕ ນິກ຺ຂມິຕ຺ວາ ສຕ຺ຖຸ ສນ຺ຕິກໍ ອາຄຈ຺ຉນ຺ໂຕ ອນ຺ຕຣາມຄ຺ເຄ ມຫນ຺ຕໍ ທາວຄ຺ຄິໍ ອຸຏ຺ຐິຕໍ ທິສ຺ວາ ເວເຄນ ເອກໍ ມຸຓ຺ຑປພ຺ພຕມຕ຺ຖກໍ ອຠິຣຸຍ຺ຫ ນິສິນ຺ໂນ ອຣຎ຺ຎໍ ຑຍ຺ຫມານໍ ອຄ຺ຄິໍ ທິສ຺ວາ ອາຣມ຺ມຓໍ ຄຓ຺ຫິ – ‘‘ຍຖາ ອຍໍ ອຄ຺ຄິ ມຫນ຺ຕານິ ຈ ຂຸທ຺ທການິ ຈ ອຸປາທານານິ ຑຫນ຺ໂຕ ຄຈ຺ຉຕິ, ເອວໍ ອຣິຍມຄ຺ຄຎາຓຄ຺ຄິນາປິ ມຫນ຺ຕານິ ຈ ຂຸທ຺ທການິ ຈ ສໍໂຍຊນານິ ຑຫນ຺ເຕນ ຄນ຺ຕພ຺ພໍ ຠວິສ຺ສຕີ’’ຕິ. ສຕ຺ຖາ ຄນ຺ຘກຸຏິຍໍ ນິສິນ຺ໂນວ ຕສ຺ສ ຈິຕ຺ຕາຈາຣໍ ຎຕ຺ວາ, ‘‘ເອວເມວ, ຠິກ຺ຂຸ, ມຫນ຺ຕານິປິ ຂຸທ຺ທການິປິ ອຸປາທານານິ ວິຍ ອິເມສໍ ສຕ຺ຕານໍ ອພ຺ຠນ຺ຕເຣ ອຸປ຺ປຊ຺ຊມານານິ ອຓຸໍຖູລານິ ສໍໂຍຊນານິ, ຕານິ ຎາຓຄ຺ຄິນາ ຌາເປຕ຺ວາ ອຠພ຺ພຸປ຺ປຕ຺ຕິການິ ກາຕຸໍ ວຏ຺ຏຕີ’’ຕິ ວຕ຺ວາ ໂອຠາສໍ ວິສ຺ສຊ຺ເຊຕ຺ວາ ຕສ຺ສ ຠິກ຺ຂຸໂນ ອຠິມຸເຂ ນິສິນ຺ໂນ ວິຍ ປຎ຺ຎາຍມາໂນ ອິມໍ ໂອຠາສຄາຖມາຫ –

໓໑. ‘‘ອປ຺ປມາທຣໂຕ ຠິກ຺ຂຸ, ປມາເທ ຠຍທສ຺ສິ ວາ;

ສໍໂຍຊນໍ ອຓຸໍ ຖູລໍ, ຑຫໍ ອຄ຺ຄີວ ຄຈ຺ຉຕີ’’ຕິ.

ຕຕ຺ຖ ອປ຺ປມາທຣໂຕຕິ ອປ຺ປມາເທ ຣໂຕ ອຠິຣໂຕ, ອປ຺ປມາເທນ ວີຕິນາເມນ຺ໂຕຕິ ອຕ຺ໂຖ. ປມາເທ ຠຍທສ຺ສິ ວາຕິ ນິຣຍຸປ຺ປຕ຺ຕິອາທິກໍ ປມາເທ ຠຍໍ ຠຍໂຕ ປສ຺ສນ຺ໂຕ, ຕາສໍ ວາ ອຸປ຺ປຕ຺ຕີນໍ ມູລຕ຺ຕາ ປມາທໍ ຠຍໂຕ ປສ຺ສນ຺ໂຕ. ສໍໂຍຊນນ຺ຕິ ວຏ຺ຏທຸກ຺ເຂນ ສທ຺ຘິໍ ໂຍຊນໍ ພນ຺ຘນໍ ປຊານໍ ວຏ຺ເຏ ໂອສີທາປນສມຕ຺ຖໍ ທສວິຘໍ ສໍໂຍຊນໍ. ອຓຸໍ ຖູລນ຺ຕິ ມຫນ຺ຕຎ຺ຈ ຂຸທ຺ທກຎ຺ຈ. ຑຫໍ ອຄ຺ຄີວ ຄຈ຺ຉຕີຕິ ຍຖາ ອຍໍ ອຄ຺ຄີ ເອຕໍ ມຫນ຺ຕຎ຺ຈ ຂຸທ຺ທກຎ຺ຈ ອຸປາທານໍ ຑຫນ຺ໂຕວ ຄຈ຺ຉຕິ. ເອວເມໂສ ອປ຺ປມາທຣໂຕ ຠິກ຺ຂຸ ອປ຺ປມາທາຘິຄເຕນ ຎາຓຄ຺ຄິນາ ເອຕໍ ສໍໂຍຊນໍ ຑຫນ຺ໂຕ ອຠພ຺ພຸປ຺ປຕ຺ຕິກໍ ກໂຣນ຺ໂຕ ຄຈ຺ຉຕີຕິ ອຕ຺ໂຖ.

ຄາຖາປຣິໂຍສາເນ ໂສ ຠິກ຺ຂຸ ຍຖານິສິນ຺ໂນວ ສພ຺ພສໍໂຍຊນານິ ຌາເປຕ຺ວາ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ວາ ອາກາເສນາຄນ຺ຕ຺ວາ ຕຖາຄຕສ຺ສ ສຸວຓ຺ຓວຓ຺ຓໍ ສຣີຣໍ ໂຖເມຕ຺ວາ ວຓ຺ເຓຕ຺ວາ ວນ຺ທມາໂນວ ປກ຺ກາມີຕິ.

ອຎ຺ຎຕຣຠິກ຺ຂຸວຕ຺ຖຸ ອຏ຺ຐມໍ.