໖. ປມຕ຺ຕາປມຕ຺ຕທ຺ເວສຫາຍກວຕ຺ຖຸ

ອປ຺ປມຕ຺ໂຕ ປມຕ຺ເຕສູຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ທ຺ເວ ສຫາຍເກ ຠິກ຺ຂູ ອາຣພ຺ຠ ກເຖສິ.

ເຕ ກິຣ ສຕ຺ຖຸ ສນ຺ຕິເກ ກມ຺ມຏ຺ຐານໍ ຄເຫຕ຺ວາ ອາຣຎ຺ຎກວິຫາຣໍ ປວິສິໍສຸ. ເຕສຸ ເອໂກ ກິຣ ກາລສ຺ເສວ ທາຣູນິ ອາຫຣິຕ຺ວາ ອງ຺ຄາຣກປລ຺ລໍ ສຊ຺ເຊຕ຺ວາ ທຫຣສາມເຓເຣຫິ ສທ຺ຘິໍ ສລ຺ລປນ຺ໂຕ ປຐມຍາມໍ ວິສິພ຺ພມາໂນ ນິສີທຕິ. ເອໂກ ອປ຺ປມຕ຺ໂຕ ສມຓຘມ຺ມໍ ກໂຣນ຺ໂຕ ອິຕຣໍ ໂອວທຕິ, ‘‘ອາວຸໂສ, ມາ ເອວໍ ກຣິ, ປມຕ຺ຕສ຺ສ ຫິ ຈຕ຺ຕາໂຣ ອປາຍາ ສກຆຣສທິສາ. ພຸທ຺ຘາ ນາມ ສາເຐຍ຺ເຍນ ອາຣາເຘຕຸໍ ນ ສກ຺ກາ’’ຕິ ໂສ ຕສ຺ໂສວາທໍ ນ ສຸຓາຕິ. ອິຕໂຣ ‘‘ນາຍໍ ວຈນກ຺ຂໂມ’’ຕິ ຕໍ ອວຕ຺ວາ ອປ຺ປມຕ຺ໂຕວ ສມຓຘມ຺ມມກາສິ. ອລສຕ຺ເຖໂຣປິ ປຐມຍາເມ ວິສິພ຺ເພຕ຺ວາ ອິຕຣສ຺ສ ຈງ຺ກມິຕ຺ວາ ຄພ຺ຠໍ ປວິຏ຺ຐກາເລ ປວິສິຕ຺ວາ, ‘‘ມຫາກຸສີຕ, ຕ຺ວໍ ນິປຊ຺ຊິຕ຺ວາ ສຍນຕ຺ຖາຍ ອຣຎ຺ຎໍ ປວິຏ຺ໂຐສິ, ກິໍ ພຸທ຺ຘານໍ ສນ຺ຕິເກ ກມ຺ມຏ຺ຐານໍ ຄເຫຕ຺ວາ ອຸຏ຺ຐາຍ ສມຓຘມ຺ມໍ ກາຕຸໍ ວຏ຺ຏຕີ’’ຕິ ວຕ຺ວາ ອຕ຺ຕໂນ ວສນຏ຺ຐານໍ ປວິສິຕ຺ວາ ນິປຊ຺ຊິຕ຺ວາ ສຸປຕິ. ອິຕໂຣປິ ມຊ຺ຌິມຍາເມ ວິສ຺ສມິຕ຺ວາ ປຈ຺ຉິມຍາເມ ປຈ຺ຈຸຏ຺ຐາຍ ສມຓຘມ຺ມໍ ກໂຣຕິ. ໂສ ເອວໍ ອປ຺ປມຕ຺ໂຕ ວິຫຣນ຺ໂຕ ນ ຈິຣສ຺ເສວ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິ. ອິຕໂຣ ປມາເທເນວ ກາລໍ ວີຕິນາເມສິ. ເຕ ວຸຏ຺ຐວສ຺ສາ ສຕ຺ຖຸ ສນ຺ຕິກໍ ຄນ຺ຕ຺ວາ ສຕ຺ຖາຣໍ ວນ຺ທິຕ຺ວາ ເອກມນ຺ຕໍ ນິສີທິໍສຸ. ສຕ຺ຖາ ເຕຫິ ສທ຺ຘິໍ ປຏິສນ຺ຖາຣໍ ກຕ຺ວາ, ‘‘ກຈ຺ຈິ, ຠິກ຺ຂເວ, ອປ຺ປມຕ຺ຕາ ສມຓຘມ຺ມໍ ກຣິຕ຺ຖ, ກຈ຺ຈິ ໂວ ປພ຺ພຊິຕກິຈ຺ຈໍ ມຕ຺ຖກໍ ປຕ຺ຕ’’ນ຺ຕິ ປຸຈ຺ຉິ. ປຐມໍ ປມຕ຺ໂຕ ຠິກ຺ຂຸ ອາຫ – ‘‘ກຸໂຕ, ຠນ຺ເຕ, ເອຕສ຺ສ ອປ຺ປມາໂທ, ຄຕກາລໂຕ ປຏ຺ຐາຍ ນິປຊ຺ຊິຕ຺ວາ ນິທ຺ທາຍນ຺ໂຕ ກາລໍ ວີຕິນາເມສີ’’ຕິ. ‘‘ຕ຺ວໍ ປນ ຠິກ຺ຂູ’’ຕິ. ‘‘ອຫໍ, ຠນ຺ເຕ, ກາລສ຺ເສວ ທາຣູນິ ອາຫຣິຕ຺ວາ ອງ຺ຄາຣກປລ຺ລໍ ສຊ຺ເຊຕ຺ວາ ປຐມຍາເມ ວິສິພ຺ເພນ຺ໂຕ ນິສີທິຕ຺ວາ ອນິທ຺ທາຍນ຺ໂຕວ ກາລໍ ວີຕິນາເມສິ’’ນ຺ຕິ. ອຖ ນໍ ສຕ຺ຖາ ‘‘ຕ຺ວໍ ປມຕ຺ໂຕ ກາລໍ ວີຕິນາເມຕ຺ວາ ‘ອປ຺ປມຕ຺ໂຕມ຺ຫີ’ຕິ ວທສິ, ອປ຺ປມຕ຺ຕໍ ປນ ປມຕ຺ຕໍ ກໂຣສີ’’ຕິ ອາຫ. ປຸນ ປມາເທ ໂທເສ, ອປ຺ປມາເທ ອານິສໍເສ ປກາເສຕຸໍ, ‘‘ຕ຺ວໍ ມມ ປຸຕ຺ຕສ຺ສ ສນ຺ຕິເກ ຊວຈ຺ຉິນ຺ໂນ ທຸພ຺ພລສ຺ໂສ ວິຍ, ເອສ ປນ ຕວ ສນ຺ຕິເກ ສີຆຊວສ຺ໂສ ວິຍາ’’ຕິ ວຕ຺ວາ ອິມໍ ຄາຖມາຫ –

໒໙. ‘‘ອປ຺ປມຕ຺ໂຕ ປມຕ຺ເຕສຸ, ສຸຕ຺ເຕສຸ ພຫຸຊາຄໂຣ;

ອພລສ຺ສໍວ ສີຆສ຺ໂສ, ຫິຕ຺ວາ ຍາຕິ ສຸເມຘໂສ’’ຕິ.

ຕຕ຺ຖ ອປ຺ປມຕ຺ໂຕຕິ ສຕິເວປຸລ຺ລປ຺ປຕ຺ຕຕາຍ ອປ຺ປມາທສມ຺ປນ຺ເນ ຂີຓາສໂວ. ປມຕ຺ເຕສູຕິ ສຕິໂວສຄ຺ເຄ ຐິເຕສຸ ສຕ຺ເຕສຸ. ສຸຕ຺ເຕສູຕິ ສຕິຊາຄຣິຍາຠາເວນ ສພ຺ພິຣິຍາປເຖສຸ ນິທ຺ທາຍນ຺ເຕສຸ. ພຫຸຊາຄໂຣຕິ ມຫນ຺ເຕ ສຕິເວປຸລ຺ເລ ຊາຄຣິເຍ ຐິໂຕ. ອພລສ຺ສໍວາຕິ ກຸຓ຺ຐປາທໍ ຉິນ຺ນຊວໍ ທຸພ຺ພລສ຺ສໍ ສີຆຊໂວ ສິນ຺ຘວາຊານີໂຍ ວິຍ. ສຸເມຘໂສຕິ ອຸຕ຺ຕມປຎ຺ໂຎ. ຕຖາຣູປໍ ປຸຄ຺ຄລໍ ອາຄເມນປິ ອຘິຄເມນປິ ຫິຕ຺ວາ ຍາຕິ. ມນ຺ທປຎ຺ຎສ຺ມິຎ຺ຫິ ເອກໍ ສຸຕ຺ຕໍ ຄເຫຕຸໍ ວາຍມນ຺ເຕເຍວ ສຸເມຘໂສ ເອກໍ ວຄ຺ຄໍ ຄຓ຺ຫາຕິ, ເອວໍ ຕາວ ອາຄເມນ ຫິຕ຺ວາ ຍາຕິ. ມນ຺ທປຎ຺ເຎ ປນ ຣຕ຺ຕິຏ຺ຐານທິວາຏ຺ຐານານິ ກາຕຸໍ ວາຍມນ຺ເຕເຍວ ກມ຺ມຏ຺ຐານໍ ອຸຄ຺ຄເຫຕ຺ວາ ສຊ຺ຌາຍນ຺ເຕເຍວ ຈ ສຸເມຘໂສ ປຸພ຺ພຠາເຄປິ ປເຣນ ກຕໍ ຣຕ຺ຕິຏ຺ຐານໍ ວາ ທິວາຏ຺ຐານໍ ວາ ປວິສິຕ຺ວາ ກມ຺ມຏ຺ຐານໍ ສມ຺ມສນ຺ໂຕ ສພ຺ພກິເລເສ ເຂເປຕ຺ວາ ເນວ ໂລກຸຕ຺ຕຣຘມ຺ເມ ຫຕ຺ຖຄເຕ ກໂຣຕິ, ເອວໍ ອຘິຄເມນປິ ຫິຕ຺ວາ ຍາຕິ. ວຏ຺ເຏ ປນ ນໍ ຫິຕ຺ວາ ຉຑ຺ເຑຕ຺ວາ ວຏ຺ຏໂຕ ນິສ຺ສຣນ຺ໂຕ ຍາຕິເຍວາຕິ.

ຄາຖາປຣິໂຍສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ປມຕ຺ຕາປມຕ຺ຕທ຺ເວສຫາຍກວຕ຺ຖຸ ຉຏ຺ຐໍ.