໕. ວຊ຺ຊິປຸຕ຺ຕຕ຺ເຖຣອປທານວຓ຺ຓນາ

ສຫສ຺ສຣໍສີ ຠຄວາຕິອາທິກໍ ອາຍສ຺ມໂຕ ວຊ຺ຊິປຸຕ຺ຕຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ໂຕ ອິໂຕ ຈຕຸນວຸຕິກປ຺ເປ ເອກໍ ປຈ຺ເຈກພຸທ຺ຘໍ ຠິກ຺ຂາຍ ຄຈ຺ຉນ຺ຕໍ ທິສ຺ວາ ປສນ຺ນມານໂສ ກທລິຜລານິ ອທາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ເວສາລິຍໍ ລິຈ຺ຉວິຣາຊກຸມາໂຣ ຫຸຕ຺ວາ ນິພ຺ພຕ຺ຕິ, ວຊ຺ຊິຣາຊປຸຕ຺ຕຕ຺ຕາ ວຊ຺ຊິປຸຕ຺ໂຕຕ຺ເວວສ຺ສ ສມຎ຺ຎາ. ໂສ ທຫໂຣ ຫຸຕ຺ວາ ຫຕ຺ຖິສິປ຺ປາທິສິກ຺ຂນກາເລປິ ເຫຕຸສມ຺ປນ຺ນຕາຍ ນິສ຺ສຣຓຊ຺ຌາສໂຍວ ຫຸຕ຺ວາ ວິຈຣນ຺ໂຕ ສຕ຺ຖຸ ຘມ຺ມເທສນໍ ສຸຕ຺ວາ ປຏິລທ຺ຘສທ຺ໂຘ ສຕ຺ຖຸ ສນ຺ຕິເກ ປພ຺ພຊິຕ຺ວາ ວິປສ຺ສນາຍ ກມ຺ມໍ ກຕ຺ວາ ນຈິຣສ຺ເສວ ຉຬຠິຎ຺ໂຎ ອໂຫສິ. ຉຬຠິຎ຺ໂຎ ປນ ຫຸຕ຺ວາ ອປຣຠາເຄ ອຈິຣປຣິນິພ຺ພຸເຕ ສຕ຺ຖຣິ ຘມ຺ມໍ ສງ຺ຄາຍິຕຸໍ ສງ຺ເກຕໍ ກຕ຺ວາ ມຫາເຖເຣສຸ ຕຕ຺ຖ ຕຕ຺ຖ ວິຫຣນ຺ເຕສຸ ເອກທິວສໍ ອາຍສ຺ມນ຺ຕໍ ອານນ຺ທໍ ເສຂໍເຍວ ສມານໍ ມຫຕິຍາ ປຣິສາຍ ປຣິວຸຕໍ ຘມ຺ມໍ ເທເສນ຺ຕໍ ທິສ຺ວາ ຕສ຺ສ ອຸປຣິມຄ຺ຄາຘິຄມາຍ ອຸສ຺ສາຫໍ ຊເນນ຺ໂຕ –

‘‘ຣຸກ຺ຂມູລຄຫນໍ ປສກ຺ກິຍ, ນິພ຺ພານໍ ຫທຍສ຺ມິໍ ໂອປິຍ;

ຌາຍ ໂຄຕມ ມາ ຈ ປມາໂທ, ກິໍ ເຕ ພິຬິພິຬິກາ ກຣິສ຺ສຕີ’’ຕິ. (ເຖຣຄາ. ໑໑໙) – ຄາຖໍ ອຠາສິ;

ຕຕ຺ຖ ຣຸກ຺ຂມູລຄຫນນ຺ຕິ ຣຸກ຺ຂມູລຠູຕໍ ຄຫນໍ, ຄຫນຎ຺ຫິ ອຕ຺ຖິ, ນ ຣຸກ຺ຂມູລໍ, ຣຸກ຺ຂມູລຎ຺ຈ ອຕ຺ຖິ, ນ ຄຫນໍ, ເຕສຸ ຣຸກ຺ຂມູລຄ຺ຄຫເຓນ ຐານສ຺ສ ຉາຍາຍ ສມ຺ປນ຺ນຕາຍ ວາຕາຕປປຣິສ຺ສຍາຠາວໍ ທີເປຕິ, ຄຫນຄ຺ຄຫເຓນ ນິວາຕຠາເວນ ວາຕປຣິສ຺ສຍາຠາວໍ ຊນສມ຺ພາຘາຠາວຎ຺ຈ ທສ຺ເສຕິ, ຕທຸຠເຍນ ຈ ຠາວນາໂຍຄ຺ຍຕໍ. ປສກ຺ກິຍາຕິ ອຸປຄນ຺ຕ຺ວາ. ນິພ຺ພານໍ ຫທຍສ຺ມິໍ ໂອປິຍາຕິ ‘‘ເອວໍ ມຍາ ປຏິປຊ຺ຊິຕ຺ວາ ນິພ຺ພານໍ ອຘິຄນ຺ຕພ຺ພ’’ນ຺ຕິ ນິພ຺ພຸຕິໍ ຫທເຍ ຐເປຕ຺ວາ ຈິຕ຺ເຕ ກຕ຺ວາ. ຌາຍາຕິ ຕິລກ຺ຂຓູປນິຊ຺ຌາເນນ ຌາຍ, ວິປສ຺ສນາຠາວນາສຫິຕໍ ມຄ຺ຄຠາວນໍ ຠາເວຫິ. ໂຄຕມາຕິ ຘມ຺ມຠຓ຺ຑາຄາຣິກໍ ໂຄຕ຺ເຕນາລປຕິ. ມາ ຈ ປມາໂທຕິ ອຘິກຸສເລສຸ ຘມ຺ເມສຸ ມາ ປມາທໍ ອາປຊ຺ຊິ. ອິທານິ ຍາທິໂສ ເຖຣສ຺ສ ປມາໂທ, ຕໍ ປຏິກ຺ເຂປວເສນ ທສ຺ເສນ຺ໂຕ ‘‘ກິໍ ເຕ ພິຬິພິຬິກາ ກຣິສ຺ສຕີ’’ຕິ ອາຫ. ຕຕ຺ຖ ພິຬິພິຬິກາຕິ ພິຬິພິຬິກິຣິຍາ, ພິຬິພິຬິຕິສທ຺ທປວຕ຺ຕິ ຍຖາ ນິຣຕ຺ຖກາ, ເອວໍ ພິຬິພິຬິກາສທິສາ ຊນປຎ຺ຎຕ຺ຕິ. ກິໍ ເຕ ກຣິສ຺ສຕີຕິ ກີທິສໍ ອຕ຺ຖໍ ຕຸຍ຺ຫໍ ສາເຘສ຺ສຕິ, ຕສ຺ມາ ຊນປຎ຺ຎຕ຺ຕິໍ ປຫາຍ ສທຕ຺ຖປສຸໂຕ ໂຫຫີຕິ ໂອວາທໍ ອທາສິ.

ຕໍ ສຸຕ຺ວາ ອຎ຺ເຎຫິ ວຸຕ຺ເຕນ ວິສ຺ສຄນ຺ຘວາຍນວຈເນນ ສໍເວຄຊາໂຕ ພຫຸເທວ ຣຕ຺ຕິໍ ຈງ຺ກເມນ ວີຕິນາເມນ຺ໂຕ ວິປສ຺ສນໍ ອຸສ຺ສຸກ຺ກາເປຕ຺ວາ ເສນາສນໍ ປວິສິຕ຺ວາ ມຎ຺ຈເກ ນິສິນ຺ນມຕ຺ໂຕວ ‘‘ກິຎ຺ຈິ ສຍາມີ’’ຕິ ສີສໍ ພິມ຺ໂພຫນມສມ຺ປຕ຺ຕໍ ປາທໍ ຠູມິໂຕ ອຸຄ຺ຄຕໍ ສຣີຣສ຺ສ ອາກາສຄຕກ຺ຂເຓເຍວ ອຣຫຕ຺ຕໍ ປາປຸຓິ.

໔໙. ວຊ຺ຊິປຸຕ຺ຕຕ຺ເຖໂຣ ອປຣຠາເຄ ໂສມນສ຺ສຊາໂຕ ອຕ຺ຕໂນ ປຸພ຺ພຈຣິຕາປທານໍ ປກາເສນ຺ໂຕ ສຫສ຺ສຣໍສີ ຠຄວາຕິອາທິມາຫ. ຕຕ຺ຖ ສຫສ຺ສຣໍສີຕິ ເອຕ຺ຖ ‘‘ອເນກສຕສຫສ຺ສຣໍສີ’’ຕິ ວຕ຺ຕພ຺ເພ ຄາຖາພນ຺ຘສຸຂຕ຺ຖໍ ‘‘ສຫສ຺ສຣໍສີ’’ຕິ ວຸຕ຺ຕນ຺ຕິ ເວທິຕພ຺ພໍ. ເສສໍ ສຸວິຎ຺ເຎຍ຺ຍເມວາຕິ.

ວຊ຺ຊິປຸຕ຺ຕຕ຺ເຖຣອປທານວຓ຺ຓນາ ສມຕ຺ຕາ.