໖. ອຸຕ຺ຕຣຕ຺ເຖຣອປທານວຓ຺ຓນາ

ຉຏ຺ຐາປທາເນ ສຸເມໂຘ ນາມ ສມ຺ພຸທ຺ໂຘຕິອາທິກໍ ອາຍສ຺ມໂຕ ອຸຕ຺ຕຣສາມເຓຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສຸເມຘສ຺ສ ຠຄວໂຕ ກາເລ ວິຊ຺ຊາຘໂຣ ຫຸຕ຺ວາ ອາກາເສນ ວິຈຣຕິ. ເຕນ ຈ ສມເຍນ ສຕ຺ຖາ ຕສ຺ເສວ ອນຸຄ຺ຄຓ຺ຫນຕ຺ຖໍ ວນນ຺ຕເຣ ອຎ຺ຎຕຣສ຺ມິໍ ຣຸກ຺ຂມູເລ ນິສີທິ ຉພ຺ພຓ຺ຓພຸທ຺ຘຣໍສິໂຍ ວິສ຺ສຊ຺ເຊນ຺ໂຕ. ໂສ ອນ຺ຕລິກ຺ເຂນ ຄຈ຺ຉນ຺ໂຕ ຠຄວນ຺ຕໍ ທິສ຺ວາ ປສນ຺ນມານໂສ ອາກາສໂຕ ໂອຣຸຍ຺ຫ ສຸວິສຸທ຺ເຘຫິ ວິປຸເລຫິ ກຓິກາຣປຸປ຺ເຜຫິ ຠຄວນ຺ຕໍ ປູເຊສິ, ປຸປ຺ຜານິ ພຸທ຺ຘານຸຠາເວນ ສຕ຺ຖຸ ອຸປຣິ ຉຕ຺ຕາກາເຣນ ອຏ຺ຐໍສຸ, ໂສ ເຕນ ຠິຍ຺ໂຍໂສມຕ຺ຕາຍ ປສນ຺ນຈິຕ຺ໂຕ ຫຸຕ຺ວາ ອປຣຠາເຄ ກາລໍ ກຕ຺ວາ ຕາວຕິໍເສສຸ ນິພ຺ພຕ຺ຕິຕ຺ວາ ທິພ຺ພສມ຺ປຕ຺ຕິໍ ອນຸຠວນ຺ໂຕ ຍາວຕາຍຸກໍ ຕຕ຺ຖ ຐຕ຺ວາ ຕໂຕ ຈຸໂຕ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຣາຊຄເຫ ພ຺ຣາຫ຺ມຓມຫາສາລສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ, ອຸຕ຺ຕໂຣຕິສ຺ສ ນາມໍ ອໂຫສິ. ໂສ ວິຎ຺ຎຸຕໍ ປຕ຺ໂຕ ພ຺ຣາຫ຺ມຓວິຊ຺ຊາສຸ ນິປ຺ຜຕ຺ຕິໍ ຄນ຺ຕ຺ວາ ຊາຕິຍາ ຣູເປນ ວິຊ຺ຊາຍ ວເຍນ ສີລາຈາເຣນ ຈ ໂລກສ຺ສ ສມ຺ຠາວນີໂຍ ຊາໂຕ.

ຕສ຺ສ ຕໍ ສມ຺ປຕ຺ຕິໍ ທິສ຺ວາ ວສ຺ສກາໂຣ ມຄຘມຫາມຕ຺ໂຕ ອຕ຺ຕໂນ ຘີຕຣໍ ທາຕຸກາໂມ ຫຸຕ຺ວາ ອຕ຺ຕໂນ ອຘິປ຺ປາຍໍ ປເວເທສິ. ໂສ ນິສ຺ສຣຓຊ຺ຌາສຍຕາຍ ຕໍ ປຏິກ຺ຂິປິຕ຺ວາ ກາເລນ ກາລໍ ຘມ຺ມເສນາປຕິໍ ປຍິຣຸປາສນ຺ໂຕ ຕສ຺ສ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ວຕ຺ຕສມ຺ປນ຺ໂນ ຫຸຕ຺ວາ ເຖຣໍ ອຸປຏ຺ຐຫຕິ.

ເຕນ ຈ ສມເຍນ ເຖຣສ຺ສ ອຎ຺ຎຕໂຣ ອາພາໂຘ ອຸປ຺ປນ຺ໂນ, ຕສ຺ສ ເຠສຊ຺ຊຕ຺ຖາຍ ອຸຕ຺ຕໂຣ ສາມເຓໂຣ ປາໂຕວ ປຕ຺ຕຈີວຣມາທາຍ ວິຫາຣໂຕ ນິກ຺ຂນ຺ໂຕ ອນ຺ຕຣາມຄ຺ເຄ ຕຬາກສ຺ສ ສມີເປ ປຕ຺ຕໍ ຐເປຕ຺ວາ ອຸທກສມີປໍ ຄນ຺ຕ຺ວາ ມຸຂໍ ໂຘວຕິ. ອຖ ອຎ຺ຎຕໂຣ ອຸມງ຺ຄໂຈໂຣ ກຕກມ຺ໂມ ອາຣກ຺ຂປຸຣິເສຫິ ອນຸພທ຺ໂຘ ອຄ຺ຄມຄ຺ເຄນ ນຄຣໂຕ ນິກ຺ຂມິຕ຺ວາ ປລາຍນ຺ໂຕ ອຕ຺ຕນາ ຄຫິຕໍ ຣຕນຠຓ຺ຑິຕໍ ສາມເຓຣສ຺ສ ປຕ຺ເຕ ປກ຺ຂິປິຕ຺ວາ ປລາຍິ. ສາມເຓໂຣປິ ປຕ຺ຕສມີປໍ ອຸປຄໂຕ. ໂຈຣໍ ອນຸພນ຺ຘນ຺ຕາ ຣາຊປຸຣິສາ ສາມເຓຣສ຺ສ ປຕ຺ເຕ ຠຓ຺ຑິກໍ ທິສ຺ວາ ‘‘ອຍໍ ໂຈໂຣ, ອິມິນາ ໂຈຣິຍໍ ກຕ’’ນ຺ຕິ ສາມເຓຣໍ ປຈ຺ຉາພາຫໍ ພນ຺ຘິຕ຺ວາ ວສ຺ສກາຣສ຺ສ ພ຺ຣາຫ຺ມຓສ຺ສ ທສ຺ເສສຸໍ. ວສ຺ສກາໂຣ ຈ ຕທາ ຣຎ຺ໂຎ ວິນິຈ຺ຉເຍ ນິຍຸຕ຺ໂຕ ຫຸຕ຺ວາ ເຉຊ຺ຊເຠຊ຺ຊໍ ອນຸສາສຕິ, ໂສ ‘‘ປຸພ຺ເພ ມມ ວຈນໍ ນາທິຍິ, ສຸທ຺ຘປາສຓ຺ຑິເຍສຸ ປພ຺ພຊີ’’ຕິ (ເຖຣຄາ. ອຏ຺ຐ. ໑.ອຸຕ຺ຕຣຕ຺ເຖຣຄາຖາວຓ຺ຓນາ) ກມ຺ມໍ ອໂສເຘຕ຺ວາ ຆາຕຸກາມຕ຺ຕາວ ຊີວນ຺ຕເມວ ຕໍ ສູເລ ອຸຕ຺ຕາເສສິ.

ອຖສ຺ສ ຠຄວາ ຎາຓປຣິປາກໍ ໂອໂລເກຕ຺ວາ ຕໍ ຐານໍ ຄນ຺ຕ຺ວາ ວິປ຺ຜຸຣນ຺ຕຫຕ຺ຖນຂມຓິມຍູຂສມ຺ຠິນ຺ນສິຕາຠຕາຍ ປຄ຺ຆຣນ຺ຕຊາຕິຫິງ຺ຄຸລກສຸວຓ຺ຓຣສຘາຣໍ ວິຍ ຊາລາຄຸຓ຺ຐິຕມຸທຸຕລຸນທີຆງ຺ຄຸລິຫຕ຺ຖໍ ອຸຕ຺ຕຣສ຺ສ ສີເສ ຐເປຕ຺ວາ ‘‘ອຸຕ຺ຕຣ, ອິທໍ ເຕ ປຸຣິມກມ຺ມສ຺ສ ຜລໍ ອຸປ຺ປນ຺ນໍ, ຕຕ຺ຖ ຕຍາ ປຈ຺ຈເວກ຺ຂຓພເລນ ອຘິວາສນາ ກາຕພ຺ພາ’’ຕິ ວຕ຺ວາ ອຊ຺ຌາສຍານຸຣູປໍ ຘມ຺ມໍ ເທເສສິ. ອຸຕ຺ຕໂຣ ອມຕາຠິເສກສທິເສນ ສຕ຺ຖຸ ຫຕ຺ຖສມ຺ຜສ຺ເສນ ສຎ຺ຊາຕປ຺ປສາທໂສມນສ຺ສຕາຍ ອຸຬາຣປີຕິປາໂມຊ຺ຊໍ ປຏິລຠິຕ຺ວາ ຍຖາປຣິຈິຕໍ ວິປສ຺ສນາມຄ຺ຄໍ ສມາຣູຬ຺ໂຫ ຎາຓສ຺ສ ປຣິປາກໍ ຄຕຕ຺ຕາ ສຕ຺ຖຸ ຈ ເທສນາວິລາເສນ ຕາວເທວ ມຄ຺ຄປຏິປາຏິຍາ ສພ຺ເພ ກິເລເສ ເຂເປຕ຺ວາ ຉຬຠິຎ຺ໂຎ ອໂຫສິ. ຉຬຠິຎ຺ໂຎ ປນ ຫຸຕ຺ວາ ສູລໂຕ ອຸຏ຺ຐຫິຕ຺ວາ ປຣານຸທ຺ທຍາຍ ອາກາເສ ຐຕ຺ວາ ປາຏິຫາຣິຍໍ ທສ຺ເສສິ. ມຫາຊໂນ ອຈ຺ຉຣິຍພ຺ຠຸຕຈິຕ຺ຕຊາໂຕ ອໂຫສິ. ຕາວເທວສ຺ສ ວໂຓ ສໍຣູຬ຺ຫິ, ໂສ ຠິກ຺ຂູຫິ, ‘‘ອາວຸໂສ, ຕາທິສທຸກ຺ຂໍ ອນຸຠວນ຺ໂຕ ກຖໍ ຕ຺ວໍ ວິປສ຺ສນໍ ອນຸຍຸຎ຺ຊິຕຸໍ ອສກ຺ຂີ’’ຕິ ປຸຏ຺ໂຐ, ‘‘ປເຄວ ເມ, ອາວຸໂສ, ສໍສາເຣ ອາທີນໂວ, ສງ຺ຂາຣານຎ຺ຈ ສຠາໂວ ສຸທິຏ຺ໂຐ, ເອວາຫໍ ຕາທິສໍ ທຸກ຺ຂໍ ອນຸຠວນ຺ໂຕປິ ອສກ຺ຂິໍ ວິປສ຺ສນໍ ວຑ຺ເຒຕ຺ວາ ວິເສສໍ ອຘິຄນ຺ຕຸ’’ນ຺ຕິ ອາຫ. ‘‘ປຸພ຺ພຊາຕິຍາ ທຫຣກາເລ ມກ຺ຂິກໍ ຄເຫຕ຺ວາ ນິມ຺ພສູລກໍ ຄເຫຕ຺ວາ ສູລາໂຣປນກີຬໍ ປຏິຈ຺ຈ ເອວໍ ອເນກຊາຕິສເຕສຸ ສູລາໂຣປນທຸກ຺ຂມນຸຠວິຕ຺ວາ ອິມາຍ ປຣິໂຍສານຊາຕິຍາ ເອວຣູປໍ ທຸກ຺ຂມນຸຠູຕ’’ນ຺ຕິ ອາຫ.

໕໕. ອຖ ອປຣຠາເຄ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ສຸເມໂຘ ນາມ ສມ຺ພຸທ຺ໂຘຕິອາທິມາຫ. ຕຕ຺ຖ ອນຸຕ຺ຕານປທວຓ຺ຓນເມວ ກຣິສ຺ສາມ.

໕໗. ວິຊ຺ຊາຘໂຣ ຕທາ ອາສິນ຺ຕິ ພາຫິຣກມນ຺ຕາທິວິຊ຺ຊາສິທ຺ຘິຍາ ອາກາສຄາມິສມຕ຺ໂຖ ຫຸຕ຺ວາ ຈຣຓວເສນ ຕໍ ວິຊ຺ຊໍ ຣກ຺ຂິຕ຺ວາ ອວິນາເສຕ຺ວາ ປຣິຫຣຓວເສນ ວິຊ຺ຊາຘຣໂຍນິ ອາສິໍ ອໂຫສິນ຺ຕິ ອຕ຺ໂຖ. ອນ຺ຕລິກ຺ຂຈໂຣ ອຫນ຺ຕິ ອນ຺ຕໍ ປຣິໂຍສານໍ ໂກຏິໍ ລິຂເຕ ສໍກຣິສ຺ສຕີຕິ ອນ຺ຕລິກ຺ຂໍ. ອຖ ວາ ອນ຺ຕໍ ປຣິໂຍສານໍ ລິຂ຺ຍເຕ ໂອໂລກິຍເຕ ເອເຕນາຕິ ອນ຺ຕລິກ຺ຂໍ, ຕສ຺ມິໍ ອນ຺ຕລິກ຺ເຂ, ອາກາເສ ຈຣຓສີໂລ ອຫນ຺ຕິ ອຕ຺ໂຖ. ຕິສູລໍ ສຸກຕໍ ຄຍ຺ຫາຕິ ຕິຂິຓໍ ສູລໍ, ອຄ຺ຄໍ ອາວຸຘໍ. ຕິສູລໍ ສຸນ຺ທຣໍ ກຕໍ, ໂກຏ຺ຏນຆໍສນມທ຺ທນປຫຣຓວເສນ ສຸຏ຺ຐຸ ກຕໍ ສູລາວຸຘໍ ຄຍ຺ຫ ຄເຫຕ຺ວາ ອມ຺ພຣໂຕ ຄຈ຺ຉາມີຕິ ອຕ຺ໂຖ. ເສສໍ ສພ຺ພໍ ເຫຏ຺ຐາ ວຸຕ຺ຕນຍຕ຺ຕາວ ນຍານຸໂຍເຄນ ສຸວິຎ຺ເຎຍ຺ຍເມວາຕິ.

ອຸຕ຺ຕຣຕ຺ເຖຣອປທານວຓ຺ຓນາ ສມຕ຺ຕາ.