໔. ກິມິລຕ຺ເຖຣອປທານວຓ຺ຓນາ

ຈຕຸຕ຺ຖາປທາເນ ນິພ຺ພຸເຕ ກກຸສນ຺ຘມ຺ຫີຕິອາທິກໍ ອາຍສ຺ມໂຕ ກິມິລຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ກກຸສນ຺ຘສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ປຣິນິພ຺ພຸເຕ ສຕ຺ຖຣິ ຕສ຺ສ ຘາຕຸໂຍ ອຸທ຺ທິສ຺ສ ສລລມາລາຫິ ມຓ຺ຑປໍ ກາເຣຕ຺ວາ ປູຊໍ ອກາສິ. ໂສ ເຕນ ປຸຎ຺ຎກມ຺ເມນ ຕາວຕິໍເສສຸ ອຸປ຺ປຊ຺ຊິຕ຺ວາ ອປຣາປຣໍ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ກປິລວຕ຺ຖຸນຄເຣ ສກ຺ຍຣາຊກຸເລ ນິພ຺ພຕ຺ຕິຕ຺ວາ ກິມິໂລຕິ ຕສ຺ສ ນາມໍ ອກາສິ. ໂສ ວຍປ຺ປຕ຺ໂຕ ໂຠຄສມ຺ປຕ຺ຕິຍາ ປມຕ຺ໂຕ ວິຫຣຕິ. ຕສ຺ສ ຎາຓປຣິປາກໍ ຎຕ຺ວາ ສໍເວຄຊນນຕ຺ຖໍ ອນຸປິຍາຍໍ ວິຫຣນ຺ໂຕ ສຕ຺ຖາ ປຐມໂຍພ຺ພເນ ຐິຕໍ ຣມຓີຍໍ ອິຕ຺ຖິຣູປໍ ອຠິນິມ຺ມິນິຕ຺ວາ ປຸຣໂຕ ທສ຺ເສຕ຺ວາ ປຸນ ອນຸກ຺ກເມນ ຍຖາ ຊຣາໂຣຄວິປຕ຺ຕີຫິ ອຠິຠູຕາ ທິສ຺ສຕິ, ຕຖາ ອກາສິ. ຕໍ ທິສ຺ວາ ກິມິລກຸມາໂຣ ອຕິວິຍ ສໍເວຄຊາໂຕ ອຕ຺ຕໂນ ສໍເວຄໍ ປກາເສນ຺ໂຕ ຠຄວໂຕ ປາກຏໍ ກຕ຺ວາ ລທ຺ຘານຸສາສໂນ ອຣຫຕ຺ຕໍ ປາປຸຓິ.

໔໒. ໂສ ອຣຫຕ຺ຕໍ ປຕ຺ວາ ໂສມນສ຺ສຊາໂຕ ອຕ຺ຕໂນ ປຸພ຺ພຈຣິຕາປທານໍ ປກາເສນ຺ໂຕ ນິພ຺ພຸເຕ ກກຸສນ຺ຘມ຺ຫີຕິອາທິມາຫ. ພ຺ຣາຫ຺ມຓມ຺ຫິ ວຸສີມຕີຕິ ປຎ຺ຈຫິ ວສິຕາຫິ ວສິປ຺ປຕ຺ຕມ຺ຫິ ຠຄວຕິ. ພ຺ຣາຫ຺ມຓສ຺ສ ສພ຺ພຄຸຓຄເຓຫິ ມຓ຺ຑິຕຕ຺ຕາ ອຠິວູຬ຺ຫີຕຕ຺ຕາ ພ຺ຣາຫ຺ມຓມ຺ຫິ ກກຸສນ຺ເຘ ຠຄວຕິ ປຣິນິພ຺ພຸເຕຕິ ອຕ຺ໂຖ. ເສສໍ ສພ຺ພໍ ອຸຕ຺ຕານເມວາຕິ.

ກິມິລຕ຺ເຖຣອປທານວຓ຺ຓນາ ສມຕ຺ຕາ.