໓. ຄຍາກສ຺ສປຕ຺ເຖຣອປທານວຓ຺ຓນາ

ຕຕິຍາປທາເນ ອຊິນຈມ຺ມວຕ຺ໂຖຫນ຺ຕິອາທິກໍ ອາຍສ຺ມໂຕ ຄຍາກສ຺ສປຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ໂຕ ອິໂຕ ເອກຕິໍສກປ຺ເປ ສິຂິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ນິສ຺ສຣຓຊ຺ຌາສຍຕາຍ ຆຣາວາສໍ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ອຣຎ຺ຎາຍຕເນ ອສ຺ສມໍ ມາເປຕ຺ວາ ວນມູລຜລາຫາໂຣ ວສຕິ. ເຕນ ຈ ສມເຍນ ຠຄວາ ເອໂກ ອທຸຕິໂຍ ຕສ຺ສ ອສ຺ສມສມີເປນາຄຈ຺ຉິ, ໂສ ຠຄວນ຺ຕໍ ທິສ຺ວາ ປສນ຺ນມານໂສ ອຸປສງ຺ກມິຕ຺ວາ ວນ຺ທິຕ຺ວາ ເອກມນ຺ຕໍ ຐິໂຕ ເວລໍ ໂອໂລເກນ຺ໂຕ ມໂນຫຣານິ ໂກລຜລານິ ສຕ຺ຖຸ ອຸປເນສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ວຍປ຺ປຕ຺ໂຕ ນິສ຺ສຣຓຊ຺ຌາສຍຕາຍ ຆຣາວາສໍ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ທ຺ວີຫິ ຕາປສສເຕຫິ ສທ຺ຘິໍ ຄຍາຍ ວິຫຣຕິ. ຄຍາຍ ວສນໂຕ ຫິສ຺ສ ກສ຺ສປໂຄຕ຺ຕຕາຍ ຈ ຄຍາກສ຺ສໂປຕິ ສມຎ຺ຎາ ອໂຫສິ. ໂສ ຠຄວໂຕ ສທ຺ຘິໍ ປຣິສາຍ ເອຫິຠິກ຺ຂູປສມ຺ປທໍ ທຕ຺ວາ ນທີກສ຺ສປສ຺ສ ວຸຕ຺ຕນເຍນ ອາທິຕ຺ຕປຣິຍາຍ ເທສນາຍ ໂອວທິຍມາໂນ ອຣຫຕ຺ເຕ ປຕິຏ຺ຐາສິ.

໓໕. ໂສ ອຣຫຕ຺ຕໍ ປຕ຺ວາ ໂສມນສ຺ສຊາໂຕ ອຕ຺ຕໂນ ປຸພ຺ພຈຣິຕາປທານໍ ປກາເສນ຺ໂຕ ອຊິນຈມ຺ມວຕ຺ໂຖຫນ຺ຕິອາທິມາຫ. ຕຕ຺ຖ ອຊິນຈມ຺ມວຕ຺ໂຖຕິ ຕາປສປພ຺ພຊິຕຕ຺ຕາ ອຊິນຈມ຺ມນິວາສນປາວຸຣໂຓຕິ ອຕ຺ໂຖ. ຂາຣິຠາຣຘໂຣຕິ ຕາປສກາເລ ຕາປສປຣິກ຺ຂາຣປຣິປຸຓ຺ຓກາຊຘໂຣຕິ ອຕ຺ໂຖ. ຂາຣິກຕາປສປຣິກ຺ຂາເຣ ປູເຣຕ຺ວາ. ໂກລໍ ອຫາສິ ອສ຺ສມນ຺ຕິ ໂກລຜລໍ ອສ຺ສເມ ປູເຣຕ຺ວາ ອສ຺ສເມ ນິສິນ຺ໂນຕິ ອຕ຺ໂຖ. ອໂຄປຍິນ຺ຕິ ປາເຐ ໂກລຜລໍ ປຣິເຍສິຕ຺ວາ ອສ຺ສມໍ ໂຄເປສິໍ ຣກ຺ຂິນ຺ຕິ ອຕ຺ໂຖ. ເສສໍ ສພ຺ພໍ ອຸຕ຺ຕານຕ຺ຖເມວາຕິ.

ຄຍາກສ຺ສປຕ຺ເຖຣອປທານວຓ຺ຓນາ ສມຕ຺ຕາ.