໑໑. ຣຏ຺ຐປາລຕ຺ເຖຣອປທານວຓ຺ຓນາ

ເອກາທສມາປທາເນ ປທຸມຸຕ຺ຕຣສ຺ສ ຠຄວໂຕຕິອາທິກໍ ອາຍສ຺ມໂຕ ຣຏ຺ຐປາລຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ຕສ຺ສ ອຸປ຺ປຕ຺ຕິໂຕ ປຸເຣຕຣເມວ ຫໍສວຕີນຄເຣ ຄຫປຕິມຫາສາລກຸເລ ນິພ຺ພຕ຺ຕິຕ຺ວາ ວຍປ຺ປຕ຺ໂຕ ປິຕຸ ອຈ຺ຈເຍນ ຆຣາວາເສ ປຕິຏ຺ຐິໂຕ ຣຕນໂກຏ຺ຐາຄາຣກມ຺ມິເກນ ທສ຺ສິຕໍ ອປຣິມາຓໍ ກຸລວໍສານຸຄຕໍ ຘນໍ ທິສ຺ວາ ‘‘ອິມໍ ເອຕ຺ຕກໍ ຘນຣາສິໍ ມຍ຺ຫໍ ອຍ຺ຍກປຍ຺ຍກາທໂຍ ອຕ຺ຕນາ ສທ຺ຘິໍ ຄເຫຕ຺ວາ ຄນ຺ຕຸໍ ນາສກ຺ຂິໍສຸ, ມຍາ ປນ ຄເຫຕ຺ວາ ຄນ຺ຕຸໍ ວຏ຺ຏຕີ’’ຕິ ຈິນ຺ເຕຕ຺ວາ ກປຓທ຺ຘິກາທີນໍ ມຫາທານໍ ເທຕິ. ໂສ ອຠິຎ຺ຎາລາຠິໍ ເອກໍ ຕາປສໍ ອຸປຏ຺ຐຫນ຺ໂຕ ເຕນ ເທວໂລກາຘິປຈ຺ເຈ ອຸຍ຺ໂຍຊິໂຕ ຍາວຊີວໍ ປຸຎ຺ຎານິ ກຕ຺ວາ ຕໂຕ ຈຸໂຕ ເທໂວ ຫຸຕ຺ວາ ນິພ຺ພຕ຺ຕິ. ໂສ ຕຕ຺ຖ ເທວໂລເກ ເທວຣຊ຺ຊໍ ກໂຣນ຺ໂຕ ຍາວຕາຍຸກໍ ຐຕ຺ວາ ຕໂຕ ຈຸໂຕ ມນຸສ຺ສໂລເກ ຠິນ຺ນໍ ຣຏ຺ຐໍ ສນ຺ຘາເຣຕຸໍ ສມຕ຺ຖສ຺ສ ກຸລສ຺ສ ເອກປຸຕ຺ໂຕ ຫຸຕ຺ວາ ນິພ຺ພຕ຺ຕິ. ເຕນ ຈ ສມເຍນ ປທຸມຸຕ຺ຕໂຣ ນາມ ຠຄວາ ໂລເກ ອຸປ຺ປຊ຺ຊິຕ຺ວາ ປວຕ຺ຕິຕວຣຘມ຺ມຈກ຺ໂກ ເວເນຍ຺ຍສຕ຺ຕໍ ນິພ຺ພານມຫານຄຣສງ຺ຂາຕເຂມນ຺ຕຠູມິໍ ສມ຺ປາເປສິ. ອຖ ໂສ ກຸລປຸຕ຺ໂຕ ອນຸກ຺ກເມນ ວິຎ຺ຎຸຕໍ ປຕ຺ໂຕ ເອກທິວສໍ ອຸປາສເກຫິ ສທ຺ຘິໍ ວິຫາຣໍ ຄໂຕ ສຕ຺ຖາຣໍ ຘມ຺ມໍ ເທເສນ຺ຕໍ ທິສ຺ວາ ປສນ຺ນຈິຕ຺ໂຕ ປຣິສປຣິຍນ຺ເຕ ນິສີທິ.

ເຕນ ຈ ສມເຍນ ສຕ຺ຖາ ເອກໍ ຠິກ຺ຂຸໍ ສທ຺ຘາປພ຺ພຊິຕານໍ ອຄ຺ຄຏ຺ຐາເນ ຐເປສິ, ຕໍ ທິສ຺ວາ ປສນ຺ນມານໂສ ຕທຕ຺ຖາຍ ຈິຕ຺ຕໍ ຐເປຕ຺ວາ ສຕສຫສ຺ສຠິກ຺ຂຸປຣິວາຣສ຺ສ ຠຄວໂຕ ມຫຕາ ສກ຺ກາເຣນ ສຕ຺ຕາຫໍ ມຫາທານໍ ປວຕ຺ເຕຕ຺ວາ ປຓິຘານໍ ອກາສິ. ສຕ຺ຖາ ຕສ຺ສ ອນນ຺ຕຣາເຍນ ອິຊ຺ຌນຠາວໍ ທິສ຺ວາ ‘‘ອນາຄເຕ ໂຄຕມສ຺ສ ນາມ ສມ຺ມາສມ຺ພຸທ຺ຘສ຺ສ ສາສເນ ສທ຺ຘາປພ຺ພຊິຕານໍ ອຄ຺ໂຄ ຠວິສ຺ສຕີ’’ຕິ ພ຺ຍາກາສິ. ໂສ ສຕ຺ຖາຣໍ ຠິກ຺ຂຸສງ຺ຆຎ຺ຈ ວນ຺ທິຕ຺ວາ ອຸຏ຺ຐາຍາສນາ ປກ຺ກາມິ. ໂສ ຕຕ຺ຖ ຍາວຕາຍຸກໍ ປຸຎ຺ຎານິ ກຕ຺ວາ ຕໂຕ ຈວິຕ຺ວາ ເທວມນຸສ຺ເສສຸ ສໍສຣນ຺ໂຕ ອິໂຕ ທ຺ວານວຸຕິກປ຺ເປ ຜຸສ຺ສສ຺ສ ຠຄວໂຕ ກາເລ ສຕ຺ຖຸ ເວມາຕິກຠາຕິເກສຸ ຕີສຸ ຣາຊປຸຕ຺ເຕສຸ ສຕ຺ຖາຣໍ ອຸປຏ຺ຐຫນ຺ເຕສຸ ເຕສໍ ປຸຎ຺ຎກິຣິຍາຍ ສຫາຍກິຈ຺ຈໍ ອກາສິ. ເອວໍ ຕຕ຺ຖ ຕຕ຺ຖ ຠເວ ຕໍ ຕໍ ພຫຸໍ ກຸສລໍ ອຸປຈິນິຕ຺ວາ ສຸຄຕີສຸເຍວ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ກຸຣຸຣຏ຺ເຐ ຖຸລ຺ລໂກຏ຺ຐິກນິຄເມ ຣຏ຺ຐປາລເສຏ຺ຐິເຄເຫ ນິພ຺ພຕ຺ຕິ, ຕສ຺ສ ຠິນ຺ນໍ ຣຏ຺ຐໍ ສນ຺ຘາເຣຕຸໍ ສມຕ຺ເຖ ກຸເລ ນິພ຺ພຕ຺ຕຕ຺ຕາ ຣຏ຺ຐປາໂລຕິ ວໍສານຸຄຕເມວ ນາມໍ ອໂຫສິ. ໂສ ມຫຕາ ປຣິວາເຣນ ວຑ຺ຒນ຺ໂຕ ອນຸກ຺ກເມນ ໂຍພ຺ພນໍ ປຕ຺ໂຕ ມາຕາປິຕູຫິ ປຕິຣູເປນ ທາເຣນ ສໍໂຍເຊຕ຺ວາ ມຫນ຺ເຕ ຈ ຍເສ ປຕິຏ຺ຐາປິໂຕ ທິພ຺ພສມ຺ປຕ຺ຕິສທິສໍ ສມ຺ປຕ຺ຕິໍ ປຈ຺ຈນຸໂຠຕິ. ອຖ ຠຄວາ ກຸຣຸຣຏ຺ເຐ ຊນປທຈາຣິກໍ ຈຣນ຺ໂຕ ຖຸລ຺ລໂກຏ຺ຐິກໍ ອນຸປາປຸຓິ. ຕໍ ສຸຕ຺ວາ ຣຏ຺ຐປາໂລ ກຸລປຸຕ຺ໂຕ ສຕ຺ຖາຣໍ ອຸປສງ຺ກມິຕ຺ວາ ສຕ຺ຖຸ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ສຕ຺ຕວາເຣ ຠຕ຺ຕຈ຺ເຉເທ ກຕ຺ວາ ກິຈ຺ເຉນ ກສິເຣນ ມາຕາປິຕໂຣ ອນຸຊານາເປຕ຺ວາ ສຕ຺ຖາຣໍ ອຸປສງ຺ກມິຕ຺ວາ ປພ຺ພຊ຺ຊໍ ຍາຈິຕ຺ວາ ສຕ຺ຖຸ ອາຓຕ຺ຕິຍາ ອຎ຺ຎຕຣສ຺ສ ເຖຣສ຺ສ ສນ຺ຕິເກ ປພ຺ພຊິຕ຺ວາ ໂຍນິໂສມນສິກາເຣນ ກມ຺ມໍ ກໂຣນ຺ໂຕ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ.

໑໗໙-໑໘໐. ອຖາຍສ຺ມາ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕ຺ຕຣສ຺ສ ຠຄວໂຕຕິອາທິມາຫ. ສຸນາໂຄ ໂສ ມຍາ ທິນ຺ໂນຕິ ຕທາ ມຫາຘນເສຏ຺ຐິ ຫຸຕ຺ວາ ສພ຺ພໍ ສາປເຕຍ຺ຍໍ ທານມຸເຂ ວິສ຺ສຊ຺ຊນສມເຍ ສຕ຺ຕປ຺ປຕິຏ຺ໂຐ ສຸນ຺ທໂຣ ນາໂຄ ຫຕ຺ຖິຣາຊາ ມຍາ ທິນ຺ໂນ ອໂຫສິ. ຕໍ ທສ຺ເສນ຺ໂຕ ອີສາທນ຺ໂຕຕິອາທິມາຫ. ອີສາທນ຺ໂຕ ຣຖອີສປ຺ປມາຓທນ຺ໂຕ, ໂສ ມຍາ ທິນ຺ໂນ ຫຕ຺ຖິນາໂຄ. ອຸຣູຬ຺ຫວາຕິ ຣາຊາວຫນໂຍຄ຺ຄສມຕ຺ໂຖ, ຣາຊາຣໂຫ ວາ. ເສຕຈ຺ຉຕ຺ໂຕຕິ ອລງ຺ກາຣຕ຺ຖາຍ ອຸປຏ຺ຐຫນເສຕຈ຺ຉຕ຺ຕສຫິໂຕຕິ ອຕ຺ໂຖ. ປໂສຠິໂຕຕິ ອາໂຣຫປຣິຓາຫວາ ຣູປໂສຠາຫິ ສມ຺ປນ຺ໂນຕິ ອຕ຺ໂຖ. ສກປ຺ປໂນ ສຫຕ຺ຖິໂປຕິ ຫຕ຺ຖິອລງ຺ກາຣສຫິໂຕ ຫຕ຺ຖິໂຄປກສຫິໂຕຕິ ອຕ຺ໂຖ. ອິຕ຺ຖມ຺ຠູໂຕ ຫຕ຺ຖິນາໂຄ ປທຸມຸຕ຺ຕຣສ຺ສ ຠຄວໂຕ ມຍາ ທິນ຺ໂນຕິ ອຕ຺ໂຖ.

໑໘໑. ມຍາ ຠຕ຺ຕໍ ກາເຣຕ຺ວານາຕິ ມຍາ ກາຣາປິຕວິຫາເຣ ວສນ຺ຕານໍ ໂກຏິສງ຺ຂານໍ ຠິກ຺ຂູນໍ ນິຈ຺ຈຠຕ຺ຕໍ ປຏ຺ຐເປຕ຺ວາ ມເຫສິໂນ ນິຍ຺ຍາເທສິນ຺ຕິ ສມ຺ພນ຺ໂຘ.

໑໘໓. ຊລຊຸຕ຺ຕມນາມໂກຕິ ຊລໂຕ ຊາໂຕ ຊລໂຊ, ກິໍ ຕໍ? ປທຸມໍ, ປທຸເມນ ສມານນາມຕ຺ຕາ ອຸຕ຺ຕມຕ຺ຕາ ຈ ປທຸມຸຕ຺ຕໂຣ ນາມ ຠຄວາຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ຣຏ຺ຐປາລຕ຺ເຖຣອປທານວຓ຺ຓນາ ສມຕ຺ຕາ.

ຉປ຺ປຎ຺ຎາສມມຫາວຄ຺ຄວຓ຺ຓນາ ສມຕ຺ຕາ.

ອິຕິ ວິສຸທ຺ຘຊນວິລາສິນິຍາ ອປທານ-ອຏ຺ຐກຖາຍ

ເອຕ຺ຕາວຕາ ພຸທ຺ຘປຈ຺ເຈກພຸທ຺ຘສາວກຕ຺ເຖຣາປທານ-ອຏ຺ຐກຖາ ສມຕ຺ຕາ.

ນິຄມນກຖາ

ສີຫຬທີປເກ ອປ຺ປິຈ຺ຉຕາທິຄຸຓວນ຺ຕານໍ ເຖຣວໍສປ຺ປທີປານໍ ອານນ຺ທຕ຺ເຖຣາທີນໍ ສພ຺ພສຕ຺ຕານໍ ຕຓ຺ຫາມານທິຏ຺ຐາທໂຍ ເຉທນນິຄ຺ຄຫວິເວຈນາທ຺ຍຕ຺ຖໍ ສຕ຺ຕຫິ ມາເສຫິ ອຕິວິຍ ອາຣາຘເນນ ລທ຺ຘໂກສລ຺ເລນ ໂພຘິສມ຺ຠາຣໍ ຄເວສນ຺ເຕນ ສຕິຘິຕິຄຕິວີຣິຍປຣກ຺ກມນ຺ເຕນ ມຫາສມນ຺ຕຄຸຓໂສຠເນນ ຕິປິຏກຘເຣນ ປຓ຺ຑິເຕນ ອາຠຕໍ ອິມໍ ອປທານ-ອຏ຺ຐກຖໍ ສພ຺ໂພ ສເທວໂລໂກ ຊານາຕູຕິ.

ອເນນ ໂລຠາທິມລາ ປຊານໍ, ຈກ຺ຂາທິໂຣຄາ ວິວິຘາ ຈ ທຸກ຺ຂາ;

ກລຫາທິຠຍາ ທຸກ຺ຂິຕາ ຊາຕາ, ໂຈຣາທໂຍນຕ຺ຖກຣາ ຈ ໂລເກ.

ນສ຺ສນ຺ຕຸ ເມ ປຎ຺ຈ ເວຣາ ຈ ປາປາ, ນສ຺ສນ຺ຕຸ ຄິມ຺ເຫ ຍຖາ ວຸຏ຺ຐິວາຕາ;

ອຏ຺ຐງ຺ຄິກມຄ຺ຄວເຣນ ປຕ຺ວາ, ນິພ຺ພານປຸຣໍ ປຏິປາທຍາມິ.

ສພ຺ພທິຏ຺ຐິຎ຺ຈ ມທ຺ທນ຺ໂຕ, ຣາຄໂທສາທິປາປເກ;

ສໍສາຣວຏ຺ຏໍ ຉິນ຺ທິຕ຺ວາ, ອຸເປມິ ສຄ຺ຄໂມກ຺ຂເກ.

ອາຓາເຂຕ຺ຕມ຺ຫິ ສພ຺ພຕ຺ຖ, ອວີຈິມ຺ຫິ ຠວຄ຺ຄໂຕ;

ສພ຺ເພ ຘມ຺ມານຸຍາຍນ຺ຕຸ, ຕໂຍ ໂລກາ ອຸຕຸປິ ຈາຕິ.

ອປທານ-ອຏ຺ຐກຖາ ສມຕ຺ຕາ.