໑໐. ອຸປວານຕ຺ເຖຣອປທານວຓ຺ຓນາ

ທສມາປທາເນ ປທຸມຸຕ຺ຕໂຣ ນາມ ຊິໂນຕິອາທິກໍ ອາຍສ຺ມໂຕ ອຸປວານຕ຺ເຖຣສ຺ສ ອປທານໍ. ອຍໍ ກິຣ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ເກນຈິ ກມ຺ມຈ຺ຉິທ຺ເທນ ປທຸມຸຕ຺ຕຣສ຺ສ ຠຄວໂຕ ກາເລ ທລ຺ລິທ຺ທກຸເລ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ຠຄວຕິ ປຣິນິພ຺ພຸເຕ ຕສ຺ສ ຘາຕຸໍ ຄເຫຕ຺ວາ ມນຸສ຺ສເທວນາຄຄຣຸຬຍກ຺ຂກຸມ຺ຠຓ຺ຑຄນ຺ຘພ຺ເພຫິ ສຕ຺ຕຣຕນມເຍ ສຕ຺ຕໂຍຊນິເກ ຖູເປ ກເຕ ຕຕ຺ຖ ສຸໂຘຕໍ ອຕ຺ຕໂນ ອຸຕ຺ຕຣາສງ຺ຄໍ ເວຬຄ຺ເຄ ອາພນ຺ຘິຕ຺ວາ ຘຊໍ ກຕ຺ວາ ປູຊໍ ອກາສິ. ຕໍ ຄເຫຕ຺ວາ ອຠິສມ຺ມຕໂກ ນາມ ຍກ຺ຂເສນາປຕິ ເທເວຫິ ເຈຕິຍປູຊາຣກ຺ຂຓຕ຺ຖໍ ຐປິໂຕ ອທິສ຺ສມານກາໂຍ ອາກາເສ ຘາເຣນ຺ໂຕ ເຈຕິຍໍ ຕິກ຺ຂຕ຺ຕຸໍ ປທກ຺ຂິຓໍ ອກາສິ. ຕໍ ທິສ຺ວາ ຠິຍ຺ໂຍໂສມຕ຺ຕາຍ ປສນ຺ນມານໂສ ອໂຫສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ອຸປວາໂນຕິ ລທ຺ຘນາໂມ ວຍປ຺ປຕ຺ໂຕ ເຊຕວນປຏິຄ຺ຄຫເຓ ພຸທ຺ຘານຸຠາວໍ ທິສ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ວິປສ຺ສນາຍ ກມ຺ມໍ ກໂຣນ຺ໂຕ ຉຬຠິຎ຺ໂຎ ອໂຫສິ. ອຖາຍສ຺ມາ ອຸປວາໂນ ຠຄວໂຕ ອຸປຏ຺ຐາໂກ ອໂຫສິ. ເຕນ ຈ ສມເຍນ ຠຄວໂຕ ວາຕາພາໂຘ ອຸປ຺ປຊ຺ຊິ. ເຖຣສ຺ສ ຄິຫິສຫາໂຍ ເທວຫິໂຕ ນາມ ພ຺ຣາຫ຺ມໂຓ ສາວຕ຺ຖິຍໍ ປຏິວສຕິ. ໂສ ເຖຣໍ ຈຕູຫິ ປຈ຺ຈເຍຫິ ປວາເຣສິ. ອຖາຍສ຺ມາ ອຸປວາໂນ ນິວາເສຕ຺ວາ ປຕ຺ຕຈີວຣໍ ຄເຫຕ຺ວາ ຕສ຺ສ ພ຺ຣາຫ຺ມຓສ຺ສ ນິເວສນໍ ອຸປຄຎ຺ຉິ. ພ຺ຣາຫ຺ມໂຓ ‘‘ເກນຈິ ມຎ຺ເຎ ປໂຍຊເນນ ເຖໂຣ ອາຄໂຕ ຠວິສ຺ສຕີ’’ຕິ ຎຕ຺ວາ ‘‘ວເທຍ຺ຍາຖ, ຠນ຺ເຕ, ເກນຕ຺ໂຖ’’ຕິ ອາຫ. ເຖໂຣ ຕສ຺ສ ພ຺ຣາຫ຺ມຓສ຺ສ ປໂຍຊນໍ ອາຈິກ຺ຂນ຺ໂຕ –

‘‘ອຣຫໍ ສຸຄໂຕ ໂລເກ, ວາເຕຫາພາຘິໂກ ມຸນິ;

ສເຈ ອຸຓ຺ໂຫທກໍ ອຕ຺ຖິ, ມຸນິໂນ ເທຫິ ພ຺ຣາຫ຺ມຓ.

‘‘ປູຊິໂຕ ປູຊເນຍ຺ຍານໍ, ສກ຺ກເຣຍ຺ຍານ ສກ຺ກໂຕ;

ອປຈິໂຕປເຈຍ຺ຍານໍ, ຕສ຺ສ ອິຈ຺ຉາມິ ຫາຕເວ’’ຕິ. (ເຖຣຄາ. ໑໘໕-໑໘໖) –

ຄາຖາທ຺ວຍໍ ອຠາສິ.

ຕສ຺ສຕ຺ໂຖ – ໂຍ ອິມສ຺ມິໍ ໂລເກ ປູຊເນຍ຺ຍານໍ ປູເຊຕພ຺ເພຫິ ສກ຺ກາທີຫິ ເທເວຫິ ມຫາພ຺ຣຫ຺ມາທີຫິ ຈ ພ຺ຣຫ຺ເມຫິ ປູຊິໂຕ, ສກ຺ກເຣຍ຺ຍານໍ ສກ຺ກາຕພ຺ເພຫິ ພິມ຺ພິສາຣໂກສລຣາຊາທີຫິ ສກ຺ກໂຕ, ອປເຈຍ຺ຍານໍ ອປຈາຍິຕພ຺ເພຫິ ມເຫສີຫິ ຂີຓາສເວຫິ ອປຈິໂຕ, ກິເລເສຫິ ອາຣກຕ຺ຕາທິນາ ອຣຫໍ, ໂສຠນຄມນາທິນາ ສຸຄໂຕ ສພ຺ພຎ຺ຎູ ມຸນິ ມຍ຺ຫໍ ສຕ຺ຖາ ເທວເທໂວ ສກ຺ການໍ ອຕິສກ຺ໂກ ພ຺ຣຫ຺ມານໍ ອຕິພ຺ຣຫ຺ມາ, ໂສ ທານິ ວາເຕຫິ ວາຕເຫຕຸ ວາຕກ຺ໂຂຠນິມິຕ຺ຕໍ ອາພາຘິໂກ ຊາໂຕ. ສເຈ, ພ຺ຣາຫ຺ມຓ, ອຸຓ຺ໂຫທກໍ ອຕ຺ຖິ, ຕສ຺ສ ວາຕາພາຘວູປສມນຕ຺ຖໍ ຕໍ ຫາຕເວ ອຸປເນຕຸໍ ອິຈ຺ຉາມີຕິ.

ຕໍ ສຸຕ຺ວາ ພ຺ຣາຫ຺ມໂຓ ອຸຓ຺ໂຫທກໍ ຕທນຸຣູປໍ ວາຕຫຣຎ຺ຈ ເຠສຊ຺ຊໍ ຠຄວໂຕ ອຸປນາເມສິ. ເຕນ ຈ ສຕ຺ຖຸ ໂຣໂຄ ວູປສມິ. ຕສ຺ສ ຠຄວາ ອນຸໂມທນໍ ອກາສິ.

໑໒໒. ອຖາຍສ຺ມາ ອຸປວາໂນ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕ຺ຕໂຣ ນາມ ຊິໂນຕິອາທິມາຫ. ຕຕ຺ຖ ປທຸມຸຕ຺ຕໂຣຕິອາທີນິ ປຸພ຺ເພ ວຸຕ຺ຕຕ຺ຖາເນວ.

໑໒໓. ມຫາຊນາ ສມາຄມ຺ມາຕິ ສກລຊມ຺ພຸທີປວາສິໂນ ຣາສິຠູຕາຕິ ອຕ຺ໂຖ. ຈິຕກໍ ກຕ຺ວາຕິ ໂຍຊນຸພ຺ເພຘໍ ຈນ຺ທນຣາສິຈິຕກໍ ກຕ຺ວາ ຠຄວໂຕ ສຣີຣໍ ຕຕ຺ຖ ອຠິໂຣປຍິໍສູຕິ ສມ຺ພນ຺ໂຘ.

໑໒໔. ສຣີຣກິຈ຺ຈໍ ກຕ຺ວານາຕິ ອາທຫນາຕິ ອຄ຺ຄິນາ ທຫນກິຈ຺ຈໍ ກຕ຺ວາຕິ ອຕ຺ໂຖ.

໑໒໗-໒໘. ຊງ຺ຆາ ມຓິມຍາ ອາສີຕິ ມນຸສ຺ເສຫິ ກຕຖູເປ ຊງ຺ຆາ ປຸປ຺ຜວາຫຕ຺ຖໍ ຈຣິຕຏ຺ຐານໍ ມຓິມຍາ ອິນ຺ທນີລມຓິນາ ກຕາຕິ ອຕ຺ໂຖ. ມຍມ຺ປີຕິ ສພ຺ເພ ເທວາ ຖູປໍ ກຣິສ຺ສາມາຕິ ອຕ຺ໂຖ.

໑໒໙. ຘາຕຸ ອາເວຓິກາ ນຕ຺ຖີຕິ ເທວມນຸສ຺ເສຫິ ວິສຸໍ ວິສຸໍ ເຈຕິຍໍ ກາຕຸໍ ອາເວຓິກາ ວິສຸໍ ຘາຕຸ ນຕ຺ຖິ, ຕໍ ທສ຺ເສນ຺ໂຕ ສຣີຣໍ ເອກປິຓ຺ຑິຕນ຺ຕິ ອາຫ. ອຘິຏ຺ຐານພເລນ ສກລສຣີຣຘາຕຸ ເອກຆນສິລາມຍປຏິມາ ວິຍ ເອກເມວ ອໂຫສີຕິ ອຕ຺ໂຖ. ອິມມ຺ຫິ ພຸທ຺ຘຖູປມ຺ຫີຕິ ສກລຊມ຺ພຸທີປວາສີຫິ ກຕມ຺ຫິ ອິມມ຺ຫິ ສຸວຓ຺ຓຖູປມ຺ຫິ ມຍໍ ສພ຺ເພ ສມາຄນ຺ຕ຺ວາ ກຎ຺ຈຸກຖູປໍ ກຣິສ຺ສາມາຕິ ອຕ຺ໂຖ.

໑໓໓. ອິນ຺ທນີລໍ ມຫານີລນ຺ຕິ ອິນ຺ທີວຣປຸປ຺ຜວຓ຺ຓາຠໍ ມຓິ ອິນ຺ທນີລມຓິ. ຕໂຕ ອຘິກວຓ຺ຓຕາ ມຫາມຓິ ອິນ຺ທນີລມຓໂຍ ຈ ມຫານີລມຓໂຍ ຈ ໂຊຕິຣສມຓິຊາຕິຣງ຺ຄມຓໂຍ ຈ ເອກໂຕ ສນ຺ນິປາເຕຕ຺ວາ ຣາສີ ກຕ຺ວາ ສຸວຓ຺ຓຖູເປ ກຎ຺ຈຸກຖູປໍ ກຕ຺ວາ ອຉາທຍຸນ຺ຕິ ສມ຺ພນ຺ໂຘ.

໑໔໔. ປຈ຺ເຈກໍ ພຸທ຺ຘເສຏ຺ຐສ຺ສາຕິ ພຸທ຺ຘຸຕ຺ຕມສ຺ສ ປຕິ ເອກໍ ວິສຸໍ ອຸປຣິຉທເນນ ຖູປໍ ອກໍສູຕິ ອຕ຺ໂຖ.

໑໔໗. ກຸມ຺ຠຓ຺ຑາ ຄຸຍ຺ຫກາ ຕຖາຕິ ກຸມ຺ຠມຕ຺ຕານິ ອຓ຺ຑານິ ເຍສໍ ເທວານໍ ເຕ ກຸມ຺ຠຓ຺ຑາ, ປຏິຈ຺ຉາເທຕ຺ວາ ນິຄຸຫິຕ຺ວາ ປຏິຈ຺ຉາທນໂຕ ຄຣຸຬາ ຄຸຍ຺ຫກາ ນາມ ຊາຕາ, ເຕ ກຸມ຺ຠຓ຺ຑາ ຄຸຍ຺ຫກາປິ ຖູປໍ ອກໍສູຕິ ອຕ຺ໂຖ.

໑໕໑. ອຕິໂຠນ຺ຕິ ນ ຕສ຺ສາຠາຕິ ຕສ຺ສ ເຈຕິຍສ຺ສ ປຠໍ ຈນ຺ທສູຣິຍຕາຣການໍ ປຠາ ນ ອຕິໂຠນ຺ຕິ, ນ ອຊ຺ໂຌຕ຺ຖຣນ຺ຕີຕິ ອຕ຺ໂຖ.

໑໕໘. ອຫມ຺ປິ ກາຣໍ ກສ຺ສາມີຕິ ຕາທິໂນ ໂລກນາຖສ຺ສ ຖູປສ຺ມິໍ ອຫມ຺ປິ ກາຣໍ ປຸຎ຺ຎກິຣິຍໍ ກຸສລກມ຺ມໍ ຘຊປຏາກປູຊໍ ກຣິສ຺ສາມີຕິ ອຕ຺ໂຖ.

ອຸປວານຕ຺ເຖຣອປທານວຓ຺ຓນາ ສມຕ຺ຕາ.