໙. ວນວຈ຺ຉຕ຺ເຖຣອປທານວຓ຺ຓນາ

ນວມາປທາເນ ອິມມ຺ຫິ ຠທ຺ທເກ ກປ຺ເປຕິອາທິກໍ ອາຍສ຺ມໂຕ ວນວຈ຺ຉຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ກສ຺ສປສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສຕ຺ຖຸ ຘມ຺ມເທສນໍ ສຸຕ຺ວາ ສທ຺ຘາຊາໂຕ ປພ຺ພຊິຕ຺ວາ ປຣິສຸທ຺ຘໍ ພ຺ຣຫ຺ມຈຣິຍໍ ຈຣິຕ຺ວາ ຕໂຕ ຈຸໂຕ ເທວໂລເກ ນິພ຺ພຕ຺ໂຕ, ຕໂຕ ຈຸໂຕ ອຣຎ຺ຎາຍຕເນ ຠິກ຺ຂູນໍ ສມີເປ ກໂປຕໂຍນິຍໍ ນິພ຺ພຕ຺ໂຕ. ເຕສຸ ເມຕ຺ຕຈິຕ຺ໂຕ ຘມ຺ມໍ ສຸຕ຺ວາ ຕໂຕ ຈຸໂຕ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ກປິລວຕ຺ຖຸສ຺ມິໍ ພ຺ຣາຫ຺ມຓກຸເລ ນິພ຺ພຕ຺ຕິ. ຕສ຺ສ ມາຕຸກຸຈ຺ຉິຄຕກາເລເຍວ ມາຕຸ ໂທຫໂຬ ອຸທປາທິ ວເນ ວສິຕຸໍ ວເນ ວິຊາຍິຕຸໍ. ຕໂຕ ອິຈ຺ຉານຸຣູປວເສນ ວເນ ວສນ຺ຕິຍາ ຄພ຺ຠວຸຏ຺ຐານໍ ອໂຫສິ. ຄພ຺ຠໂຕ ນິກ຺ຂນ຺ຕຎ຺ຈ ນໍ ກາສາວຂຓ຺ເຑນ ປຏິຄ຺ຄເຫສຸໍ. ຕທາ ໂພຘິສຕ຺ຕສ຺ສ ອຸປ຺ປນ຺ນກາໂລ, ຣາຊາ ຕໍ ກຸມາຣໍ ອາຫຣາເປຕ຺ວາ ສເຫວ ໂປເສສິ. ອຖ ໂພຘິສຕ຺ໂຕ ມຫາຠິນິກ຺ຂມນໍ ນິກ຺ຂມິຕ຺ວາ ປພ຺ພຊິຕ຺ວາ ຉພ຺ພສານິ ທຸກ຺ກຣກາຣິກໍ ກຕ຺ວາ ພຸທ຺ເຘ ຊາເຕ ໂສ ມຫາກສ຺ສປສ຺ສ ສນ຺ຕິກໍ ຄນ຺ຕ຺ວາ ຕສ຺ໂສວາເທ ປສນ຺ໂນ ຕສ຺ສ ສນ຺ຕິກາ ພຸທ຺ຘຸປ຺ປາທຠາວໍ ສຸຕ຺ວາ ສຕ຺ຖຸ ສນ຺ຕິກໍ ຄນ຺ຕ຺ວາ ຘມ຺ມໍ ສຸຕ຺ວາ ປພ຺ພຊິຕ຺ວາ ນຈິຣສ຺ເສວ ຉຬຠິຎ຺ໂຎ ອຣຫາ ອໂຫສິ.

໒໕໑. ໂສ ອຣຫຕ຺ຕໍ ປຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອິມມ຺ຫິ ຠທ຺ທເກ ກປ຺ເປຕິອາທິມາຫ. ຕຕ຺ຖ ພ຺ຣຫ຺ມພນ຺ຘຸ ມຫາຍໂສຕິ ເອຕ຺ຖ ພ຺ຣາຫ຺ມຓານໍ ພນ຺ຘຸ ຎາຕໂກຕິ ພ຺ຣາຫ຺ມຓພນ຺ຘູຕິ ວຕ຺ຕພ຺ເພ ຄາຖາພນ຺ຘສຸຂຕ຺ຖໍ ‘‘ພ຺ຣຫ຺ມພນ຺ຘູ’’ຕິ ວຸຕ຺ຕນ຺ຕິ ເວທິຕພ຺ພໍ. ໂລກຕ຺ຕຍພ຺ຍາປກຍສຕ຺ຕາ ມຫາຍໂສ. ເສສໍ ສພ຺ພໍ ສຸວິຎ຺ເຎຍ຺ຍເມວາຕິ.

ວນວຈ຺ຉຕ຺ເຖຣອປທານວຓ຺ຓນາ ສມຕ຺ຕາ.