໑໐. ຈູຬສຸຄນ຺ຘຕ຺ເຖຣອປທານວຓ຺ຓນາ

ທສມາປທາເນ ອິມມ຺ຫິ ຠທ຺ທເກ ກປ຺ເປຕິອາທິກໍ ອາຍສ຺ມໂຕ ສຸຄນ຺ຘຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ກສ຺ສປສມ຺ມາສມ຺ພຸທ຺ຘກາເລ ພາຣາຓສິຍໍ ວິຠວສມ຺ປນ຺ເນ ກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສຕ຺ຖຸ ສນ຺ຕິເກ ຘມ຺ມໍ ສຸຕ຺ວາ ສພ຺ພທາ ນມສ຺ສມາໂນ ມຫາທານໍ ທທມາໂນ ມາສສ຺ສ ສຕ຺ຕກ຺ຂຕ຺ຕຸໍ ຠຄວໂຕ ຄນ຺ຘກຸຏິຍາ ຈຕຸຊ຺ຊາຕິຄນ຺ເຘນ ວິລິມ຺ເປສິ. ‘‘ມມ ນິພ຺ພຕ຺ຕນິພ຺ພຕ຺ຕຏ຺ຐາເນ ສຣີຣໂຕ ສຸຄນ຺ຘຄນ຺ໂຘ ນິພ຺ພຕ຺ຕຕູ’’ຕິ ປຕ຺ຖນໍ ອກາສິ. ຠຄວາ ຕໍ ພ຺ຍາກາສິ. ໂສ ຍາວຕາຍຸກໍ ຐຕ຺ວາ ປຸຎ຺ຎານິ ກໂຣນ຺ໂຕ ຕໂຕ ຈຸໂຕ ເທວໂລເກ ນິພ຺ພຕ຺ໂຕ ກາມາວຈຣໂລກໍ ສຣີຣຄນ຺ເຘນ ສຸຄນ຺ຘໍ ກຸຣຸມາໂນ ສຸຄນ຺ຘເທວປຸຕ຺ໂຕຕິ ປາກໂຏ ອໂຫສິ. ໂສ ເທວໂລກສມ຺ປຕ຺ຕິໂຍ ອນຸຠວິຕ຺ວາ ຕໂຕ ຈຸໂຕ ອິມສ຺ມິໍ ພຸທ຺ຘຸປ຺ປາເທ ມຫາໂຠຄກຸເລ ນິພ຺ພຕ຺ຕິ, ຕສ຺ສ ມາຕຸກຸຈ຺ຉິຄຕສ຺ເສວ ມາຕຸຍາ ສຣີຣຄນ຺ເຘນ ສກລເຄຫໍ ສກລນຄຣຎ຺ຈ ສຸຄນ຺ເຘນ ເອກຄນ຺ຘໍ ອໂຫສິ, ຊາຕກ຺ຂເຓ ສກລໍ ສາວຕ຺ຖິນຄຣໍ ສຸຄນ຺ຘກຣຓ຺ຑໂກ ວິຍ ອໂຫສິ, ເຕນສ຺ສ ສຸຄນ຺ໂຘຕິ ນາມໍ ກຣິໍສຸ. ໂສ ວຸທ຺ຘິໍ ອຄມາສິ. ຕທາ ສຕ຺ຖາ ສາວຕ຺ຖິຍໍ ປຕ຺ວາ ເຊຕວນມຫາວິຫາຣໍ ປຏິຄ຺ຄເຫສິ, ຕໍ ທິສ຺ວາ ປສນ຺ນມານໂສ ຠຄວໂຕ ສນ຺ຕິເກ ປພ຺ພຊິຕ຺ວາ ນຈິຣສ຺ເສວ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິ. ຕສ຺ສ ອຸປ຺ປນ຺ນທິວສໂຕ ປຏ຺ຐາຍ ຍາວ ປຣິນິພ຺ພານາ ເອຕ຺ຖນ຺ຕເຣ ນິປນ຺ນຏ຺ຐານາທີສຸ ສຸຄນ຺ຘເມວ ວາຍິ. ເທວາປິ ທິພ຺ພຈຸຓ຺ຓທິພ຺ພຄນ຺ຘປຸປ຺ຜານິ ໂອກິຣນ຺ຕິ.

໒໗໒. ໂສປິ ເຖໂຣ ອຣຫຕ຺ຕໍ ປຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອິມມ຺ຫິ ຠທ຺ທເກ ກປ຺ເປຕິອາທິມາຫ. ຕໍ ສພ຺ພໍ ເຫຏ຺ຐາ ວຸຕ຺ຕນຍຕ຺ຕາ ອຸຕ຺ຕານຕ຺ຖຕ຺ຕາ ຈ ສຸວິຎ຺ເຎຍ຺ຍເມວ, ເກວລໍ ປຸຎ຺ຎນານຕ຺ຕໍ ນາມນານຕ຺ຕຎ຺ຈ ວິເສໂສ.

ຈູຬສຸຄນ຺ຘຕ຺ເຖຣອປທານວຓ຺ຓນາ ສມຕ຺ຕາ.

ປຎ຺ຈປຎ຺ຎາສມວຄ຺ຄວຓ຺ຓນາ ສມຕ຺ຕາ.