໙. ຘມ຺ມຈກ຺ກິກຕ຺ເຖຣອປທານວຓ຺ຓນາ

ສິທ຺ຘຕ຺ຖສ຺ສ ຠຄວໂຕຕິອາທິກໍ ອາຍສ຺ມໂຕ ຘມ຺ມຈກ຺ກິກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິທ຺ຘຕ຺ຖສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ປຸຕ຺ຕທາເຣຫິ ວຑ຺ຒິໂຕ ວິຠວສມ຺ປນ຺ໂນ ມຫາໂຠໂຄ, ໂສ ຣຕນຕ຺ຕເຍ ປສນ຺ໂນ ສທ຺ຘາຊາໂຕ ຘມ຺ມສຠາຍໍ ຘມ຺ມາສນສ຺ສ ປິຏ຺ຐິໂຕ ຣຕນມຍໍ ຘມ຺ມຈກ຺ກໍ ກາເຣຕ຺ວາ ປູເຊສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ນິພ຺ພຕ຺ຕຏ຺ຐາເນສຸ ສກ຺ກສມ຺ປຕ຺ຕິໍ ຈກ຺ກວຕ຺ຕິສມ຺ປຕ຺ຕິຎ຺ຈ ອນຸຠວິຕ຺ວາ ກເມນ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ອຸປ຺ປນ຺ໂນ ວິຠວສມ຺ປນ຺ໂນ ສຎ຺ຊາຕສທ຺ໂຘ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ນຈິຣສ຺ເສວ ອຣຫຕ຺ຕໍ ປຕ຺ວາ ປຸພ຺ເພ ກຕກຸສລນາມສທິສນາເມນ ຘມ຺ມຈກ຺ກິກຕ຺ເຖໂຣຕິ ປາກໂຏ ຊາໂຕ ອໂຫສິ.

໑໐໒. ໂສ ປຸຎ຺ຎສມ຺ຠາຣານຸຣູເປນ ປຕ຺ຕອຣຫຕ຺ຕຜໂລ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ຊາຕໂສມນສ຺ໂສ ປຸພ຺ພຈຣິຕາປທານໍ ປກາເສນ຺ໂຕ ສິທ຺ຘຕ຺ຖສ຺ສ ຠຄວໂຕຕິອາທິມາຫ. ສີຫາສນສ຺ສ ສມ຺ມຸຂາຕິ ສີຫສ຺ສ ຠຄວໂຕ ນິສິນ຺ນສ຺ສ ສມ຺ມຸຂາ ພຸທ຺ຘາສນສ຺ສ ອຠິມຸຂຏ຺ຐາເນຕິ ອຕ຺ໂຖ, ຘມ຺ມຈກ຺ກໍ ເມ ຐປິຕນ຺ຕິ ມຍາ ຘມ຺ມຈກ຺ກາກາເຣນ ອຸຠໂຕ ສີຫຣູປໍ ທສ຺ເສຕ຺ວາ ມຊ຺ເຌ ອາທາສສທິສໍ ກາເຣຕ຺ວາ ກຕໍ ຘມ຺ມຈກ຺ກໍ ຐປິຕໍ ປູຊິຕໍ. ກິໍ ຠູຕໍ? ວິຎ຺ຎູຫິ ເມຘາວີຫິ ‘‘ອຕີວ ສຸນ຺ທຣ’’ນ຺ຕິ ວຓ຺ຓິຕໍ ໂຖມິຕໍ ສຸກຕໍ ຘມ຺ມຈກ຺ກນ຺ຕິ ສມ຺ພນ຺ໂຘ.

໑໐໓. ຈາຣຸວຓ຺ໂຓວ ໂສຠາມີຕິ ສຸວຓ຺ຓວຓ຺ໂຓ ອິວ ໂສຠາມິ ວິໂຣຈາມີຕິ ອຕ຺ໂຖ. ‘‘ຈຕຸວຓ຺ເຓຫິ ໂສຠາມີ’’ຕິປິ ປາໂຐ, ຕສ຺ສ ຂຕ຺ຕິຍພ຺ຣາຫ຺ມຓເວສ຺ສສຸທ຺ທຊາຕິສງ຺ຂາເຕຫິ ຈຕູຫິ ວຓ຺ເຓຫິ ໂສຠາມິ ວິໂຣຈາມີຕິ ອຕ຺ໂຖ. ສໂຍຄ຺ຄພລວາຫໂນຕິ ສຸວຓ຺ຓສິວິກາທີຫິ ໂຍຄ຺ເຄຫິ ຈ ເສນາປຕິມຫາມຕ຺ຕາທີຫິ ເສວເກຫິ ພເລຫິ ຈ ຫຕ຺ຖິອສ຺ສຣຖສງ຺ຂາເຕຫິ ວາຫເນຫິ ຈ ສຫິໂຕຕິ ອຕ຺ໂຖ. ພຫຸຊ຺ຊນາ ພຫໂວ ມນຸສ຺ສາ ອນຸຍນ຺ຕາ ມມານຸວຕ຺ຕນ຺ຕາ ນິຈ຺ຈໍ ນິຈ຺ຈກາລໍ ປຣິວາເຣນ຺ຕີຕິ ສມ຺ພນ຺ໂຘ. ເສສໍ ສຸວິຎ຺ເຎຍ຺ຍເມວາຕິ.

ຘມ຺ມຈກ຺ກິກຕ຺ເຖຣອປທານວຓ຺ຓນາ ສມຕ຺ຕາ.