໑໐. ກປ຺ປຣຸກ຺ຂິຍຕ຺ເຖຣອປທານວຓ຺ຓນາ

ສິທ຺ຘຕ຺ຖສ຺ສ ຠຄວໂຕຕິອາທິກໍ ອາຍສ຺ມໂຕ ກປ຺ປຣຸກ຺ຂິຍຕ຺ເຖຣສ຺ສ ອປທານໍ (ເຖຣຄາ. ອຏ຺ຐ. ໒.໕໗໖). ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ເຕສຸ ເຕສຸ ຠເວສຸ ນິພ຺ພານາຘິຄມູປາຍຠູຕານິ ປຸຎ຺ຎານິ ອຸປຈິນນ຺ໂຕ ສິທ຺ຘຕ຺ຖສ຺ສ ຠຄວໂຕ ກາເລ ວິຠວສມ຺ປນ຺ເນ ເອກສ຺ມິໍ ກຸເລ ນິພ຺ພຕ຺ໂຕ ມຫທ຺ຘໂນ ມຫາໂຠໂຄ ສຕ຺ຖຣິ ປສນ຺ໂນ ສຕ຺ຕຫິ ຣຕເນຫິ ວິຈິຕ຺ຕໍ ສຸວຓ຺ຓມຍໍ ກປ຺ປຣຸກ຺ຂໍ ກາເຣຕ຺ວາ ສິທ຺ຘຕ຺ຖສ຺ສ ຠຄວໂຕ ເຈຕິຍສ຺ສ ສມ຺ມຸເຂ ຐເປຕ຺ວາ ປູເຊສິ. ໂສ ເອວຣູປໍ ປຸຎ຺ຎໍ ກຕ຺ວາ ຍາວຕາຍຸກໍ ຐຕ຺ວາ ຕໂຕ ຈຸໂຕ ສຸຄຕີສຸເຍວ ສໍສຣນ຺ໂຕ ກເມນ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຆຣາວາສໍ ສຓ຺ຐເປຕ຺ວາ ຣຕນຕ຺ຕເຍ ປສນ຺ໂນ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ສຕ຺ຖຸ ອາຣາເຘຕ຺ວາ ປພ຺ພຊິໂຕ ນຈິຣສ຺ເສວ ອຣຫຕ຺ຕໍ ປຕ຺ວາ ປຸພ຺ເພ ກຕກຸສລນາເມນ ກປ຺ປຣຸກ຺ຂິຍຕ຺ເຖໂຣຕິ ປາກໂຏ ອໂຫສິ.

໑໐໘. ໂສ ເອວໍ ປຕ຺ຕອຣຫຕ຺ຕຜໂລ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສວເສນ ປຸພ຺ພຈຣິຕາປທານໍ ປກາເສນ຺ໂຕ ສິທ຺ຘຕ຺ຖສ຺ສ ຠຄວໂຕຕິອາທິມາຫ. ຖູປເສຏ຺ຐສ຺ສ ສມ຺ມຸຂາຕິ ເສຏ຺ຐສ຺ສ ອຸຕ຺ຕມສ຺ສ ຘາຕຸນິຫິຕຖູປສ຺ສ ເຈຕິຍສ຺ສ ສມ຺ມຸຂຏ຺ຐາເນ ວິຈິຕ຺ຕທຸສ຺ເສ ອເນກວຓ຺ເຓຫິ ວິສເມນ ວິສທິເສນ ຈິຕ຺ເຕນ ມໂນຫເຣ ຈິນປຏ຺ຏໂສມາຣປຏ຺ຏາທິເກ ທຸສ຺ເສ. ລເຄຕ຺ວາ ໂອລຄ຺ເຄຕ຺ວາ ກປ຺ປຣຸກ຺ຂໍ ຐເປສິໍ ອຫໍ ປຕິຏ຺ຐເປສິນ຺ຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ກປ຺ປຣຸກ຺ຂິຍຕ຺ເຖຣອປທານວຓ຺ຓນາ ສມຕ຺ຕາ.

ຈຕຸຕ຺ຖວຄ຺ຄວຓ຺ຓນາ ສມຕ຺ຕາ.