໕. ອຸປາລິວຄ຺ໂຄ

໑. ຠາຄິເນຍ຺ຍຸປາລິຕ຺ເຖຣອປທານວຓ຺ຓນາ

ຂີຓາສວສຫສ຺ເສຫີຕິອາທິກໍ ອາຍສ຺ມໂຕ ອຸປາລິຕ຺ເຖຣສ຺ສ ຠາຄິເນຍ຺ຍຸປາລິຕ຺ເຖຣສ຺ສ ອປທານໍ. ເອໂສ ຫິ ເຖໂຣ ປຸຣິມພຸທ຺ເຘສຸ ກຕາຘິກາໂຣ ຕສ຺ມິໍ ຕສ຺ມິໍ ຠເວ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ເອກສ຺ມິໍ ກຸເລ ນິພ຺ພຕ຺ໂຕ ວຸທ຺ຘິມນ຺ວາຍ ຆຣາວາເສ ອາທີນວໍ ທິສ຺ວາ ເຄຫໍ ປຫາຍ ອິສິປພ຺ພຊ຺ຊໍ ປພ຺ພຊິຕ຺ວາ ປຎ຺ຈາຠິຎ຺ຎາອຏ຺ຐສມາປຕ຺ຕິລາຠີ ຫຸຕ຺ວາ ຫິມວນ຺ເຕ ວາສໍ ກປ຺ເປສິ. ຕສ຺ມິໍ ສມເຍ ປທຸມຸຕ຺ຕໂຣ ຠຄວາ ວິເວກກາໂມ ຫິມວນ຺ຕໍ ປາວິສິ. ຕາປໂສ ຠຄວນ຺ຕໍ ປຸຓ຺ຓຈນ຺ທມິວ ວິໂຣຈມານໍ ທູຣໂຕວ ທິສ຺ວາ ປສນ຺ນມານໂສ ອຊິນຈມ຺ມໍ ອໍເສ ກຕ຺ວາ ອຎ຺ຊລິໍ ປຄ຺ຄຍ຺ຫ ວນ຺ທິຕ຺ວາ ຐິຕໂກວ ທສນຂສໂມຘານຎ຺ຊລິໍ ສິຣສິ ປຕິຏ຺ຐເປຕ຺ວາ ອເນກາຫິ ອຸປມາຫິ ອເນເກຫິ ຖຸຕິວຈເນຫິ ຠຄວນ຺ຕໍ ໂຖເມສິ. ຕໍ ສຸຕ຺ວາ ຠຄວາ – ‘‘ອຍໍ ຕາປໂສ ອນາຄເຕ ໂຄຕມສ຺ສ ນາມ ຠຄວໂຕ ສາສເນ ປພ຺ພຊິຕ຺ວາ ວິນເຍ ຕິຂິຓປຎ຺ຎານໍ ອຄ຺ໂຄ ຠວິສ຺ສຕີ’’ຕິ ພ຺ຍາກຣຓມທາສິ. ໂສ ຍາວຕາຍຸກໍ ຐຕ຺ວາ ອປຣິຫີນຊ຺ຌາໂນ ພ຺ຣຫ຺ມໂລເກ ນິພ຺ພຕ຺ຕິ. ຕໂຕ ຈຸໂຕ ເທວມນຸສ຺ເສສຸ ສໍສຣນ຺ໂຕ ສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກປິລວຕ຺ຖຸນຄເຣ ອຸປາລິຕ຺ເຖຣສ຺ສ ຠາຄິເນຍ຺ໂຍ ຫຸຕ຺ວາ ນິພ຺ພຕ຺ຕິ. ໂສ ກເມນ ວຸທ຺ຘິປ຺ປຕ຺ໂຕ ມາຕຸລສ຺ສ ອຸປາລິຕ຺ເຖຣສ ສນ຺ຕິເກ ປພ຺ພຊິຕ຺ວາ ກມ຺ມຏ຺ຐານໍ ຄເຫຕ຺ວາ ວິປສ຺ສນໍ ວຑ຺ເຒຕ຺ວາ ນຈິຣສ຺ເສວ ອຣຫາ ອໂຫສິ. ໂສ ອຕ຺ຕໂນ ອາຈຣິຍສ຺ສ ສມີເປ ວສິຕຕ຺ຕາ ວິນຍປຎ຺ເຫ ຕິຂິຓຎາໂຓ ອໂຫສິ. ອຖ ຠຄວາ ‘‘ເອຕທຄ຺ຄໍ, ຠິກ຺ຂເວ, ມມ ສາວການໍ ຠິກ຺ຂູນໍ ວິນຍປຎ຺ເຫ ຕິຂິຓປຎ຺ຎານໍ ຠິກ຺ຂູນໍ ຍທິທໍ ຠາຄິເນຍ຺ຍຸປາລີ’’ຕິ ຕໍ ເອຕທຄ຺ຄຏ຺ຐາເນ ຐເປສິ.

໑. ໂສ ເອວໍ ເອຕທຄ຺ຄຏ຺ຐານໍ ປຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຂີຓາສວສຫສ຺ເສຫີຕິອາທິມາຫ. ຕຕ຺ຖ ອາ ສມນ຺ຕໂຕ ຍາວຠວຄ຺ຄາ ສວນ຺ຕິ ປວຕ຺ຕນ຺ຕີຕິ ອາສວາ. ກາມາສວາທໂຍ ຈຕ຺ຕາໂຣ ອາສວາ, ເຕ ຂີຓາ ໂສສິຕາ ວິໂສສິຕາ ວິທ຺ຘໍສິຕາ ເຍຫິ ເຕຕິ ຂີຓາສວາ, ເຕເຍວ ສຫສ຺ສາ ຂີຓາສວສຫສ຺ສາ, ເຕຫິ ຂີຓາສວສຫສ຺ເສຫິ. ປເຣໂຕ ປຣິວຸໂຕ ໂລກນາຍໂກ ໂລກສ຺ສ ນິພ຺ພານປາປນໂກ ວິເວກໍ ອນຸຍຸຕ຺ໂຕ ປຏິສລ຺ລິຕຸໍ ເອກີຠວິຕຸໍ ຄຈ຺ຉເຕຕິ ສມ຺ພນ຺ໂຘ.

໒. ອຊິເນນ ນິວຕ຺ໂຖຫນ຺ຕິ ອຫໍ ອຊິນມິຄຈມ຺ເມນ ປຏິຈ຺ຉນ຺ໂນ, ອຊິນຈມ຺ມວສໂນຕິ ອຕ຺ໂຖ. ຕິທຓ຺ຑປຣິຘາຣໂກຕິ ກຸຓ຺ຑິກຏ຺ຐປນຕ຺ຖາຍ ຕິທຓ຺ຑໍ ຄເຫຕ຺ວາ ຘາເຣນ຺ໂຕຕິ ອຕ຺ໂຖ. ຠິກ຺ຂຸສງ຺ເຆນ ປຣິພ຺ຍູຬ຺ຫໍ ປຣິວາຣິຕໍ ໂລກນາຍກໍ ອທ຺ທສນ຺ຕິ ສມ຺ພນ຺ໂຘ. ເສສໍ ປາກຏເມວາຕິ.

ຠາຄິເນຍ຺ຍຸປາລິຕ຺ເຖຣອປທານວຓ຺ຓນາ ສມຕ຺ຕາ.

໒. ໂສຓໂກຬິວິສຕ຺ເຖຣອປທານວຓ຺ຓນາ

ອໂນມທສ຺ສິສ຺ສ ມຸນິໂນຕິອາທິກໍ ອາຍສ຺ມໂຕ ໂກຬິວິສຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອໂນມທສ຺ສິສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຍປ຺ປຕ຺ໂຕ ປຸຕ຺ຕທາເຣຫິ ວຑ຺ຒິໂຕ ວິຠວສມ຺ປນ຺ໂນ ຠຄວໂຕ ຈງ຺ກມນຕ຺ຖາຍ ໂສຠນໍ ຈງ຺ກມໍ ກາເຣຕ຺ວາ ສຸຘາປຣິກມ຺ມໍ ກາເຣຕ຺ວາ ອາທາສຕລມິວ ສມໍ ວິຊ຺ໂຊຕມານໍ ກຕ຺ວາ ທີປຘູປປຸປ຺ຜາທີຫິ ສຊ຺ເຊຕ຺ວາ ຠຄວໂຕ ນິຍ຺ຍາເທຕ຺ວາ ພຸທ຺ຘປ຺ປມຸຂໍ ຠິກ຺ຂຸສງ຺ຆໍ ປຓີເຕນາຫາເຣນ ປູເຊສິ. ໂສ ເອວໍ ຍາວຊີວໍ ປຸຎ຺ຎານິ ກຕ຺ວາ ຕໂຕ ຈວິຕ຺ວາ ເທວໂລເກ ນິພ຺ພຕ຺ໂຕ. ຕຕ຺ຖ ປາຬິຍາ ວຸຕ຺ຕນເຍນ ທິພ຺ພສມ຺ປຕ຺ຕິໍ ອນຸຠວິຕ຺ວາ ອນ຺ຕຣາ ໂອກ຺ກາກກຸລປ຺ປສຸໂຕຕິ ຕໍ ສພ຺ພໍ ປາຬິຍາ ວຸຕ຺ຕານຸສາເຣນ ເວທິຕພ຺ພໍ. ປຈ຺ຉິມຠເວ ປນ ໂກລິຍຣາຊວໍເສ ຊາໂຕ ວຍປ຺ປຕ຺ໂຕ ໂກຏິອຄ຺ຆນກສ຺ສ ກຓ຺ຓປິຬນ຺ຘນສ຺ສ ຘາຣິຕຕ຺ຕາ ໂກຏິກຓ຺ໂຓຕິ, ກຸຏິກຓ຺ໂຓຕິ ຈ ປາກໂຏ ອໂຫສິ. ໂສ ຠຄວຕິ ປສນ຺ໂນ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ນຈິຣສ຺ເສວ ອຣຫຕ຺ຕໍ ປາປຸຓິ.

໒໕. ໂສ ອຣຫາ ຫຸຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອໂນມທສ຺ສິສ຺ສ ມຸນິໂນຕິອາທິມາຫ. ຕຕ຺ຖ ອໂນມທສ຺ສິສ຺ສາຕິ ອໂນມໍ ອລາມກໍ ສຸນ຺ທຣໍ ທສ຺ສນໍ ທ຺ວຕ຺ຕິໍສມຫາປຸຣິສລກ຺ຂຓປຏິມຓ຺ຑິຕຕ຺ຕາ ພ຺ຍາມປ຺ປຠາມຓ຺ຑໂລປໂສຠິຕຕ຺ຕາ ອາໂຣຫປຣິຓາເຫນ ສມນ຺ນາຄຕຕ຺ຕາ ຈ ທສ຺ສນີຍໍ ສຣີຣໍ ຍສ຺ສ ຠຄວໂຕ ໂສ ອໂນມທສ຺ສີ, ຕສ຺ສ ອໂນມທສ຺ສິສ຺ສ ມຸນິໂນຕິ ອຕ຺ໂຖ. ຕາທິໂນຕິ ອິຏ຺ຐານິຏ຺ເຐສຸ ອກມ຺ປິຍສຠາວສ຺ສ. ສຸຘາຍ ເລປນໍ ກຕ຺ວາຕິ ສຸຘາຍ ອວລິຕ຺ຕໍ ກຕ຺ວາ ທີປຘູປປຸປ຺ຜຘຊປຏາກາທີຫິ ຈ ອລງ຺ກຕໍ ຈງ຺ກມໍ ກາຣຍິໍ ອກາສິນ຺ຕິ ອຕ຺ໂຖ. ເສສຄາຖານໍ ອຕ຺ໂຖ ປາຬິຍາ ອນຸສາເຣນ ສຸວິຎ຺ເຎຍ຺ໂຍວ.

໓໕. ປຣິວາຣສມ຺ປຕ຺ຕິຘນສມ຺ປຕ຺ຕິສງ຺ຂາຕໍ ຍສໍ ຘາເຣຕີຕິ ຍໂສຘໂຣ, ສພ຺ເພ ເອເຕ ສຕ຺ຕສຕ຺ຕຕິຈກ຺ກວຕ຺ຕິຣາຊາໂນ ຍໂສຘຣນາເມນ ເອກນາມກາຕິ ສມ຺ພນ຺ໂຘ.

໕໒. ອງ຺ຄີຣໂສຕິ ອງ຺ຄໂຕ ສຣີຣໂຕ ນິຄ຺ຄຕາ ຣສ຺ມິ ຍສ຺ສ ໂສ ອງ຺ຄີຣໂສ, ຉນ຺ທໂທສໂມຫຠຍາຄຕີຫິ ວາ ປາປາຈາຣວເສນ ວາ ຈຕຸຣາປາຍໍ ນ ຄຈ຺ຉຕີຕິ ນາໂຄ, ມຫນ຺ໂຕ ປູຊິໂຕ ຈ ໂສ ນາໂຄ ເຈຕິ ມຫານາໂຄ. ເສສໍ ອຸຕ຺ຕານຕ຺ຖເມວາຕິ.

ໂກຬິວິສຕ຺ເຖຣອປທານວຓ຺ຓນາ ສມຕ຺ຕາ.

໓. ກາຬິໂຄຘາປຸຕ຺ຕຠທ຺ທິຍຕ຺ເຖຣອປທານວຓ຺ຓນາ

ປທຸມຸຕ຺ຕຣສມ຺ພຸທ຺ຘນ຺ຕິອາທິກໍ ອາຍສ຺ມໂຕ ຠທ຺ທິຍສ຺ສ ກາຬິໂຄຘາປຸຕ຺ຕຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ວິຠວສມ຺ປນ຺ເນ ເອກສ຺ມິໍ ກຸເລ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ປຸຕ຺ຕທາເຣຫິ ວຑ຺ຒິໂຕ ນຄຣວາສິໂນ ປຸຎ຺ຎານິ ກໂຣນ຺ເຕ ທິສ຺ວາ ສຍມ຺ປິ ປຸຎ຺ຎານິ ກາຕຸກາໂມ ພຸທ຺ຘປ຺ປມຸຂໍ ຠິກ຺ຂຸສງ຺ຆໍ ນິມນ຺ເຕຕ຺ວາ ຖູລປຏລິກາທິອເນການິ ມຫາຣຫານິ ສຍນານິ ປຎ຺ຎາເປຕ຺ວາ ຕຕ຺ຖ ນິສິນ຺ເນ ຠຄວຕິ ສສງ຺ເຆ ປຓີເຕນາຫາເຣນ ໂຠເຊຕ຺ວາ ມຫາທານໍ ອທາສິ. ໂສ ເອວໍ ຍາວຕາຍຸກໍ ປຸຎ຺ຎານິ ກຕ຺ວາ ເທວມນຸສ຺ເສສຸ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອປຣຠາເຄ ອິມສ຺ມິໍ ພຸທ຺ຘຸປ຺ປາເທ ກາຬິໂຄຘາຍ ນາມ ເທວິຍາ ປຸຕ຺ໂຕ ຫຸຕ຺ວາ ນິພ຺ພຕ຺ຕິ. ໂສ ວິຎ຺ຎຸຕໍ ປຕ຺ໂຕ ອາໂຣຫປຣິຓາຫຫຕ຺ຖປາທຣູປສມ຺ປຕ຺ຕິຍາ ຠທ຺ທຕ຺ຕາ ຈ ກາຬິໂຄຘາຍ ເທວິຍາ ປຸຕ຺ຕຕ຺ຕາ ຈ ຠທ຺ທິໂຍ ກາຬິໂຄຘາປຸຕ຺ໂຕຕິ ປາກໂຏ. ສຕ຺ຖຣິ ປສີທິຕ຺ວາ ມາຕາປິຕໂຣ ອາຣາເຘຕ຺ວາ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໕໔. ໂສ ອຣຫາ ຫຸຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕ຺ຕຣສມ຺ພຸທ຺ຘນ຺ຕິອາທິມາຫ. ຕໍ ເຫຏ຺ຐາ ວຸຕ຺ຕຕ຺ຖເມວ. ເມຕ຺ຕຈິຕ຺ຕນ຺ຕິ ມິຊ຺ຊຕິ ສິເນຫຕິ ນນ຺ທຕິ ສພ຺ພສຕ຺ເຕຕິ ເມຕ຺ຕາ, ເມຕ຺ຕາຍ ສຫຄຕໍ ຈິຕ຺ຕໍ ເມຕ຺ຕຈິຕ຺ຕໍ, ຕໍ ຍສ຺ສ ຠຄວໂຕ ອຕ຺ຖີຕິ ເມຕ຺ຕຈິຕ຺ໂຕ, ຕໍ ເມຕ຺ຕຈິຕ຺ຕໍ. ມຫາມຸນິນ຺ຕິ ສກລຠິກ຺ຂູນໍ ມຫນ຺ຕຕ຺ຕາ ມຫາມຸນິ, ຕໍ ປທຸມຸຕ຺ຕຣໍ ສມ຺ພຸທ຺ຘນ຺ຕິ ສມ຺ພນ຺ໂຘ. ຊນຕາ ສພ຺ພາຕິ ສພ຺ໂພ ຊນກາໂຍ, ສພ຺ພນຄຣວາສິໂນຕິ ອຕ຺ໂຖ. ສພ຺ພໂລກຄ຺ຄນາຍກນ຺ຕິ ສກລໂລກສ຺ສ ອຄ຺ຄໍ ເສຏ຺ຐໍ ນິພ຺ພານສ຺ສ ນຍນໂຕ ປາປນໂຕ ນາຍກໍ ປທຸມຸຕ຺ຕຣສມ຺ພຸທ຺ຘໍ ຊນຕາ ອຸເປຕິ ສມີປໍ ຄຈ຺ຉຕີຕິ ສມ຺ພນ຺ໂຘ.

໕໕. ສຕ຺ຕຸກຎ຺ຈ ພທ຺ຘກຎ຺ຈາຕິ ພທ຺ຘສຕ຺ຕຸອພທ຺ຘສຕ຺ຕຸສງ຺ຂາຕໍ ອາມິສໍ. ອຖ ວາ ຠຕ຺ຕປູປຂຊ຺ຊໂຠຊ຺ຊຍາຄຸອາທໂຍ ຍາວກາລິກຕ຺ຕາ ອາມິສໍ ປານໂຠຊນຎ຺ຈ ຄເຫຕ຺ວາ ປຸຎ຺ຎກ຺ເຂຕ຺ເຕ ອນຸຕ຺ຕເຣ ສຕ຺ຖຸໂນ ທທນ຺ຕີຕິ ສມ຺ພນ຺ໂຘ.

໕໘. ອາສນໍ ພຸທ຺ຘຍຸຕ຺ຕກນ຺ຕິ ພຸທ຺ຘໂຍຄ຺ຄໍ ພຸທ຺ຘາຣຫໍ ພຸທ຺ຘານຸຈ຺ຉວິກໍ ສຕ຺ຕຣຕນມຍໍ ອາສນນ຺ຕິ ອຕ຺ໂຖ. ເສສໍ ນຍານຸໂຍເຄນ ສຸວິຎ຺ເຎຍ຺ຍເມວາຕິ.

ກາຬິໂຄຘາປຸຕ຺ຕຠທ຺ທິຍຕ຺ເຖຣອປທານວຓ຺ຓນາ ສມຕ຺ຕາ.

໔. ສນ຺ນິຏ຺ຐາປກຕ຺ເຖຣອປທານວຓ຺ຓນາ

ອຣຎ຺ເຎ ກຸຏິກໍ ກຕ຺ວາຕິອາທິກໍ ອາຍສ຺ມໂຕ ສນ຺ນິຏ຺ຐາປກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຆຣພນ຺ຘເນນ ພທ຺ໂຘ ຆຣາວາເສ ອາທີນວໍ ທິສ຺ວາ ວຕ຺ຖຸກາມກິເລສກາເມ ປຫາຍ ຫິມວນ຺ຕສ຺ສ ອວິທູເຣ ປພ຺ພຕນ຺ຕເຣ ອຣຎ຺ຎວາສໍ ກປ຺ເປສິ. ຕສ຺ມິໍ ກາເລ ປທຸມຸຕ຺ຕໂຣ ຠຄວາ ວິເວກກາມຕາຍ ຕໍ ຐານໍ ປາປຸຓິ. ອຖ ໂສ ຕາປໂສ ຠຄວນ຺ຕໍ ທິສ຺ວາ ປສນ຺ນມານໂສ ວນ຺ທິຕ຺ວາ ນິສີທນຕ຺ຖາຍ ຕິຓສນ຺ຖຣໍ ປຎ຺ຎາເປຕ຺ວາ ອທາສິ. ຕຕ຺ຖ ນິສິນ຺ນໍ ຠຄວນ຺ຕໍ ອເນເກຫິ ມຘຸເຣຫິ ຕິຓ຺ຑຸກາທີຫິ ຜລາຜເລຫິ ສນ຺ຕປ຺ເປສິ. ໂສ ເຕນ ປຸຎ຺ຎກມ຺ເມນ ຕໂຕ ຈຸໂຕ ເທເວສຸ ຈ ມນຸສ຺ເສສຸ ຈ ອປຣາປຣໍ ສໍສຣນ຺ໂຕ ທ຺ເວ ສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ສທ຺ຘາສມ຺ປນ຺ໂນ ປພ຺ພຊິໂຕ ວິປສ຺ສນໍ ວຑ຺ເຒຕ຺ວາ ນຈິຣສ຺ເສວ ອຣຫາ ອໂຫສິ. ຂຸຣຄ຺ເຄ ອຣຫຕ຺ຕຜລປ຺ປຕ຺ຕິຍໍ ວິຍ ນິຣຸສ຺ສາເຫເນວ ສນ຺ຕິປທສງ຺ຂາເຕ ນິພ຺ພາເນ ສຸຏ຺ຐຸ ຐິຕຕ຺ຕາ ສນ຺ນິຏ຺ຐາປກຕ຺ເຖໂຣຕິ ປາກໂຏ.

໗໐. ອຣຫາ ປນ ຫຸຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອຣຎ຺ເຎ ກຸຏິກໍ ກຕ຺ວາຕິອາທິມາຫ. ຕຕ຺ຖ ອຣຎ຺ເຎຕິ ສີຫພ຺ຍຄ຺ຆາທີນໍ ຠເຍນ ມນຸສ຺ສາ ເອຕ຺ຖ ນ ຣຊ຺ຊນ຺ຕິ ນ ຣມນ຺ຕິ ນ ອລ຺ລີຍນ຺ຕີຕິ ອຣຎ຺ຎໍ, ຕສ຺ມິໍ ອຣຎ຺ເຎ. ກຸຏິກນ຺ຕິ ຕິຓຈ຺ຉທນກຸຏິກໍ ກຕ຺ວາ ປພ຺ພຕນ຺ຕເຣ ວສາມິ ວາສໍ ກປ຺ເປສິນ຺ຕິ ອຕ຺ໂຖ. ລາເຠນ ຈ ອລາເຠນ ຈ ຍເສນ ຈ ອຍເສນ ຈ ສນ຺ຕຸຏ຺ໂຐ ວິຫາສິນ຺ຕິ ສມ຺ພນ຺ໂຘ.

໗໒. ຊລຊຸຕ຺ຕມນາມກນ຺ຕິ ຊເລ ຊາຕໍ ຊລຊໍ, ປທຸມໍ, ຊລຊໍ ອຸຕ຺ຕມໍ ຊລຊຸຕ຺ຕມໍ, ຊລຊຸຕ຺ຕເມນ ສມານໍ ນາມໍ ຍສ຺ສ ໂສ ຊລຊຸຕ຺ຕມນາມໂກ, ຕໍ ຊລຊຸຕ຺ຕມນາມກໍ ພຸທ຺ຘນ຺ຕິ ອຕ຺ໂຖ. ເສສໍ ປາຬິນຍານຸໂຍເຄນ ສຸວິຎ຺ເຎຍ຺ຍເມວາຕິ.

ສນ຺ນິຏ຺ຐາປກຕ຺ເຖຣອປທານວຓ຺ຓນາ ສມຕ຺ຕາ.

໕. ປຎ຺ຈຫຕ຺ຖິຍຕ຺ເຖຣອປທານວຓ຺ຓນາ

ສຸເມໂຘ ນາມ ສມ຺ພຸທ຺ໂຘຕິອາທິກໍ ອາຍສ຺ມໂຕ ປຎ຺ຈຫຕ຺ຖິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສຸເມຘສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ຣຕນຕ຺ຕເຍ ປສນ຺ໂນ ວິຫາສິ. ຕສ຺ມິໍ ສມເຍ ປຎ຺ຈອຸປ຺ປລຫຕ຺ຖານິ ອາເນສຸໍ. ໂສ ເຕຫິ ປຎ຺ຈອຸປ຺ປລຫຕ຺ເຖຫິ ວີຖິຍໍ ຈຣມານໍ ສຸເມຘໍ ຠຄວນ຺ຕໍ ປູເຊສິ. ຕານິ ຄນ຺ຕ຺ວາ ອາກາເສ ວິຕານໍ ຫຸຕ຺ວາ ຉາຍໍ ກຸຣຸມານານິ ຕຖາຄເຕເນວ ສທ຺ຘິໍ ຄຈ຺ຉິໍສຸ. ໂສ ຕໍ ທິສ຺ວາ ໂສມນສ຺ສຊາໂຕ ປີຕິຍາ ຜຸຏ຺ຐສຣີໂຣ ຍາວຊີວໍ ຕເທວ ປຸຎ຺ຎໍ ອນຸສ຺ສຣິຕ຺ວາ ຕໂຕ ຈຸໂຕ ເທວໂລເກ ນິພ຺ພຕ຺ໂຕ ອປຣາປຣໍ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສທ຺ຘາຊາໂຕ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ນຈິຣສ຺ເສວ ອຣຫາ ອໂຫສິ. ກຕກຸສລນາເມນ ປຎ຺ຈຫຕ຺ຖິຍຕ຺ເຖໂຣຕິ ປາກໂຏ.

໗໗. ໂສ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ປຈ຺ຈກ຺ຂໂຕ ປຎ຺ຎາຍ ທິຏ຺ຐປຸພ຺ພຈຣິຕາປທານໍ ປກາເສນ຺ໂຕ ສຸເມໂຘ ນາມ ສມ຺ພຸທ຺ໂຘຕິອາທິມາຫ. ຕຕ຺ຖ ສຸເມໂຘຕິ ສຸນ຺ທຣາ ເມຘາ ຈຕຸສຈ຺ຈປຏິເວຘປຏິສມ຺ຠິທາທໂຍ ປຎ຺ຎາ ຍສ຺ສ ໂສ ຠຄວາ ສຸເມໂຘ ສມ຺ພຸທ຺ໂຘ ອນ຺ຕຣາປເຓ ອນ຺ຕຣວີຖິຍໍ ຄຈ຺ຉຕີຕິ ສມ຺ພນ຺ໂຘ. ໂອກ຺ຂິຕ຺ຕຈກ຺ຂູຕິ ອໂຘຂິຕ຺ຕຈກ຺ຂຸ. ມິຕຠາຓີຕິ ປມາຓໍ ຎຕ຺ວາ ຠຓນສີໂລ, ປມາຓໍ ຊານິຕ຺ວາ ຘມ຺ມໍ ເທເສສີຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ປຎ຺ຈຫຕ຺ຖິຍຕ຺ເຖຣອປທານວຓ຺ຓນາ ສມຕ຺ຕາ.

໖. ປທຸມຈ຺ຉທນິຍຕ຺ເຖຣອປທານວຓ຺ຓນາ

ນິພ຺ພຸເຕ ໂລກນາຖມ຺ຫີຕິອາທິກໍ ອາຍສ຺ມໂຕ ປທຸມຈ຺ຉທນິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕປຸຎ຺ຎສມ຺ຠາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຣຕນຕ຺ຕເຍ ປສນ຺ໂນ ປຣິນິພ຺ພຸຕສ຺ສ ວິປສ຺ສິສ຺ສ ຠຄວໂຕ ຈິຕກໍ ປທຸມປຸປ຺ເຜຫິ ປູເຊສິ. ໂສ ເຕເນວ ຈິຕ຺ຕປ຺ປສາເທນ ຍາວຕາຍຸກໍ ຐຕ຺ວາ ຕໂຕ ສຸຄຕີສຸເຍວ ສໍສຣນ຺ໂຕ ທິພ຺ພສມ຺ປຕ຺ຕິໍ ມນຸສ຺ສສມ຺ປຕ຺ຕິຎ຺ຈາຕິ ທ຺ເວ ສມ຺ປຕ຺ຕິໂຍ ອເນກກ຺ຂຕ຺ຕຸໍ ອນຸຠວິຕ຺ວາ ອິມສ຺ມິໍ ອມ຺ຫາກໍ ສມ຺ມາສມ຺ພຸທ຺ຘກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຖຣິ ປສີທິຕ຺ວາ ສາສເນ ປພ຺ພຊິໂຕ ຆເຏນ຺ໂຕ ວາຍມນ຺ໂຕ ນຈິຣສ຺ເສວ ອຣຫາ ອໂຫສິ. ຕສ຺ສ ຣຕ຺ຕິຏ຺ຐານທິວາຏ຺ຐານາທີສຸ ຕຕ຺ຖ ຕຕ຺ຖ ວິຫຣນ຺ຕສ຺ສ ວິຫາໂຣ ປທຸມປຸປ຺ເຜຫິ ຉາທີຍຕິ, ເຕນ ໂສ ປທຸມຈ຺ຉທນິຍຕ຺ເຖໂຣຕິ ປາກໂຏ.

໘໓. ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສວເສນ ປຸພ຺ພຈຣິຕາປທານໍ ປກາເສນ຺ໂຕ ນິພ຺ພຸເຕ ໂລກນາຖມ຺ຫີຕິອາທິມາຫ. ຕຕ຺ຖ ນິພ຺ພຸເຕຕິ ຂນ຺ຘປຣິນິພ຺ພາເນນ ປຣິນິພ຺ພຸເຕ ສຕ຺ຖຣິ, ວິປສ຺ສິສ຺ສ ສມ຺ມາສມ຺ພຸທ຺ຘສ຺ສ ສຣີເຣ ຈິຕມານິຍມາເນ ຈິຕເກ ອາໂຣປິເຕ ສຸຜຸລ຺ລໍ ປທຸມກລາປໍ ອຫໍ ຄເຫຕ຺ວາ ຈິຕກໍ ອາໂຣປຍິໍ ປູເຊສິນ຺ຕິ ອຕ຺ໂຖ. ເສສຄາຖາສຸ ເຫຏ຺ຐາ ວຸຕ຺ຕນຍຕ຺ຕາ ອຸຕ຺ຕານຕ຺ຖເມວາຕິ.

ປທຸມຈ຺ຉທນິຍຕ຺ເຖຣອປທານວຓ຺ຓນາ ສມຕ຺ຕາ.

໗. ສຍນທາຍກຕ຺ເຖຣອປທານວຓ຺ຓນາ

ສິທ຺ຘຕ຺ຖສ຺ສ ຠຄວໂຕຕິອາທິກໍ ອາຍສ຺ມໂຕ ສຍນທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິທ຺ຘຕ຺ຖສ຺ສ ຠຄວໂຕ ກາເລ ອຎ຺ຎຕຣສ຺ມິໍ ກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຖຣິ ປສີທິຕ຺ວາ ຫຕ຺ຖິທຓ຺ຑສຸວຓ຺ຓາທີຫິ ສຍນຕ຺ຖາຍ ມຎ຺ຈໍ ກາເຣຕ຺ວາ ອນຄ຺ເຆຫິ ວິຈິຕ຺ຕຕ຺ຖຣເຓຫິ ອຕ຺ຖຣິຕ຺ວາ ຠຄວນ຺ຕໍ ປູເຊສິ. ໂສ ຠຄວາ ຕສ຺ສານຸກມ຺ປາຍ ປຏິຄ຺ຄເຫຕ຺ວາ ອນຸຠວິ. ໂສ ເຕນ ປຸຎ຺ຎກມ຺ເມນ ທິພ຺ພມນຸສ຺ສສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສຕ຺ຖຸ ສາສເນ ປສນ຺ໂນ ປພ຺ພຊິຕ຺ວາ ວິປສ຺ສນໍ ອາຣຠິຕ຺ວາ ນຈິຣສ຺ເສວ ອຣຫາ ອໂຫສິ. ປຸພ຺ເພ ກຕປຸຎ຺ຎນາເມນ ສຍນທາຍກຕ຺ເຖໂຣຕິ ປາກໂຏ.

໘໘. ໂສ ເອກທິວສໍ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ສິທ຺ຘຕ຺ຖສ຺ສ ຠຄວໂຕຕິອາທິມາຫ. ຕໍ ສພ຺ພໍ ປາຬິນຍານຸສາເຣນ ສຸວິຎ຺ເຎຍ຺ຍເມວາຕິ.

ສຍນທາຍກຕ຺ເຖຣອປທານວຓ຺ຓນາ ສມຕ຺ຕາ.

໘. ຈງ຺ກມນທາຍກຕ຺ເຖຣອປທານວຓ຺ຓນາ

ອຕ຺ຖທສ຺ສິສ຺ສ ມຸນິໂນຕິອາທິກໍ ອາຍສ຺ມໂຕ ຈງ຺ກມນທາຍກຕ຺ເຖຣສ຺ສ ອປທານໍ. ອຍມ຺ປາຍສ຺ມາ ປຸຣິມພຸທ຺ເຘສຸ ກຕາຘິກາໂຣ ເຕສຸ ເຕສຸ ຠເວສຸ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອຕ຺ຖທສ຺ສິສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຖຣິ ປສີທິຕ຺ວາ ອຸຈ຺ຈວຕ຺ຖຸກໍ ສຸຘາປຣິກມ຺ມກຕໍ ຣຊຕຣາສິສທິສໍ ໂສຠມານໍ ຈງ຺ກມໍ ກາເຣຕ຺ວາ ມຸຕ຺ຕທລສທິສໍ ເສຕປຸລິນໍ ອຕ຺ຖຣິຕ຺ວາ ຠຄວໂຕ ອທາສິ. ປຏິຄ຺ຄເຫສິ ຠຄວາ, ຈງ຺ກມໍ ປຏິຄ຺ຄເຫຕ຺ວາ ຈ ປນ ສຸຂໍ ກາຍຈິຕ຺ຕສມາຘິໍ ອປ຺ເປຕ຺ວາ ‘‘ອຍໍ ອນາຄເຕ ໂຄຕມສ຺ສ ຠຄວໂຕ ສາສເນ ສາວໂກ ຠວິສ຺ສຕີ’’ຕິ ພ຺ຍາກາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ອປຣາປຣໍ ສໍສຣນ຺ໂຕ ທ຺ເວ ສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ສທ຺ຘາສມ຺ປນ຺ໂນ ສາສເນ ປພ຺ພຊິຕ຺ວາ ນຈິຣສ຺ເສວ ອຣຫຕ຺ຕໍ ປຕ຺ວາ ກຕປຸຎ຺ຎນາເມນ ຈງ຺ກມນທາຍກຕ຺ເຖໂຣຕິ ປາກໂຏ ອໂຫສິ.

໙໓. ໂສ ເອກທິວສໍ ອຕ຺ຕນາ ປຸພ຺ເພ ກຕປຸຎ຺ຎກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອຕ຺ຖທສ຺ສິສ຺ສ ມຸນິໂນຕິອາທິມາຫ. ຕຕ຺ຖ ອຕ຺ຖທສ຺ສິສ຺ສາຕິ ອຕ຺ຖໍ ປໂຍຊນໍ ວຸທ຺ຘິໍ ວິຣູຬ຺ຫິໍ ນິພ຺ພານໍ ທກ຺ຂຕິ ປສ຺ສຕີຕິ ອຕ຺ຖທສ຺ສີ, ອຖ ວາ ອຕ຺ຖໍ ນິພ຺ພານໍ ທສ຺ສນສີໂລ ຊານນສີໂລຕິ ອຕ຺ຖທສ຺ສີ, ຕສ຺ສ ອຕ຺ຖທສ຺ສິສ຺ສ ມຸນິໂນ ໂມເນນ ຎາເຓນ ສມນ຺ນາຄຕສ຺ສ ຠຄວໂຕ ມໂນຣມໍ ມນລ຺ລີນໍ ຠາວນີຍໍ ມນສິ ກາຕພ຺ພໍ ຈງ຺ກມໍ ກາເຣສິນ຺ຕິ ສມ຺ພນ຺ໂຘ. ເສສໍ ວຸຕ຺ຕນຍານຸສາເຣເນວ ສຸວິຎ຺ເຎຍ຺ຍເມວາຕິ.

ຈງ຺ກມນທາຍກຕ຺ເຖຣອປທານວຓ຺ຓນາ ສມຕ຺ຕາ.

໙. ສຸຠທ຺ທຕ຺ເຖຣອປທານວຓ຺ຓນາ

ປທຸມຸຕ຺ຕໂຣ ໂລກວິທູຕິອາທິກໍ ອາຍສ຺ມໂຕ ສຸຠທ຺ທຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ນິພ຺ພານາຘິຄມນຕ຺ຖາຍ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ວິຠວສມ຺ປນ຺ເນ ສທ຺ຘາສມ຺ປນ຺ເນ ເອກສ຺ມິໍ ກຸລເຄເຫ ນິພ຺ພໂຕ ວິຎ຺ຎຸຕໍ ປຕ຺ວາ ຆຣພນ຺ຘເນນ ພທ຺ໂຘ ຣຕນຕ຺ຕເຍ ປສນ຺ໂນ ປຣິນິພ຺ພານມຎ຺ເຈ ນິປນ຺ນໍ ປທຸມຸຕ຺ຕຣໍ ຠຄວນ຺ຕໍ ທິສ຺ວາ ສນ຺ນິປຕິຕາ ທສສຫສ຺ສຈກ຺ກວາຬເທວຕາໂຍ ຈ ທິສ຺ວາ ປສນ຺ນມານໂສ ນິຄ຺ຄຸຓ຺ຑິເກຏກນີລກາໂສກາສິຕາທິອເນເກຫິ ສຸຄນ຺ຘປຸປ຺ເຜຫິ ປູເຊສິ. ໂສ ເຕນ ປຸຎ຺ຎກມ຺ເມນ ຍາວຕາຍຸກໍ ຐຕ຺ວາ ຕໂຕ ຈວິຕ຺ວາ ຕຸສິຕາທີສຸ ທິພ຺ພສມ຺ປຕ຺ຕິໂຍ ອນຸຠວິຕ຺ວາ ຕໂຕ ມນຸສ຺ເສສຸ ມນຸສ຺ສສມ຺ປຕ຺ຕິໂຍ ອນຸຠວິຕ຺ວາ ນິພ຺ພຕ຺ຕນິພ຺ພຕ຺ຕຏ຺ຐາເນສຸ ຈ ສຸຄນ຺ເຘຫິ ປຸປ຺ເຜຫິ ປູຊິໂຕ ອໂຫສິ. ອິມສ຺ມິໍ ປນ ພຸທ຺ຘຸປ຺ປາເທ ເອກສ຺ມິໍ ວິຠວສມ຺ປນ຺ເນ ກຸເລ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ກາເມສຸ ອາທີນວໍ ທິສ຺ວາປິ ຍາວ ພຸທ຺ຘສ຺ສ ຠຄວໂຕ ປຣິນິພ຺ພານກາໂລ ຕາວ ອລທ຺ຘພຸທ຺ຘທສ຺ສໂນ ຠຄວໂຕ ປຣິນິພ຺ພານມຎ຺ເຈ ນິປນ຺ນກາເລເຍວ ປພ຺ພຊິຕ຺ວາ ອຣຫຕ຺ຕໍ ປາປຸຓິ. ປຸພ຺ເພ ກຕປຸຎ຺ຎນາເມນ ສຸຠທ຺ໂທຕິ ປາກໂຏ ອໂຫສິ.

໑໐໑. ໂສ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສວເສນ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕ຺ຕໂຣ ໂລກວິທູຕິອາທິມາຫ. ຕໍ ອຸຕ຺ຕານຕ຺ຖເມວ. ສຸຓາຖ ມມ ຠາສໂຕ…ເປ… ນິພ຺ພາຍິສ຺ສຕິນາສໂວຕິ ອິທໍ ປຣິນິພ຺ພານມຎ຺ເຈ ນິປນ຺ໂນວ ປທຸມຸຕ຺ຕໂຣ ຠຄວາ ພ຺ຍາກາສິ.

ປຎ຺ຈມຠາຓວາຣວຓ຺ຓນາ ສມຕ຺ຕາ.

໑໑໕. ໂສ ອຕ຺ຕໂນ ປຏິປຕ຺ຕິໍ ທສ຺ເສນ຺ໂຕ ປຸພ຺ພກມ຺ເມນ ສໍຍຸຕ຺ໂຕຕິອາທິມາຫ. ເອກຄ຺ໂຄຕິ ເອກຄ຺ຄຈິຕ຺ໂຕ. ສຸສມາຫິໂຕຕິ ສຸຏ຺ຐຸ ສມາຫິໂຕ, ສນ຺ຕກາຍຈິຕ຺ໂຕຕິ ອຕ຺ໂຖ. ພຸທ຺ຘສ຺ສ ໂອຣໂສ ປຸຕ຺ໂຕຕິ ພຸທ຺ຘສ຺ສ ອຸຣສາ ຫທເຍນ ນິຄ຺ຄຕໂອວາທານຸສາສນິໍ ສຸຕ຺ວາ ປຕ຺ຕອຣຫຕ຺ຕຜໂລຕິ ອຕ຺ໂຖ. ຘມ຺ມໂຊມ຺ຫິ ສຸນິມ຺ມິໂຕຕິ ຘມ຺ມໂຕ ກມ຺ມຏ຺ຐານຘມ຺ມໂຕ ຊາໂຕ ອຣິຍາຍ ຊາຕິຍາ ສຸນິມ຺ມິໂຕ ສຸຏ຺ຐຸ ນິປ຺ຜາທິຕສພ຺ພກິຈ຺ໂຈ ອມ຺ຫິ ຠວາມີຕິ ອຕ຺ໂຖ.

໑໑໖. ຘມ຺ມຣາຊໍ ອຸປຄມ຺ມາຕິ ຘມ຺ເມນ ສພ຺ພສຕ຺ຕານໍ ຣາຊານໍ ອິສ຺ສຣຠູຕໍ ຠຄວນ຺ຕໍ ອຸປຄນ຺ຕ຺ວາ ສມີປໍ ຄນ຺ຕ຺ວາຕິ ອຕ຺ໂຖ. ອປຸຈ຺ຉິໍ ປຎ຺ຫມຸຕ຺ຕມນ຺ຕິ ອຸຕ຺ຕມໍ ຂນ຺ຘາຍຕນຘາຕຸສຈ຺ຈສມຸປ຺ປາທາທິປຏິສໍຍຸຕ຺ຕໍ ປຎ຺ຫໍ ອປຸຈ຺ຉິນ຺ຕິ ອຕ຺ໂຖ. ກຖຍນ຺ໂຕ ຈ ເມ ປຎ຺ຫນ຺ຕິ ເອໂສ ອມ຺ຫາກໍ ຠຄວາ ເມ ມຍ຺ຫໍ ປຎ຺ຫໍ ກຖຍນ຺ໂຕ ພ຺ຍາກໂຣນ຺ໂຕ. ຘມ຺ມໂສຕໍ ອຸປານຍີຕິ ອນຸປາທິເສສນິພ຺ພານຘາຕຸສງ຺ຂາຕໍ ຘມ຺ມໂສຕໍ ຘມ຺ມປວາຫໍ ອຸປານຍິ ປາວິສີຕິ ອຕ຺ໂຖ.

໑໑໘. ຊລຊຸຕ຺ຕມນາຍໂກຕິ ປທຸມຸຕ຺ຕຣນາມໂກ ມ-ກາຣສ຺ສ ຍ-ກາຣໍ ກຕ຺ວາ ກຕໂວຫາໂຣ. ນິພ຺ພາຍິ ອນຸປາທາໂນຕິ ອຸປາທາເນ ປຎ຺ຈກ຺ຂນ຺ເຘ ອຄ຺ຄເຫຕ຺ວາ ນິພ຺ພາຍິ ນ ປຎ຺ຎາຍິ ອທສ຺ສນໍ ອຄມາສິ, ມນຸສ຺ສໂລກາທີສຸ ກຕ຺ຖຈິປິ ອປຕິຏ຺ຐິໂຕຕິ ອຕ຺ໂຖ. ທີໂປວ ເຕລສງ຺ຂຍາຕິ ວຏ຺ຏິເຕລານໍ ສງ຺ຂຍາ ອຠາວາ ປທີໂປ ອິວ ນິພ຺ພາຍີຕິ ສມ຺ພນ຺ໂຘ.

໑໑໙. ສຕ຺ຕໂຍຊນິກໍ ອາສີຕິ ຕສ຺ສ ປຣິນິພ຺ພຸຕສ຺ສ ປທຸມຸຕ຺ຕຣສ຺ສ ຠຄວໂຕ ຣຕນມຍໍ ຖູປໍ ສຕ຺ຕໂຍຊນຸພ຺ເພຘໍ ອາສິ ອໂຫສີຕິ ອຕ຺ໂຖ. ຘຊໍ ຕຕ຺ຖ ອປູເຊສິນ຺ຕິ ຕຕ຺ຖ ຕສ຺ມິໍ ເຈຕິເຍ ສພ຺ພຠທ຺ທໍ ສພ຺ພໂຕ ຠທ຺ທໍ ສພ຺ພໂສ ມໂນຣມໍ ຘຊໍ ປູເຊສິນ຺ຕິ ອຕ຺ໂຖ.

໑໒໐. ກສ຺ສປສ຺ສ ຈ ພຸທ຺ຘສ຺ສາຕິ ປທຸມຸຕ຺ຕຣສ຺ສ ຠຄວໂຕ ກາລໂຕ ປຏ຺ຐາຍ ອາຄຕສ຺ສ ເທວມນຸສ຺ເສສຸ ສໍສຣໂຕ ເມ ມຍ຺ຫໍ ໂອຣໂສ ປຸຕ຺ໂຕ ຕິສ຺ໂສ ນາມ ກສ຺ສປສ຺ສ ສມ຺ມາສມ຺ພຸທ຺ຘສ຺ສ ອຄ຺ຄສາວໂກ ຊິນສາສເນ ພຸທ຺ຘສາສເນ ທາຍາໂທ ອາສິ ອໂຫສີຕິ ສມ຺ພນ຺ໂຘ.

໑໒໑. ຕສ຺ສ ຫີເນນ ມນສາຕິ ຕສ຺ສ ມມ ປຸຕ຺ຕສ຺ສ ຕິສ຺ສສ຺ສ ອຄ຺ຄສາວກສ຺ສ ຫີເນນ ລາມເກນ ມນສາ ຈິຕ຺ເຕນ ອຠທ຺ທກໍ ອສຸນ຺ທຣໍ ອຍຸຕ຺ຕກໍ ‘‘ອນ຺ຕໂກ ປຈ຺ຉິໂມ’’ຕິ ວາຈໍ ວຈນໍ ອຠາສິໍ ກເຖສິນ຺ຕິ ອຕ຺ໂຖ. ເຕນ ກມ຺ມວິປາເກນາຕິ ເຕນ ອຣຫນ຺ຕຠກ຺ຂານສງ຺ຂາຕສ຺ສ ອກຸສລກມ຺ມສ຺ສ ວິປາເກນ. ປຈ຺ຉິເມ ອທ຺ທສໍ ຊິນນ຺ຕິ ປຈ຺ຉິເມ ປຣິໂຍສາເນ ປຣິນິພ຺ພານກາເລ ມລ຺ລານໍ ອຸປວຕ຺ຕເນ ສາລວເນ ປຣິນິພ຺ພານມຎ຺ເຈ ນິປນ຺ນໍ ຊິນໍ ຊິຕສພ຺ພມາຣໍ ອມ຺ຫາກໍ ໂຄຕມສມ຺ມາສມ຺ພຸທ຺ຘໍ ອທ຺ທສໍ ອຫນ຺ຕິ ອຕ຺ໂຖ. ‘‘ປຈ຺ຉາ ເມ ອາສິ ຠທ຺ທກ’’ນ຺ຕິປິ ປາໂຐ. ຕສ຺ສ ປຈ຺ຉາ ຕສ຺ສ ຠຄວໂຕ ອວສານກາເລ ນິພ຺ພານາສນ຺ນກາເລ ເມ ມຍ຺ຫໍ ຠທ຺ທກໍ ສຸນ຺ທຣໍ ຈຕຸສຈ຺ຈປຏິວິຊ຺ຌນໍ ອາສິ ອໂຫສີຕິ ອຕ຺ໂຖ.

໑໒໒. ປພ຺ພາເຊສິ ມຫາວີໂຣຕິ ມຫາວີຣິໂຍ ສພ຺ພສຕ຺ຕຫິໂຕ ກຣຸຓາຍຸຕ຺ໂຕ ຊິຕມາໂຣ ມຸນິ ມລ຺ລານໍ ອຸປວຕ຺ຕເນ ສາລວເນ ປຈ຺ຉິເມ ສຍເນ ປຣິນິພ຺ພານມຎ຺ເຈ ສຍິໂຕວ ມໍ ປພ຺ພາເຊສີຕິ ສມ຺ພນ຺ໂຘ.

໑໒໓. ອຊ຺ເຊວ ທານິ ປພ຺ພຊ຺ຊາຕິ ອຊ຺ຊ ເອວ ຠຄວໂຕ ປຣິນິພ຺ພານທິວເສເຍວ ມມ ປພ຺ພຊ຺ຊາ, ຕຖາ ອຊ຺ຊ ເອວ ອຸປສມ຺ປທາ, ອຊ຺ຊ ເອວ ທ຺ວິປທຸຕ຺ຕມສ຺ສ ສມ຺ມຸຂາ ປຣິນິພ຺ພານໍ ອໂຫສີຕິ ສມ຺ພນ຺ໂຘ. ເສສໍ ສຸວິຎ຺ເຎຍ຺ຍເມວາຕິ.

ສຸຠທ຺ທຕ຺ເຖຣອປທານວຓ຺ຓນາ ສມຕ຺ຕາ.

໑໐. ຈຸນ຺ທຕ຺ເຖຣອປທານວຓ຺ຓນາ

ສິທ຺ຘຕ຺ຖສ຺ສ ຠຄວໂຕຕິອາທິກໍ ອາຍສ຺ມໂຕ ຈຸນ຺ທຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕປຸຎ຺ຎສມ຺ຠາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິທ຺ຘຕ຺ຖສ຺ສ ຠຄວໂຕ ກາເລ ວິຠວສມ຺ປນ຺ເນ ກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສຕ຺ຖຣິ ປສີທິຕ຺ວາ ສຕ຺ຕຣຕນມຍໍ ສຸວຓ຺ຓຄ຺ຆິຍໍ ກາເຣຕ຺ວາ ສຸມນປຸປ຺ເຜຫິ ຉາເທຕ຺ວາ ຠຄວນ຺ຕໍ ປູເຊສິ. ຕານິ ປຸປ຺ຜານິ ອາກາສໍ ສມຸຄ຺ຄນ຺ຕ຺ວາ ວິຕານາກາເຣນ ອຏ຺ຐໍສຸ. ອຖ ນໍ ຠຄວາ ‘‘ອນາຄເຕ ໂຄຕມສ຺ສ ນາມ ຠຄວໂຕ ສາສເນ ຈຸນ຺ໂທ ນາມ ສາວໂກ ຠວິສ຺ສຕີ’’ຕິ ພ຺ຍາກາສິ. ໂສ ເຕນ ປຸຎ຺ຎກມ຺ເມນ ຕໂຕ ຈຸໂຕ ເທວໂລເກ ອຸປປນ຺ໂນ ກເມນ ຉສຸ ກາມາວຈຣເທເວສຸ ສຸຂໍ ອນຸຠວິຕ຺ວາ ມນຸສ຺ເສສຸ ຈກ຺ກວຕ຺ຕິອາທິສມ຺ປຕ຺ຕິໂຍ ຈ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ພ຺ຣາຫ຺ມຓກຸເລ ຣູປສາຣິຍາ ປຸຕ຺ໂຕ ສາຣິປຸຕ຺ຕຕ຺ເຖຣສ຺ສ ກນິຏ຺ໂຐ ຫຸຕ຺ວາ ນິພ຺ພຕ຺ຕິ. ຕສ຺ສ ວິຎ຺ຎຸຕໍ ປຕ຺ຕສ຺ສ ອາໂຣຫປຣິຓາຫຣູປວຍານໍ ສຸນ຺ທຣຕາຍ ສກາຣສ຺ສ ຈກາຣໍ ກຕ຺ວາ ຈຸນ຺ໂທຕິ ນາມໍ ກຣິໍສຸ. ໂສ ວຍປ຺ປຕ຺ໂຕ ຆຣາວາເສ ອາທີນວໍ ປພ຺ພຊ຺ຊາຍ ຈ ອານິສໍສໍ ທິສ຺ວາ ຠາຕຸຕ຺ເຖຣສ຺ສ ສນ຺ຕິເກ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ນຈິຣສ຺ເສວ ອຣຫຕ຺ຕໍ ປາປຸຓິ.

໑໒໕. ໂສ ປຕ຺ຕອຣຫຕ຺ຕຜໂລ ເອກທິວສໍ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ສິທ຺ຘຕ຺ຖສ຺ສ ຠຄວໂຕຕິອາທິມາຫ. ຕໍ ເຫຏ຺ຐາ ວຸຕ຺ຕຕ຺ຖເມວ. ອຄ຺ຆິຍນ຺ຕິອາທໂຍປິ ອຸຕ຺ຕານຕ຺ຖາເຍວ.

໑໒໘. ວິຕິຓ຺ຓກງ຺ໂຂ ສມ຺ພຸທ຺ໂຘຕິ ວິເສເສນ ມຄ຺ຄາຘິຄເມນ ວິຈິກິຈ຺ຉາຍ ເຂປິຕຕ຺ຕາ ວິຕິຓ຺ຓກງ຺ໂຂ ອສໍສໂຍ ສມ຺ພຸທ຺ໂຘ. ຕິຓ຺ໂຓເຆຫິ ປຸຣກ຺ຂໂຕຕິ ກາໂມຆາທີນໍ ຈຕຸນ຺ນໍ ໂອຆານໍ ຕິຓ຺ຓຕ຺ຕາ ອຕິກ຺ກນ຺ຕຕ຺ຕາ ໂອຆຕິຓ຺ເຓຫິ ຂີຓາສເວຫິ ປຸຣກ຺ຂໂຕ ປຣິວາຣິໂຕຕິ ອຕ຺ໂຖ. ພ຺ຍາກຣຓຄາຖາ ອຸຕ຺ຕານຕ຺ຖາເຍວ.

໑໓໙. ອຸປຏ຺ຐຫິໍ ມຫາວີຣນ຺ຕິ ອຸຕ຺ຕມຕ຺ຖສ຺ສ ນິພ຺ພານສ຺ສ ປຕ຺ຕິຍາ ປາປຸຓນຕ຺ຖາຍ ກປ຺ປສຕສຫສ຺ສາຘິເກສຸ ຈຕຸຣາສງ຺ຂ຺ເຍຍ຺ເຍສຸ ກປ຺ເປສຸ ປາຣມິໂຍ ປູເຣນ຺ເຕນ ກຕວີຣິຍຕ຺ຕາ ມຫາວີຣໍ ພຸທ຺ຘໍ ອຸປຏ຺ຐຫິໍ ອຸປຏ຺ຐານໍ ອກາສິນ຺ຕິ ອຕ຺ໂຖ. ອຎ຺ເຎ ຈ ເປສເລ ພຫູຕິ ນ ເກວລເມວ ພຸທ຺ຘໍ ອຸປຏ຺ຐຫິໍ, ເປສເລ ປິຍສີເລ ສີລວນ຺ເຕ ອຎ຺ເຎ ຈ ພຫຸອຄ຺ຄປ຺ປຕ຺ເຕ ສາວເກ, ເມ ມຍ຺ຫໍ ຠາຕຣໍ ສາຣິປຸຕ຺ຕຕ຺ເຖຣຎ຺ຈ ອຸປຏ຺ຐຫິນ຺ຕິ ສມ຺ພນ຺ໂຘ.

໑໔໐. ຠາຕຣໍ ເມ ອຸປຏ຺ຐຫິຕ຺ວາຕິ ມຍ຺ຫໍ ຠາຕຣໍ ອຸປຏ຺ຐຫິຕ຺ວາ ວຕ຺ຕປຏິວຕ຺ຕໍ ກຕ຺ວາ ຕສ຺ສ ປຣິນິພ຺ພຸຕກາເລ ຠຄວໂຕ ປຐມໍ ປຣິນິພ຺ພຸຕຕ຺ຕາ ຕສ຺ສ ຘາຕຸໂຍ ຄເຫຕ຺ວາ ປຕ຺ຕມ຺ຫິ ໂອກິຣິຕ຺ວາ ໂລກເຊຏ຺ຐສ຺ສ ນຣານໍ ອາສຠສ຺ສ ພຸທ຺ຘສ຺ສ ອຸປນາເມສິໍ ອທາສິນ຺ຕິ ອຕ຺ໂຖ.

໑໔໑. ອຸໂຠ ຫຕ຺ເຖຫິ ປຄ຺ຄຍ຺ຫາຕິ ຕໍ ມຫາ ທິນ຺ນໍ ຘາຕຸໍ ໂສ ຠຄວາ ອຕ຺ຕໂນ ອຸໂຠຫິ ຫຕ຺ເຖຫິ ປກາເຣນ ຄເຫຕ຺ວາ ຕໍ ຘາຕຸໍ ສໍສຸຏ຺ຐຸ ທສ຺ສຍນ຺ໂຕ ອຄ຺ຄສາວກໍ ສາຣິປຸຕ຺ຕຕ຺ເຖຣໍ ກິຕ຺ຕຍິ ປກາເສສີຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ຈຸນ຺ທຕ຺ເຖຣອປທານວຓ຺ຓນາ ສມຕ຺ຕາ.

ປຎ຺ຈມວຄ຺ຄວຓ຺ຓນາ ສມຕ຺ຕາ.