໖. ພີຊນິວຄ຺ໂຄ

໑. ວິຘູປນທາຍກຕ຺ເຖຣອປທານວຓ຺ຓນາ

ປທຸມຸຕ຺ຕຣພຸທ຺ຘສ຺ສາຕິອາທິກໍ ອາຍສ຺ມໂຕ ວິຘູປນທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມຊິນວເຣສຸ ປູຣິຕປຸຎ຺ຎສມ຺ຠາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ວິຠວສມ຺ປນ຺ໂນ ສທ຺ຘາຊາໂຕ ຠຄວຕິ ປສນ຺ໂນ ຄິມ຺ຫກາເລ ສຸວຓ຺ຓຣຊຕມຸຕ຺ຕາມຓິມຍໍ ພີຊນິໍ ກາເຣຕ຺ວາ ຠຄວໂຕ ອທາສິ. ໂສ ເຕນ ປຸຎ຺ຎກມ຺ເມນ ເທເວສຸ ຈ ມນຸສ຺ເສສຸ ຈ ສໍສຣນ຺ໂຕ ທ຺ເວ ສມ຺ປຕ຺ຕິໂຍ ອນຸຠວິຕ຺ວາ ອິມສ຺ສ ອມ຺ຫາກໍ ສມ຺ມາສມ຺ພຸທ຺ຘສ຺ສ ອຸປ຺ປນ຺ນກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ຆຣພນ຺ຘເນນ ພນ຺ຘິຕ຺ວາ ຆຣາວາເສ ອາທີນວໍ ທິສ຺ວາ ປພ຺ພຊ຺ຊາຍ ຈ ອານິສໍສໍ ທິສ຺ວາ ສທ຺ຘາສມ຺ປນ຺ໂນ ສາສເນ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ນຈິຣສ຺ເສວ ອຣຫາ ອໂຫສິ.

໑. ໂສ ‘‘ເກນ ມຍາ ປຸຎ຺ຎກມ຺ເມນ ອຍໍ ໂລກຸຕ຺ຕຣສມ຺ປຕ຺ຕິ ລທ຺ຘາ’’ຕິ ອຕ຺ຕໂນ ປຸພ຺ພກມ຺ມໍ ອນຸສ຺ສຣນ຺ໂຕ ຕໍ ປຈ຺ຈກ຺ຂໂຕ ຎຕ຺ວາ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕ຺ຕຣພຸທ຺ຘສ຺ສາຕິອາທິມາຫ. ຕໍ ເຫຏ຺ຐາ ວຸຕ຺ຕຕ຺ຖເມວ. ພີຊນິກາ ມຍາ ທິນ຺ນາຕິ ວິເສເສນ ສນ຺ຕາປຍນ຺ຕານໍ ສຕ຺ຕານໍ ສນ຺ຕາປໍ ນິພ຺ພາເປນ຺ຕິ ສີຕລໍ ວາຕໍ ຊເນຕີຕິ ພີຊນີ, ພີຊນີເຍວ ພີຊນິກາ, ສາ ສຕ຺ຕຣຕນມຍາ ວິຊ຺ໂຊຕມານາ ພີຊນິກາ ມຍາ ກາຣາເປຕ຺ວາ ທິນ຺ນາຕິ ອຕ຺ໂຖ.

ວິຘູປນທາຍກຕ຺ເຖຣອປທານວຓ຺ຓນາ ສມຕ຺ຕາ.

໒. ສຕຣໍສິຕ຺ເຖຣອປທານວຓ຺ຓນາ

ອຸຈ຺ຈິຍໍ ເສລມາຣຸຍ຺ຫາຕິອາທິກໍ ອາຍສ຺ມໂຕ ສຕຣໍສິຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສກ຺ກຏພ຺ຍາກຣເຓ ເວທຕ຺ຕເຍ ຈ ປາຣງ຺ຄໂຕ ຆຣາວາສໍ ປຫາຍ ອຣຎ຺ຎໍ ປວິສິຕ຺ວາ ອິສິປພ຺ພຊ຺ຊໍ ປພ຺ພຊິຕ຺ວາ ຫິມວນ຺ເຕ ວາສໍ ກປ຺ເປສິ. ຕສ຺ມິໍ ສມເຍ ປທຸມຸຕ຺ຕໂຣ ຠຄວາ ວິເວກກາມຕາຍ ອຸຈ຺ຈໍ ເອກໍ ປພ຺ພຕໍ ອາຣຸຍ຺ຫ ຊລິຕຄ຺ຄິກ຺ຂນ຺ໂຕ ວິຍ ນິສີທິ. ຕໍ ຕຖານິສິນ຺ນໍ ຠຄວນ຺ຕໍ ທິສ຺ວາ ຕາປໂສ ໂສມນສ຺ສຊາໂຕ ອຎ຺ຊລິໍ ປຄ຺ຄຍ຺ຫ ອເນເກຫິ ກາຣເຓຫິ ໂຖເມສິ. ໂສ ເຕນ ປຸຎ຺ຎກມ຺ເມນ ຕໂຕ ຈຸໂຕ ຉສຸ ກາມາວຈຣເທເວສຸ ທິພ຺ພສມ຺ປຕ຺ຕິໍ ອນຸຠວິຕ຺ວາ ຕໂຕ ມນຸສ຺ສໂລເກ ສຕຣໍສີ ນາມ ຈກ຺ກວຕ຺ຕີ ຣາຊາ ຫຸຕ຺ວາ ນິພ຺ພຕ຺ຕິ. ຕມ຺ປິ ສມ຺ປຕ຺ຕິໍ ອເນກກ຺ຂຕ຺ຕຸໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ປຸພ຺ພປຸຎ຺ຎສມ຺ຠາຣວເສນ ຎາຓສ຺ສ ປຣິປກ຺ກຕ຺ຕາ ສຕ຺ຕວສ຺ສິໂກວ ປພ຺ພຊິຕ຺ວາ ອຣຫຕ຺ຕໍ ປາປຸຓິ.

໘-໙. ໂສ ‘‘ອຫໍ ເກນ ກມ຺ເມນ ສຕ຺ຕວສ຺ສິໂກວ ສນ຺ຕິປທໍ ອນຸປ຺ປຕ຺ໂຕສ຺ມີ’’ຕິ ສຣມາໂນ ປຸພ຺ພກມ຺ມໍ ຎາເຓນ ປຈ຺ຈກ຺ຂໂຕ ທິສ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ອຸທານວເສນ ປກາເສນ຺ໂຕ ອຸຈ຺ຈິຍໍ ເສລມາຣຸຍ຺ຫາຕິອາທິມາຫ. ຕຕ຺ຖ ອຸຈ຺ຈິຍນ຺ຕິ ອຸຈ຺ຈໍ ເສລມຍໍ ປພ຺ພຕໍ ອາຣຸຍ຺ຫ ນິສີທິ ປທຸມຸຕ຺ຕໂຣຕິ ສມ຺ພນ຺ໂຘ. ປພ຺ພຕສ຺ສາວິທູຣມ຺ຫີຕິ ຠຄວໂຕ ນິສິນ຺ນສ຺ສ ປພ຺ພຕສ຺ສ ອາສນ຺ນຏ຺ຐາເນຕິ ອຕ຺ໂຖ. ພ຺ຣາຫ຺ມໂຓ ມນ຺ຕປາຣຄູຕິ ມນ຺ຕສງ຺ຂາຕສ຺ສ ເວທຕ຺ຕຍສ຺ສ ປາຣໍ ປຣິໂຍສານໍ ໂກຏິໍ ຄໂຕ ເອໂກ ພ຺ຣາຫ຺ມໂຓຕິ ອຕ຺ໂຖ, ອຎ຺ຎໍ ວິຍ ອຕ຺ຕານໍ ນິທ຺ທິສຕິ ອຍໍ ມນ຺ຕປາຣຄູຕິ. ອຸປວິຏ຺ຐໍ ມຫາວີຣນ຺ຕິ ຕສ຺ມິໍ ປພ຺ພເຕ ນິສິນ຺ນໍ ວີຣວນ຺ຕໍ ຊິນໍ, ກິໍ ວິສິຏ຺ຐໍ? ເທວເທວໍ ສກລຉກາມາວຈຣພ຺ຣຫ຺ມເທວານໍ ອຕິເທວໍ ນຣາສຠໍ ນຣານໍ ອາສຕໍ ເສຏ຺ຐໍ ໂລກນາຍກໍ ສກລສຕ຺ຕໂລກໍ ນຍນ຺ຕໍ ນິພ຺ພານໍ ປາເປນ຺ຕໍ ອຫໍ ອຎ຺ຊລິໍ ທສນຂສໂມຘານຎ຺ຊລິປຸຏໍ ສິຣສິ ມຸທ຺ຘນິ ປຄ຺ຄເຫຕ຺ວານ ປຕິຏ຺ຐເປຕ຺ວາ ສນ຺ຖວິໍ ສຸຏ຺ຐຸໍ ໂຖເມສິນ຺ຕິ ສມ຺ພນ຺ໂຘ.

໑໒. ອຠາສຖາຕິ ‘‘ເຍນາຍໍ ອຎ຺ຊລີ ທິນ຺ໂນ…ເປ… ອຣຫາ ໂສ ຠວິສ຺ສຕີ’’ຕິ ພ຺ຍາກາສິ. ເສສໍ ອຸຕ຺ຕານຕ຺ຖເມວາຕິ.

ສຕຣໍສິຕ຺ເຖຣອປທານວຓ຺ຓນາ ສມຕ຺ຕາ.

໓. ສຍນທາຍກຕ຺ເຖຣອປທານວຓ຺ຓນາ

ປທຸມຸຕ຺ຕຣພຸທ຺ຘສ຺ສາຕິອາທິກໍ ອາຍສ຺ມໂຕ ສຍນທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຆຣາວາສໍ ສຓ຺ຐເປຕ຺ວາ ສຸຂມນຸຠວນ຺ໂຕ ສຕ຺ຖຸ ຘມ຺ມເທສນໍ ສຸຕ຺ວາ ສຕ຺ຖຣິ ປສນ຺ໂນ ທນ຺ຕສຸວຓ຺ຓຣຊຕມຸຕ຺ຕມຓິມຍໍ ມຫາຣຫໍ ມຎ຺ຈໍ ກາຣາເປຕ຺ວາ ຈີນປຏ຺ຏກມ຺ພລາທີນິ ອຕ຺ຖຣິຕ຺ວາ ສຍນຕ຺ຖາຍ ຠຄວໂຕ ອທາສິ. ຠຄວາ ຕສ຺ສ ອນຸຄ຺ຄຫໍ ກໂຣນ຺ໂຕ ຕຕ຺ຖ ສຍິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ຕທນຸຣູປໍ ອາກາສຄມນສຸຂເສຍ຺ຍາທິສຸຂໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ເນ ເອກສ຺ມິໍ ກຸເລ ນິພ຺ພຕ຺ຕິຕ຺ວາ ວິຎ຺ຎຸຕໍ ປາປຸຓິຕ຺ວາ ສຕ຺ຖຸ ຘມ຺ມເທສນໍ ສຸຕ຺ວາ ປສນ຺ນມານໂສ ປພ຺ພຊິຕ຺ວາ ວິປສ຺ສນ຺ໂຕ ນຈິຣສ຺ເສວ ອຣຫາ ອໂຫສິ.

໒໐. ໂສ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕ຺ຕຣພຸທ຺ຘສ຺ສາຕິອາທິມາຫ. ຕໍ ເຫຏ຺ຐາ ວຸຕ຺ຕຕ຺ຖເມວ.

໒໑. ສຸເຂຕ຺ເຕ ພີຊສມ຺ປທາຕິ ຍຖາ ຕິຓກຈວຣຣຫິເຕ ກທ຺ທມາທິສມ຺ປນ຺ເນ ສຸເຂຕ຺ເຕ ວຸຕ຺ຕພີຊານິ ສາທຸຜລານິ ນິປ຺ຜາເທນ຺ຕິ, ເອວເມວ ຣາຄໂທສາທິທິຍຑ຺ຒສຫສ຺ສກິເລສສງ຺ຂາຕຕິຓກຈວຣຣຫິເຕ ສຸທ຺ຘສນ຺ຕາເນ ປຸຎ຺ຎກ຺ເຂຕ຺ເຕ ວຸຕ຺ຕທານານິ ອປ຺ປານິປິ ສມານານິ ມຫປ຺ຜລານິ ໂຫນ຺ຕີຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ສຍນທາຍກຕ຺ເຖຣອປທານວຓ຺ຓນາ ສມຕ຺ຕາ.

໔. ຄນ຺ໂຘທກິຍຕ຺ເຖຣອປທານວຓ຺ຓນາ

ປທຸມຸຕ຺ຕຣພຸທ຺ຘສ຺ສາຕິອາທິກໍ ອາຍສ຺ມໂຕ ຄນ຺ໂຘທກິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມມຸນິວເຣສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ປຣິນິພ຺ພຸເຕ ຠຄວຕິ ນຄຣວາສິໂນ ໂພຘິປູຊໍ ກຸຣຸມາເນ ທິສ຺ວາ ວິຈິຕ຺ຕຆເຏ ຈນ຺ທນກປ຺ປຸຣາຄຣຸອາທິມິສ຺ສກສຸຄນ຺ໂຘທເກນ ປູເຣຕ຺ວາ ໂພຘິຣຸກ຺ຂໍ ອຠິສິຎ຺ຈິ. ຕສ຺ມິໍ ຂເຓ ເທໂວ ມຫາຘາຣາຫິ ປວສ຺ສິ. ຕທາ ໂສ ອສນິເວເຄນ ກາລໍ ກໂຕ. ເຕເນວ ປຸຎ຺ຎກມ຺ເມນ ເທວໂລເກ ນິພ຺ພຕ຺ຕິ, ຕຕ຺ເຖວ ຐິໂຕ ‘‘ອໂຫ ພຸທ຺ໂຘ, ອໂຫ ຘມ຺ໂມ’’ຕິອາທິຄາຖາໂຍ ອຠາສິ. ເອວໍ ໂສ ເທວມນຸສ຺ເສສຸ ສມ຺ປຕ຺ຕິໂຍ ອນຸຠວິຕ຺ວາ ສພ຺ພປຣິຬາຫວິປ຺ປມຸຕ຺ໂຕ ນິພ຺ພຕ຺ຕນິພ຺ພຕ຺ຕຏ຺ຐາເນ ສີຕິຠາວມຸປຄໂຕ ສຸຂິໂຕ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຖຣິ ປສນ຺ໂນ ປພ຺ພຊິຕ຺ວາ ກມ຺ມຏ຺ຐານໍ ອາຣຠິຕ຺ວາ ວິປສ຺ສນ຺ໂຕ ນຈິຣສ຺ເສວ ອຣຫຕ຺ຕໍ ປາປຸຓິ. ປຸພ຺ເພ ກຕປຸຎ຺ເຎນ ຄນ຺ໂຘທກິຍຕ຺ເຖໂຣຕິ ປາກໂຏ ອໂຫສິ.

໒໕. ໂສ ເອກທິວສໍ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕຣສ຺ສາຕິອາທິມາຫ. ຕໍ ວຸຕ຺ຕຕ຺ຖເມວ. ມຫາໂພຘິມໂຫ ອຫູຕິ ມຫາໂພຘິຣຸກ຺ຂສ຺ສ ປູຊາ ອໂຫສີຕິ ອຕ຺ໂຖ. ວິຈິຕ຺ຕໍ ຆຏມາທາຍາຕິ ອເນເກຫິ ຈິຕ຺ຕກມ຺ມສຸວຓ຺ຓກມ຺ເມຫິ ວິຈິຕ຺ຕໍ ໂສຠມານໍ ຄນ຺ໂຘທກປຸຓ຺ຓໍ ຆຏໍ ຄເຫຕ຺ວາຕິ ອຕ຺ໂຖ. ຄນ຺ໂຘທກມທາສຫນ຺ຕິ ຄນ຺ໂຘທກໍ ອທາສິໍ, ອຫໍ ຄນ຺ໂຘທເກນ ອຠິສິຎ຺ຈິນ຺ຕິ ອຕ຺ໂຖ.

໒໖. ນ຺ຫານກາເລ ຈ ໂພຘິຍາຕິ ໂພຘິຍາ ປູຊາກຣຓສມເຍຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ຄນ຺ໂຘທກິຍຕ຺ເຖຣອປທານວຓ຺ຓນາ ສມຕ຺ຕາ.

໕. ໂອປວຍ຺ຫຕ຺ເຖຣອປທານວຓ຺ຓນາ

ປທຸມຸຕ຺ຕຣພຸທ຺ຘສ຺ສາຕິອາທິກໍ ອາຍສ຺ມໂຕ ໂອປວຍ຺ຫຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣຊິນາທິຈ຺ເຈ ໂລເກ ປາຕຸຠູເຕ ເອກສ຺ມິໍ ວິຠວສມ຺ປນ຺ນກຸເລ ນິພ຺ພຕ຺ໂຕ ວຸທ຺ຘິມນ຺ວາຍ ມຫທ຺ຘໂນ ມຫາໂຠໂຄ ຆຣາວາສໍ ວສມາໂນ ສາສເນ ປສນ຺ໂນ ສຕ຺ຖຣິ ປສາທພຫຸມາໂນ ອາຊານີເຍນ ສິນ຺ຘເວນ ປູຊໍ ອກາສິ, ປູເຊຕ຺ວາ ຈ ປນ ‘‘ພຸທ຺ຘາທີນໍ ສມຓານໍ ຫຕ຺ຖິອສ຺ສາທໂຍ ນ ກປ຺ປນ຺ຕິ, ກປ຺ປິຍຠຓ຺ຑໍ ທສ຺ສາມີ’’ຕິ ຈິນ຺ເຕຕ຺ວາ ຕໍ ອຄ຺ຆາເປຕ຺ວາ ຕທຄ຺ຆນເກນ ກຫາປເຓນ ກປ຺ປິຍໍ ກປ຺ປາສິກກມ຺ພລໂກຊວາທິກໍ ຈີວຣໍ ກປ຺ປູຣຕກ຺ໂກລາທິກໍ ເຠສຊ຺ຊປຣິກ຺ຂາຣຎ຺ຈ ອທາສິ. ໂສ ເຕນ ປຸຎ຺ຎກມ຺ເມນ ຍາວຕາຍຸກໍ ຐຕ຺ວາ ຕໂຕ ຈຸໂຕ ເທເວສຸ ຈ ມນຸສ຺ເສສຸ ຈ ຫຕ຺ຖິອສ຺ສາທິອເນກວາຫນສມ຺ປນ຺ໂນ ສຸຂໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສທ຺ຘາສມ຺ປນ຺ໂນ ສາສເນ ປພ຺ພຊິຕ຺ວາ ກມ຺ມຏ຺ຐານໍ ຄເຫຕ຺ວາ ວິປສ຺ສນໍ ວຑ຺ເຒຕ຺ວາ ມຄ຺ຄປຏິປາຏິຍາ ອຣຫຕ຺ເຕ ປຕິຏ຺ຐາສິ, ປຸພ຺ເພ ກຕປຸຎ຺ຎສມ຺ຠາຣວເສນ ໂອປວຍ຺ຫຕ຺ເຖໂຣຕິ ປາກໂຏ ອໂຫສິ.

໓໓. ໂສ ‘‘ເກນ ນຸ ໂຂ ກາຣເຓນ ອິທໍ ມຍາ ສນ຺ຕິປທໍ ອຘິຄຕ’’ນ຺ຕິ ອຸປຘາເຣນ຺ໂຕ ປຸພ຺ພກມ຺ມໍ ຎາເຓນ ປຈ຺ຈກ຺ຂໂຕ ຎຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ອຸທານວເສນ ປກາເສນ຺ໂຕ ປທຸມຸຕ຺ຕຣພຸທ຺ຘສ຺ສາຕິອາທິມາຫ. ຕໍ ວຸຕ຺ຕຕ຺ຖເມວ. ອາຊານີຍມທາສຫນ຺ຕິ ອາຊານີຍໍ ອຸຕ຺ຕມຊາຕິສິນ຺ຘວໍ ອຫໍ ອທາສິໍ ປູເຊສິນ຺ຕິ ອຕ຺ໂຖ.

໓໕. ສປຕ຺ຕຠາໂຣຕິ ສສ຺ສ ອຕ຺ຕໂນ ປຕ຺ຕານິ ອຏ຺ຐ ປຣິກ຺ຂາຣານິ ຠາຣານິ ຍສ຺ສ ໂສ ສປຕ຺ຕຠາໂຣ, ອຏ຺ຐປຣິກ຺ຂາຣຍຸຕ຺ໂຕຕິ ອຕ຺ໂຖ.

໓໖. ຂມນີຍມທາສຫນ຺ຕິ ຂມນີຍໂຍຄ຺ຄໍ ຈີວຣາທິກປ຺ປິຍປຣິກ຺ຂາຣນ຺ຕິ ອຕ຺ໂຖ.

໔໐. ຈຣິໂມຕິ ປຣິໂຍສາໂນ ໂກຏິປ຺ປຕ຺ໂຕ ຠໂວຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ໂອປວຍ຺ຫຕ຺ເຖຣອປທານວຓ຺ຓນາ ສມຕ຺ຕາ.

໖. ສປຣິວາຣາສນຕ຺ເຖຣອປທານວຓ຺ຓນາ

ປທຸມຸຕ຺ຕຣພຸທ຺ຘສ຺ສາຕິອາທິກໍ ອາຍສ຺ມໂຕ ສປຣິວາຣາສນຕ຺ເຖຣສ຺ສ ອປທານໍ. ໂສປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວສຸ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ວິຠວສມ຺ປນ຺ເນ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ສທ຺ຘາຊາໂຕ ສາສເນ ປສນ຺ໂນ ທານຜລໍ ສທ຺ທຫນ຺ໂຕ ນານຄ຺ຄຣສໂຠຊເນນ ຠຄວໂຕ ປິຓ຺ຑປາຕໍ ອທາສິ, ທຕ຺ວາ ຈ ປນ ໂຠຊນສາລາຍໍ ໂຠຊນຕ຺ຖາຍ ນິສິນ຺ນາສນໍ ຊາຕິສຸມນມລ຺ລິກາທີຫິ ອລງ຺ກຣິ. ຠຄວາ ຈ ຠຕ຺ຕານຸໂມທນມກາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອເນກວິຘໍ ສມ຺ປຕ຺ຕິໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ເນ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ສທ຺ໂຘ ປສນ຺ໂນ ປພ຺ພຊິຕ຺ວາ ນ ຈິຣສ຺ເສວ ອຣຫາ ອໂຫສິ.

໔໓. ໂສ ເອວໍ ປຕ຺ຕສນ຺ຕິປໂທ ‘‘ເກນ ນຸ ໂຂ ປຸຎ຺ເຎນ ອິທໍ ສນ຺ຕິປທໍ ອນຸປ຺ປຕ຺ຕ’’ນ຺ຕິ ຎາເຓນ ອຸປຘາເຣນ຺ໂຕ ປຸພ຺ພກມ຺ມໍ ທິສ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕ຺ຕຣພຸທ຺ຘສ຺ສາຕິອາທິມາຫ. ຕໍ ວຸຕ຺ຕຕ຺ຖເມວ. ປິຓ຺ຑປາຕໍ ອທາສຫນ຺ຕິ ຕຕ຺ຖ ຕຕ຺ຖ ລທ຺ຘານໍ ປິຓ຺ຑານໍ ກພຬໍ ກພຬໍ ກຕ຺ວາ ປາຕພ຺ພໂຕ ຂາທິຕພ຺ພໂຕ ອາຫາໂຣ ປິຓ຺ຑປາໂຕ, ຕໍ ປິຓ຺ຑປາຕໍ ຠຄວໂຕ ອທາສິໍ, ຠຄວນ຺ຕໍ ໂຠເຊສິນ຺ຕິ ອຕ຺ໂຖ.

໔໔. ອກິຕ຺ຕຍິ ປິຓ຺ຑປາຕນ຺ຕິ ມຍາ ທິນ຺ນປິຓ຺ຑປາຕສ຺ສ ຄຸຓໍ ອານິສໍສໍ ປກາເສສີຕິ ອຕ຺ໂຖ.

໔໘. ສໍວຸໂຕ ປາຕິໂມກ຺ຂສ຺ມິນ຺ຕິ ປາຕິໂມກ຺ຂສໍວຣສີເລນ ສໍວຸໂຕ ປິຫິໂຕ ປຏິຈ຺ຉນ຺ໂນຕິ ອຕ຺ໂຖ. ອິນ຺ທ຺ຣິເຍສຸ ຈ ປຎ຺ຈສູຕິ ຈກ຺ຂຸນ຺ທ຺ຣິຍາທີສຸ ປຎ຺ຈສຸ ອິນ຺ທ຺ຣິເຍສຸ ຣູປາທີຫິ ໂຄປິໂຕ ອິນ຺ທ຺ຣິຍສໍວຣສີລຎ຺ຈ ໂຄປິໂຕຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ສປຣິວາຣາສນຕ຺ເຖຣອປທານວຓ຺ຓນາ ສມຕ຺ຕາ.

໗. ປຎ຺ຈທີປກຕ຺ເຖຣອປທານວຓ຺ຓນາ

ປທຸມຸຕ຺ຕຣພຸທ຺ຘສ຺ສາຕິອາທິກໍ ອາຍສ຺ມໂຕ ປຎ຺ຈທີປກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອຸປ຺ປນ຺ນຸປ຺ປນ຺ນຠເວສຸ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ຆຣາວາເສ ວສນ຺ໂຕ ຠຄວໂຕ ຘມ຺ມໍ ສຸຕ຺ວາ ສມ຺ມາທິຏ຺ຐິຍໍ ປຕິຏ຺ຐິໂຕ ສທ຺ໂຘ ປສນ຺ໂນ ມຫາຊເນຫິ ໂພຘິປູຊໍ ກຍິຣມານໍ ທິສ຺ວາ ສຍມ຺ປິ ໂພຘິໍ ປຣິວາເຣຕ຺ວາ ທີປໍ ຊາເລຕ຺ວາ ປູເຊສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ຈກ຺ກວຕ຺ຕິສມ຺ປຕ຺ຕິອາທໂຍ ອນຸຠວິຕ຺ວາ ສພ຺ພຕ຺ເຖວ ອຸປ຺ປນ຺ນຠເວ ຊລມາໂນ ໂຊຕິສມ຺ປນ຺ນວິມານາທີສຸ ວສິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ວິຠວສມ຺ປນ຺ເນ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ສທ຺ຘາຊາໂຕ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ, ທີປປູຊານິສ຺ສນ຺ເທນ ທີປກຕ຺ເຖໂຣຕິ ປາກໂຏ.

໕໐. ໂສ ເອກທິວສໍ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕ຺ຕຣພຸທ຺ຘສ຺ສາຕິອາທິມາຫ. ຕໍ ວຸຕ຺ຕຕ຺ຖເມວ. ອຸຊຸທິຏ຺ຐິ ອໂຫສຫນ຺ຕິ ວງ຺ກໍ ມິຈ຺ຉາທິຏ຺ຐິໍ ຉຑ຺ເຑຕ຺ວາ ອຸຊຸ ອວງ຺ກໍ ນິພ຺ພານາຠິມຸຂໍ ປາປຸຓນສມ຺ມາທິຏ຺ຐິ ອໂຫສິນ຺ຕິ ອຕ຺ໂຖ.

໕໑. ປທີປທານໍ ປາທາສິນ຺ຕິ ເອຕ຺ຖ ປກາເຣນ ທິພ຺ພຕິ ໂຊຕຕີຕິ ປທີໂປ, ຕສ຺ສ ທານໍ ປທີປທານໍ, ຕໍ ອທາສິໍ ປທີປປູຊໍ ອກາສິນ຺ຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ປຎ຺ຈທີປກຕ຺ເຖຣອປທານວຓ຺ຓນາ ສມຕ຺ຕາ.

໘. ຘຊທາຍກຕ຺ເຖຣອປທານວຓ຺ຓນາ

ປທຸມຸຕ຺ຕຣພຸທ຺ຘສ຺ສາຕິອາທິກໍ ອາຍສ຺ມໂຕ ຘຊທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ສຕ຺ຖຣິ ປສີທິຕ຺ວາ ສຸນ຺ທເຣຫິ ອເນເກຫິ ວຕ຺ເຖຫິ ຘຊໍ ກາຣາເປຕ຺ວາ ຘຊປູຊໍ ອກາສິ. ໂສ ເຕນ ປຸຎ຺ຎກມ຺ເມນ ອຸປ຺ປນ຺ນຸປ຺ປນ຺ນຠເວ ອຸຈ຺ຈກຸເລ ນິພ຺ພຕ຺ໂຕ ປູຊນິໂຍ ອໂຫສິ. ອປຣຠາເຄ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ປຸຕ຺ຕທາເຣຫິ ວຑ຺ຒິຕ຺ວາ ມຫາໂຠໂຄ ຍສວາ ສທ຺ຘາຊາໂຕ ສຕ຺ຖຣິ ປສນ຺ໂນ ຆຣາວາສໍ ປຫາຍ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໕໗. ໂສ ປຕ຺ຕອຣຫຕ຺ຕຜໂລ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ອຕ຺ຕໂນ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕ຺ຕຣພຸທ຺ຘສ຺ສາຕິອາທິມາຫ. ຕສ຺ສຕ຺ໂຖ ປຸພ຺ເພ ວຸຕ຺ໂຕເຍວ. ຫຏ຺ໂຐ ຫຏ຺ເຐນ ຈິຕ຺ເຕນາຕິ ໂສມນສ຺ສສຫຄຕຈິຕ຺ຕຍຸຕ຺ຕຕ຺ຕາ ຫຏ຺ໂຐ ປຣິປຸຓ຺ຓຣູປກາໂຍ ສທ຺ຘາສມ຺ປຍຸຕ຺ຕຈິຕ຺ຕຕາຍ ຫຏ຺ເຐນ ຈິຕ຺ເຕນ ສນ຺ຕຸຏ຺ເຐນ ຈິຕ຺ເຕນາຕິ ອຕ຺ໂຖ. ຘຊມາໂຣປຍິໍ ອຫນ຺ຕິ ຘຸນາຕິ ກມ຺ປຕິ ຈລຕີຕິ ຘຊໍ, ຕໍ ຘຊໍ ອາໂຣປຍິໍ ເວຬຄ຺ເຄ ລຄ຺ເຄຕ຺ວາ ປູເຊສິນ຺ຕິ ອຕ຺ໂຖ.

໕໘-໙. ປຕິຕປຕ຺ຕານິ ຄຓ຺ຫິຕ຺ວາຕິ ປຕິຕານິ ໂພຘິປຕ຺ຕານິ ຄເຫຕ຺ວາ ອຫໍ ພຫິ ຉຑ຺ເຑສິນ຺ຕິ ອຕ຺ໂຖ. ອນ຺ໂຕສຸທ຺ຘໍ ພຫິສຸທ຺ຘນ຺ຕິ ອນ຺ໂຕ ຈິຕ຺ຕສນ຺ຕານນາມກາຍໂຕ ຈ ພຫິ ຈກ຺ຂຸໂສຕາທິຣູປກາຍໂຕ ຈ ສຸທ຺ຘິໍ ອຘິ ວິເສເສນ ມຸຕ຺ຕໍ ກິເລສໂຕ ວິມຸຕ຺ຕໍ ອນາສວໍ ສມ຺ພຸທ຺ຘໍ ວິຍ ສມ຺ມຸຂາ ອຸຕ຺ຕມໍ ໂພຘິໍ ອວນ຺ທິໍ ປຓາມມກາສິນ຺ຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ຘຊທາຍກຕ຺ເຖຣອປທານວຓ຺ຓນາ ສມຕ຺ຕາ.

໙. ປທຸມຕ຺ເຖຣອປທານວຓ຺ຓນາ

ຈຕຸສຈ຺ຈໍ ປກາເສນ຺ໂຕຕິອາທິກໍ ອາຍສ຺ມໂຕ ປທຸມຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕກຸສລສມ຺ຠາໂຣ ປທຸມຸຕ຺ຕຣມຸນິນາ ຘມ຺ມປຊ຺ໂຊເຕ ໂຊຕມາເນ ເອກສ຺ມິໍ ກຸລເຄເຫ ນິພ຺ພຕ຺ໂຕ ຆຣາວາສໍ ສຓ຺ຐເປຕ຺ວາ ໂຠຄສມ຺ປນ຺ໂນຕິ ປາກໂຏ. ໂສ ສຕ຺ຖຣິ ປສີທິຕ຺ວາ ມຫາຊເນນ ສທ຺ຘິໍ ຘມ຺ມໍ ສຸຓນ຺ໂຕ ຘເຊນ ສຫ ປທຸມກລາປໍ ຄເຫຕ຺ວາ ອຏ຺ຐາສິ, ສຘຊໍ ຕໍ ປທຸມກລາປໍ ອາກາສມຸກ຺ຂິປິໍ, ຕໍ ອຈ຺ຉຣິຍໍ ທິສ຺ວາ ອຕິວິຍ ໂສມນສ຺ສຊາໂຕ ອໂຫສິ. ໂສ ຍາວຊີວໍ ກຸສລໍ ກຕ຺ວາ ຊີວິຕປຣິໂຍສາເນ ສຄ຺ເຄ ນິພ຺ພຕ຺ໂຕ ຘຊມິວ ຉກາມາວຈເຣ ປາກໂຏ ປູຊິໂຕ ຈ ທິພ຺ພສມ຺ປຕ຺ຕິມນຸຠວິຕ຺ວາ ມນຸສ຺ເສສຸ ຈ ຈກ຺ກວຕ຺ຕິສມ຺ປຕ຺ຕິມນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ເນ ສທ຺ຘາສມ຺ປນ຺ເນ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ສທ຺ຘາຊາໂຕ ປຎ຺ຈວສ຺ສິໂກວ ປພ຺ພຊິຕ຺ວາ ນຈິຣສ຺ເສວ ອຣຫາ ຫຸຕ຺ວາ ກຕປຸຎ຺ຎນາເມນ ປທຸມຕ຺ເຖໂຣຕິ ປາກໂຏ.

໖໗. ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຈຕຸສຈ຺ຈໍ ປກາເສນ຺ໂຕຕິອາທິມາຫ. ຕຕ຺ຖ ສຈ຺ຈນ຺ຕິ ຕຖໍ ອວິຕຖໍ ອວິປຣີຕໍ ສຈ຺ຈໍ, ທຸກ຺ຂສມຸທຍນິໂຣຘມຄ຺ຄວເສນ ຈຕ຺ຕາຣິ ສຈ຺ຈານິ ສມາຫຏານີຕິ ຈຕຸສຈ຺ຈໍ, ຕໍ ຈຕຸສຈ຺ຈໍ ປກາເສນ຺ໂຕ ໂລເກ ປາກຏໍ ກໂຣນ຺ໂຕຕິ ອຕ຺ໂຖ. ວຣຘມ຺ມປ຺ປວຕ຺ຕໂກຕິ ອຸຕ຺ຕມຘມ຺ມປ຺ປວຕ຺ຕໂກ ປກາສໂກຕິ ອຕ຺ໂຖ. ອມຕໍ ວຸຏ຺ຐິນ຺ຕິ ອມຕມຫານິພ຺ພານວຸຏ຺ຐິຘາຣໍ ປວສ຺ສນ຺ໂຕ ປຄ຺ຆຣນ຺ໂຕ ສເທວກໍ ໂລກໍ ເຕເມນ຺ໂຕ ສພ຺ພກິເລສປຣິຬາຫໍ ນິພ຺ພາເປນ຺ໂຕ ຘມ຺ມວສ຺ສໍ ວສ຺ສຕີຕິ ອຕ຺ໂຖ.

໖໘. ສຘຊໍ ປທຸມໍ ຄຍ຺ຫາຕິ ຘເຊນ ສຫ ເອກໂຕ ກຕ຺ວາ ປທຸມໍ ປທຸມກລາປໍ ຄເຫຕ຺ວາຕິ ອຕ຺ໂຖ. ອຑ຺ຒໂກເສ ຐິໂຕ ອຫນ຺ຕິ ອຸໂຠ ອຸກ຺ຂິປິຕ຺ວາ ຐິໂຕ ອຫນ຺ຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ປທຸມຕ຺ເຖຣອປທານວຓ຺ຓນາ ສມຕ຺ຕາ.

໑໐. ອສນໂພຘິຍຕ຺ເຖຣອປທານວຓ຺ຓນາ

ຊາຕິຍາ ສຕ຺ຕວສ຺ໂສຫນ຺ຕິອາທິກໍ ອາຍສ຺ມໂຕ ອສນໂພຘິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ຕິສ຺ສສ຺ສ ຠຄວໂຕ ກາເລ ອຎ຺ຎຕຣສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ສຸຂປ຺ປຕ຺ໂຕ ສາສເນ ປສນ຺ໂນ ອສນໂພຘິໂຕ ຜລໍ ຄເຫຕ຺ວາ ຕໂຕ ວຸຏ຺ຐິຕໂພຘິຕຣຸເຓ ຄເຫຕ຺ວາ ໂພຘິໍ ໂຣເປສິ, ຍຖາ ນ ວິນສ຺ສຕິ ຕຖາ ອຸທກາສິຎ຺ຈນາທິກມ຺ເມນ ຣກ຺ຂິຕ຺ວາ ປູເຊສິ. ໂສ ເຕນ ປຸຎ຺ເຎນ ເທວມນຸສ຺ເສສຸ ສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ປຣິປກ຺ກສມ຺ຠາຣຕ຺ຕາ ສຕ຺ຕວສ຺ສິໂກວ ສມາໂນ ປພ຺ພຊິຕ຺ວາ ຂຸຣຄ຺ເຄເຍວ ອຣຫຕ຺ຕໍ ປາປຸຓິ, ປຸຣາກຕປຸຎ຺ຎນາເມນ ອສນໂພຘິຍຕ຺ເຖໂຣຕິ ປາກໂຏ.

໗໘. ໂສ ປຸພ຺ພສມ຺ຠາຣມນຸສ຺ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຊາຕິຍາ ສຕ຺ຕວສ຺ໂສຫນ຺ຕິອາທິມາຫ. ຕຕ຺ຖ ຊາຕິຍາຕິ ມາຕຸຄພ຺ຠໂຕ ນິກ຺ຂນ຺ຕກາລໂຕ ປຏ຺ຐາຍາຕິ ອຕ຺ໂຖ. ສຕ຺ຕວສ຺ໂສ ປຣິປຸຓ຺ຓສຣໂທ ອຫໍ ໂລກນາຍກໍ ຕິສ຺ສໍ ຠຄວນ຺ຕໍ ອທ຺ທສນ຺ຕິ ສມ຺ພນ຺ໂຘ. ປສນ຺ນຈິຕ຺ໂຕ ສຸມໂນຕິ ປກາເຣນ ປສນ຺ນອນາລຸຬິຕອວິກມ຺ປິຕຈິຕ຺ໂຕ, ສຸມໂນ ສຸນ຺ທຣມໂນ ໂສມນສ຺ສສຫຄຕຈິຕ຺ໂຕຕິ ອຕ຺ໂຖ.

໗໙. ຕິສ຺ສສ຺ສາຫໍ ຠຄວໂຕຕິ ຕິກ຺ຂຕ຺ຕຸໍ ຊາໂຕຕິ ຕິສ຺ໂສ, ໂສ ມາຕຸຄພ຺ຠໂຕ, ມນຸສ຺ສຊາຕິໂຕ, ປຎ຺ຈກ຺ຂນ຺ຘໂຕ ຈ ມຸຕ຺ໂຕ ຫຸຕ຺ວາ ຊາໂຕ ນິພ຺ພຕ຺ໂຕ ພຸທ຺ໂຘ ຊາໂຕຕິ ອຕ຺ໂຖ. ຕສ຺ສ ຕິສ຺ສສ຺ສ ຠຄວໂຕ ຕາທິໂນ, ໂລກເຊຏ຺ຐສ຺ສ ອສນໂພຘິໍ ອຸຕ຺ຕມໍ ໂຣປຍິນ຺ຕິ ສມ຺ພນ຺ໂຘ.

໘໐. ອສໂນ ນາມເຘຍ຺ເຍນາຕິ ນາມປຎ຺ຎຕ຺ຕິຍາ ນາມສຎ຺ຎາຍ ອສໂນ ນາມ ອສນຣຸກ຺ໂຂ ໂພຘິ ອໂຫສີຕິ ອຕ຺ໂຖ. ຘຣຓີຣຸຫປາທໂປຕິ ວລ຺ລິຣຸກ຺ຂປພ຺ພຕຄງ຺ຄາສາຄຣາທໂຍ ຘາເຣຕີຕິ ຘຣຓີ, ກາ ສາ? ປຖວີ, ຕສ຺ສໍ ຣຸຫຕິ ປຕິຏ຺ຐຫຕີຕິ ຘຣຓີຣຸໂຫ, ປາເທນ ປິວຕີຕິ ປາທໂປ, ປາທສງ຺ຂາເຕນ ມູເລນ ສິຎ຺ຈິໂຕທກໍ ປິວຕິ ອາໂປຣສໍ ສິເນຫໍ ຘາເຣຕີຕິ ອຕ຺ໂຖ. ຘຣຓີຣຸໂຫ ຈ ໂສ ປາທໂປ ຈາຕິ ຘຣຓີຣຸຫປາທໂປ, ຕໍ ອຸຕ຺ຕມໍ ອສນໍ ໂພຘິໍ ປຎ຺ຈ ວສ຺ສານິ ປຣິຈຣິໍ ໂປເສສິນ຺ຕິ ອຕ຺ໂຖ.

໘໑. ປຸປ຺ຜິຕໍ ປາທປໍ ທິສ຺ວາຕິ ຕໍ ມຍາ ໂປສິຕໍ ອສນໂພຘິຣຸກ຺ຂໍ ປຸປ຺ຜິຕໍ ອຈ຺ຉຣໂຍຄ຺ຄຠູຕປຸປ຺ຜຕ຺ຕາ ອພ຺ຠຸຕໍ ໂລມຫໍສກຣຓໍ ທິສ຺ວາ ສກໍ ກມ຺ມໍ ອຕ຺ຕໂນ ກມ຺ມໍ ປກິຕ຺ເຕນ຺ໂຕ ປກາເຣນ ກຖຍນ຺ໂຕ ພຸທ຺ຘເສຏ຺ຐສ຺ສ ສນ຺ຕິກໍ ອຄມາສິນ຺ຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ອສນໂພຘິຍຕ຺ເຖຣອປທານວຓ຺ຓນາ ສມຕ຺ຕາ.

ຉຏ຺ຐວຄ຺ຄວຓ຺ຓນາ ສມຕ຺ຕາ.