໗. ສກຈິນ຺ຕນິຍວຄ຺ໂຄ

໑. ສກຈິນ຺ຕນິຍຕ຺ເຖຣອປທານວຓ຺ຓນາ

ປວນໍ ການນໍ ທິສ຺ວາຕິອາທິກໍ ອາຍສ຺ມໂຕ ສກຈິນ຺ຕນິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ຕສ຺ສ ຠຄວໂຕ ອາຍຸປຣິໂຍສາເນ ອຸປ຺ປນ຺ໂນ ຘຣມານໍ ຠຄວນ຺ຕໍ ອປາປຸຓິຕ຺ວາ ປຣິນິພ຺ພຸຕກາເລ ອິສິປພ຺ພຊ຺ຊໍ ປພ຺ພຊິຕ຺ວາ ຫິມວນ຺ເຕ ວສນ຺ໂຕ ວິເວກໍ ຣມຓີຍໍ ເອກໍ ວນໍ ປຕ຺ວາ ຕຕ຺ເຖເວກາຍ ກນ຺ທຣາຍ ປຸລິນເຈຕິຍໍ ກຕ຺ວາ ຠຄວຕິ ສຎ຺ຎໍ ກຕ຺ວາ ສຘາຕຸກສຎ຺ຎຎ຺ຈ ກຕ຺ວາ ວນປຸປ຺ເຜຫິ ປູເຊຕ຺ວາ ນມສ຺ສມາໂນ ປຣິຈຣິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ທ຺ວີສຸ ອຄ຺ຄໍ ອຄ຺ຄສມ຺ປຕ຺ຕິໍ ອຄ຺ຄຎ຺ຈ ຈກ຺ກວຕ຺ຕິສມ຺ປຕ຺ຕິໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຠວສມ຺ປນ຺ໂນ ສທ຺ຘາສມ຺ປນ຺ໂນ ສຕ຺ຖຣິ ປສີທິຕ຺ວາ ປພ຺ພຊິຕ຺ວາ ອຣຫາ ຉຬຠິຎ຺ໂຎ ອໂຫສິ.

໑. ໂສ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປວນໍ ການນໍ ທິສ຺ວາຕິອາທິມາຫ. ຕຕ຺ຖ ປວນນ຺ຕິ ປກາເຣນ ວນໍ ປຕ຺ຖຏໍ ວິຕ຺ຖິຓ຺ຓໍ ຄຫນຠູຕນ຺ຕິ ປວນໍ. ການນໍ ອວກຸຈ຺ຉິຕໍ ອານນໍ ອວຫນໍ ສຕຕໍ ສີຫພ຺ຍຄ຺ຆຍກ຺ຂຣກ຺ຂສມທ຺ທຫຕ຺ຖິອສ຺ສສຸປຓ຺ຓອຸຣເຄຫິ ວິຫງ຺ຄຄຓສທ຺ທກຸກ຺ກຸຏໂກກິເລຫິ ວາ ພຫລນ຺ຕິ ການນໍ, ຕໍ ການນສງ຺ຂາຕໍ ປວນໍ ມນຸສ຺ສສທ຺ທວິຣຫິຕຕ຺ຕາ ອປ຺ປສທ຺ທໍ ນິສ຺ສທ຺ທນ຺ຕິ ອຕ຺ໂຖ. ອນາວິລນ຺ຕິ ນ ອາວິລໍ ອຸປທ຺ທວຣຫິຕນ຺ຕິ ອຕ຺ໂຖ. ອິສີນໍ ອນຸຈິຓ຺ຓນ຺ຕິ ພຸທ຺ຘປຈ຺ເຈກພຸທ຺ຘອຣຫນ຺ຕຂີຓາສວສງ຺ຂາຕານໍ ອິສີນໍ ອນຸຈິຓ຺ຓໍ ນິເສວິຕນ຺ຕິ ອຕ຺ໂຖ. ອາຫຸຕີນໍ ປຏິຄ຺ຄຫນ຺ຕິ ອາຫຸນໍ ວຸຈ຺ຈຕິ ປູຊາສກ຺ກາຣໍ ປຏິຄ຺ຄຫໍ ເຄຫສທິສນ຺ຕິ ອຕ຺ໂຖ.

໒. ຖູປໍ ກຕ຺ວານ ເວຬຸນາຕິ ເວຬຸເປສິກາຫິ ເຈຕິຍໍ ກຕ຺ວາຕິ ອຕ຺ໂຖ. ນານາປຸປ຺ຜໍ ສໂມກິຣິນ຺ຕິ ຈມ຺ປກາທີຫິ ອເນເກຫິ ປຸປ຺ເຜຫິ ສໂມກິຣິໍ ປູເຊສິນ຺ຕິ ອຕ຺ໂຖ. ສມ຺ມຸຂາ ວິຍ ສມ຺ພຸທ຺ຘນ຺ຕິ ສຊີວມານສ຺ສ ສມ຺ພຸທ຺ຘສ຺ສ ສມ຺ມຸຂາ ອິວ ນິມ຺ມິຕໍ ອຸປ຺ປາທິຕໍ ເຈຕິຍໍ ອຫໍ ອຠິ ວິເສເສນ ວນ຺ທິໍ ປຓາມມກາສິນ຺ຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ສກຈິນ຺ຕນິຍຕ຺ເຖຣອປທານວຓ຺ຓນາ ສມຕ຺ຕາ.

໒. ອໂວປຸປ຺ຜິຍຕ຺ເຖຣອປທານວຓ຺ຓນາ

ວິຫາຣາ ອຠິນິກ຺ຂມ຺ມາຕິອາທິກໍ ອາຍສ຺ມໂຕ ອໂວປຸປ຺ຜິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິຂິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສທ຺ຘາສມ຺ປນ຺ໂນ ຘມ຺ມໍ ສຸຕ຺ວາ ໂສມນສ຺ສປ຺ປຕ຺ໂຕ ນານາປຸປ຺ຜານິ ອຸໂຠຫິ ຫຕ຺ເຖຫິ ຄເຫຕ຺ວາ ພຸທ຺ຘສ຺ສ ອຸປຣິ ອພ຺ຠຸກ຺ກິຣິ. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ສຄ຺ຄສມ຺ປຕ຺ຕິຎ຺ຈ ຈກ຺ກວຕ຺ຕິສມ຺ປຕ຺ຕິຎ຺ຈ ອນຸຠວິຕ຺ວາ ສພ຺ພຕ຺ຖ ປູຊິໂຕ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພໂຕ ວຸທ຺ຘິປ຺ປຕ຺ໂຕ ສາສເນ ປສີທິຕ຺ວາ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ. ອາ ສມນ຺ຕໂຕ ກາສຕິ ທິປ຺ປຕີຕິ ອາກາໂສ, ຕສ຺ມິໍ ອາກາເສ ປຸປ຺ຜານໍ ອວກິຣິຕຕ຺ຕາ ອໂວປຸປ຺ຜິຍຕ຺ເຖໂຣຕິ ປາກໂຏ.

໗. ເອວໍ ປຕ຺ຕສນ຺ຕິປໂທ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ວິຫາຣາ ອຠິນິກ຺ຂມ຺ມາຕິອາທິມາຫ. ຕຕ຺ຖ ວິຫາຣາຕິ ວິເສເສນ ຫຣຕິ ຈຕູຫິ ອິຣິຍາປເຖຫິ ອປຕນ຺ຕໍ ອຕ຺ຕຠາວໍ ອາຫຣຕິ ປວຕ຺ເຕຕິ ເອຕ຺ຖາຕິ ວິຫາໂຣ, ຕສ຺ມາ ວິຫາຣາ ອຠິ ວິເສເສນ ນິກ຺ຂມ຺ມ ນິກ຺ຂມິຕ຺ວາ. ອພ຺ຠຸຏ຺ຐາສິ ຈ ຈງ຺ກເມຕິ ຈງ຺ກມນຕ຺ຖາຍ ສຏ຺ຐິຣຕເນ ຈງ຺ກເມ ອຠິວິເສເສນ ອຸຏ຺ຐາສິ, ອຠິຣຸຫີຕິ ອຕ຺ໂຖ. ຈຕຸສຈ຺ຈໍ ປກາເສນ຺ໂຕຕິ ຕສ຺ມິໍ ຈງ຺ກເມ ຈງ຺ກມນ຺ໂຕ ທຸກ຺ຂສມຸທຍນິໂຣຘມຄ຺ຄສຈ຺ຈສງ຺ຂາຕໍ ຈຕຸສຈ຺ຈໍ ປກາເສນ຺ໂຕ ປາກຏໍ ກໂຣນ຺ໂຕ ອມຕໍ ປທໍ ນິພ຺ພານໍ ເທເສນ຺ໂຕ ວິຠຊນ຺ໂຕ ອຸຕ຺ຕານີກໂຣນ຺ໂຕ ຕສ຺ມິໍ ຈງ຺ກເມຕິ ສມ຺ພນ຺ໂຘ.

໘. ສິຂິສ຺ສ ຄິຣມຎ຺ຎາຍ, ພຸທ຺ຘເສຏ຺ຐສ຺ສ ຕາທິໂນຕິ ເສຏ຺ຐສ຺ສ ຕາທິຄຸຓສມງ຺ຄິສ຺ສ ສິຂິສ຺ສ ພຸທ຺ຘສ຺ສ ຄິຣໍ ສທ຺ທໍ ໂຆສໍ ອຎ຺ຎາຍ ຊານິຕ຺ວາ. ນານາປຸປ຺ຜໍ ຄເຫຕ຺ວານາຕິ ນາຄປຸນ຺ນາຄາທິອເນການິ ປຸປ຺ຜານິ ຄເຫຕ຺ວາ ອາຫຣິຕ຺ວາ. ອາກາສມ຺ຫິ ສໂມກິຣິນ຺ຕິ ຈງ຺ກມນ຺ຕສ຺ສ ຠຄວໂຕ ມຸທ຺ຘນິ ອາກາເສ ໂອກິຣິໍ ປູເຊສິໍ.

໙. ເຕນ ກມ຺ເມນ ທ຺ວິປທິນ຺ທາຕິ ທ຺ວິປທານໍ ເທວພ຺ຣຫ຺ມມນຸສ຺ສານໍ ອິນ຺ທ ປຘານຠູຕ. ນຣາສຠ ນຣານໍ ອາສຠຠູຕ. ປຕ຺ໂຕມ຺ຫິ ອຈລໍ ຐານນ຺ຕິ ຕຸມ຺ຫາກໍ ສນ຺ຕິເກ ປພ຺ພຊິຕ຺ວາ ອຈລໍ ຐານໍ ນິພ຺ພານໍ ປຕ຺ໂຕ ອມ຺ຫິ ຠວາມິ. ຫິຕ຺ວາ ຊຍປຣາຊຍນ຺ຕິ ທິພ຺ພມນຸສ຺ສສມ຺ປຕ຺ຕິສງ຺ຂາຕໍ ຊຍຎ຺ຈ ຈຕຸຣາປາຍທຸກ຺ຂສງ຺ຂາຕໍ ປຣາຊຍຎ຺ຈ ຫິຕ຺ວາ ຉຑ຺ເຑຕ຺ວາ ນິພ຺ພານໍ ປຕ຺ໂຕສ຺ມີຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ອໂວປຸປ຺ຜິຍຕ຺ເຖຣອປທານວຓ຺ຓນາ ສມຕ຺ໂຕ.

໓. ປຈ຺ຈາຄມນິຍຕ຺ເຖຣອປທານວຓ຺ຓນາ

ສິນ຺ຘຸຍາ ນທິຍາ ຕີເຣຕິອາທິກໍ ອາຍສ຺ມໂຕ ປຈ຺ຈາຄມນິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ສິນ຺ຘຸຍາ ຄງ຺ຄາຍ ສມີເປ ຈກ຺ກວາກໂຍນິຍໍ ນິພ຺ພຕ຺ໂຕ ປຸພ຺ພສມ຺ຠາຣຍຸຕ຺ຕຕ຺ຕາ ປາຓິໂນ ອຂາທນ຺ໂຕ ເສວາລເມວ ຠກ຺ຂຍນ຺ໂຕ ຈຣຕິ. ຕສ຺ມິໍ ສມເຍ ວິປສ຺ສິຠຄວາ ສຕ຺ຕານຸຄ຺ຄຫໍ ກໂຣນ຺ໂຕ ຕຕ຺ຖ ອຄມາສິ. ຕສ຺ມິໍ ຂເຓ ໂສ ຈກ຺ກວາໂກ ວິຊ຺ໂຊຕມານໍ ຠຄວນ຺ຕໍ ທິສ຺ວາ ປສນ຺ນມານໂສ ຕຸຓ຺ເຑນ ສາລຣຸກ຺ຂໂຕ ສາລປຸປ຺ຜໍ ຉິນ຺ທິຕ຺ວາ ອາຄມ຺ມ ປູເຊສິ. ໂສ ເຕເນວ ຈິຕ຺ຕປ຺ປສາເທນ ຕໂຕ ຈຸໂຕ ເທວໂລເກ ອຸປ຺ປນ຺ໂນ ອປຣາປຣໍ ຉກາມາວຈຣສມ຺ປຕ຺ຕິໍ ອນຸຠວິຕ຺ວາ ຕໂຕ ຈຸໂຕ ມນຸສ຺ສໂລເກ ອຸປ຺ປຊ຺ຊິຕ຺ວາ ຈກ຺ກວຕ຺ຕິສມ຺ປຕ຺ຕິອາທໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ປຸພ຺ພຈຣິຕວເສນ ສຕ຺ຖຣິ ປສນ຺ໂນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ, ຈກ຺ກວາໂກ ຫຸຕ຺ວາ ຠຄວນ຺ຕໍ ທິສ຺ວາ ກຕ຺ຖຈິ ຄນ຺ຕ຺ວາ ປຸປ຺ຜມາຫຣິຕ຺ວາ ປູຊິຕຕ຺ຕາ ປຸພ຺ພປຸຎ຺ຎນາເມນ ປຈ຺ຈາຄມນິຍຕ຺ເຖໂຣຕິ ປາກໂຏ.

໑໓. ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ສິນ຺ຘຸຍາ ນທິຍາ ຕີເຣຕິອາທິມາຫ. ສີຕິ ສທ຺ທໍ ກຸຣຸມານາ ຘຸນາຕິ ກມ຺ປຕີຕິ ສິນ຺ຘຸ, ນທຕິ ສທ຺ທໍ ກໂຣນ຺ໂຕ ຄຈ຺ຉຕີຕິ ນທິ. ຈກ຺ກວາໂກ ອຫໍ ຕທາຕິ ຈກ຺ກໍ ສີຆໍ ຄຈ຺ຉນ຺ຕໍ ອິວ ອຸທເກ ວາ ຖເລ ວາ ອາກາເສ ວາ ສີຆໍ ວາຕິ ຄຈ຺ຉຕີຕິ ຈກ຺ກວາໂກ. ຕທາ ວິປສ຺ສິໍ ຠຄວນ຺ຕໍ ທສ຺ສນກາເລ ອຫໍ ຈກ຺ກວາໂກ ອໂຫສິນ຺ຕິ ອຕ຺ໂຖ. ສຸທ຺ຘເສວາລຠກ຺ໂຂຫນ຺ຕິ ອຎ຺ຎໂຄຈຣອມິສ຺ສຕ຺ຕາ ສຸທ຺ຘເສວາລເມວ ຂາທນ຺ໂຕ ອຫໍ ວສາມິ. ປາເປສຸ ຈ ສຸສຎ຺ຎໂຕຕິ ປຸພ຺ພວາສນາວເສນ ປາປກຣເຓ ສຸຏ຺ຐຸ ສຎ຺ຎໂຕ ຕີຫິ ທ຺ວາເຣຫິ ສຎ຺ຎໂຕ ສຸສິກ຺ຂິໂຕ.

໑໔. ອທ຺ທສໍ ວິຣຊໍ ພຸທ຺ຘນ຺ຕິ ຣາຄໂທສໂມຫວິຣຫິຕຕ຺ຕາ ວິຣຊໍ ນິກ຺ກິເລສໍ ພຸທ຺ຘໍ ອທ຺ທສໍ ອທ຺ທກ຺ຂິໍ. ຄຈ຺ຉນ຺ຕໍ ອນິລຎ຺ຊເສຕິ ອນິລຎ຺ຊເສ ອາກາສປເຖ ຄຈ຺ຉນ຺ຕໍ ພຸທ຺ຘໍ. ຕຸຓ຺ເຑນ ມຍ຺ຫໍ ມຸຂຕຸຓ຺ເຑນ ຕາລໍ ສາລປຸປ຺ຜໍ ປຄ຺ຄຍ຺ຫ ປຄ຺ຄເຫຕ຺ວາ ວິປສ຺ສິສ຺ສາຠິໂຣປຍິໍ ວິປສ຺ສິສ຺ສ ຠຄວໂຕ ປູເຊສິນ຺ຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ປຈ຺ຈາຄມນິຍຕ຺ເຖຣອປທານວຓ຺ຓນາ ສມຕ຺ຕາ.

໔. ປຣປ຺ປສາທກຕ຺ເຖຣອປທານວຓ຺ຓນາ

ອຸສຠໍ ປວຣໍ ວີຣນ຺ຕິອາທິກໍ ອາຍສ຺ມໂຕ ປຣປ຺ປສາທກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິທ຺ຘຕ຺ຖສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ໂຕ ຕິຓ຺ຓໍ ເວທານໍ ປາຣຄູ ອິຕິຫາສປຎ຺ຈມານໍ ປທໂກ ເວຍ຺ຍາກຣໂຓ ສນິຆຓ຺ຑຸເກຏຸຠານໍ ສາກ຺ຂຣປ຺ປເຠທານໍ ໂລກາຍຕມຫາປຸຣິສລກ຺ຂເຓສຸ ອນວໂຍ ນາເມນ ເສລພ຺ຣາຫ຺ມໂຓຕິ ປາກໂຏ ສິທ຺ຘຕ຺ຖໍ ຠຄວນ຺ຕໍ ທິສ຺ວາ ທ຺ວຕ຺ຕິໍສມຫາປຸຣິສລກ຺ຂເຓຫິ ອສີຕິອນຸພ຺ຍຎ຺ຊເນຫິ ຈາຕິ ສຍໍ ໂສຠມານໍ ທິສ຺ວາ ປສນ຺ນມານໂສ ອເນເກຫິ ກາຣເຓຫິ ອເນກາຫິ ອຸປມາຫິ ໂຖມນໍ ປກາເສສິ. ໂສ ເຕນ ປຸຎ຺ຎກມ຺ເມນ ເທວໂລເກ ສກ຺ກມາຣາທໂຍ ຉ ກາມາວຈຣສມ຺ປຕ຺ຕິໂຍ ອນຸຠວິຕ຺ວາ ມນຸສ຺ເສສຸ ຈກ຺ກວຕ຺ຕິສມ຺ປຕ຺ຕິໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ເນ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຖຣິ ປສີທິສ຺ວາ ປພ຺ພຊິໂຕ ນຈິຣສ຺ເສວ ຈຕຸປຏິສມ຺ຠິທາຉຬຠິຎ຺ຎປ຺ປຕ຺ໂຕ ມຫາຂີຓາສໂວ ອໂຫສິ, ພຸທ຺ຘສ຺ສ ຖຸຕິຍາ ສຕ຺ຕານໍ ສພ຺ເພສໍ ຈິຕ຺ຕປ຺ປສາທກຣຓໂຕ ປຣປ຺ປສາທກຕ຺ເຖໂຣຕິ ປາກໂຏ.

໒໐. ເອກທິວສໍ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອຸສຠໍ ປວຣໍ ວີຣນ຺ຕິອາທິມາຫ. ຕຕ຺ຖ ອຸສຠນ຺ຕິ ວສໂຠ ນິສໂຠ ວິສໂຠ ອາສໂຠຕິ ຈຕ຺ຕາໂຣ ເຊຏ຺ຐປຸງ຺ຄວາ. ຕຕ຺ຖ ຄວສຕເຊຏ຺ຐໂກ ວສໂຠ, ຄວສຫສ຺ສເຊຏ຺ຐໂກ ນິສໂຠ, ຄວສຕສຫສ຺ສເຊຏ຺ຐໂກ ວິສໂຠ, ຄວໂກຏິສຕສຫສ຺ສເຊຏ຺ຐໂກ ອາສໂຠຕິ ຈ ຍສ຺ສ ກສ຺ສຈິ ຖຸຕິໍ ກໂຣນ຺ຕາ ພ຺ຣາຫ຺ມຓປຓ຺ຑິຕາ ພຫຸສ຺ສຸຕາ ອຕ຺ຕໂນ ອຕ຺ຕໂນ ປຎ຺ຎາວເສນ ຖຸຕິໍ ກໂຣນ຺ຕິ, ພຸທ຺ຘານໍ ປນ ສພ຺ພາກາເຣນ ຖຸຕິໍ ກາຕຸໍ ສມຕ຺ໂຖ ເອໂກປິ ນຕ຺ຖິ. ອປ຺ປເມຍ຺ໂຍ ຫິ ພຸທ຺ໂຘ. ວຸຕ຺ຕຎ຺ເຫຕໍ –

‘‘ພຸທ຺ໂຘປິ ພຸທ຺ຘສ຺ສ ຠເຓຍ຺ຍ ວຓ຺ຓໍ, ກປ຺ປມ຺ປິ ເຈ ອຎ຺ຎມຠາສມາໂນ;

ຂີເຍຖ ກປ຺ໂປ ຈິຣທີຆມນ຺ຕເຣ, ວຓ຺ໂຓ ນ ຂີເຍຖ ຕຖາຄຕສ຺ສາ’’ຕິ. (ທີ. ນິ. ອຏ຺ຐ. ໑.໓໐໔; ໓.໑໔໑; ມ. ນິ. ອຏ຺ຐ. ໒.໔໒໕; ອຸທາ. ອຏ຺ຐ. ໕໓) –

ອາທິກໍ. ອຍມ຺ປິ ພ຺ຣາຫ຺ມໂຓ ມຸຂາຣູຬ຺ຫວເສນ ເອກປສີທນວເສນ ‘‘ອາສຠ’’ນ຺ຕິ ວຕ຺ຕພ຺ເພ ‘‘ອຸສຠ’’ນ຺ຕິອາທິມາຫ. ວຣິຕພ຺ໂພ ປຕ຺ເຖຕພ຺ໂພຕິ ວໂຣ. ອເນເກສຸ ກປ຺ປສຕສຫສ຺ເສສຸ ກຕວີຣິຍຕ຺ຕາ ວີໂຣ. ມຫນ຺ຕໍ ສີລກ຺ຂນ຺ຘາທິກໍ ເອສຕິ ຄເວສຕີຕິ ມເຫສີ, ຕໍ ມເຫສິໍ ພຸທ຺ຘໍ. ວິເສເສນ ກິເລສຂນ຺ຘມາຣາທໂຍ ມາເຣ ຊິຕວາຕິ ວິຊິຕາວີ, ຕໍ ວິຊິຕາວິນໍ ສມ຺ພຸທ຺ຘໍ. ສຸວຓ຺ຓສ຺ສ ວຓ຺ໂຓ ອິວ ວຓ຺ໂຓ ຍສ຺ສ ສມ຺ພຸທ຺ຘສ຺ສ ໂສ ສຸວຓ຺ຓວຓ຺ໂຓ, ຕໍ ສຸວຓ຺ຓວຓ຺ຓໍ ສມ຺ພຸທ຺ຘໍ ທິສ຺ວາ ໂກ ນາມ ສຕ຺ໂຕ ນປ຺ປສີທຕີຕິ.

ປຣປ຺ປສາທກຕ຺ເຖຣອປທານວຓ຺ຓນາ ສມຕ຺ຕາ.

໕. ຠິສທາຍກຕ຺ເຖຣອປທານວຓ຺ຓນາ

ເວສ຺ສຠູ ນາມ ນາເມນາຕິອາທິກໍ ອາຍສ຺ມໂຕ ຠິສທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ເວສ຺ສຠຸສ຺ສ ຠຄວໂຕ ກາເລ ຫິມວນ຺ຕສ຺ມິໍ ຫຕ຺ຖິໂຍນິຍໍ ນິພ຺ພຕ຺ໂຕ ຕສ຺ມິໍ ປຏິວສຕິ. ຕສ຺ມິໍ ສມເຍ ເວສ຺ສຠູ ຠຄວາ ວິເວກກາໂມ ຫິມວນ຺ຕມຄມາສິ. ຕໍ ທິສ຺ວາ ໂສ ຫຕ຺ຖິນາໂຄ ປສນ຺ນມານໂສ ຠິສມຸຬາລໍ ຄເຫຕ຺ວາ ຠຄວນ຺ຕໍ ໂຠເຊສິ. ໂສ ເຕນ ປຸຎ຺ຎກມ຺ເມນ ຫຕ຺ຖິໂຍນິໂຕ ຈຸໂຕ ເທວໂລເກ ອຸປ຺ປຊ຺ຊິຕ຺ວາ ຕຕ຺ຖ ຉ ກາມາວຈຣສມ຺ປຕ຺ຕິໂຍ ອນຸຠວິຕ຺ວາ ມນຸສ຺ສຕ຺ຕມາຄໂຕ ມນຸສ຺ເສສຸ ຈກ຺ກວຕ຺ຕິສມ຺ປຕ຺ຕິອາທໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ມຫາໂຠເຄ ອຎ຺ຎຕຣສ຺ມິໍ ກຸເລ ນິພ຺ພຕ຺ໂຕ ປຸພ຺ພວາສນາພເລນ ສຕ຺ຖຣິ ປສນ຺ໂນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ, ໂສ ປຸພ຺ເພ ກຕກຸສລນາເມນ ຠິສທາຍກຕ຺ເຖໂຣຕິ ປາກໂຏ.

໒໙. ໂສ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ປຸພ຺ພຈຣິຕາປທານໍ ທສ຺ເສນ຺ໂຕ ເວສ຺ສຠູ ນາມ ນາເມນາຕິອາທິມາຫ. ຕຕ຺ຖ ເວສ຺ສຠູຕິ ເວສ຺ສໍ ຠຸນາຕິ ອຕິກ຺ກມຕີຕິ ເວສ຺ສຠູ. ອຖ ວາ ເວສ຺ເສ ວາຓິຊກມ຺ເມ ວາ ກາມຣາຄາທິເກ ວາ ກຸສລາທິກມ຺ເມ ວາ ວຕ຺ຖຸກາມກິເລສກາເມ ວາ ຠຸນາຕິ ອຠິຠວຕີຕິ ເວສ຺ສຠູ, ໂສ ນາເມນ ເວສ຺ສຠູ ນາມ ຠຄວາ. ອິສີນໍ ຕຕິໂຍ ອຫູຕິ ກຸສລຘມ຺ເມ ເອສຕິ ຄເວສຕີຕິ ອິສິ, ‘‘ວິປສ຺ສີ, ສິຂີ, ເວສ຺ສຠູ’’ຕິ ວຸຕ຺ຕຕ຺ຕາ ຕຕິໂຍ ອິສິ ຕຕິໂຍ ຠຄວາ ອຫຸ ອໂຫສີຕິ ອຕ຺ໂຖ. ການນໍ ວນໂມຄ຺ຄຍ຺ຫາຕິ ການນສງ຺ຂາຕໍ ວນໍ ໂອຄຍ຺ຫ ໂອຄເຫຕ຺ວາ ປາວິສີຕິ ອຕ຺ໂຖ.

໓໐. ຠິສມຸຬາລໍ ຄຓ຺ຫິຕ຺ວາຕິ ທ຺ວິປທຈຕຸປ຺ປທານໍ ຉາຕກໍ ຠິສຕິ ຫິໍສຕິ ວິນາເສຕີຕິ ຠິສໍ, ໂກ ໂສ? ປທຸມກນ຺ໂທ, ຠິສຎ຺ຈ ມຸຬາລຎ຺ຈ ຠິສມຸຬາລໍ, ຕໍ ຠິສມຸຬາລໍ ຄເຫຕ຺ວາຕິ ອຕ຺ໂຖ.

໓໑. ກເຣນ ຈ ປຣາມຏ຺ໂຐຕິ ຕໍ ມຍາ ທິນ຺ນທານໍ, ເວສ຺ສຠູວຣພຸທ຺ຘິນາ ອຸຕ຺ຕມພຸທ຺ຘິນາ ເວສ຺ສຠຸນາ ກເຣນ ຫຕ຺ຖຕເລນ ປຣາມຏ຺ໂຐ ກຕສມ຺ຜສ຺ໂສ ອໂຫສິ. ສຸຂາຫໍ ນາຠິຊານາມິ, ສມໍ ເຕນ ກຸໂຕຕ຺ຕຣິນ຺ຕິ ເຕນ ສຸເຂນ ສມໍ ສຸຂໍ ນາຠິຊານາມິ, ຕໂຕ ອຸຕ຺ຕຣິໍ ຕໂຕ ປຣໍ ຕໂຕ ອຘິກໍ ສຸຂໍ ກຸໂຕຕິ ອຕ຺ໂຖ. ເສສໍ ນຍານຸສາເຣນ ສຸວິຎ຺ເຎຍ຺ຍນ຺ຕິ.

ຠິສທາຍກຕ຺ເຖຣອປທານວຓ຺ຓນາ ສມຕ຺ຕາ.

໖. ສຸຈິນ຺ຕິຕຕ຺ເຖຣອປທານວຓ຺ຓນາ

ຄິຣິທຸຄ຺ຄຈໂຣ ອາສິນ຺ຕິອາທິກໍ ອາຍສ຺ມໂຕ ສຸຈິນ຺ຕິຕຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອຕ຺ຖທສ຺ສິສ຺ສ ຠຄວໂຕ ກາເລ ຫິມວນ຺ຕປ຺ປເທເສ ເນສາທກຸເລ ອຸປ຺ປນ຺ໂນ ມິຄສູກຣາທໂຍ ວຘິຕ຺ວາ ຂາທນ຺ໂຕ ວິຫຣຕິ. ຕທາ ໂລກນາໂຖ ໂລການຸຄ຺ຄຫໍ ສຕ຺ຕານຸທ຺ທຍຕຎ຺ຈ ປຏິຈ຺ຈ ຫິມວນ຺ຕມຄມາສິ. ຕທາ ໂສ ເນສາໂທ ຠຄວນ຺ຕໍ ທິສ຺ວາ ປສນ຺ນມານໂສ ອຕ຺ຕໂນ ຂາທນຕ຺ຖາຍ ອານີຕໍ ວຣມຘຸຣມໍສໍ ອທາສິ. ປຏິຄ຺ຄເຫສິ ຠຄວາ ຕສ຺ສານຸກມ຺ປາຍ, ຕໍ ຠຸຎ຺ຊິຕ຺ວາ ອນຸໂມທນໍ ວຕ຺ວາ ປກ຺ກາມິ. ໂສ ເຕເນວ ປຸຎ຺ເຎນ ເຕເນວ ໂສມນສ຺ເສນ ຕໂຕ ຈຸໂຕ ສຸຄຕີສຸ ສໍສຣນ຺ໂຕ ຉ ກາມາວຈຣສມ຺ປຕ຺ຕິໂຍ ອນຸຠວິຕ຺ວາ ມນຸສ຺ເສສຸ ຈກ຺ກວຕ຺ຕິສມ຺ປຕ຺ຕິອາທໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ສຕ຺ຖຣິ ປສີທິຕ຺ວາ ປພ຺ພຊິໂຕ ນຈິຣສ຺ເສວ ອຣຫາ ອໂຫສິ.

໓໖. ຈຕຸປຏິສມ຺ຠິທາປຎ຺ຈາຠິຎ຺ຎາທິເຠທໍ ປຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຄິຣິທຸຄ຺ຄຈໂຣ ອາສິນ຺ຕິອາທິມາຫ. ຄິຣຕິ ສທ຺ທໍ ກໂຣຕີຕິ ຄິຣິ, ໂກ ໂສ? ສິລາປໍສຸມຍປພ຺ພໂຕ, ທຸຏ຺ຐຸ ທຸກ຺ເຂນ ຄມນີຍໍ ທຸຄ຺ຄໍ, ຄິຣີຫິ ທຸຄ຺ຄໍ ຄິຣິທຸຄ຺ຄໍ, ທຸຄ຺ຄໂມຕິ ອຕ຺ໂຖ. ຕສ຺ມິໍ ຄິຣິທຸຄ຺ເຄ ປພ຺ພຕນ຺ຕເຣ ຈໂຣ ຈຣຓສີໂລ ອາສິໍ ອໂຫສິໍ. ອຠິຊາໂຕວ ເກສຣີຕິ ອຠິ ວິເສເສນ ຊາໂຕ ນິພ຺ພຕ຺ໂຕ ເກສຣີວ ເກສຣສີໂຫ ອິວ ຄິຣິທຸຄ຺ຄສ຺ມິໍ ຈຣາມີຕິ ອຕ຺ໂຖ.

໔໐. ຄິຣິທຸຄ຺ຄໍ ປວິສິໍ ອຫນ຺ຕິ ອຫໍ ຕທາ ເຕນ ມໍສທາເນນ ປີຕິໂສມນສ຺ສຊາໂຕ ປພ຺ພຕນ຺ຕຣໍ ປາວິສິໍ. ເສສໍ ອຸຕ຺ຕານຕ຺ຖເມວາຕິ.

ສຸຈິນ຺ຕິຕຕ຺ເຖຣອປທານວຓ຺ຓນາ ສມຕ຺ຕາ.

໗. ວຕ຺ຖທາຍກຕ຺ເຖຣອປທານວຓ຺ຓນາ

ປກ຺ຂິຊາໂຕ ຕທາ ອາສິນ຺ຕິອາທິກໍ ອາຍສ຺ມໂຕ ວຕ຺ຖທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອຕ຺ຖທສ຺ສິສ຺ສ ຠຄວໂຕ ກາເລ ສຸປຓ຺ຓໂຍນິຍໍ ນິພ຺ພຕ຺ໂຕ ຄນ຺ຘມາທນປພ຺ພຕໍ ຄຈ຺ຉນ຺ຕໍ ອຕ຺ຖທສ຺ສິໍ ຠຄວນ຺ຕໍ ທິສ຺ວາ ປສນ຺ນມານໂສ ສຸປຓ຺ຓວຓ຺ຓໍ ວິຊຫິຕ຺ວາ ມາຓວກວຓ຺ຓໍ ນິມ຺ມິນິຕ຺ວາ ມຫຄ຺ຆໍ ທິພ຺ພວຕ຺ຖໍ ອາທາຍ ຠຄວນ຺ຕໍ ປູເຊສິ. ໂສປິ ຠຄວາ ປຏິຄ຺ຄເຫຕ຺ວາ ອນຸໂມທນໍ ວຕ຺ວາ ປກ຺ກາມິ. ໂສ ເຕເນວ ໂສມນສ຺ເສນ ວີຕິນາເມຕ຺ວາ ຍາວຕາຍຸກໍ ຐຕ຺ວາ ຕໂຕ ຈຸໂຕ ເທວໂລເກ ນິພ຺ພຕ຺ໂຕ ຕຕ຺ຖ ອປຣາປຣໍ ສໍສຣນ຺ໂຕ ປຸຎ຺ຎານິ ອນຸຠວິຕ຺ວາ ຕໂຕ ມນຸສ຺ເສສຸ ມນຸສ຺ສສມ຺ປຕ຺ຕິນ຺ຕິ ສພ຺ພຕ຺ຖ ມຫຄ຺ຆໍ ວຕ຺ຖາຠຣຓໍ ລທ຺ຘໍ, ຕໂຕ ອຸປ຺ປນ຺ນຸປ຺ປນ຺ນຠເວ ວຕ຺ຖຈ຺ຉາຍາຍ ຄຕຄຕຏ຺ຐາເນ ວສນ຺ໂຕ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຖຣິ ປສີທິຕ຺ວາ ປພ຺ພຊິໂຕ ນຈິຣສ຺ເສວ ຉຬຠິຎ຺ຎປ຺ປຕ຺ຕຂີຓາສໂວ ອໂຫສິ, ປຸພ຺ເພ ກຕປຸຎ຺ຎນາເມນ ວຕ຺ຖທາຍກຕ຺ເຖໂຣຕິ ປາກໂຏ.

໔໕. ໂສ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປກ຺ຂິຊາໂຕ ຕທາ ອາສິນ຺ຕິອາທິມາຫ. ຕຕ຺ຖ ປກ຺ຂິຊາໂຕຕິ ປກ຺ຂນ຺ທຕິ ອຸປລວຕິ ສກຸໂຓ ເອເຕນາຕິ ປກ຺ຂໍ, ປກ຺ຂມສ຺ສ ອຕ຺ຖີຕິ ປກ຺ຂີ, ປກ຺ຂິໂຍນິຍໍ ຊາໂຕ ນິພ຺ພຕ຺ໂຕຕິ ອຕ຺ໂຖ. ສຸປຓ຺ໂຓຕິ ສຸນ຺ທຣໍ ປຓ຺ຓໍ ປຕ຺ຕໍ ຍສ຺ສ ໂສ ສຸປຓ຺ໂຓ, ວາຕຄ຺ຄາຫສຸວຓ຺ຓວຓ຺ຓຊລມານປຕ຺ຕມຫາຠາໂຣຕິ ອຕ຺ໂຖ. ຄຣຸຬາຘິໂປຕິ ນາເຄ ຄຓ຺ຫນຕ຺ຖາຍ ຄຣຸໍ ຠາຣໍ ປາສາຓໍ ຄິຬນ຺ຕີຕິ ຄຣຸຬາ, ຄຣຸຬານໍ ອຘິໂປ ຣາຊາຕິ ຄຣຸຬາຘິໂປ, ວິຣຊໍ ພຸທ຺ຘໍ ອທ຺ທສາຫນ຺ຕິ ສມ຺ພນ຺ໂຘ.

ວຕ຺ຖທາຍກຕ຺ເຖຣອປທານວຓ຺ຓນາ ສມຕ຺ຕາ.

໘. ອມ຺ພທາຍກຕ຺ເຖຣອປທານວຓ຺ຓນາ

ອໂນມທສ຺ສີ ຠຄວາຕິອາທິກໍ ອາຍສ຺ມໂຕ ອມ຺ພທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອໂນມທສ຺ສິສ຺ສ ຠຄວໂຕ ກາເລ ວານຣໂຍນິຍໍ ນິພ຺ພຕ຺ໂຕ ຫິມວນ຺ເຕ ກປິຣາຊາ ຫຸຕ຺ວາ ປຏິວສຕິ. ຕສ຺ມິໍ ສມເຍ ອໂນມທສ຺ສີ ຠຄວາ ຕສ຺ສານຸກມ຺ປາຍ ຫິມວນ຺ຕມຄມາສິ. ອຖ ໂສ ກປິຣາຊາ ຠຄວນ຺ຕໍ ທິສ຺ວາ ປສນ຺ນມານໂສ ສຸມຘຸຣໍ ອມ຺ພຜລໍ ຂຸທ຺ທມຘຸນາ ອທາສິ. ອຖ ຠຄວາ ຕສ຺ສ ປສ຺ສນ຺ຕສ຺ເສວ ຕໍ ສພ຺ພໍ ປຣິຠຸຎ຺ຊິຕ຺ວາ ອນຸໂມທນໍ ວຕ຺ວາ ປກ຺ກາມິ. ອຖ ໂສ ໂສມນສ຺ສສມ຺ປນ຺ນຫທໂຍ ເຕເນວ ປີຕິໂສມນສ຺ເສນ ຍາວຕາຍຸກໍ ຐຕ຺ວາ ຕໂຕ ຈຸໂຕ ເທວໂລເກ ນິພ຺ພຕ຺ໂຕ ອປຣາປຣໍ ຕຕ຺ຖ ທິພ຺ພສຸຂມນຸຠວິຕ຺ວາ ມນຸສ຺ເສສຸ ຈ ມນຸສ຺ສສມ຺ປຕ຺ຕິໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ເນ ເອກສ຺ມິໍ ກຸລເຄເຫ ນິພ຺ພຕ຺ໂຕ ສຕ຺ຖຣິ ປສີທິຕ຺ວາ ປພ຺ພຊິຕ຺ວາ ນຈິຣສ຺ເສວ ຉຬຠິຎ຺ຎປ຺ປຕ຺ໂຕ ອໂຫສິ. ປຸພ຺ພປຸຎ຺ຎນາເມນ ອມ຺ພທາຍກຕ຺ເຖໂຣຕິ ປາກໂຏ.

໕໓. ໂສ ອປຣຠາເຄ ອຕ຺ຕນາ ກຕກຸສລພີຊໍ ທິສ຺ວາ ໂສມນສ຺ສຊາໂຕ ອຕ຺ຕໂນ ປຸພ຺ພຈຣິຕາປທານໍ ປກາເສນ຺ໂຕ ອໂນມທສ຺ສີ ຠຄວາຕິອາທິມາຫ. ເມຕ຺ຕາຍ ອຜຣິ ໂລເກ, ອປ຺ປມາເຓ ນິຣູປຘີຕິ ໂສ ຠຄວາ ສພ຺ພໂລເກ ອປ຺ປມາເຓ ສຕ຺ເຕ ‘‘ສຸຂີ ໂຫນ຺ຕູ’’ຕິອາທິນາ ນິຣຸປຘິ ອຸປຘິວິຣຫິຕໍ ກຕ຺ວາ ເມຕ຺ຕາຍ ເມຕ຺ຕຈິຕ຺ເຕນ ອຜຣິ ປຕ຺ຖຣິ ວຑ຺ເຒສີຕິ ອຕ຺ໂຖ.

໕໔. ກປິ ອຫໍ ຕທາ ອາສິນ຺ຕິ ຕທາ ຕສ຺ສາຄມນກາເລ ກປິຣາຊາ ອໂຫສິນ຺ຕິ ອຕ຺ໂຖ.

ອມ຺ພທາຍກຕ຺ເຖຣອປທານວຓ຺ຓນາ ສມຕ຺ຕາ.

໙. ສຸມນຕ຺ເຖຣອປທານວຓ຺ຓນາ

ສຸມໂນ ນາມ ນາເມນາຕິອາທິກໍ ອາຍສ຺ມໂຕ ສຸມນຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິຂິສ຺ສ ຠຄວໂຕ ກາເລ ມາລາກາຣສ຺ສ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ສທ຺ຘາຊາໂຕ ຠຄວຕິ ປສນ຺ນມານໂສ ສຸມນມາລາມຸຏ຺ຐິໂຍ ຄເຫຕ຺ວາ ອຸໂຠຫິ ຫຕ຺ເຖຫິ ປູເຊສິ. ໂສ ເຕນ ປຸຎ຺ເຎນ ເທວມນຸສ຺ເສສຸ ທ຺ເວ ສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ປຸຕ຺ຕທາເຣຫິ ວຑ຺ຒິຕ຺ວາ ສຸມນນາເມນ ປາກໂຏ ສຕ຺ຖຣິ ປສີທິຕ຺ວາ ປພ຺ພຊິໂຕ ນຈິຣສ຺ເສວ ອຣຫາ ອໂຫສິ.

໖໒. ໂສ ອຣຫາ ຫຸຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ອຕ຺ຕໂນ ປຸພ຺ພຈຣິຕາປທານໍ ປກາເສນ຺ໂຕ ສຸມໂນ ນາມ ນາເມນາຕິອາທິມາຫ. ສຸນ຺ທຣໍ ມນໍ ຈິຕ຺ຕໍ ຍສ຺ສ ໂສ ສຸມໂນ. ສທ຺ຘາປສາທພຫຸມາເນນ ຍຸຕ຺ໂຕ ນາເມນ ສຸມໂນ ນາມ ມາລາກາໂຣ ຕທາ ອຫໍ ອໂຫສິໍ.

໖໓. ສິຂິໂນ ໂລກພນ຺ຘຸໂນຕິ ສິຂາ ມຸທ຺ຘາ ກາສຕີຕິ ສິຂີ. ອຖ ວາ ສມ຺ປຍຸຕ຺ຕສມ຺ປໂຍເຄ ຂາທຕິ ວິທ຺ຘໍເສຕີຕິ ສິຂີ, ກາ ສາ? ອຄ຺ຄິສິຂາ, ອຄ຺ຄິສິຂາ ວິຍ ສິຂາຍ ທິປ຺ປນໂຕ ສິຂີ. ຍຖາ ອຄ຺ຄິສິຂາ ໂຊຕຕິ ປາກຏາ ໂຫຕິ, ສິຂີ ປຕ຺ຕຕິຓກຏ຺ຐປລາສາທິເກ ທຫຕິ, ເອວມຍມ຺ປິ ຠຄວາ ນີລປີຕາທິຣໍສີຫິ ໂຊຕຕິ ສກລໂລກສນ຺ນິວາເສ ປາກໂຏ ໂຫຕິ. ສກສນ຺ຕານຄຕສພ຺ພກິເລເສ ໂສເສຕິ ວິທ຺ຘໍເສຕິ ຌາເປຕີຕິ ໂວຫາຣນາມໍ ນາມກມ຺ມໍ ນາມເຘຍ຺ຍໍ, ຕສ຺ສ ສິຂິໂນ. ສກລໂລກສ຺ສ ພນ຺ຘຸຎາຕໂກຕິ ໂລກພນ຺ຘຸ, ຕສ຺ສ ສິຂິໂນ ໂລກພນ຺ຘຸໂນ ຠຄວໂຕ ສຸມນປຸປ຺ຜໍ ອຠິໂຣປຍິໍ ປູເຊສິນ຺ຕິ ອຕ຺ໂຖ.

ສຸມນຕ຺ເຖຣອປທານວຓ຺ຓນາ ສມຕ຺ຕາ.

໑໐. ປຸປ຺ຜຈງ຺ໂກຏິຍຕ຺ເຖຣອປທານວຓ຺ຓນາ

ອຠີຕຣູປໍ ສີຫໍ ວາຕິອາທິກໍ ອາຍສ຺ມໂຕ ປຸປ຺ຜຈງ຺ໂກຏິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິຂິສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ມຫາວິຠວສມ຺ປນ຺ໂນ ສຕ຺ຖຣິ ປສີທິຕ຺ວາ ປສນ຺ນາກາຣໍ ທສ຺ເສນ຺ໂຕ ສຸວຓ຺ຓວຓ຺ຓໍ ອໂນຊປຸປ຺ຜໂມຈິນິຕ຺ວາ ຈງ຺ໂກຏກໍ ປູເຣຕ຺ວາ ຠຄວນ຺ຕໍ ປູເຊຕ຺ວາ ‘‘ຠຄວາ, ອິມສ຺ສ ນິສ຺ສນ຺ເທນ ນິພ຺ພຕ຺ຕນິພ຺ພຕ຺ຕຏ຺ຐາເນ ສຸວຓ຺ຓວຓ຺ໂຓ ປູຊນີໂຍ ຫຸຕ຺ວາ ນິພ຺ພານໍ ປາປຸເຓຍ຺ຍ’’ນ຺ຕິ ປຕ຺ຖນມກາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ນິພ຺ພຕ຺ໂຕ ສພ຺ພຕ຺ຖ ປູຊິໂຕ ສຸວຓ຺ຓວຓ຺ໂຓ ອຠິຣູໂປ ອໂຫສິ. ໂສ ອປຣຠາເຄ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ເນ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ສຕ຺ຖຣິ ປສີທິຕ຺ວາ ປພ຺ພຊິໂຕ ວິປສ຺ສນໍ ວຑ຺ເຒຕ຺ວາ ນຈິຣສ຺ເສວ ອຣຫາ ອໂຫສິ.

໖໘-໙. ໂສ ປຕ຺ຕອຣຫຕ຺ຕຜໂລ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອຠີຕຣູປໍ ສີຫໍ ວາຕິອາທິມາຫ. ຕຕ຺ຖ ສີຫນ຺ຕິ ທ຺ວິປທຈຕຸປ຺ປທາທໂຍ ສຕ຺ເຕ ອຠິຠວຕິ ອຊ຺ໂຌຕ຺ຖຣຕີຕິ ສີໂຫ, ອຠີຕຣູໂປ ອຠີຕສຠາໂວ, ຕໍ ອຠີຕຣູປໍ ສີຫໍ ອິວ ນິສິນ຺ນໍ ປູເຊສິນ຺ຕິ ສມ຺ພນ຺ໂຘ. ປກ຺ຂີນໍ ອຄ຺ຄໍ ຄຣຸຬຣາຊໍ ອິວ ປວຣໍ ອຸຕ຺ຕມໍ ພ຺ຍຄ຺ຆຣາຊໍ ອິວ ອຠິ ວິເສເສນ ຊາຕໍ ສພ຺ພສີຫານໍ ວິເສສໍ ເກສຣສີຫໍ ອິວ ຕິໂລກສ຺ສ ສຣຓໍ ສິຂິໍ ສມ຺ມາສມ຺ພຸທ຺ຘໍ. ກິໍ ຠູຕໍ? ອເນຊໍ ນິກ຺ກິເລສໍ ຂນ຺ຘມາຣາທີຫິ ອປຣາຊິຕໍ ນິສິນ຺ນໍ ສິຂິນ຺ຕິ ສມ຺ພນ຺ໂຘ. ມາຣຓານຄ຺ຄນ຺ຕິ ສພ຺ພກິເລສານໍ ມາຣເຓ ໂສສເນ ວິທ຺ຘໍສເນ ອຄ຺ຄໍ ເສຏ຺ຐໍ ກິເລເສ ມາເຣນ຺ຕານໍ ປຈ຺ເຈກພຸທ຺ຘພຸທ຺ຘສາວການໍ ວິຊ຺ຊມານານມ຺ປິ ເຕສໍ ອຄ຺ຄນ຺ຕິ ອຕ຺ໂຖ. ຠິກ຺ຂຸສງ຺ຆປຸຣກ຺ຂຕໍ ປຣິວາຣິຕໍ ປຣິວາເຣຕ຺ວາ ນິສິນ຺ນໍ ສິຂິນ຺ຕິ ສມ຺ພນ຺ໂຘ.

໗໐. ຈງ຺ໂກຏເກ ຐເປຕ຺ວານາຕິ ອຸຕ຺ຕມໍ ອໂນຊປຸປ຺ຜໍ ກຣຓ຺ຑເກ ປູເຣຕ຺ວາ ສິຂີສມ຺ພຸທ຺ຘໍ ເສຏ຺ຐໍ ສໂມກິຣິໍ ປູເຊສິນ຺ຕິ ອຕ຺ໂຖ.

ປຸປ຺ຜຈງ຺ໂກຏິຍຕ຺ເຖຣອປທານວຓ຺ຓນາ ສມຕ຺ຕາ.

ສຕ຺ຕມວຄ຺ຄວຓ຺ຓນາ ສມຕ຺ຕາ.