໘. ນາຄສມາລວຄ຺ໂຄ

໑. ນາຄສມາລຕ຺ເຖຣອປທານວຓ຺ຓນາ

ອາປາຏລິໍ ອຫໍ ປຸປ຺ຜນ຺ຕິອາທິກໍ ອາຍສ຺ມໂຕ ນາຄສມາລຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິຂິສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຆຣາວາສໍ ສຓ຺ຐເປຕ຺ວາ ຕຖາຣູປສຊ຺ຊນສໍສຄ຺ຄສ຺ສ ອລາເຠນ ສຕ຺ຖຣິ ຘຣມານກາເລ ທສ຺ສນສວນປູຊາກມ຺ມມກຣິຕ຺ວາ ປຣິນິພ຺ພຸຕກາເລ ຕສ຺ສ ຠຄວໂຕ ສາຣີຣິກຘາຕຸໍ ນິທຫິຕ຺ວາ ກຕເຈຕິຍມ຺ຫິ ຈິຕ຺ຕໍ ປສາເທຕ຺ວາ ປາຏລິປຸປ຺ຜໍ ປູເຊຕ຺ວາ ໂສມນສ຺ສໍ ອຸປ຺ປາເທຕ຺ວາ ຍາວຕາຍຸກໍ ຐຕ຺ວາ ເຕເນວ ໂສມນສ຺ເສນ ຕໂຕ ກາລໍ ກໂຕ ຕຸສິຕາທີສຸ ຉສຸ ເທວໂລເກສຸ ສຸຂມນຸຠວິຕ຺ວາ ອປຣຠາເຄ ມນຸສ຺ເສສຸ ມນຸສ຺ສສມ຺ປຕ຺ຕິໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ນາຄຣຸກ຺ຂປລ຺ລວໂກມຬສທິສສຣີຣຕ຺ຕາ ນາຄສມາໂລຕິ ມາຕາປິຕູຫິ ກຕນາມເຘຍ຺ໂຍ ຠຄວຕິ ປສນ຺ໂນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໑. ໂສ ປຈ຺ຉາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອາປາຏລິໍ ອຫໍ ປຸປ຺ຜນ຺ຕິອາທິມາຫ. ຕຕ຺ຖ ອາປາຏລິນ຺ຕິ ອາ ສມນ຺ຕໂຕ, ອາທເຣນ ວາ ປາຏລິປຸປ຺ຜໍ ຄເຫຕ຺ວາ ອຫໍ ຖູປມ຺ຫິ ອຠິໂຣເປສິໍ ປູເຊສິນ຺ຕິ ອຕ຺ໂຖ. ອຸຊ຺ຌິຕໍ ສຸມຫາປເຖຕິ ສພ຺ພນຄຣວາສີນໍ ວນ຺ທນປູຊນຕ຺ຖາຍ ມຫາປເຖ ນຄຣມຊ຺ເຌ ວີຖິຍໍ ອຸຊ຺ຌິຕໍ ອຸຏ຺ຐາປິຕໍ, ອິຏ຺ຐກກມ຺ມສຸຘາກມ຺ມາທີຫິ ນິປ຺ຜາທິຕນ຺ຕິ ອຕ຺ໂຖ. ເສສໍ ເຫຏ຺ຐາ ວຸຕ຺ຕນຍຕ຺ຕາ ອຸຕ຺ຕານຕ຺ຖຕ຺ຕາ ຈ ສຸວິຎ຺ເຎຍ຺ຍເມວາຕິ.

ນາຄສມາລຕ຺ເຖຣອປທານວຓ຺ຓນາ ສມຕ຺ຕາ.

໒. ປທສຎ຺ຎກຕ຺ເຖຣອປທານວຓ຺ຓນາ

ອກ຺ກນ຺ຕຎ຺ຈ ປທໍ ທິສ຺ວາຕິອາທິກໍ ອາຍສ຺ມໂຕ ປທສຎ຺ຎກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອຸປ຺ປນ຺ນຸປ຺ປນ຺ນຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ຕິສ຺ສສ຺ສ ຠຄວໂຕ ກາເລ ເອກສ຺ມິໍ ສທ຺ຘາສມ຺ປນ຺ເນ ອຸປາສກເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຣຕນຕ຺ຕເຍ ປສນ຺ໂນ ຠຄວຕາ ຕສ຺ສ ອນຸກມ຺ປາຍ ທສ຺ສິຕໍ ປທເຈຕິຍໍ ທິສ຺ວາ ປສນ຺ໂນ ໂລມຫຏ຺ຐຊາໂຕ ວນ຺ທນປູຊນາທິພຫຸມານມກາສິ. ໂສ ເຕເນວ ສຸເຂຕ຺ເຕ ສຸກເຕນ ປຸຎ຺ເຎນ ຕໂຕ ຈຸໂຕ ສຄ຺ເຄ ນິພ຺ພຕ຺ໂຕ ຕຕ຺ຖ ທິພ຺ພສຸຂມນຸຠວິຕ຺ວາ ອປຣຠາເຄ ມນຸສ຺ເສສຸ ຊາໂຕ ມນຸສ຺ສສມ຺ປຕ຺ຕິໍ ສພ຺ພມນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ນກຸເລ ນິພ຺ພຕ຺ໂຕ ວຸທ຺ຘິມນ຺ວາຍ ສທ຺ຘາຊາໂຕ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ, ປຸຣາກຕປຸຎ຺ຎນາເມນ ປທສຎ຺ຎກຕ຺ເຖໂຣຕິ ປາກໂຏ.

໕. ໂສ ເອກທິວສໍ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ປຸພ຺ພຈຣິຕາປທານໍ ປກາເສນ຺ໂຕ ອກ຺ກນ຺ຕຎ຺ຈ ປທໍ ທິສ຺ວາຕິອາທິມາຫ. ຕຕ຺ຖ ອກ຺ກນ຺ຕນ຺ຕິ ອກ຺ກມິຕໍ ທສ຺ສິຕໍ. ສພ຺ພພຸທ຺ຘານໍ ສພ຺ພທາ ຈຕຸຣງ຺ຄຸໂລປຣິເຍວ ຄມນໍ, ອຍໍ ປນ ຕສ຺ສ ສທ຺ຘາສມ຺ປນ຺ນຕໍ ຎຕ຺ວາ ‘‘ເອໂສ ອິມໍ ປສ຺ສຕູ’’ຕິ ປທເຈຕິຍໍ ທສ຺ເສສິ, ຕສ຺ມາ ໂສ ຕສ຺ມິໍ ປສີທິຕ຺ວາ ວນ຺ທນປູຊນາທິສກ຺ກາຣມກາສີຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ປທສຎ຺ຎກຕ຺ເຖຣອປທານວຓ຺ຓນາ ສມຕ຺ຕາ.

໓. ພຸທ຺ຘສຎ຺ຎກຕ຺ເຖຣອປທານວຓ຺ຓນາ

ທຸມຄ຺ເຄ ປໍສຸກູລິກນ຺ຕິອາທິກໍ ອາຍສ຺ມໂຕ ພຸທ຺ຘສຎ຺ຎກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ຕິສ຺ສສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ສທ຺ຘາຊາໂຕ ທຸມຄ຺ເຄ ລຄ຺ຄິຕໍ ຠຄວໂຕ ປໍສຸກູລຈີວຣໍ ທິສ຺ວາ ປສນ຺ນມານໂສ ‘‘ອຣຫທ຺ຘຊ’’ນ຺ຕິ ຈິນ຺ເຕຕ຺ວາ ວນ຺ທນປູຊນາທິສກ຺ກາຣມກາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ສສມ຺ປຕ຺ຕິມນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ເນ ເອກສ຺ມິໍ ກຸລເຄເຫ ນິພ຺ພຕ຺ໂຕ ສທ຺ຘາຊາໂຕ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໙. ໂສ ປຕ຺ຕອຣຫຕ຺ຕາຘິຄໂມ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ທຸມຄ຺ເຄ ປໍສຸກູລິກນ຺ຕິອາທິມາຫ. ຕຕ຺ຖ ຘຸນາຕິ ກມ຺ປຕີຕິ ທຸໂມ. ທຸຫຕິ ປູເຣຕິ ອາກາສຕລນ຺ຕິ ວາ ທຸໂມ, ທຸມສ຺ສ ອຄ຺ໂຄ ໂກຏີຕິ ທຸມຄ຺ໂຄ, ຕສ຺ມິໍ ທຸມຄ຺ເຄ. ປໍສຸມິວ ປຏິກ຺ກູລຠາວໍ ອມນຸຎ຺ຎຠາວໍ ອຸລຕິ ຄຈ຺ຉຕີຕິ ປໍສຸກູລໍ, ປໍສຸກູລເມວ ປໍສຸກູລິກໍ, ສຕ຺ຖຸໂນ ປໍສຸກູລໍ ທຸມຄ຺ເຄ ລຄ຺ຄິຕໍ ທິສ຺ວາ ອຫໍ ອຎ຺ຊລິໍ ປຄ຺ຄເຫຕ຺ວາ ຕໍ ປໍສຸກູລໍ ອວນ຺ທິໍ ປຓາມມກາສິນ຺ຕິ ອຕ຺ໂຖ. ຕນ຺ຕິ ນິປາຕມຕ຺ຕໍ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ພຸທ຺ຘສຎ຺ຎກຕ຺ເຖຣອປທານວຓ຺ຓນາ ສມຕ຺ຕາ.

໔. ຠິສາລຸວທາຍກຕ຺ເຖຣອປທານວຓ຺ຓນາ

ການນໍ ວນໂມຄ຺ຄຍ຺ຫາຕິອາທິກໍ ອາຍສ຺ມໂຕ ຠິສາລຸວທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ຫິມວນ຺ຕສ຺ສ ສມີເປ ອຣຎ຺ຎາວາເສ ວສນ຺ໂຕ ວນມູລຜລາຫາໂຣ ວິເວກວເສນາຄຕໍ ວິປສ຺ສິໍ ຠຄວນ຺ຕໍ ທິສ຺ວາ ປສນ຺ນມານໂສ ປຎ຺ຈຠິສາລຸເວ ອທາສິ. ຠຄວາ ຕສ຺ສ ຈິຕ຺ຕໍ ປສາເທຕຸໍ ປສ຺ສນ຺ຕສ຺ເສວ ປຣິຠຸຎ຺ຊິ. ໂສ ເຕນ ຈິຕ຺ຕປ຺ປສາເທນ ກາລໍ ກຕ຺ວາ ຕຸສິຕາທີສຸ ສມ຺ປຕ຺ຕິມນຸຠວິຕ຺ວາ ປຈ຺ຉາ ມນຸສ຺ສສມ຺ປຕ຺ຕິຎ຺ຈ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຠວສມ຺ປຕ຺ຕິໍ ປຕ຺ໂຕ ຕໍ ປຫາຍ ສາສເນ ປພ຺ພຊິໂຕ ນຈິຣສ຺ເສວ ອຣຫຕ຺ຕໍ ປາປຸຓິ.

໑໓. ໂສ ຕໂຕ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ການນໍ ວນໂມຄ຺ຄຍ຺ຫາຕິອາທິມາຫ. ຕໍ ເຫຏ຺ຐາ ວຸຕ຺ຕຕ຺ຖເມວ. ວສາມິ ວິປິເນ ອຫນ຺ຕິ ວິເວກວາໂສ ອຫໍ ວສາມີຕິ ສມ຺ພນ຺ໂຘ. ເສສໍ ອຸຕ຺ຕານຕ຺ຖເມວາຕິ.

ຠິສາລຸວທາຍກຕ຺ເຖຣອປທານວຓ຺ຓນາ ສມຕ຺ຕາ.

ຉຏ຺ຐຠາຓວາຣວຓ຺ຓນາ ນິຏ຺ຐິຕາ.

໕. ເອກສຎ຺ຎກຕ຺ເຖຣອປທານວຓ຺ຓນາ

ຂຓ຺ໂຑ ນາມາສິ ນາເມນາຕິອາທິກໍ ອາຍສ຺ມໂຕ ເອກສຎ຺ຎກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຣຕນຕ຺ຕເຍ ປສນ຺ນມານໂສ ຕສ຺ສ ສຕ຺ຖຸໂນ ຂຓ຺ຑໍ ນາມ ອຄ຺ຄສາວກໍ ຠິກ຺ຂາຍ ຈຣມານໍ ທິສ຺ວາ ສທ຺ທຫິຕ຺ວາ ປິຓ຺ຑປາຕມທາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ສສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຖຸ ຘມ຺ມເທສນໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ. ໂສ ເອກທິວສໍ ປິຓ຺ຑປາຕສ຺ສ ສຎ຺ຎໍ ມນສິກຣິຕ຺ວາ ປຏິລທ຺ຘວິເສສຕ຺ຕາ ເອກສຎ຺ຎກຕ຺ເຖໂຣຕິ ປາກໂຏ.

໑໘. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຂຓ຺ໂຑ ນາມາສິ ນາເມນາຕິອາທິມາຫ. ຕຕ຺ຖ ຕສ຺ສ ອຄ຺ຄສາວກຕ຺ເຖຣສ຺ສ ກິເລສານໍ ຂຓ຺ຑິຕຕ຺ຕາ ຂຓ຺ໂຑຕິ ນາມໍ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ເອກສຎ຺ຎກຕ຺ເຖຣອປທານວຓ຺ຓນາ ສມຕ຺ຕາ.

໖. ຕິຓສນ຺ຖຣທາຍກຕ຺ເຖຣອປທານວຓ຺ຓນາ

ຫິມວນ຺ຕສ຺ສາວິທູເຣຕິອາທິກໍ ອາຍສ຺ມໂຕ ຕິຓສນ຺ຖຣທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ຕິສ຺ສສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ພຸທ຺ຘຸປ຺ປາທໂຕ ປເຄວ ອຸປ຺ປນ຺ນຕ຺ຕາ ຆຣາວາສໍ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ຫິມວນ຺ຕສ຺ສ ອວິທູເຣ ເອກໍ ສຣໍ ນິສ຺ສາຍ ປຏິວສຕິ. ຕສ຺ມິໍ ສມເຍ ຕິສ຺ໂສ ຠຄວາ ຕສ຺ສານຸກມ຺ປາຍ ອາກາເສນ ອຄມາສິ. ອຖ ໂຂ ໂສ ຕາປໂສ ອາກາສໂຕ ໂອຣຸຍ຺ຫ ຐິຕໍ ຕໍ ຠຄວນ຺ຕໍ ທິສ຺ວາ ປສນ຺ນມານໂສ ຕິຓໍ ລາຍິຕ຺ວາ ຕິຓສນ຺ຖຣໍ ກຕ຺ວາ ນິສີທາເປຕ຺ວາ ພຫຸມານາທເຣນ ປຎ຺ຈປຕິຏ຺ຐິເຕນ ວນ຺ທິຕ຺ວາ ປຏິກຸຏິໂກ ຫຸຕ຺ວາ ປກ຺ກາມິ. ໂສ ຍາວຕາຍຸກໍ ຐຕ຺ວາ ຕໂຕ ຈວິຕ຺ວາ ເທວມນຸສ຺ເສສຸ ສໍສຣນ຺ໂຕ ອເນກວິຘສມ຺ປຕ຺ຕິໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ສຕ຺ຖຣິ ປສີທິຕ຺ວາ ປພ຺ພຊິໂຕ ນຈິຣສ຺ເສວ ອຣຫາ ອໂຫສິ.

໒໒. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຫິມວນ຺ຕສ຺ສາວິທູເຣຕິອາທິມາຫ. ຕໍ ເຫຏ຺ຐາ ວຸຕ຺ຕຕ຺ຖເມວ. ມຫາຊາຕສ຺ສໂຣຕິ ເອຕ຺ຖ ປນ ສຣນ຺ຕິ ເອຕ຺ຖ ປານີຍຕ຺ຖິກາ ທ຺ວິປທຈຕຸປ຺ປທາທໂຍ ສຕ຺ຕາຕິ ສຣໍ, ອຖ ວາ ສຣນ຺ຕິ ເອຕ຺ຖ ນທີກນ຺ທຣາທໂຍຕິ ສຣໍ, ມຫນ຺ໂຕ ຈ ໂສ ສຍເມວ ຊາຕຕ຺ຕາ ສໂຣ ເຈຕິ ມຫາຊາຕສ຺ສໂຣ. ອໂນຕຕ຺ຕຉທ຺ທນ຺ຕທຫາທໂຍ ວິຍ ອປາກຏນາມຕ຺ຕາ ‘‘ມຫາຊາຕສ຺ສໂຣ’’ຕິ ວຸຕ຺ໂຕຕິ ທຏ຺ຐພ຺ໂພ. ສຕປຕ຺ເຕຫິ ສຎ຺ຉນ຺ໂນຕິ ເອເກກສ຺ມິໍ ປຸປ຺ເຜ ສຕສຕປຕ຺ຕານໍ ວເສນ ສຕປຕ຺ໂຕ, ສຕປຕ຺ຕເສຕປທຸເມຫິ ສຎ຺ຉນ຺ໂນ ຄຫນີຠູໂຕຕິ ອຕ຺ໂຖ. ນານາສກຸຓມາລໂຍຕິ ອເນເກ ຫໍສກຸກ຺ກຸຏກຸກ຺ກຸຫເທຓ຺ຑິຠາທໂຍ ເອກໂຕ ກຸຓນ຺ຕິ ສທ຺ທໍ ກໂຣນ຺ຕີຕິ ສກຸຓາຕິ ລທ຺ຘນາມານໍ ປກ຺ຂີນໍ ອາລໂຍ ອາຘາຣຠູໂຕຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ຕິຓສນ຺ຖຣທາຍກຕ຺ເຖຣອປທານວຓ຺ຓນາ ສມຕ຺ຕາ.

໗. ສູຈິທາຍກຕ຺ເຖຣອປທານວຓ຺ຓນາ

ຕິໍສກປ຺ປສຫສ຺ສມ຺ຫີຕິອາທິກໍ ອາຍສ຺ມໂຕ ສູຈິທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມຊິນວເຣສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສຸເມຘສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ຠຄວໂຕ ຈີວຣກມ຺ມໍ ກາຕຸໍ ປຎ຺ຈ ສູຈິໂຍ ອທາສິ. ໂສ ເຕນ ປຸຎ຺ເຎນ ເທວມນຸສ຺ເສສຸ ປຸຎ຺ຎມນຸຠວິຕ຺ວາ ວິຈຣນ຺ໂຕ ອຸປ຺ປນ຺ນຸປ຺ປນ຺ນຠເວ ຕິກ຺ຂປຎ຺ໂຎ ຫຸຕ຺ວາ ປາກໂຏ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ສຕ຺ຖຣິ ປສີທິຕ຺ວາ ປພ຺ພຊນ຺ໂຕ ຕິກ຺ຂປຎ຺ຎຕາຍ ຂຸຣຄ຺ເຄເຍວ ອຣຫຕ຺ຕໍ ປາປຸຓິ.

໓໐. ໂສ ອປຣຠາເຄ ປຸຎ຺ຎໍ ປຈ຺ຈເວກ຺ຂນ຺ໂຕ ຕໍ ທິສ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຕິໍສກປ຺ປສຫສ຺ສມ຺ຫີຕິອາທິມາຫ. ອນ຺ຕຣນ຺ຕຣໍ ປເນຕ຺ຖ ສຸວິຎ຺ເຎຍ຺ຍເມວ.

໓໑. ປຎ຺ຈສູຈີ ມຍາ ທິນ຺ນາຕິ ເອຕ຺ຖ ສູຈຕິ ຉິທ຺ທໍ ກໂຣຕິ ວິຊ຺ຌຕີຕິ ສູຈິ, ປຎ຺ຈມຕ຺ຕາ ສູຈີ ປຎ຺ຈສູຈີ ມຍາ ທິນ຺ນາຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ສູຈິທາຍກຕ຺ເຖຣອປທານວຓ຺ຓນາ ສມຕ຺ຕາ.

໘. ປາຏລິປຸປ຺ຜິຍຕ຺ເຖຣອປທານວຓ຺ຓນາ

ສຸວຓ຺ຓວຓ຺ຓໍ ສມ຺ພຸທ຺ຘນ຺ຕິອາທິກໍ ອາຍສ຺ມໂຕ ປາຏລິປຸປ຺ຜິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມຊິນວເຣສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ຕິສ຺ສສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ເສຏ຺ຐິປຸຕ຺ໂຕ ຫຸຕ຺ວາ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ກຸສລາກຸສລຎ຺ຎູ ສຕ຺ຖຣິ ປສີທິຕ຺ວາ ປາຏລິປຸປ຺ຜໍ ຄເຫຕ຺ວາ ສຕ຺ຖຸ ປູເຊສິ. ໂສ ເຕນ ປຸຎ຺ເຎນ ພຫຸຘາ ສຸຂສມ຺ປຕ຺ຕິໂຍ ອນຸຠວນ຺ໂຕ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ສຕ຺ຖຣິ ປສນ຺ໂນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໓໖. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ສຸວຓ຺ຓວຓ຺ຓໍ ສມ຺ພຸທ຺ຘນ຺ຕິອາທິມາຫ. ຕຕ຺ຖ ອນ຺ຕຣາປເຓຕິ ອາ ສມນ຺ຕໂຕ ຫິຣຎ຺ຎສຸວຓ຺ຓາທິກໍ ຠຓ຺ຑໍ ປເຓນ຺ຕິ ວິກ຺ກິຓນ຺ຕິ ປຕ຺ຖຣນ຺ຕິ ເອຕ຺ຖາຕິ ອາປຓໍ, ອາປຓສ຺ສ ອນ຺ຕຣໍ ວີຖີຕິ ອນ຺ຕຣາປຓໍ, ຕສ຺ມິໍ ອນ຺ຕຣາປເຓ. ສຸວຓ຺ຓວຓ຺ຓໍ ກຎ຺ຈນຄ຺ຆິຍສໍກາສໍ ທ຺ວຕ຺ຕິໍສວຣລກ຺ຂຓໍ ສມ຺ພຸທ຺ຘໍ ທິສ຺ວາ ປາຏລິປຸປ຺ຜໍ ປູເຊສິນ຺ຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ປາຏລິປຸປ຺ຜິຍຕ຺ເຖຣອປທານວຓ຺ຓນາ ສມຕ຺ຕາ.

໙. ຐິຕຎ຺ຊລິຍຕ຺ເຖຣອປທານວຓ຺ຓນາ

ມິຄລຸທ຺ໂທ ປຸເຣ ອາສິນ຺ຕິອາທິກໍ ອາຍສ຺ມໂຕ ຐິຕຎ຺ຊລິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖຸປ຺ປນ຺ນຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ຕິສ຺ສສ຺ສ ຠຄວໂຕ ກາເລ ປຸຣາກເຕນ ເອເກນ ກມ຺ມຈ຺ຉິທ຺ເທນ ເນສາທໂຍນິຍໍ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ມິຄສູກຣາທໂຍ ມາເຣຕ຺ວາ ເນສາທກມ຺ເມນ ອຣຎ຺ເຎ ວາສໍ ກປ຺ເປສິ. ຕສ຺ມິໍ ສມເຍ ຕິສ຺ໂສ ຠຄວາ ຕສ຺ສານຸກມ຺ປາຍ ຫິມວນ຺ຕໍ ອຄມາສິ. ໂສ ຕໍ ທ຺ວຕ຺ຕິໍສວຣລກ຺ຂເຓຫິ ອສີຕານຸພ຺ຍຎ຺ຊນພ຺ຍາມປ຺ປຠາຫິ ຈ ຊລມານໍ ຠຄວນ຺ຕໍ ທິສ຺ວາ ໂສມນສ຺ສຊາໂຕ ປຓາມໍ ກຕ຺ວາ ຄນ຺ຕ຺ວາ ປຓ຺ຓສນ຺ຖເຣ ນິສີທິ. ຕສ຺ມິໍ ຂເຓ ເທໂວ ຄຊ຺ຊນ຺ໂຕ ອສນິ ປຕິ, ຕໂຕ ມຣຓສມເຍ ພຸທ຺ຘມນຸສ຺ສຣິຕ຺ວາ ປຸນຎ຺ຊລິມກາສິ. ໂສ ເຕນ ປຸຎ຺ເຎນ ສຸເຂຕ຺ເຕ ກຕກຸສລຕ຺ຕາ ອກຸສລວິປາກໍ ປຏິພາຫິຕ຺ວາ ສຄ຺ເຄ ນິພ຺ພຕ຺ໂຕ ກາມາວຈຣສມ຺ປຕ຺ຕິໂຍ ອນຸຠວິຕ຺ວາ ມນຸສ຺ເສສຸ ມນຸສ຺ສສມ຺ປຕ຺ຕິໂຍ ຈ ອນຸຠວິຕ຺ວາ ອປຣຠາເຄ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ປຸຣາກຕວາສນາຍ ສຕ຺ຖຣິ ປສີທິຕ຺ວາ ປພ຺ພຊິໂຕ ນຈິຣສ຺ເສວ ອຣຫາ ອໂຫສິ.

໔໒. ໂສ ຕໂຕ ປຣໍ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ມິຄລຸທ຺ໂທ ປຸເຣ ອາສິນ຺ຕິອາທິມາຫ. ຕຕ຺ຖ ມິຄລຸທ຺ໂທຕິ ມິຄານໍ ມາຣຓໍ ອຸປຄຈ຺ຉຕີຕິ ມິຄລຸທ຺ໂທ. ມິຄນ຺ຕິ ສີຆໍ ວາຕເວເຄນ ຄຈ຺ຉນ຺ຕິ ຘາວນ຺ຕີຕິ ມິຄາ, ເຕສໍ ມິຄານໍ ມາຣເຓ ລຸທ຺ໂທ ທາຣຸໂຓ ໂລຠີຕິ ມິຄລຸທ຺ໂທ. ໂສ ອຫໍ ປຸເຣ ຠຄວໂຕ ທສ຺ສນສມເຍ ມິຄລຸທ຺ໂທ ອາສິໍ ອໂຫສິນ຺ຕິ ອຕ຺ໂຖ. ອຣຎ຺ເຎ ການເນຕິ ອຣຕິ ຄຈ຺ຉຕິ ມິຄສມູໂຫ ເອຕ຺ຖາຕິ ອຣຎ຺ຎໍ, ອຖ ວາ ອາ ສມນ຺ຕໂຕ ຣຊ຺ຊນ຺ຕິ ຕຕ຺ຖ ວິເວກາຠິຣຕາ ພຸທ຺ຘປຈ຺ເຈກພຸທ຺ຘາທໂຍ ມຫາສາຣປ຺ປຕ຺ຕາ ສປ຺ປຸຣິສາຕິ ອຣຎ຺ຎໍ. ກາ ກຸຈ຺ຉິຕາກາເຣນ ວາ ຠຍານກາກາເຣນ ວາ ນທນ຺ຕິ ສທ຺ທໍ ກໂຣນ຺ຕິ, ອານນ຺ຕິ ວິນ຺ທນ຺ຕີຕິ ວາ ການນໍ, ຕສ຺ມິໍ ອຣຎ຺ເຎ ການເນ ມິຄລຸທ຺ໂທ ປຸເຣ ອາສິນ຺ຕິ ສມ຺ພນ຺ໂຘ. ຕຕ຺ຖ ອທ຺ທສໍ ສມ຺ພຸທ຺ຘນ຺ຕິ ຕຕ຺ຖ ຕສ຺ມິໍ ອຣຎ຺ເຎ ອຸປຄຕໍ ສມ຺ພຸທ຺ຘໍ ອທ຺ທສໍ ອທ຺ທກ຺ຂິນ຺ຕິ ອຕ຺ໂຖ. ທສ຺ສນໍ ປຸເຣ ອໂຫສິ ອວິທູເຣ, ຕສ຺ມາ ມໂນທ຺ວາຣານຸສາເຣນ ຈກ຺ຂຸວິຎ຺ຎາຓໍ ປຸເຣຈາຣິກໍ ກາຍວິຎ຺ຎາຓສມງ຺ຄິໍ ປາເປຕິ ອປ຺ເປຕີຕິ ອຕ຺ໂຖ.

໔໔. ຕໂຕ ເມ ອສນີປາໂຕຕິ ອາ ສມນ຺ຕໂຕ ສນນ຺ໂຕ ຄຊ຺ຊນ຺ໂຕ ປຕຕີຕິ ອສນິ, ອສນິຍາ ປາໂຕ ປຕນໍ ອສນີປາໂຕ, ເທວທຓ຺ໂຑຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ຐິຕຎ຺ຊລິຍຕ຺ເຖຣອປທານວຓ຺ຓນາ ສມຕ຺ຕາ.

໑໐. ຕິປທຸມິຍຕ຺ເຖຣອປທານວຓ຺ຓນາ

ປທຸມຸຕ຺ຕໂຣ ນາມ ຊິໂນຕິອາທິກໍ ອາຍສ຺ມໂຕ ຕິປທຸມິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ຫໍສວຕິຍໍ ມາລາກາຣກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ມາລາກາຣກມ຺ມໍ ກຕ຺ວາ ວສນ຺ໂຕ ເອກທິວສໍ ອເນກວິຘານິ ຊລຊຖລຊປຸປ຺ຜານິ ຄເຫຕ຺ວາ ຣຎ຺ໂຎ ສນ຺ຕິກໍ ຄນ຺ຕຸກາໂມ ເອວໍ ຈິນ຺ເຕສິ – ‘‘ຣາຊາ ອິມານິ ຕາວ ປຸປ຺ຜານິ ທິສ຺ວາ ປສນ຺ໂນ ສຫສ຺ສໍ ວາ ຘນໍ ຄາມາທິກໍ ວາ ທເທຍ຺ຍ, ໂລກນາຖໍ ປນ ປູເຊຕ຺ວາ ນິພ຺ພານາມຕຘນໍ ລຠາມິ, ກິໍ ເມ ເອເຕສຸ ສຸນ຺ທຣ’’ນ຺ຕິ ເຕນ ‘‘ຠຄວນ຺ຕໍ ປູເຊຕ຺ວາ ສຄ຺ຄໂມກ຺ຂສມ຺ປຕ຺ຕິໂຍ ນິປ຺ຜາເທຕຸໍ ວຏ຺ຏຕີ’’ຕິ ຈິນ຺ເຕຕ຺ວາ ວຓ຺ຓວນ຺ຕໍ ອຕີວ ຣຕ຺ຕປຸປ຺ຜຕ຺ຕຍໍ ຄເຫຕ຺ວາ ປູເຊສິ. ຕານິ ຄນ຺ຕ຺ວາ ອາກາສໍ ຉາເທຕ຺ວາ ປຕ຺ຖຣິຕ຺ວາ ອຏ຺ຐໍສຸ. ນຄຣວາສິໂນ ອຈ຺ຉຣິຍພ຺ຠຸຕຈິຕ຺ຕຊາຕາ ເຈລຸກ຺ເຂປສຫສ຺ສານິ ປວຕ຺ຕຍິໍສຸ. ຕໍ ທິສ຺ວາ ຠຄວາ ອນຸໂມທນໍ ອກາສິ. ໂສ ເຕນ ປຸຎ຺ເຎນ ເທວມນຸສ຺ເສສຸ ສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ຄຫປຕິກຸເລ ນິພ຺ພຕ຺ໂຕ ວຸທ຺ຘິມນ຺ວາຍ ສຕ຺ຖຣິ ປສີທິຕ຺ວາ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໔໘. ໂສ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕ຺ຕໂຣ ນາມ ຊິໂນຕິອາທິມາຫ. ຕສ຺ສຕ຺ໂຖ ເຫຏ຺ຐາ ວຸຕ຺ໂຕວ. ສພ຺ພຘມ຺ມານ ປາຣຄູຕິ ສພ຺ເພສໍ ນວໂລກຸຕ຺ຕຣຘມ຺ມານໍ ປາຣໍ ນິພ຺ພານໍ ຄໂຕ ປຈ຺ຈກ຺ຂໍ ກໂຕຕິ ອຕ຺ໂຖ. ທນ຺ໂຕ ທນ຺ຕປຣິວຸໂຕຕິ ສຍໍ ກາຍວາຈາທີຫິ ທນ຺ໂຕ ເອຕທຄ຺ເຄ ຐປິເຕຫິ ສາວເກຫິ ປຣິວຸໂຕຕິ ອຕ຺ໂຖ. ເສສໍ ສພ຺ພຕ຺ຖ ສມ຺ພນ຺ຘວເສນ ອຸຕ຺ຕານຕ຺ຖເມວາຕິ.

ຕິປທຸມິຍຕ຺ເຖຣອປທານວຓ຺ຓນາ ສມຕ຺ຕາ.

ອຏ຺ຐມວຄ຺ຄວຓ຺ຓນາ ສມຕ຺ຕາ.