໙. ຕິມິຣວຄ຺ໂຄ

໑. ຕິມິຣປຸປ຺ຜິຍຕ຺ເຖຣອປທານວຓ຺ຓນາ

ຈນ຺ທຠາຄານທີຕີເຣຕິອາທິກໍ ອາຍສ຺ມໂຕ ຕິມິຣປຸປ຺ຜິຍຕ຺ເຖຣສ຺ສ ອປທານໍ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິທ຺ຘຕ຺ຖສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ຆຣາວາສໍ ສຓ຺ຐເປຕ຺ວາ ວສນ຺ໂຕ ກາເມສຸ ອາທີນວໍ ທິສ຺ວາ ຆຣາວາສໍ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ຈນ຺ທຠາຄາຍ ນທິຍາ ສມີເປ ວສຕິ, ວິເວກກາມຕາຍ ຫິມວນ຺ຕໍ ຄນ຺ຕ຺ວາ ນິສິນ຺ນໍ ສິທ຺ຘຕ຺ຖໍ ຠຄວນ຺ຕໍ ທິສ຺ວາ ວນ຺ທິຕ຺ວາ ຕສ຺ສ ຄຸຓໍ ປສີທິຕ຺ວາ ຕິມິຣປຸປ຺ຜໍ ຄເຫຕ຺ວາ ປູເຊສິ. ໂສ ເຕນ ປຸຎ຺ເຎນ ເທເວສຸ ຈ ມນຸສ຺ເສສຸ ຈ ສມ຺ປຕ຺ຕິມນຸຠວນ຺ໂຕ ສໍສຣິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ສຕ຺ຖຣິ ປສີທິຕ຺ວາ ປພ຺ພຊິໂຕ ນຈິຣສ຺ເສວ ອຣຫາ ອໂຫສິ.

໑. ໂສ ອປຣຠາເຄ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຈນ຺ທຠາຄານທີຕີເຣຕິອາທິມາຫ. ຕສ຺ສຕ຺ໂຖ ເຫຏ຺ຐາ ວຸຕ຺ໂຕວ. ອນຸໂຠຕໍ ວຊາມຫນ຺ຕິ ຄງ຺ຄາຍ ອາສນ຺ເນ ວສນຠາເວນ ສພ຺ພຕ຺ຖ ຣມ຺ມຠາເວນ ຄງ຺ຄາໂຕ ເຫຏ຺ຐາ ໂສຕານຸສາເຣນ ອຫໍ ວຊາມິ ຄຈ຺ຉາມິ ຕຕ຺ຖ ຕຕ຺ຖ ວສາມີຕິ ອຕ຺ໂຖ. ນິສິນ຺ນໍ ສມຓໍ ທິສ຺ວາຕິ ສມິຕປາປຕ຺ຕາ ໂສສິຕປາປຕ຺ຕາ ສມຓສງ຺ຂາຕໍ ສມ຺ມາສມ຺ພຸທ຺ຘໍ ທິສ຺ວາຕິ ອຕ຺ໂຖ.

໒. ເອວໍ ຈິນ຺ເຕສຫໍ ຕທາຕິ ອຍໍ ຠຄວາ ສຍໍ ຕິຓ຺ໂຓ ສພ຺ພສຕ຺ເຕ ຕາຣຍິສ຺ສຕິ ສໍສາຣໂຕ ອຸຕ຺ຕາເຣຕິ ສຍໍ ກາຍທ຺ວາຣາທີຫິ ທມິໂຕ ອຍໍ ຠຄວາ ປເຣ ທເມຕິ.

໓. ສຍໍ ອສ຺ສຕ຺ໂຖ ອສ຺ສາສມ຺ປຕ຺ໂຕ, ກິເລສປຣິຬາຫໂຕ ມຸຕ຺ໂຕ ສພ຺ພສຕ຺ເຕ ອສ຺ສາເສຕິ, ສນ຺ຕຠາວໍ ອາປາເປຕິ. ສຍໍ ສນ຺ໂຕ ສນ຺ຕກາຍຈິຕ຺ໂຕ ປເຣສໍ ສນ຺ຕກາຍຈິຕ຺ຕໍ ປາເປຕິ. ສຍໍ ມຸຕ຺ໂຕ ສໍສາຣໂຕ ມຸຈ຺ຈິໂຕ ປເຣ ສໍສາຣໂຕ ໂມຈຍິສ຺ສຕິ. ໂສ ອຍໍ ຠຄວາ ສຍໍ ນິພ຺ພຸໂຕ ກິເລສຄ຺ຄີຫິ ນິພ຺ພຸໂຕ ປເຣສມ຺ປິ ກິເລສຄ຺ຄີຫິ ນິພ຺ພາເປສ຺ສຕີຕິ ອຫໍ ຕທາ ເອວໍ ຈິນ຺ເຕສິນ຺ຕິ ອຕ຺ໂຖ.

໔. ຄເຫຕ຺ວາ ຕິມິຣປຸປ຺ຜນ຺ຕິ ສກລໍ ວນນ຺ຕໍ ນີລກາຬຣໍສີຫິ ອນ຺ຘກາຣໍ ວິຍ ກຸຣຸມານໍ ຂາຍຕີຕິ ຕິມິຣໍ ປຸປ຺ຜໍ ຕໍ ຄເຫຕ຺ວາ ກຓ຺ຓິກາວຓ຺ຏໍ ຄເຫຕ຺ວາ ມຕ຺ຖເກ ສີສສ຺ສ ອຸປຣິ ອາກາເສ ໂອກິຣິໍ ປູເຊສິນ຺ຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ຕິມິຣປຸປ຺ຜິຍຕ຺ເຖຣອປທານວຓ຺ຓນາ ສມຕ຺ຕາ.

໒. ຄຕສຎ຺ຎກຕ຺ເຖຣອປທານວຓ຺ຓນາ

ຊາຕິຍາ ສຕ຺ຕວສ຺ໂສຫນ຺ຕິອາທິກໍ ອາຍສ຺ມໂຕ ຄຕສຎ຺ຎກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ຕິສ຺ສສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ປຸຣາກຕວາສນາວເສນ ສທ຺ຘາຊາໂຕ ສຕ຺ຕວສ຺ສິກກາເລເຍວ ປພ຺ພຊິໂຕ ຠຄວໂຕ ປຓາມກຣເຓເນວ ປາກໂຏ ອໂຫສິ. ໂສ ເອກທິວສໍ ອຕີວ ນີລມຓິປ຺ປຠານິ ນງ຺ຄລກສິຕຏ຺ຐາເນ ອຸຏ຺ຐິຕສຕ຺ຕປຸປ຺ຜານິ ຄເຫຕ຺ວາ ອາກາເສ ປູເຊສິ. ໂສ ຍາວຕາຍຸກໍ ສມຓຘມ຺ມໍ ກຕ຺ວາ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຖຣິ ປສີທິຕ຺ວາ ປພ຺ພຊິໂຕ ນຈິຣສ຺ເສວ ອຣຫາ ອໂຫສິ.

໑໐. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຊາຕິຍາ ສຕ຺ຕວສ຺ໂສຫນ຺ຕິອາທິມາຫ. ຕຕ຺ຖ ຊາຕິຍາ ສຕ຺ຕວສ຺ໂສຕິ ມາຕຸຄພ຺ຠໂຕ ນິກ຺ຂນ຺ຕກາລໂຕ ປຏ຺ຐາຍ ປຣິປຸຓ຺ຓສຕ຺ຕວສ຺ສິໂກຕິ ອຕ຺ໂຖ. ປພ຺ພຊິໍ ອນຄາຣິຍນ຺ຕິ ອຄາຣສ຺ສ ຫິຕໍ ອາຄາຣິຍໍ ກສິວາຓິຊ຺ຊາທິກມ຺ມໍ ນຕ຺ຖິ ອາຄາຣິຍນ຺ຕິ ອນຄາຣິຍໍ, ພຸທ຺ຘສາສເນ ປພ຺ພຊິໍ ອຫນ຺ຕິ ອຕ຺ໂຖ.

໑໒. ສຸຄຕານຸຄຕໍ ມຄ຺ຄນ຺ຕິ ພຸທ຺ເຘນ ຄຕໍ ມຄ຺ຄໍ. ອຖ ວາ ສຸຄເຕນ ເທສິຕໍ ຘມ຺ມານຸຘມ຺ມປຏິປຕ຺ຕິປູຣຓວເສນ ຫຏ຺ຐມານໂສ ຕຸຏ຺ຐຈິຕ຺ໂຕ ປູເຊຕ຺ວາຕິ ສມ຺ພນ຺ໂຘ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ຄຕສຎ຺ຎກຕ຺ເຖຣອປທານວຓ຺ຓນາ ສມຕ຺ຕາ.

໓. ນິປນ຺ນຎ຺ຊລິກຕ຺ເຖຣອປທານວຓ຺ຓນາ

ຣຸກ຺ຂມູເລ ນິສິນ຺ໂນຫນ຺ຕິອາທິກໍ ອາຍສ຺ມໂຕ ນິປນ຺ນຎ຺ຊລິກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອເນເກສຸ ຠເວສຸ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ຕິສ຺ສສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ປພ຺ພຊິຕ຺ວາ ຣຸກ຺ຂມູລິກງ຺ຄໍ ປູຣຍມາໂນ ອຣຎ຺ເຎ ວິຫຣຕິ. ຕສ຺ມິໍ ສມເຍ ຂໂຣ ອາພາໂຘ ອຸປ຺ປຊ຺ຊິ, ເຕນ ປີຬິໂຕ ປຣມກາຣຸຎ຺ຎປ຺ປຕ຺ໂຕ ອໂຫສິ. ຕທາ ຠຄວາ ຕສ຺ສ ກາຣຸຎ຺ເຎນ ຕຕ຺ຖ ອຄມາສິ. ອຖ ໂສ ນິປນ຺ນໂກວ ອຸຏ຺ຐິຕຸໍ ອສກ຺ໂກນ຺ໂຕ ສິຣສິ ອຎ຺ຊລິໍ ກຕ຺ວາ ຠຄວໂຕ ປຓາມໍ ອກາສິ. ໂສ ຕໂຕ ຈຸໂຕ ຕຸສິຕຠວເນ ອຸປ຺ປນ຺ໂນ ຕຕ຺ຖ ສມ຺ປຕ຺ຕິມນຸຠວິຕ຺ວາ ເອວໍ ຉ ກາມາວຈຣສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ສຕ຺ຖຣິ ປສີທິຕ຺ວາ ປພ຺ພຊິໂຕ ນຈິຣສ຺ເສວ ອຣຫາ ອໂຫສິ, ປຸຣາກຕປຸຎ຺ຎວເສນ ນິປນ຺ນຎ຺ຊລິກຕ຺ເຖໂຣຕິ ປາກໂຏ.

໑໖. ໂສ ອປຣຠາເຄ ອຕ຺ຕໂນ ປຸຎ຺ຎສມ຺ປຕ຺ຕິໂຍ ໂອໂລເກຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຣຸກ຺ຂມູເລ ນິສິນ຺ໂນຫນ຺ຕິອາທິມາຫ. ຕຕ຺ຖ ຣຸຫຕິ ປຏິຣຸຫຕິ ອຸທ຺ຘມຸທ຺ຘໍ ອາໂຣຫຕີຕິ ຣຸກ຺ໂຂ, ຕສ຺ສ ຣຸກ຺ຂສ຺ສ ມູເລ ສມີເປຕິ ອຕ຺ໂຖ. ພ຺ຍາຘິໂຕ ປຣເມນ ຈາຕິ ປຣເມນ ອຘິເກນ ຂເຣນ ກກ຺ຂເຬນ ພ຺ຍາຘິນາ ໂຣເຄນ ພ຺ຍາຘິໂຕ, ພ຺ຍາຘິນາ ອຫໍ ສມນ຺ນາຄໂຕຕິ ອຕ຺ໂຖ. ປຣມກາຣຸຎ຺ຎປ຺ປຕ຺ໂຕມ຺ຫີຕິ ປຣມໍ ອຘິກໍ ກາຣຸຎ຺ຎໍ ທີນຠາວໍ ທຸກ຺ຂິຕຠາວໍ ປຕ຺ໂຕມ຺ຫິ ອຣຎ຺ເຎ ການເນຕິ ສມ຺ພນ຺ໂຘ.

໒໐. ປຎ຺ເຈວາສຸໍ ມຫາສິຂາຕິ ສິຣສິ ປິຬນ຺ຘນຕ຺ເຖນ ສິຂາ ວຸຈ຺ຈຕິ ຈູຬາ. ມຓີຕິ ໂຊຕມານໍ ມກຸຏໍ ຕສ຺ສ ອຕ຺ຖີຕິ ສິໂຂ, ຈກ຺ກວຕ຺ຕິໂນ ເອກນາມກາ ປຎ຺ເຈວ ຈກ຺ກວຕ຺ຕິໂນ ອາສຸໍ ອເຫສຸນ຺ຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ນິປນ຺ນຎ຺ຊລິກຕ຺ເຖຣອປທານວຓ຺ຓນາ ສມຕ຺ຕາ.

໔. ອໂຘປຸປ຺ຜິຍຕ຺ເຖຣອປທານວຓ຺ຓນາ

ອຠິຠູ ນາມ ໂສ ຠິກ຺ຂູຕິອາທິກໍ ອາຍສ຺ມໂຕ ອໂຘປຸປ຺ຜິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອເນເກສຸ ຠເວສຸ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິຂິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ຆຣາວາສໍ ສຓ຺ຐເປຕ຺ວາ ອປຣຠາເຄ ກາເມສຸ ອາທີນວໍ ທິສ຺ວາ ຕໍ ປຫາຍ ອິສິປພ຺ພຊ຺ຊໍ ປພ຺ພຊິຕ຺ວາ ປຎ຺ຈາຠິຎ຺ຎາອຏ຺ຐສມາປຕ຺ຕິລາຠີ ອິທ຺ຘີສຸ ຈ ວສີຠາວໍ ປຕ຺ວາ ຫິມວນ຺ຕສ຺ມິໍ ປຏິວສຕິ. ຕສ຺ສ ສິຂິສ຺ສ ຠຄວໂຕ ອຠິຠູ ນາມ ອຄ຺ຄສາວໂກ ວິເວກາຠິຣໂຕ ຫິມວນ຺ຕມຄມາສິ. ອຖ ໂສ ຕາປໂສ ຕໍ ອຄ຺ຄສາວກຕ຺ເຖຣໍ ທິສ຺ວາ ເຖຣສ຺ສ ຐິຕປພ຺ພຕໍ ອາຣຸຫນ຺ໂຕ ປພ຺ພຕສ຺ສ ເຫຏ຺ຐາຕລໂຕ ສຸຄນ຺ຘານິ ວຓ຺ຓສມ຺ປນ຺ນານິ ສຕ຺ຕ ປຸປ຺ຜານິ ຄເຫຕ຺ວາ ປູເຊສິ. ອຖ ໂສ ເຖໂຣ ຕສ຺ສານຸໂມທນມກາສິ. ໂສປິ ຕາປໂສ ສກສ຺ສມໍ ອຄມາສິ. ຕຕ຺ຖ ເອເກນ ອຊຄເຣນ ປີຬິໂຕ ອປຣຠາເຄ ອປຣິຫີນຊ຺ຌາໂນ ເຕເນວ ອຸປທ຺ທເວນ ອຸປທ຺ທຸໂຕ ກາລໍ ກຕ຺ວາ ພ຺ຣຫ຺ມໂລກປຣາຍໂນ ຫຸຕ຺ວາ ພ຺ຣຫ຺ມສມ຺ປຕ຺ຕິໍ ຉກາມາວຈຣສມ຺ປຕ຺ຕິຎ຺ຈ ອນຸຠວິຕ຺ວາ ມນຸສ຺ເສສຸ ມນຸສ຺ສສມ຺ປຕ຺ຕິໂຍ ຈ ເຂເປຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ຠຄວໂຕ ຘມ຺ມໍ ສຸຕ຺ວາ ປສນ຺ນມານໂສ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ. ໂສ ອປຣຠາເຄ ອຕ຺ຕໂນ ກຕປຸຎ຺ຎນາເມນ ອໂຘປຸປ຺ຜິຍຕ຺ເຖໂຣຕິ ປາກໂຏ.

໒໒. ໂສ ເອກທິວສໍ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອຠິຠູ ນາມ ໂສ ຠິກ຺ຂູຕິອາທິມາຫ. ຕຕ຺ຖ ສີລສມາຘີຫິ ປເຣ ອຠິຠວຕີຕິ ອຠິຠູ, ຂນ຺ຘມາຣາທິມາເຣ ອຠິຠວຕິ ອຊ຺ໂຌຕ຺ຖຣຕີຕິ ວາ ອຠິຠູ, ສສນ຺ຕານປຣສນ຺ຕານຄຕກິເລເສ ອຠິຠວຕິ ວິເຫເສຕິ ວິທ຺ຘໍເສຕີຕິ ວາ ອຠິຠູ. ຠິກ຺ຂນສີໂລ ຍາຈນສີໂລຕິ ຠິກ຺ຂຸ, ຉິນ຺ນຠິນ຺ນປຏຘໂຣຕິ ວາ ຠິກ຺ຂຸ. ອຠິຠູ ນາມ ອຄ຺ຄສາວໂກ ໂສ ຠິກ຺ຂູຕິ ອຕ຺ໂຖ, ສິຂິສ຺ສ ຠຄວໂຕ ອຄ຺ຄສາວໂກຕິ ສມ຺ພນ຺ໂຘ.

໒໗. ອຊຄໂຣ ມໍ ປີເຬສີຕິ ຕຖາຣູປໍ ສີລສມ຺ປນ຺ນໍ ຌານສມ຺ປນ຺ນໍ ຕາປສໍ ປຸພ຺ເພ ກຕປາເປນ ເວເຣນ ຈ ມຫນ຺ໂຕ ອຊຄຣສປ຺ໂປ ປີເຬສິ. ໂສ ເຕເນວ ອຸປທ຺ທເວນ ອຸປທ຺ທຸໂຕ ອປຣິຫີນຊ຺ຌາໂນ ກາລໍ ກຕ຺ວາ ພ຺ຣຫ຺ມໂລກປຣາຍໂຓ ອາສິ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ອໂຘປຸປ຺ຜິຍຕ຺ເຖຣອປທານວຓ຺ຓນາ ສມຕ຺ຕາ.

໕. ຣໍສິສຎ຺ຎກຕ຺ເຖຣອປທານວຓ຺ຓນາ

ປພ຺ພເຕ ຫິມວນ຺ຕມ຺ຫີຕິອາທິກໍ ອາຍສ຺ມໂຕ ຣໍສິສຎ຺ຎກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ເຕສຸ ເຕສຸ ຠເວສຸ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ຆຣາວາສໍ ສຓ຺ຐເປຕ຺ວາ ກາເມສຸ ອາທີນວໍ ທິສ຺ວາ ຆຣາວາສໍ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ອຊິນຈມ຺ມຘໂຣ ຫິມວນ຺ຕມ຺ຫິ ວາສໍ ກປ຺ເປສິ. ຕສ຺ມິໍ ສມເຍ ວິປສ຺ສີ ຠຄວາ ຫິມວນ຺ຕມຄມາສິ. ອຖ ໂສ ຕາປໂສ ຕມຸປຄຕໍ ຠຄວນ຺ຕໍ ທິສ຺ວາ ຕສ຺ສ ຠຄວໂຕ ສຣີຣໂຕ ນິກ຺ຂນ຺ຕຉພ຺ພຓ຺ຓພຸທ຺ຘຣໍສີສຸ ປສີທິຕ຺ວາ ອຎ຺ຊລິໍ ປຄ຺ຄຍ຺ຫ ປຎ຺ຈງ຺ເຄນ ນມກ຺ກາຣມກາສິ. ໂສ ເຕເນວ ປຸຎ຺ເຎນ ອິໂຕ ຈຸໂຕ ຕຸສິຕາທີສຸ ທິພ຺ພສມ຺ປຕ຺ຕິໂຍ ອນຸຠວິຕ຺ວາ ອປຣຠາເຄ ມນຸສ຺ສສມ຺ປຕ຺ຕິໂຍ ຈ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ຆຣາວາສໍ ສຓ຺ຐເປຕ຺ວາ ຕຕ຺ຖາທີນວໍ ທິສ຺ວາ ເຄຫໍ ປຫາຍ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໓໐. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປພ຺ພເຕ ຫິມວນ຺ຕມ຺ຫີຕິອາທິມາຫ. ຕຕ຺ຖ ປພ຺ພເຕຕິ ປກາເຣນ ພ຺ຣູຫຕິ ວຑ຺ເຒຕີຕິ ປພ຺ພໂຕ, ຫິໂມ ອສ຺ສ ອຕ຺ຖີຕິ ຫິມວນ຺ໂຕ, ຫິມວນ຺ໂຕ ຈ ໂສ ປພ຺ພໂຕ ຈາຕິ ຫິມວນ຺ຕປພ຺ພໂຕ. ຫິມວນ຺ຕປພ຺ພເຕຕິ ວຕ຺ຕພ຺ເພ ຄາຖາວຈນສຸຂຕ຺ຖໍ ‘‘ປພ຺ພເຕ ຫິມວນ຺ຕມ຺ຫີ’’ຕິ ວຸຕ຺ຕໍ. ຕສ຺ມິໍ ຫິມວນ຺ຕມ຺ຫິ ປພ຺ພເຕ ວາສໍ ກປ຺ເປສິໍ ປຸເຣ ອຫນ຺ຕິ ສມ຺ພນ຺ໂຘ. ເສສໍ ສພ຺ພຕ຺ຖ ນຍານຸສາເຣນ ອຸຕ຺ຕານເມວາຕິ.

ຣໍສິສຎ຺ຎກຕ຺ເຖຣອປທານວຓ຺ຓນາ ສມຕ຺ຕາ.

໖. ທຸຕິຍຣໍສິສຎ຺ຎກຕ຺ເຖຣອປທານວຓ຺ຓນາ

ປພ຺ພເຕ ຫິມວນ຺ຕມ຺ຫີຕິອາທິກໍ ອາຍສ຺ມໂຕ ທຸຕິຍຣໍສິສຎ຺ຎກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕກຸສໂລ ອຸປ຺ປນ຺ນຸປ຺ປນ຺ນຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ຜຸສ຺ສສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ຆຣາວາສໍ ສຓ຺ຐເປຕ຺ວາ ຕຕ຺ຖ ໂທສໍ ທິສ຺ວາ ຕໍ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ຫິມວນ຺ຕປພ຺ພເຕ ວສນ຺ໂຕ ວາກຈີຣນິວສໂນ ວິເວກສຸເຂນ ວິຫຣຕິ. ຕສ຺ມິໍ ສມເຍ ໂສ ຜຸສ຺ສໍ ຠຄວນ຺ຕໍ ຕໍ ປເທສໍ ສມ຺ປຕ຺ຕໍ ທິສ຺ວາ ຕສ຺ສ ສຣີຣໂຕ ນິກ຺ຂນ຺ຕຉພ຺ພຓ຺ຓພຸທ຺ຘຣໍສິໂຍ ອິໂຕ ຈິໂຕ ວິຘາວນ຺ຕິໂຍ ທຓ຺ຑທີປິການິກ຺ຂນ຺ຕວິປ຺ຜຸຣນ຺ຕມິວ ທິສ຺ວາ ຕສ຺ມິໍ ປສນ຺ໂນ ອຎ຺ຊລິໍ ປຄ຺ຄເຫຕ຺ວາ ວນ຺ທິຕ຺ວາ ຈິຕ຺ຕໍ ປສາເທຕ຺ວາ ເຕເນວ ປີຕິໂສມນສ຺ເສນ ກາລໍ ກຕ຺ວາ ຕຸສິຕາທີສຸ ນິພ຺ພຕ຺ໂຕ ຕຕ຺ຖ ຉ ກາມາວຈຣສມ຺ປຕ຺ຕິໂຍ ຈ ອນຸຠວິຕ຺ວາ ອປຣຠາເຄ ມນຸສ຺ສສມ຺ປຕ຺ຕິໂຍ ຈ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ປຸພ຺ພວາສນາວເສນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໓໕. ໂສ ອປຣຠາເຄ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປພ຺ພເຕ ຫິມວນ຺ຕມ຺ຫີຕິອາທິມາຫ. ຕໍ ສພ຺ພໍ ອຸຕ຺ຕານຕ຺ຖເມວາຕິ.

ທຸຕິຍຣໍສິສຎ຺ຎກຕ຺ເຖຣອປທານວຓ຺ຓນາ ສມຕ຺ຕາ.

໗. ຜລທາຍກຕ຺ເຖຣອປທານວຓ຺ຓນາ

ປພ຺ພເຕ ຫິມວນ຺ຕມ຺ຫີຕິອາທິກໍ ອາຍສ຺ມໂຕ ຜລທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕກຸສລສມ຺ຠາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ຜຸສ຺ສສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ສຸຂປ຺ປຕ຺ໂຕ ຕໍ ສພ຺ພໍ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ຂຣາຊິນຈມ຺ມຘາຣີ ຫຸຕ຺ວາ ວິຫຣຕິ. ຕສ຺ມິຎ຺ຈ ສມເຍ ຜຸສ຺ສໍ ຠຄວນ຺ຕໍ ຕຕ຺ຖ ສມ຺ປຕ຺ຕໍ ທິສ຺ວາ ປສນ຺ນມານໂສ ມຘຸຣານິ ຜລານິ ຄເຫຕ຺ວາ ໂຠເຊສິ. ໂສ ເຕເນວ ກຸສເລນ ເທວໂລກາທີສຸ ປຸຎ຺ຎສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ສຕ຺ຖຣິ ປສີທິຕ຺ວາ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໓໙. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ອນຸສ຺ສຣິຕ຺ວາ ປຸພ຺ພຈຣິຕາປທານໍ ປກາເສນ຺ໂຕ ປພ຺ພເຕ ຫິມວນ຺ຕມ຺ຫີຕິອາທິມາຫ. ຕໍ ສພ຺ພໍ ເຫຏ຺ຐາ ວຸຕ຺ຕນຍຕ຺ຕາ ອຸຕ຺ຕານຕ຺ຖເມວາຕິ.

ຜລທາຍກຕ຺ເຖຣອປທານວຓ຺ຓນາ ສມຕ຺ຕາ.

໘. ສທ຺ທສຎ຺ຎກຕ຺ເຖຣອປທານວຓ຺ຓນາ

ປພ຺ພເຕ ຫິມວນ຺ຕມ຺ຫີຕິອາທິກໍ ອາຍສ຺ມໂຕ ສທ຺ທສຎ຺ຎກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ຜຸສ຺ສສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ສທ຺ຘາຊາໂຕ ຕາປສປພ຺ພຊ຺ຊໍ ປພ຺ພຊິຕ຺ວາ ຫິມວນ຺ຕມ຺ຫິ ອຣຎ຺ຎາວາເສ ວສນ຺ໂຕ ອຕ຺ຕໂນ ອນຸກມ຺ປາຍ ອຸປຄຕສ຺ສ ຠຄວໂຕ ຘມ຺ມໍ ສຸຕ຺ວາ ຘມ຺ເມສຸ ຈິຕ຺ຕໍ ປສາເທຕ຺ວາ ຍາວຕາຍຸກໍ ຐຕ຺ວາ ອປຣຠາເຄ ກາລໍ ກຕ຺ວາ ຕຸສິຕາທີສຸ ຉສຸ ກາມາວຈຣສມ຺ປຕ຺ຕິໂຍ ຈ ມນຸສ຺ເສສຸ ມນຸສ຺ສສມ຺ປຕ຺ຕິໂຍ ຈ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ສທ຺ຘາຊາໂຕ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ.

໔໓. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປພ຺ພເຕ ຫິມວນ຺ຕມ຺ຫີຕິອາທິມາຫ. ຕໍ ສພ຺ພໍ ອຸຕ຺ຕານຕ຺ຖເມວາຕິ.

ສທ຺ທສຎ຺ຎກຕ຺ເຖຣອປທານວຓ຺ຓນາ ສມຕ຺ຕາ.

໙. ໂພຘິສິຎ຺ຈກຕ຺ເຖຣອປທານວຓ຺ຓນາ

ວິປສ຺ສິສ຺ສ ຠຄວໂຕຕິອາທິກໍ ອາຍສ຺ມໂຕ ໂພຘິສິຎ຺ຈກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອເນກາສຸ ຊາຕີສຸ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ສາສເນ ປພ຺ພຊິຕ຺ວາ ວຕ຺ຕປຏິປຕ຺ຕິຍາ ສາສນໍ ໂສຠຍນ຺ໂຕ ມຫາຊເນ ໂພຘິປູຊໍ ກຸຣຸມາເນ ທິສ຺ວາ ອເນການິ ປຸປ຺ຜານິ ສຸຄນ຺ໂຘທການິ ຈ ຄາຫາເປຕ຺ວາ ປູເຊສິ. ໂສ ເຕນ ປຸຎ຺ເຎນ ເທວໂລເກ ນິພ຺ພຕ຺ໂຕ ຉ ກາມາວຈຣສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ສທ຺ຘາຊາໂຕ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໔໖. ໂສ ອຣຫາ ຫຸຕ຺ວາ ຌານຜລສຸເຂນ ວີຕິນາເມຕ຺ວາ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ວິປສ຺ສິສ຺ສ ຠຄວໂຕຕິອາທິມາຫ. ຕຕ຺ຖ ວິເສສໍ ປຣມຕ຺ຖໍ ນິພ຺ພານໍ ປສ຺ສຕີຕິ ວິປສ຺ສີ, ວິເສເສນ ຠພ຺ພາຠພ຺ພຊເນ ປສ຺ສຕີຕິ ວາ ວິປສ຺ສີ, ວິປສ຺ສນ຺ໂຕ ຈຕຸສຈ຺ຈໍ ປສ຺ສນທກ຺ຂນສີໂລຕິ ວາ ວິປສ຺ສີ, ຕສ຺ສ ວິປສ຺ສິສ຺ສ ຠຄວໂຕ ມຫາໂພຘິມໂຫ ອຫູຕິ ສມ຺ພນ຺ໂຘ. ຕຕ຺ຣາປິ ມຫາໂພຘີຕິ ໂພຘິ ວຸຈ຺ຈຕິ ຈຕູສຸ ມຄ຺ເຄສຸ ຎາຓໍ, ຕເມຕ຺ຖ ນິສິນ຺ໂນ ຠຄວາ ປຏິວິຊ຺ຌຕີຕິ ກຓິກາຣປາທປຣຸກ຺ໂຂປິ ໂພຘິຈ຺ເຈວ ວຸຈ຺ຈຕິ, ມຫິໂຕ ຈ ໂສ ເທວພ຺ຣຫ຺ມນຣາສຸເຣຫິ ໂພຘິ ເຈຕິ ມຫາໂພຘິ, ມຫໂຕ ພຸທ຺ຘສ຺ສ ຠຄວໂຕ ໂພຘີຕິ ວາ ມຫາໂພຘິ, ຕສ຺ສ ມໂຫ ປູຊາ ອໂຫສີຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ໂພຘິສິຎ຺ຈກຕ຺ເຖຣອປທານວຓ຺ຓນາ ສມຕ຺ຕາ.

໑໐. ປທຸມປຸປ຺ຜິຍຕ຺ເຖຣອປທານວຓ຺ຓນາ

ໂປກ຺ຂຣວນໍ ປວິຏ຺ໂຐຕິອາທິກໍ ອາຍສ຺ມໂຕ ປທຸມປຸປ຺ຜິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ຜຸສ຺ສສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ປທຸມສມ຺ປນ຺ນໍ ເອກໍ ໂປກ຺ຂຣຓິໍ ປວິສິຕ຺ວາ ຠິສມຸຬາເລ ຂາທນ຺ໂຕ ໂປກ຺ຂຣຓິຍາ ອວິທູເຣ ຄຈ຺ຉມານໍ ຜຸສ຺ສໍ ຠຄວນ຺ຕໍ ທິສ຺ວາ ປສນ຺ນມານໂສ ຕໂຕ ປທຸມານິ ໂອຈິນິຕ຺ວາ ອາກາເສ ອຸກ຺ຂິປິຕ຺ວາ ຠຄວນ຺ຕໍ ປູເຊສິ, ຕານິ ປຸປ຺ຜານິ ອາກາເສ ວິຕານໍ ຫຸຕ຺ວາ ອຏ຺ຐໍສຸ. ໂສ ຠິຍ຺ໂຍໂສມຕ຺ຕາຍ ປສນ຺ນມານໂສ ປພ຺ພຊິຕ຺ວາ ວຕ຺ຕປຏິປຕ຺ຕິສາໂຣ ສມຓຘມ຺ມໍ ປູເຣຕ຺ວາ ຕໂຕ ຈຸໂຕ ຕຸສິຕຠວນມລໍ ກຸຣຸມາໂນ ວິຍ ຕຕ຺ຖ ອຸປ຺ປຊ຺ຊິຕ຺ວາ ກເມນ ຉ ກາມາວຈຣສມ຺ປຕ຺ຕິໂຍ ຈ ມນຸສ຺ສສມ຺ປຕ຺ຕິໂຍ ຈ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ສທ຺ຘາຊາໂຕ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໕໑. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ໂປກ຺ຂຣວນໍ ປວິຏ຺ໂຐຕິອາທິມາຫ. ຕຕ຺ຖ ປກາເຣນ ນຬທຓ຺ຑປຕ຺ຕາທີຫິ ຂຣນ຺ຕີຕິ ໂປກ຺ຂຣາ, ໂປກ຺ຂຣານໍ ສມຸຏ຺ຐິຕຏ຺ເຐນ ສມູຫນ຺ຕິ ໂປກ຺ຂຣວນໍ, ປທຸມຄຈ຺ຉສຓ຺ເຑຫິ ມຓ຺ຑິຕໍ ມຊ຺ຌໍ ປວິຏ຺ໂຐ ອຫນ຺ຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປທຸມປຸປ຺ຜິຍຕ຺ເຖຣອປທານວຓ຺ຓນາ ສມຕ຺ຕາ.

ນວມວຄ຺ຄວຓ຺ຓນາ ສມຕ຺ຕາ.