ປຎ຺ຫສໂມຘານວຓ຺ຓນາ

໓໔໙. ອິຘ ປນ ຐຕ຺ວາ ປຎ຺ຫາ ສໂມຘາເນຕພ຺ພາ. ອິມສ຺ມິຎ຺ຫິ ສຸຕ຺ເຕ ເອກກວເສນ ທ຺ເວ ປຎ຺ຫາ ກຖິຕາ. ທຸກວເສນ ສຕ຺ຕຕິ. ຕິກວເສນ ອສີຕິສຕໍ. ຈຕຸກ຺ກວເສນ ທ຺ເວສຕານິ. ປຎ຺ຈກວເສນ ຕິໍສສຕໍ. ຉກ຺ກວເສນ ພາຕ຺ຕິໍສສຕໍ. ສຕ຺ຕກວເສນ ອຏ຺ຐນວຸຕິ. ອຏ຺ຐກວເສນ ອຏ຺ຐາສີຕິ. ນວກວເສນ ຈຕຸປຓ຺ຓາສ. ທສກວເສນ ສມສຏ຺ຐີຕິ ເອວໍ ສຫສ຺ສໍ ຈຸທ຺ທສ ປຎ຺ຫາ ກຖິຕາ.

ອິມຎ຺ຫິ ສຸຕ຺ຕນ຺ຕໍ ຐເປຕ຺ວາ ເຕປິຏເກ ພຸທ຺ຘວຈເນ ອຎ຺ໂຎ ສຸຕ຺ຕນ຺ໂຕ ເອວໍ ພຫຸປຎ຺ຫປຏິມຓ຺ຑິໂຕ ນຕ຺ຖິ. ຠຄວາ ອິມໍ ສຸຕ຺ຕນ຺ຕໍ ອາທິໂຕ ປຏ຺ຐາຍ ສກລໍ ສຸຕ຺ວາ ຈິນ຺ເຕສິ – ‘‘ຘມ຺ມເສນາປຕິ ສາຣິປຸຕ຺ໂຕ ພຸທ຺ຘພລໍ ທີເປຕ຺ວາ ອປ຺ປຏິວຕ຺ຕິຍໍ ສີຫນາທໍ ນທຕິ. ສາວກຠາສິໂຕຕິ ວຸຕ຺ເຕ ໂອກປ຺ປນາ ນ ໂຫຕິ, ຊິນຠາສິໂຕຕິ ວຸຕ຺ເຕ ໂຫຕິ, ຕສ຺ມາ ຊິນຠາສິຕໍ ກຕ຺ວາ ເທວມນຸສ຺ສານໍ ໂອກປ຺ປນໍ ອິມສ຺ມິໍ ສຸຕ຺ຕນ຺ເຕ ອຸປ຺ປາເທສ຺ສາມີ’’ຕິ. ຕໂຕ ວຸຏ຺ຐາຍ ສາຘຸກາຣໍ ອທາສິ. ເຕນ ວຸຕ຺ຕໍ ‘‘ອຖ ໂຂ ຠຄວາ ວຸຏ຺ຐຫິຕ຺ວາ ອາຍສ຺ມນ຺ຕໍ ສາຣິປຸຕ຺ຕໍ ອາມນ຺ເຕສິ, ສາຘຸ, ສາຘຸ, ສາຣິປຸຕ຺ຕ, ສາຘຸ ໂຂ ຕ຺ວໍ ສາຣິປຸຕ຺ຕ, ຠິກ຺ຂູນໍ ສງ຺ຄີຕິປຣິຍາຍໍ ອຠາສີ’’ຕິ.

ຕຕ຺ຖ ສງ຺ຄີຕິປຣິຍາຍນ຺ຕິ ສາມຄ຺ຄິຍາ ກາຣຓໍ. ອິທໍ ວຸຕ຺ຕໍ ໂຫຕິ – ‘‘ສາຘຸ, ໂຂ ຕ຺ວໍ, ສາຣິປຸຕ຺ຕ, ມມ ສພ຺ພຎ຺ຎຸຕຎ຺ຎາເຓນ ສໍສນ຺ທິຕ຺ວາ ຠິກ຺ຂູນໍ ສາມຄ຺ຄິຣສໍ ອຠາສີ’’ຕິ. ສມນຸຎ຺ໂຎ ສຕ຺ຖາ ອໂຫສີຕິ ອນຸໂມທເນນ ສມນຸຎ຺ໂຎ ອໂຫສິ. ເອຕ຺ຕເກນ ອຍໍ ສຸຕ຺ຕນ຺ໂຕ ຊິນຠາສິໂຕ ນາມ ຊາໂຕ. ເທສນາປຣິໂຍສາເນ ອິມໍ ສຸຕ຺ຕນ຺ຕໍ ມນສິກໂຣນ຺ຕາ ເຕ ຠິກ຺ຂູ ອຣຫຕ຺ຕໍ ປາປຸຓິໍສູຕິ.

ສຸມງ຺ຄລວິລາສິນິຍາ ທີຆນິກາຍຏ຺ຐກຖາຍ

ສງ຺ຄີຕິສຸຕ຺ຕວຓ຺ຓນາ ນິຏ຺ຐິຕາ.