ນວກວຓ຺ຓນາ

໓໔໐. ອິຕິ ອຏ຺ຐກວເສນ ສາມຄ຺ຄິຣສໍ ທສ຺ເສຕ຺ວາ ອິທານິ ນວກວເສນ ທສ຺ເສຕຸໍ ປຸນ ເທສນໍ ອາຣຠິ. ຕຕ຺ຖ ອາຆາຕວຕ຺ຖູນີຕິ ອາຆາຕກາຣຓານິ. ອາຆາຕໍ ພນ຺ຘຕີຕິ ໂກປໍ ພນ຺ຘຕິ ກໂຣຕິ ອຸປ຺ປາເທຕິ.

ຕໍ ກຸເຕຕ຺ຖ ລພ຺ຠາຕິ ຕໍ ອນຕ຺ຖຈຣຓໍ ມາ ອໂຫສີຕິ ເອຕສ຺ມິໍ ປຸຄ຺ຄເລ ກຸໂຕ ລພ຺ຠາ, ເກນ ກາຣເຓນ ສກ຺ກາ ລທ຺ຘຸໍ? ປໂຣ ນາມ ປຣສ຺ສ ອຕ຺ຕໂນ ຈິຕ຺ຕຣຸຈິຍາ ອນຕ຺ຖໍ ກໂຣຕີຕິ ເອວໍ ຈິນ຺ເຕຕ຺ວາ ອາຆາຕໍ ປຏິວິໂນເທຕິ. ອຖ ວາ ສຈາຫໍ ປຏິໂກປໍ ກເຣຍ຺ຍໍ, ຕໍ ໂກປກຣຓໍ ເອຕ຺ຖ ປຸຄ຺ຄເລ ກຸໂຕ ລພ຺ຠາ, ເກນ ກາຣເຓນ ລທ຺ຘພ຺ພນ຺ຕິ ອຕ຺ໂຖ. ກຸໂຕ ລາຠາຕິປິ ປາໂຐ, ສຈາຫໍ ເອຕ຺ຖ ໂກປໍ ກເຣຍ຺ຍໍ, ຕສ຺ມິໍ ເມ ໂກປກຣເຓ ກຸໂຕ ລາຠາ, ລາຠາ ນາມ ເກ ສິຍຸນ຺ຕິ ອຕ຺ໂຖ. ອິມສ຺ມິຎ຺ຈ ອຕ຺ເຖ ຕນ຺ຕິ ນິປາຕມຕ຺ຕເມວ ໂຫຕິ.

໓໔໑. ສຕ຺ຕາວາສາຕິ ສຕ຺ຕານໍ ອາວາສາ, ວສນຏ຺ຐານານີຕິ ອຕ຺ໂຖ. ຕຕ຺ຖ ສຸທ຺ຘາວາສາປິ ສຕ຺ຕາວາໂສວ, ອສພ຺ພກາລິກຕ຺ຕາ ປນ ນ ຄຫິຕາ. ສຸທ຺ຘາວາສາ ຫິ ພຸທ຺ຘານໍ ຂນ຺ຘາວາຣສທິສາ. ອສງ຺ຂ຺ເຍຍ຺ຍກປ຺ເປ ພຸທ຺ເຘສຸ ອນິພ຺ພຕ຺ຕນ຺ເຕສຸ ຕໍ ຐານໍ ສຸຎ຺ຎໍ ໂຫຕີຕິ ອສພ຺ພກາລິກຕ຺ຕາ ນ ຄຫິຕາ. ເສສເມຕ຺ຖ ຍໍ ວຕ຺ຕພ຺ພໍ, ຕໍ ເຫຏ຺ຐາ ວຸຕ຺ຕເມວ.

໓໔໒. ອກ຺ຂເຓສຸ ຘມ຺ໂມ ຈ ເທສິຍຕີຕິ ຈຕຸສຈ຺ຈຘມ຺ໂມ ເທສິຍຕິ. ໂອປສມິໂກຕິ ກິເລສູປສມກໂຣ. ປຣິນິພ຺ພານິໂກຕິ ກິເລສປຣິນິພ຺ພາເນນ ປຣິນິພ຺ພານາວໂຫ. ສມ຺ໂພຘຄາມີຕິ ຈຕຸມຄ຺ຄຎາຓປຏິເວຘຄາມີ. ອຎ຺ຎຕຣນ຺ຕິ ອສຎ຺ຎຠວໍ ວາ ອຣູປຠວໍ ວາ.

໓໔໓. ອນຸປຸພ຺ພວິຫາຣາຕິ ອນຸປຏິປາຏິຍາ ສມາປຊ຺ຊິຕພ຺ພວິຫາຣາ.

໓໔໔. ອນຸປຸພ຺ພນິໂຣຘາຕິ ອນຸປຏິປາຏິຍາ ນິໂຣຘາ.

‘‘ອິເມ, ໂຂ ອາວຸໂສ’’ຕິອາທິ ວຸຕ຺ຕນເຍເນວ ໂຍເຊຕພ຺ພໍ. ອິຕິ ຉນ຺ນໍ ນວການໍ ວເສນ ຈຕຸປຓ຺ຓາສ ປຎ຺ເຫ ກເຖນ຺ໂຕ ເຖໂຣ ສາມຄ຺ຄິຣສໍ ທສ຺ເສສີຕິ.

ນວກວຓ຺ຓນາ ນິຏ຺ຐິຕາ.