ອຏ຺ຐກວຓ຺ຓນາ

໓໓໓. ອິຕິ ສຕ຺ຕກວເສນ ສາມຄ຺ຄິຣສໍ ທສ຺ເສຕ຺ວາ ອິທານິ ອຏ຺ຐກວເສນ ທສ຺ເສຕຸໍ ປຸນ ເທສນໍ ອາຣຠິ. ຕຕ຺ຖ ມິຈ຺ຉຕ຺ຕາຕິ ອຍາຖາວາ ມິຈ຺ຉາສຠາວາ. ສມ຺ມຕ຺ຕາຕິ ຍາຖາວາ ສມ຺ມາສຠາວາ.

໓໓໔. ກຸສີຕວຕ຺ຖູນີຕິ ກຸສີຕສ຺ສ ອລສສ຺ສ ວຕ຺ຖູນິ ປຕິຏ຺ຐາ ໂກສຊ຺ຊກາຣຓານີຕິ ອຕ຺ໂຖ. ກມ຺ມໍ ກຕ຺ຕພ຺ພໍ ໂຫຕີຕິ ຈີວຣວິຈາຣຓາທິກມ຺ມໍ ກາຕພ຺ພໍ ໂຫຕິ. ນ ວີຣິຍໍ ອາຣຠຕີຕິ ທຸວິຘມ຺ປິ ວີຣິຍໍ ນາຣຠຕິ. ອປ຺ປຕ຺ຕສ຺ສາຕິ ຌານວິປສ຺ສນາມຄ຺ຄຜລຘມ຺ມສ຺ສ ອປ຺ປຕ຺ຕສ຺ສ ປຕ຺ຕິຍາ. ອນຘິຄຕສ຺ສາຕິ ຕສ຺ເສວ ອນຘິຄຕສ຺ສ ອຘິຄມຕ຺ຖາຍ. ອສຈ຺ຉິກຕສ຺ສາຕິ ຕສ຺ເສວ ອປຈ຺ຈກ຺ຂກຕສ຺ສ ສຈ຺ຉິກຣຓຕ຺ຖາຍ. ອິທໍ ປຐມນ຺ຕິ ອິທໍ ຫນ຺ທາຫໍ ນິປຊ຺ຊາມີຕິ ເອວໍ ໂອສີທນໍ ປຐມໍ ກຸສີຕວຕ຺ຖຸ. ອິມິນາ ນເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ. ‘‘ມາສາຈິຕໍ ມຎ຺ເຎ’’ຕິ ເອຕ຺ຖ ປນ ມາສາຈິຕໍ ນາມ ຕິນ຺ຕມາໂສ. ຍຖາ ຕິນ຺ຕມາໂສ ຄຣຸໂກ ໂຫຕິ, ເອວໍ ຄຣຸໂກຕິ ອຘິປ຺ປາໂຍ. ຄິລານາ ວຸຏ຺ຐິໂຕ ໂຫຕີຕິ ຄິລາໂນ ຫຸຕ຺ວາ ປຈ຺ຉາ ວຸຏ຺ຐິໂຕ ໂຫຕິ.

໓໓໕. ອາຣມ຺ຠວຕ຺ຖູນີຕິ ວີຣິຍກາຣຓານິ. ເຕສມ຺ປິ ອິມິນາວ ນເຍນ ອຕ຺ໂຖ ເວທິຕພ຺ໂພ.

໓໓໖. ທານວຕ຺ຖູນີຕິ ທານກາຣຓານິ. ອາສຊ຺ຊ ທານໍ ເທຕີຕິ ປຕ຺ວາ ທານໍ ເທຕິ. ອາຄຕໍ ທິສ຺ວາວ ມຸຫຸຕ຺ຕໍເຍວ ນິສີທາເປຕ຺ວາ ສກ຺ກາຣໍ ກຕ຺ວາ ທານໍ ເທຕິ, ທສ຺ສາມິ ທສ຺ສາມີຕິ ນ ກິລເມຕິ. ອິຕິ ເອຕ຺ຖ ອາສາທນໍ ທານກາຣຓໍ ນາມ ໂຫຕິ. ຠຍາ ທານໍ ເທຕີຕິອາທີສຸປິ ຠຍາທີນິ ທານກາຣຓານີຕິ ເວທິຕພ຺ພານິ. ຕຕ຺ຖ ຠຍໍ ນາມ ອຍໍ ອທາຍໂກ ອກາຣໂກຕິ ຄຣຫາຠຍໍ ວາ ອປາຍຠຍໍ ວາ. ອທາສິ ເມຕິ ມຍ຺ຫໍ ປຸພ຺ເພ ເອສ ອິທໍ ນາມ ອທາສີຕິ ເທຕິ. ທສ຺ສຕິ ເມຕິ ອນາຄເຕ ອິທໍ ນາມ ທສ຺ສຕີຕິ ເທຕິ. ສາຫຸ ທານນ຺ຕິ ທານໍ ນາມ ສາຘຸ ສຸນ຺ທຣໍ, ພຸທ຺ຘາທີຫິ ປຓ຺ຑິເຕຫິ ປສຕ຺ຖນ຺ຕິ ເທຕິ. ຈິຕ຺ຕາລງ຺ກາຣຈິຕ຺ຕປຣິກ຺ຂາຣຕ຺ຖໍ ທານໍ ເທຕີຕິ ສມຖວິປສ຺ສນາຈິຕ຺ຕສ຺ສ ອລງ຺ກາຣຕ຺ຖຎ຺ເຈວ ປຣິວາຣຕ຺ຖຎ຺ຈ ເທຕິ. ທານຎ຺ຫິ ຈິຕ຺ຕໍ ມຸທຸກໍ ກໂຣຕິ. ເຍນ ລທ຺ຘໍ ໂຫຕິ, ໂສປິ ລທ຺ຘໍ ເມຕິ ມຸທຸຈິຕ຺ໂຕ ໂຫຕິ, ເຍນ ທິນ຺ນໍ, ໂສປິ ທິນ຺ນໍ ມຍາຕິ ມຸທຸຈິຕ຺ໂຕ ໂຫຕິ, ອິຕິ ອຸຠິນ຺ນມ຺ປິ ຈິຕ຺ຕໍ ມຸທຸກໍ ກໂຣຕິ, ເຕເນວ ‘‘ອທນ຺ຕທມນໍ ທານ’’ນ຺ຕິ ວຸຈ຺ຈຕິ. ຍຖາຫ –

‘‘ອທນ຺ຕທມນໍ ທານໍ, ອທານໍ ທນ຺ຕທູສກໍ;

ທາເນນ ປິຍວາຈາຍ, ອຸນ຺ນມນ຺ຕິ ນມນ຺ຕິ ຈາ’’ຕິ.

ອິເມສຸ ປນ ອຏ຺ຐສຸ ທາເນສຸ ຈິຕ຺ຕາລງ຺ກາຣທານເມວ ອຸຕ຺ຕມໍ.

໓໓໗. ທານູປປຕ຺ຕິໂຍຕິ ທານປຈ຺ຈຍາ ອຸປປຕ຺ຕິໂຍ. ທຫຕີຕິ ຐເປຕິ. ອຘິຏ຺ຐາຕີຕິ ຕສ຺ເສວ ເວວຈນໍ. ຠາເວຕີຕິ ວຑ຺ເຒຕິ. ຫີເນ ວິມຸຕ຺ຕນ຺ຕິ ຫີເນສຸ ປຎ຺ຈກາມຄຸເຓສຸ ວິມຸຕ຺ຕໍ. ອຸຕ຺ຕຣິ ອຠາວິຕນ຺ຕິ ຕໂຕ ອຸຕ຺ຕຣິ ມຄ຺ຄຜລຕ຺ຖາຍ ອຠາວິຕໍ. ຕຕ຺ຣູປປຕ຺ຕິຍາ ສໍວຕ຺ຕຕີຕິ ຍໍ ປຕ຺ເຖຕ຺ວາ ກຸສລໍ ກຕໍ, ຕຕ຺ຖ ຕຕ຺ຖ ນິພ຺ພຕ຺ຕນຕ຺ຖາຍ ສໍວຕ຺ຕຕິ.

ວີຕຣາຄສ຺ສາຕິ ມຄ຺ເຄນ ວາ ສມຸຈ຺ຉິນ຺ນຣາຄສ຺ສ ສມາປຕ຺ຕິຍາ ວາ ວິກ຺ຂມ຺ຠິຕຣາຄສ຺ສ. ທານມຕ຺ເຕເນວ ຫິ ພ຺ຣຫ຺ມໂລເກ ນິພ຺ພຕ຺ຕິຕຸໍ ນ ສກ຺ກາ. ທານໍ ປນ ສມາຘິວິປສ຺ສນາຈິຕ຺ຕສ຺ສ ອລງ຺ກາໂຣ ປຣິວາໂຣ ໂຫຕິ. ຕໂຕ ທາເນນ ມຸທຸຈິຕ຺ໂຕ ພ຺ຣຫ຺ມວິຫາເຣ ຠາເວຕ຺ວາ ພ຺ຣຫ຺ມໂລເກ ນິພ຺ພຕ຺ຕຕິ. ເຕນ ວຸຕ຺ຕໍ ‘‘ວີຕຣາຄສ຺ສ ໂນ ສຣາຄສ຺ສາ’’ຕິ.

ຂຕ຺ຕິຍານໍ ປຣິສາ ຂຕ຺ຕິຍປຣິສາ, ສມູໂຫຕິ ອຕ຺ໂຖ. ເອສ ນໂຍ ສພ຺ພຕ຺ຖ.

ໂລກສ຺ສ ຘມ຺ມາ ໂລກຘມ຺ມາ. ເອເຕຫິ ມຸຕ຺ໂຕ ນາມ ນຕ຺ຖິ, ພຸທ຺ຘານມ຺ປິ ໂຫນ຺ຕິເຍວ. ວຸຕ຺ຕມ຺ປິ ເຈຕໍ – ‘‘ອຏ຺ຐິເມ, ຠິກ຺ຂເວ, ໂລກຘມ຺ມາ ໂລກໍ ອນຸປຣິວຕ຺ຕນ຺ຕິ, ໂລໂກ ຈ ອຏ຺ຐ ໂລກຘມ຺ເມ ອນຸປຣິວຕ຺ຕຕີ’’ຕິ (ອ. ນິ. ໘.໕). ລາໂຠ ອລາໂຠຕິ ລາເຠ ອາຄເຕ ອລາໂຠ ອາຄໂຕ ເອວາຕິ ເວທິຕພ຺ໂພ. ຍສາທີສຸປິ ເອເສວ ນໂຍ.

໓໓໘. ອຠິຠາຍຕນວິໂມກ຺ຂກຖາ ເຫຏ຺ຐາ ກຖິຕາ ເອວ.

‘‘ອິເມ ໂຂ, ອາວຸໂສ’’ຕິອາທິ ວຸຕ຺ຕນເຍເນວ ໂຍເຊຕພ຺ພໍ. ອິຕິ ເອກາທສນ຺ນໍ ອຏ຺ຐການໍ ວເສນ ອຏ຺ຐາສີຕິ ປຎ຺ເຫ ກເຖນ຺ໂຕ ເຖໂຣ ສາມຄ຺ຄິຣສໍ ທສ຺ເສສີຕິ.

ອຏ຺ຐກວຓ຺ຓນາ ນິຏ຺ຐິຕາ.