ນິສ຺ສຣຓິຍຉກ຺ກວຓ຺ຓນາ

໓໒໖. ນິສ຺ສຣຓິຍາ ຘາຕຸໂຍຕິ ນິສ຺ສຏຘາຕຸໂຍວ. ປຣິຍາທາຍ ຕິຏ຺ຐຕີຕິ ປຣິຍາທິຍິຕ຺ວາ ຫາເປຕ຺ວາ ຕິຏ຺ຐຕິ. ‘ມາ ເຫວນ຺ຕິສ຺ສ ວຈນີໂຍ’ຕິ ຍສ຺ມາ ອຠູຕໍ ພ຺ຍາກຣຓໍ ພ຺ຍາກໂຣຕິ, ຕສ຺ມາ ມາ ເອວໍ ຠຓີຕິ ວຕ຺ຕພ຺ໂພ. ຍທິທໍ ເມຕ຺ຕາເຈໂຕວິມຸຕ຺ຕີຕິ ຍາ ອຍໍ ເມຕ຺ຕາເຈໂຕວິມຸຕ຺ຕິ, ອິທໍ ນິສ຺ສຣຓໍ ພ຺ຍາປາທສ຺ສ, ພ຺ຍາປາທໂຕ ນິສ຺ສຏາຕິ ອຕ຺ໂຖ. ໂຍ ປນ ເມຕ຺ຕາຍ ຕິກຈຕຸກ຺ກຊ຺ຌານໂຕ ວຸຏ຺ຐິໂຕ ສງ຺ຂາເຣ ສມ຺ມສິຕ຺ວາ ຕຕິຍມຄ຺ຄໍ ປຕ຺ວາ ‘‘ປຸນ ພ຺ຍາປາໂທ ນຕ຺ຖີ’’ຕິ ຕຕິຍຜເລນ ນິພ຺ພານໍ ປສ຺ສຕິ, ຕສ຺ສ ຈິຕ຺ຕໍ ອຈ຺ຈນ຺ຕໍ ນິສ຺ສຣຓໍ ພ຺ຍາປາທສ຺ສ. ເອເຕນຸປາເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ.

ອນິມິຕ຺ຕາ ເຈໂຕວິມຸຕ຺ຕີຕິ ອຣຫຕ຺ຕຜລສມາປຕ຺ຕິ. ສາ ຫິ ຣາຄນິມິຕ຺ຕາທີນຎ຺ເຈວ ຣູປນິມິຕ຺ຕາທີນຎ຺ຈ ນິຈ຺ຈນິມິຕ຺ຕາທີນຎ຺ຈ ອຠາວາ ‘‘ອນິມິຕ຺ຕາ’’ຕິ ວຸຕ຺ຕາ. ນິມິຕ຺ຕານຸສາຣີຕິ ວຸຕ຺ຕປ຺ປເຠທໍ ນິມິຕ຺ຕໍ ອນຸສຣຕີຕິ ນິມິຕ຺ຕານຸສາຣີ.

ອສ຺ມີຕິ ອສ຺ມິມາໂນ. ອຍມຫມສ຺ມີຕິ ປຎ຺ຈສຸ ຂນ຺ເຘສຸ ອຍໍ ນາມ ອຫໍ ອສ຺ມີຕິ ເອຕ຺ຕາວຕາ ອຣຫຕ຺ຕໍ ພ຺ຍາກຕໍ ໂຫຕິ. ວິຈິກິຈ຺ຉາກຖໍກຖາສລ຺ລນ຺ຕິ ວິຈິກິຈ຺ຉາຠູຕໍ ກຖໍກຖາສລ຺ລໍ. ‘ມາ ເຫວນ຺ຕິສ຺ສ ວຈນີໂຍ’ຕິ ສເຈ ເຕ ປຐມມຄ຺ຄວຊ຺ຌາ ວິຈິກິຈ຺ຉາ ອຸປ຺ປຊ຺ຊຕິ, ອຣຫຕ຺ຕພ຺ຍາກຣຓໍ ມິຈ຺ຉາ ໂຫຕິ, ຕສ຺ມາ ມາ ອຠູຕໍ ຠຓີຕິ ວາເຣຕພ຺ໂພ. ອສ຺ມິມານສມຸຄ຺ຆາໂຕຕິ ອຣຫຕ຺ຕມຄ຺ໂຄ. ອຣຫຕ຺ຕມຄ຺ຄຜລວເສນ ຫິ ນິພ຺ພາເນ ທິຏ຺ເຐ ປຸນ ອສ຺ມິມາໂນ ນຕ຺ຖີຕິ ອຣຫຕ຺ຕມຄ຺ໂຄ ອສ຺ມິມານສມຸຄ຺ຆາໂຕຕິ ວຸຕ຺ໂຕ.