ອນຸຕ຺ຕຣິຍາທິຉກ຺ກວຓ຺ຓນາ

໓໒໗. ອນຸຕ຺ຕຣິຍານີຕິ ອນຸຕ຺ຕຣານິ ເຊຏ຺ຐການິ. ທສ຺ສເນສຸ ອນຸຕ຺ຕຣິຍໍ ທສ຺ສນານຸຕ຺ຕຣິຍໍ. ເສສປເທສຸປິ ເອເສວ ນໂຍ. ຕຕ຺ຖ ຫຕ຺ຖິຣຕນາທີນໍ ທສ຺ສນໍ ນ ທສ຺ສນານຸຕ຺ຕຣິຍໍ, ນິວິຏ຺ຐສທ຺ຘສ຺ສ ປນ ນິວິຏ຺ຐເປມວເສນ ທສພລສ຺ສ ວາ ຠິກ຺ຂຸສງ຺ຆສ຺ສ ວາ ກສິຓາສຸຠນິມິຕ຺ຕາທີນໍ ວາ ອຎ຺ຎຕຣສ຺ສ ທສ຺ສນໍ ທສ຺ສນານຸຕ຺ຕຣິຍໍ ນາມ. ຂຕ຺ຕິຍາທີນໍ ຄຸຓກຖາສວນໍ ນ ສວນານຸຕ຺ຕຣິຍໍ, ນິວິຏ຺ຐສທ຺ຘສ຺ສ ປນ ນິວິຏ຺ຐເປມວເສນ ຕິຓ຺ຓໍ ວາ ຣຕນານໍ ຄຸຓກຖາສວນໍ ເຕປິຏກພຸທ຺ຘວຈນສວນໍ ວາ ສວນານຸຕ຺ຕຣິຍໍ ນາມ. ມຓິຣຕນາທິລາໂຠ ນ ລາຠານຸຕ຺ຕຣິຍໍ, ສຕ຺ຕວິຘອຣິຍຘນລາໂຠ ປນ ລາຠານຸຕ຺ຕຣິຍໍ ນາມ. ຫຕ຺ຖິສິປ຺ປາທິສິກ຺ຂນໍ ນ ສິກ຺ຂານຸຕ຺ຕຣິຍໍ, ສິກ຺ຂຕ຺ຕຍປູຣຓໍ ປນ ສິກ຺ຂານຸຕ຺ຕຣິຍໍ ນາມ. ຂຕ຺ຕິຍາທີນໍ ປາຣິຈຣິຍາ ນ ປາຣິຈຣິຍານຸຕ຺ຕຣິຍໍ, ຕິຓ຺ຓໍ ປນ ຣຕນານໍ ປາຣິຈຣິຍາ ປາຣິຈຣິຍານຸຕ຺ຕຣິຍໍ ນາມ. ຂຕ຺ຕິຍາທີນໍ ຄຸຓານຸສ຺ສຣຓໍ ນານຸສ຺ສຕານຸຕ຺ຕຣິຍໍ, ຕິຓ຺ຓໍ ປນ ຣຕນານໍ ຄຸຓານຸສ຺ສຣຓໍ ອນຸສ຺ສຕານຸຕ຺ຕຣິຍໍ ນາມ.

ອນຸສ຺ສຕິໂຍວ ອນຸສ຺ສຕິຏ຺ຐານານິ ນາມ. ພຸທ຺ຘານຸສ຺ສຕີຕິ ພຸທ຺ຘສ຺ສ ຄຸຓານຸສ຺ສຣຓໍ. ເອວໍ ອນຸສ຺ສຣໂຕ ຫິ ປີຕິ ອຸປ຺ປຊ຺ຊຕິ. ໂສ ຕໍ ປີຕິໍ ຂຍໂຕ ວຍໂຕ ປຏ຺ຐເປຕ຺ວາ ອຣຫຕ຺ຕໍ ປາປຸຓາຕິ. ອຸປຈາຣກມ຺ມຏ຺ຐານໍ ນາເມຕໍ ຄິຫີນມ຺ປິ ລພ຺ຠຕິ, ເອສ ນໂຍ ສພ຺ພຕ຺ຖ. ວິຕ຺ຖາຣກຖາ ປເນຕ຺ຖ ວິສຸທ຺ຘິມຄ຺ເຄ ວຸຕ຺ຕນເຍເນວ ເວທິຕພ຺ພາ.