ໂຄປກວຕ຺ຖຸວຓ຺ຓນາ

໓໕໓. ສີເລສຸ ປຣິປູຣກາຣິນີຕິ ປຎ຺ຈສຸ ສີເລສຸ ປຣິປູຣກາຣິນີ. ອິຕ຺ຖິຕ຺ຕໍ ວິຣາເຊຕ຺ວາຕິ ອິຕ຺ຖິຕ຺ຕໍ ນາມ ອລໍ, ນ ຫິ ອິຕ຺ຖິຕ຺ເຕ ຐຕ຺ວາ ຈກ຺ກວຕ຺ຕິສິຣິໍ, ນ ສກ຺ກມາຣພ຺ຣຫ຺ມສິຣິໂຍ ປຈ຺ຈນຸຠວິຕຸໍ, ນ ປຈ຺ເຈກໂພຘິໍ, ນ ສມ຺ມາສມ຺ໂພຘິໍ ຄນ຺ຕຸໍ ສກ຺ກາຕິ ເອວໍ ອິຕ຺ຖິຕ຺ຕໍ ວິຣາເຊຕິ ນາມ. ມຫນ຺ຕມິທໍ ປຸຣິສຕ຺ຕໍ ນາມ ເສຏ຺ຐໍ ອຸຕ຺ຕມໍ, ເອຕ຺ຖ ຐຕ຺ວາ ສກ຺ກາ ເອຕາ ສມ຺ປຕ຺ຕິໂຍ ປາປຸຓິຕຸນ຺ຕິ ເອວໍ ປນ ປຸຣິສຕ຺ຕໍ ຠາເວຕິ ນາມ. ສາປິ ເອວມກາສິ. ເຕນ ວຸຕ຺ຕໍ – ‘‘ອິຕ຺ຖິຕ຺ຕໍ ວິຣາເຊຕ຺ວາ ປຸຣິສຕ຺ຕໍ ຠາເວຕ຺ວາ’’ຕິ. ຫີນໍ ຄນ຺ຘພ຺ພກາຍນ຺ຕິ ຫີນໍ ລາມກໍ ຄນ຺ຘພ຺ພນິກາຍໍ. ກສ຺ມາ ປນ ເຕ ປຣິສຸທ຺ຘສີລາ ຕຕ຺ຖ ອຸປ຺ປນ຺ນາຕິ? ປຸພ຺ພນິກນ຺ຕິຍາ. ປຸພ຺ເພປິ ກິຣ ເນສໍ ເອຕເທວ ວສິຕຏ຺ຐານໍ, ຕສ຺ມາ ນິກນ຺ຕິວເສນ ຕຕ຺ຖ ອຸປ຺ປນ຺ນາ. ອຸປຏ຺ຐານນ຺ຕິ ອຸປຏ຺ຐານສາລໍ. ປາຣິຈຣິຍນ຺ຕິ ປຣິຈຣຓຠາວໍ. ຄີຕວາທິເຕຫິ ອມ຺ເຫ ປຣິຈຣິສ຺ສາມາຕິ ອາຄຈ຺ຉນ຺ຕິ.

ປຏິໂຈເທສີຕິ ສາເຣສິ. ໂສ ກິຣ ເຕ ທິສ຺ວາ ‘‘ອິເມ ເທວປຸຕ຺ຕາ ອຕິວິຍ ວິໂຣເຈນ຺ຕິ ອຕິວຓ຺ຓວນ຺ໂຕ, ກິໍ ນຸ ໂຂ ກມ຺ມໍ ກຕ຺ວາ ອາຄຕາ’’ຕິ ອາວຊ຺ຊນ຺ໂຕ ‘‘ຠິກ຺ຂູ ອເຫສຸ’’ນ຺ຕິ ອທ຺ທສ. ຕໂຕ ‘‘ຠິກ຺ຂູ ໂຫນ຺ຕຸ, ສີເລສຸ ປຣິປູຣກາຣິໂນ’’ຕິ ອຸປຘາເຣນ຺ໂຕ ‘‘ປຣິປູຣກາຣິໂນ’’ຕິ ອທ຺ທສ. ‘‘ປຣິປູຣກາຣິໂນ ໂຫນ຺ຕຸ, ອຎ຺ໂຎ ຄຸໂຓ ອຕ຺ຖິ ນຕ຺ຖີ’’ຕິ ອຸປຘາເຣນ຺ໂຕ ‘‘ຌານລາຠິໂນ’’ຕິ ອທ຺ທສ. ‘‘ຌານລາຠິໂນ ໂຫນ຺ຕຸ, ກຸຫິໍ ວາສິກາ’’ຕິ ອຸປຘາເຣນ຺ໂຕ ‘‘ມຍ຺ຫໍວ ກຸລູປກາ’’ຕິ ອທ຺ທສ. ປຣິສຸທ຺ຘສີລາ ນາມ ຉສຸ ເທວໂລເກສຸ ຍຕ຺ຖິຈ຺ຉນ຺ຕິ, ຕຕ຺ຖ ນິພ຺ພຕ຺ຕນ຺ຕິ. ອິເມ ປນ ອຸປຣິເທວໂລເກ ຈ ນ ນິພ຺ພຕ຺ຕາ. ຌານລາຠິໂນ ນາມ ພ຺ຣຫ຺ມໂລເກ ນິພ຺ພຕ຺ຕນ຺ຕິ, ອິເມ ຈ ພ຺ຣຫ຺ມໂລເກ ນ ນິພ຺ພຕ຺ຕາ. ອຫໍ ປນ ເອເຕສໍ ໂອວາເທ ຐຕ຺ວາ ເທວໂລກສາມິກສ຺ສ ສກ຺ກສ຺ສ ເທວານມິນ຺ທສ຺ສ ປລ຺ລງ຺ເກ ປຸຕ຺ໂຕ ຫຸຕ຺ວາ ນິພ຺ພຕ຺ໂຕ, ອິເມ ຫີເນ ຄນ຺ຘພ຺ພກາເຍ ນິພ຺ພຕ຺ຕາ. ອຏ຺ຐິເວຘປຸຄ຺ຄລາ ນາເມເຕ ວຏ຺ເຏຕ຺ວາ ວຏ຺ເຏຕ຺ວາ ຄາຬ຺ຫໍ ວິຊ຺ຌິຕພ຺ພາຕິ ຈິນ຺ເຕຕ຺ວາ ກຸໂຕມຸຂາ ນາມາຕິອາທີຫິ ວຈເນຫິ ປຏິໂຈເທສິ.

ຕຕ຺ຖ ກຸໂຕມຸຂາຕິ ຠຄວຕິ ອຠິມຸເຂ ຘມ຺ມໍ ເທເສນ຺ເຕ ຕຸມ຺ເຫ ກຸໂຕມຸຂາ ກິໍ ອຎ຺ຎາ ວິຫິຕາ ອິໂຕ ຈິໂຕ ຈ ໂອໂລກຍມານາ ອຸທາຫຸ ນິທ຺ທາຍມານາ? ທຸທ຺ທິຏ຺ຐຣູປນ຺ຕິ ທຸທ຺ທິຏ຺ຐສຠາວໍ ທຏ຺ຐຸໍ ອຍຸຕ຺ຕໍ. ສຫຘມ຺ມິເກຕິ ເອກສ຺ສ ສຕ຺ຖຸ ສາສເນ ສມາຈິຓ຺ຓຘມ຺ເມ ກຕປຸຎ຺ເຎ. ເຕສໍ ຠນ຺ເຕຕິ ເຕສໍ ໂຄປເກນ ເທວປຸຕ຺ເຕນ ເອວໍ ວຕ຺ວາ ປຸນ ‘‘ອໂຫ ຕຸມ຺ເຫ ນິລ຺ລຊ຺ຊາ ອຫິຣິກາ’’ຕິອາທີຫິ ວຈເນຫິ ປຏິໂຈທິຕານໍ ທ຺ເວ ເທວາ ທິຏ຺ເຐວ ຘມ຺ເມ ສຕິໍ ປຏິລຠິໍສຸ.

ກາຍໍ ພ຺ຣຫ຺ມປຸໂຣຫິຕນ຺ຕິ ເຕ ກິຣ ຈິນ຺ຕຍິໍສຸ – ‘‘ນເຏຫິ ນາມ ນຈ຺ຈນ຺ເຕຫິ ຄາຍນ຺ເຕຫິ ວາເທນ຺ເຕຫິ ອາຄນ຺ຕ຺ວາ ທາໂຍ ນາມ ລຠິຕພ຺ໂພ ອສ຺ສ, ອຍໍ ປນ ອມ຺ຫາກໍ ທິຏ຺ຐກາລໂຕ ປຏ຺ຐາຍ ປກ຺ຂິຕ຺ຕໂລຓໍ ອຸທ຺ຘນໍ ວິຍ ຕຏຕຏາຍເຕວ, ກິໍ ນຸ ໂຂ ອິທ’’ນ຺ຕິ ອາວຊ຺ຊນ຺ຕາ ອຕ຺ຕໂນ ສມຓຠາວໍ ປຣິສຸທ຺ຘສີລຕໍ ຌານລາຠິຕໍ ຕສ຺ເສວ ກຸລູປກຠາວຎ຺ຈ ທິສ຺ວາ ‘‘ປຣິສຸທ຺ຘສີລາ ນາມ ຉສຸ ເທວໂລເກສຸ ຍຖາຣຸຈິເຕ ຐາເນ ນິພ຺ພຕ຺ຕນ຺ຕິ, ຌານລາຠິໂນ ພ຺ຣຫ຺ມໂລເກ. ມຍໍ ອຸປຣິເທວໂລເກປິ ພ຺ຣຫ຺ມໂລເກປິ ນິພ຺ພຕ຺ຕິຕຸໍ ນາສກ຺ຂິມ຺ຫ. ອມ຺ຫາກໍ ໂອວາເທ ຐຕ຺ວາ ອຍໍ ອິຕ຺ຖິກາ ອຸປຣິ ນິພ຺ພຕ຺ຕາ, ມຍໍ ຠິກ຺ຂູ ສມານາ ຠຄວຕິ ພ຺ຣຫ຺ມຈຣິຍໍ ຈຣິຕ຺ວາ ຫີເນ ຄນ຺ຘພ຺ພກາເຍ ນິພ຺ພຕ຺ຕາ. ເຕນ ໂນ ອຍໍ ເອວໍ ນິຄ຺ຄຓ຺ຫາຕີ’’ຕິ ຎຕ຺ວາ ຕສ຺ສ ກຖໍ ສຸຓນ຺ຕາເຍວ ເຕສຸ ທ຺ເວ ຊນາ ປຐມຊ຺ຌານສຕິໍ ປຏິລຠິຕ຺ວາ ຌານໍ ປາທກໍ ກຕ຺ວາ ສງ຺ຂາເຣ ສມ຺ມສນ຺ຕາ ອນາຄາມິຜເລເຍວ ປຕິຏ຺ຐຫິໍສຸ. ອຖ ເນສໍ ໂສ ປຣິຕ຺ໂຕ ກາມາວຈຣຕ຺ຕຠາໂວ ຘາເຣຕຸໍ ນາສກ຺ຂິ. ຕສ຺ມາ ຕາວເທວ ຈວິຕ຺ວາ ພ຺ຣຫ຺ມປຸໂຣຫິເຕສຸ ນິພ຺ພຕ຺ຕາ. ໂສ ຈ ເນສໍ ກາໂຍ ຕຕ຺ຖ ຐິຕານໍເຍວ ນິພ຺ພຕ຺ໂຕ. ເຕນ ວຸຕ຺ຕໍ – ‘‘ເຕສໍ, ຠນ຺ເຕ, ໂຄປເກນ ເທວປຸຕ຺ເຕນ ປຏິໂຈທິຕານໍ ທ຺ເວ ເທວາ ທິຏ຺ເຐວ ຘມ຺ເມ ສຕິໍ ປຏິລຠິໍສຸ ກາຍໍ ພ຺ຣຫ຺ມປຸໂຣຫິຕ’’ນ຺ຕິ.

ຕຕ຺ຖ ທິຏ຺ເຐວ ຘມ຺ເມຕິ ຕສ຺ມິຎ຺ເຎວ ອຕ຺ຕຠາເວ ຌານສຕິໍ ປຏິລຠິໍສຸ. ຕຕ຺ເຖວ ຐຕ຺ວາ ຈຸຕາ ປນ ກາຍໍ ພ຺ຣຫ຺ມປຸໂຣຫິຕໍ ພ຺ຣຫ຺ມປຸໂຣຫິຕສຣີຣໍ ປຏິລຠິໍສູຕິ ເອວມຕ຺ໂຖ ທຏ຺ຐພ຺ໂພ. ເອໂກ ປນ ເທໂວຕິ ເອໂກ ເທວປຸຕ຺ໂຕ ນິກນ຺ຕິໍ ຉິນ຺ທິຕຸໍ ອສກ຺ໂກນ຺ໂຕ ກາເມ ອຊ຺ຌວສິ, ຕຕ຺ເຖວ ອາວາສິໂກ ອໂຫສິ.

໓໕໔. ສງ຺ຆຎ຺ຈຸປຏ຺ຐາສິນ຺ຕິ ສງ຺ຆຎ຺ຈ ອຸປຏ຺ຐາສິໍ.

ສຸຘມ຺ມຕາຍາຕິ ຘມ຺ມສ຺ສ ສຸນ຺ທຣຠາເວນ. ຕິທິວູປປນ຺ໂນຕິ ຕິທິເວ ຕິທສປຸເຣ ອຸປປນ຺ໂນ. ຄນ຺ຘພ຺ພກາຍູປຄເຕ ວສີເນຕິ ຄນ຺ຘພ຺ພກາຍໍ ອາວາສິໂກ ຫຸຕ຺ວາ ອຸປຄເຕ. ເຍ ຈ ມຍໍ ປຸພ຺ເພ ມນຸສ຺ສຠູຕາຕິ ເຍ ປຸພ຺ເພ ມນຸສ຺ສຠູຕາ ມຍໍ ອນ຺ເນນ ປາເນນ ອຸປຏ຺ຐຫິມ຺ຫາຕິ ອິມິນາ ສທ຺ຘິໍ ໂຍເຊຕ຺ວາ ອຕ຺ໂຖ ເວທິຕພ຺ໂພ.

ປາທູປສງ຺ຄຍ຺ຫາຕິ ປາເທ ອຸປສງ຺ຄຍ຺ຫ ປາທໂຘວນປາທມກ຺ຂນານຸປ຺ປທາເນນ ປູເຊຕ຺ວາ ເຈວ ວນ຺ທິຕ຺ວາ ຈ. ສເກ ນິເວສເນຕິ ອຕ຺ຕໂນ ຆເຣ. ອິມສ຺ສາປິ ປທສ຺ສ ອຸປຏ຺ຐຫິມ຺ຫາຕິ ອິມິນາວ ສມ຺ພນ຺ໂຘ.

ປຈ຺ຈຕ຺ຕໍ ເວທິຕພ຺ໂພຕິ ອຕ຺ຕນາວ ເວທິຕພ຺ໂພ. ອຣິຍານ ສຸຠາສິຕານີຕິ ຕຸມ຺ເຫຫິ ວຸຈ຺ຈມານານິ ພຸທ຺ຘານໍ ຠຄວນ຺ຕານໍ ສຸຠາສິຕານິ.

ຕຸມ຺ເຫ ປນ ເສຏ຺ຐມຸປາສມານາຕິ ອຸຕ຺ຕມໍ ພຸທ຺ຘໍ ຠຄວນ຺ຕໍ ອຸປາສມານາ ອນຸຕ຺ຕເຣ ພຸທ຺ຘສາສເນ ວາ. ພ຺ຣຫ຺ມຈຣິຍນ຺ຕິ ເສຏ຺ຐຈຣິຍໍ. ຠວຕູປປຕ຺ຕີຕິ ຠວນ຺ຕານໍ ອຸປປຕ຺ຕິ.

ອຄາເຣ ວສໂຕ ມຍ຺ຫນ຺ຕິ ຆຣມຊ຺ເຌ ວສນ຺ຕສ຺ສ ມຍ຺ຫໍ.

ສ຺ວຊ຺ຊາຕິ ໂສ ອຊ຺ຊ. ໂຄຕມສາວເກນາຕິ ອິຘ ໂຄປໂກ ໂຄຕມສາວໂກຕິ ວຸຕ຺ໂຕ. ສເມຈ຺ຈາຕິ ສມາຄນ຺ຕ຺ວາ.

ຫນ຺ທ ວິຍາຍາມ ພ຺ຍາຍາມາຕິ ຫນ຺ທ ອຸຍ຺ຍມາມ ພ຺ຍາຍມາມ. ມາ ໂນ ມຍໍ ປຣເປສ຺ສາ ອຫຸມ຺ຫາຕິ ໂນຕິ ນິປາຕມຕ຺ຕໍ, ມາ ມຍໍ ປຣສ຺ສ ເປສນກາຣກາວ ອຫຸມ຺ຫາຕິ ອຕ຺ໂຖ. ໂຄຕມສາສນານີຕິ ອິຘ ປກຕິຍາ ປຏິວິທ຺ຘໍ ປຐມຊ຺ຌານເມວ ໂຄຕມສາສນານີຕິ ວຸຕ຺ຕໍ, ຕໍ ອນຸສ຺ສຣໍ ອນຸສ຺ສຣິຕ຺ວາຕິ ອຕ຺ໂຖ.

ຈິຕ຺ຕານິ ວິຣາຊຍິຕ຺ວາຕິ ປຎ຺ຈກາມຄຸຓິກຈິຕ຺ຕານິ ວິຣາຊຍິຕ຺ວາ. ກາເມສຸ ອາທີນວນ຺ຕິ ວິກ຺ຂມ຺ຠນວເສນ ປຐມຊ຺ຌາເນນ ກາເມສຸ ອາທີນວໍ ອທ຺ທສໍສຸ, ສມຸຈ຺ເຉທວເສນ ຕຕິຍມຄ຺ເຄນ. ກາມສໍໂຍຊນພນ຺ຘນານີຕິ ກາມສຎ຺ໂຎຊນານິ ຈ ກາມພນ຺ຘນານິ ຈ. ປາປິມໂຍຄານີຕິ ປາປິມໂຕ ມາຣສ຺ສ ໂຍຄຠູຕານິ, ພນ຺ຘນຠູຕານີຕິ ອຕ຺ໂຖ. ທຸຣຈ຺ຈຍານີຕິ ທຸຣຕິກ຺ກມານິ. ສອິນ຺ທາ ເທວາ ສປຊາປຕິກາຕິ ອິນ຺ທໍ ເຊຏ຺ຐກໍ ກຕ຺ວາ ອຸປວິຏ຺ຐາ ສອິນ຺ທາ ປຊາປຕິໍ ເທວຣາຊານໍ ເຊຏ຺ຐກໍ ກຕ຺ວາ ອຸປວິຏ຺ຐາ ສປຊາປຕິກາ. ສຠາຍຸປວິຏ຺ຐາຕິ ສຠາຍໍ ອຸປວິຏ຺ຐາ, ນິສິນ຺ນາຕິ ອຕ຺ໂຖ.

ວີຣາຕິ ສູຣາ. ວິຣາຄາຕິ ວີຕຣາຄາ. ວິຣຊໍ ກໂຣນ຺ຕາຕິ ວິຣຊໍ ອນາຄາມິມຄ຺ຄໍ ກໂຣນ຺ຕາ ອຸປ຺ປາເທນ຺ຕາ. ນາໂຄວ ສນ຺ນານິ ຄຸຓານີຕິ ກາມສຎ຺ໂຎຊນພນ຺ຘນານິ ເຉຕ຺ວາ ເທເວ ຕາວຕິໍເສ ອຕິກ຺ກມິໍສຸ. ສໍເວຄຊາຕສ຺ສາຕິ ຊາຕສໍເວຄສ຺ສ ສກ຺ກສ຺ສ.

ກາມາຠິຠູຕິ ທຸວິຘານມ຺ປິ ກາມານໍ ອຠິຠູ. ສຕິຍາ ວິຫີນາຕິ ຌານສຕິວິຣຫິຕາ.

ຕິຓ຺ຓໍ ເຕສນ຺ຕິ ເຕສຸ ຕີສຸ ຊເນສຸ. ອາວສິເນຕ຺ຖ ເອໂກຕິ ຕຕ຺ຖ ຫີເນ ກາເຍ ເອໂກເຍວ ອາວາສິໂກ ຊາໂຕ. ສມ຺ໂພຘິປຖານຸສາຣິໂນຕິ ອນາຄາມິມຄ຺ຄານຸສາຣິໂນ. ເທເວປິ ຫີເຬນ຺ຕີຕິ ທ຺ເວ ເທວໂລເກ ຫີເຬນ຺ຕາ ອໂຘກໂຣນ຺ຕາ ອຸປຈາຣປ຺ປນາສມາຘີຫິ ສມາຫິຕຕ຺ຕາ ອຕ຺ຕໂນ ປາທປໍສຸໍ ເທວຕານໍ ມຕ຺ຖເກ ໂອກິຣນ຺ຕາ ອາກາເສ ອຸປ຺ປຕິຕ຺ວາ ຄຕາຕິ.

ເອຕາທິສີ ຘມ຺ມປ຺ປກາສເນຕ຺ຖາຕິ ເອຕ຺ຖ ສາສເນ ເອວຣູປາ ຘມ຺ມປ຺ປກາສນາ, ຍາຍ ສາວກາ ເອເຕຫິ ຄຸເຓຫິ ສມນ຺ນາຄຕາ ໂຫນ຺ຕິ. ນ ຕຕ຺ຖ ກິໍ ກງ຺ຂຕິ ໂກຈິ ສາວໂກຕິ ກິໍ ຕຕ຺ຖ ເຕສຸ ສາວເກສຸ ໂກຈິ ເອກສາວໂກປິ ພຸທ຺ຘາທີສຸ ວາ ຈາຕຸທ຺ທິສຠາເວ ວາ ນ ກງ຺ຂຕິ ‘‘ສພ຺ພທິສາສຸ ອສຊ຺ຊມາໂນ ອຄຍ຺ຫມາໂນ ວິຫຣຕີ’’ຕິ. ອິທານິ ຠຄວໂຕ ວຓ຺ຓໍ ຠຓນ຺ໂຕ ‘‘ນິຕິຓ຺ຓໂອຆໍ ວິຈິກິຈ຺ຉຉິນ຺ນໍ, ພຸທ຺ຘໍ ນມສ຺ສາມ ຊິນໍ ຊນິນ຺ທ’’ນ຺ຕິ ອາຫ. ຕຕ຺ຖ ວິຈິກິຈ຺ຉຉິນ຺ນນ຺ຕິ ຉິນ຺ນວິຈິກິຈ຺ຉໍ. ຊນິນ຺ທນ຺ຕິ ສພ຺ພໂລກຸຕ຺ຕມໍ.

ຍໍ ເຕ ຘມ຺ມນ຺ຕິ ຍໍ ຕວ ຘມ຺ມໍ. ອຊ຺ຌຄໍສຸ ເຕຕິ ເຕ ເທວປຸຕ຺ຕາ ອຘິຄຕາ. ກາຍໍ ພ຺ຣຫ຺ມປຸໂຣຫິຕນ຺ຕິ ອມ຺ຫາກໍ ປສ຺ສນ຺ຕານໍເຍວ ພ຺ຣຫ຺ມປຸໂຣຫິຕສຣີຣໍ. ອິທໍ ວຸຕ຺ຕໍ ໂຫຕິ – ຍໍ ຕວ ຘມ຺ມໍ ຊານິຕ຺ວາ ເຕສໍ ຕິຓ຺ຓໍ ຊນານໍ ເຕ ທ຺ເວ ວິເສສຄູ ອມ຺ຫາກໍ ປສ຺ສນ຺ຕານໍເຍວ ກາຍໍ ພ຺ຣຫ຺ມປຸໂຣຫິຕໍ ອຘິຄນ຺ຕ຺ວາ ມຄ຺ຄຜລວິເສສໍ ອຊ຺ຌຄໍສຸ, ມຍມ຺ປິ ຕສ຺ສ ຘມ຺ມສ຺ສ ປຕ຺ຕິຍາ ອາຄຕມ຺ຫາສິ ມາຣິສາຕິ. ອາຄຕມ຺ຫເສຕິ ສມ຺ປຕ຺ຕມ຺ຫ. ກຕາວກາສາ ຠຄວຕາ, ປຎ຺ຫໍ ປຸຈ຺ເຉມຸ ມາຣິສາຕິ ສເຈ ໂນ ຠຄວາ ໂອກາສໍ ກໂຣຕິ, ອຖ ຠຄວຕາ ກຕາວກາສາ ຫຸຕ຺ວາ ປຎ຺ຫໍ, ມາຣິສ, ປຸຈ຺ເຉຍ຺ຍາມາຕິ ອຕ຺ໂຖ.