ຘມ຺ມາທາສຘມ຺ມປຣິຍາຍວຓ຺ຓນາ

໑໕໘. ວິເຫສາຕິ ເຕສໍ ເຕສໍ ຎາຓຄຕິໍ ຎາຓູປປຕ຺ຕິໍ ຎາຓາຠິສມ຺ປຣາຍໍ ໂອໂລເກນ຺ຕສ຺ສ ກາຍກິລມໂຖວ ເອສ, ອານນ຺ທ, ຕຖາຄຕສ຺ສາຕິ ທີເປຕິ, ຈິຕ຺ຕວິເຫສາ ປນ ພຸທ຺ຘານໍ ນຕ຺ຖິ. ຘມ຺ມາທາສນ຺ຕິ ຘມ຺ມມຍໍ ອາທາສໍ. ເຍນາຕິ ເຍນ ຘມ຺ມາທາເສນ ສມນ຺ນາຄໂຕ. ຂີຓາປາຍທຸຄ຺ຄຕິວິນິປາໂຕຕິ ອິທໍ ນິຣຍາທີນໍເຍວ ເວວຈນວເສນ ວຸຕ຺ຕໍ. ນິຣຍາທໂຍ ຫິ ວຑ຺ຒິສງ຺ຂາຕໂຕ ອຍໂຕ ອເປຕຕ຺ຕາ ອປາຍາ. ທຸກ຺ຂສ຺ສ ຄຕິ ປຏິສຣຓນ຺ຕິ ທຸຄ຺ຄຕິ. ເຍ ທຸກ຺ກຏກາຣິໂນ, ເຕ ເອຕ຺ຖ ວິວສາ ນິປຕນ຺ຕີຕິ ວິນິປາຕາ.

ອເວຈ຺ຈປ຺ປສາເທນາຕິ ພຸທ຺ຘຄຸຓານໍ ຍຖາຠູຕໂຕ ຎາຕຕ຺ຕາ ອຈເລນ ອຈ຺ຈຸເຕນ ປສາເທນ. ອຸປຣິ ປທທ຺ວເຍປິ ເອເສວ ນໂຍ. ອິຕິປິ ໂສ ຠຄວາຕິອາທີນໍ ປນ ວິຕ຺ຖາໂຣ ວິສຸທ຺ຘິມຄ຺ເຄ ວຸຕ຺ໂຕ.

ອຣິຍກນ຺ເຕຫີຕິ ອຣິຍານໍ ກນ຺ເຕຫິ ປິເຍຫິ ມນາເປຫິ. ປຎ຺ຈ ສີລານິ ຫິ ອຣິຍສາວການໍ ກນ຺ຕານິ ໂຫນ຺ຕິ, ຠວນ຺ຕເຣປິ ອວິຊຫິຕພ຺ພໂຕ. ຕານິ ສນ຺ຘາເຍຕໍ ວຸຕ຺ຕໍ. ສພ຺ໂພປິ ປເນຕ຺ຖ ສໍວໂຣ ລພ຺ຠຕິເຍວ.

ໂສຕາປນ຺ໂນຫມສ຺ມີຕິ ອິທໍ ເທສນາສີສເມວ. ສກທາຄາມິອາທໂຍປິ ປນ ສກທາຄາມີຫມສ຺ມີຕິອາທິນາ ນເຍນ ພ຺ຍາກໂຣນ຺ຕິ ເຍວາຕິ. ສພ຺ເພສມ຺ປິ ຫິ ສິກ຺ຂາປທາວິໂຣເຘນ ຍຸຕ຺ຕຏ຺ຐາເນ ພ຺ຍາກຣຓໍ ອນຸຎ຺ຎາຕເມວ ໂຫຕິ.